Ndlela yo vuna lava va kalako va nga seva ka xiyimo xo amukela bhuku A Biblia Gi Gonzisako
1. Xana a vanhu vontlhe va ta tekela ku gi tsakela a bhuku A Biblia Gi Gonzisako? Tlhamusela.
1 Kasi a munhu ava mukhozeli wa Jehova i fanele ku tiva lezi a Biblia gi zi gonzisako. Hambulezo, ku na ni vanhu va lumbako wukhongeli gi nga hiko ga wuKristu lava va nga woniko Biblia kota Mhaka ya Nungungulu. A vanwani a va kholwi ka Nungungulu niku a va na xichawo hi Biblia. Makunu-ke, zilo muni zi tolovelako ku vuna vanhu lava a kusanguleni va nga byekeleliko ku amukela a bhuku A Biblia Gi Gonzisako ke? A mawonela lawa ma lanzelako ma wulilwe hi vamakabye va xipimo xa 20 wa matiko yo hambana.
2. Loku a munhu aku a nga kholwi ka Nungungulu, zini hi faneleko ku ti karatela ku zi tiva, niku hikuyini?
2 Lava va nga kholwiko ka Nungungulu: Loku a munhu aku a nga kholwi ka Nungungulu, zi nene a ku zama ku tiva xigelo xa kona. Xana o kholwa ka evolusawu? I luzile kukholwa kakwe ka Nungungulu hi kota ya wubihi tikweni legi kutani wufarisi ga wukhongeli ke? Xana ota hi ka tiko zi beletelwako ku kholwa ka Nungungulu? Kuzilava a nga womelelangi ka mawonela ya lezaku Nungungulu a nga kona; kova lezaku a nga se tshuka a wona xilaveko xa ku kholwa ku i kona. A vahuweleli vo tala va polile lezaku a xiwutiso lexi xi nge, “Kale na u hi ni mawonela lawo ke?” xi kuca munhu loye a kuva a tlhamusela. Demba ndleve u ingisela; u nga mu tsemarisi. Loku hi zwisisa a ku hikuyini a munhu loye a kalako a nga kholwi ka Nungungulu, hi ta tiva a ndlela ya ku mu hlamula ni bhuku ga ku mu nyika. — Mav. 18:13.
3. Hi nga kombisisa kuyini xichawo ka munhu zinwe ni kukholwa kakwe?
3 A xikhati lexi u mu hlamulako, ti wonele ku a magezu ya wena ma wonekisa ku khwatsi wo vukela a mawonela yakwe. Wona a mawonela lawa ma lanzelako ma tileko hi Estados Unidos: “Za lisima a ku kombisa xichawo a kutlhatlheka ka munhu ka kuva a ti mahela xiboho xa lezi a lavako ku kholwa zona. Wutshanwini ga ku ti karatela ku mu kona, i chukwana ku maha ziwutiso lezi zi to mu maha a alakanyisisa ni ku chikelela magumo yakwe ha yece.” Anzhako ka kuva a nwinyi wa muti a ti phofulile, a muwoneleli wo kari wa muganga i tolovela ku mu hlamula hi xiwutiso lexi: “U tshuka u ehleketa hi lezi?”
4. Hi nga va vunisa kuyini a vaBhuda ke?
4 Ka vaBhuda vo tala, a ku na Nungungulu. A vahuweleli vo kari le Grã-Bretanya va ranza ku tirisa a broxura Como Ter Verdadeira Paz e Felicidade loku va xumayela vanhu lavo. Anzhako ka kuva va mahile xingheniso, va wulawula hi xipanze “Existe realmente um Criador supremo?” va gumesa va wulawula hi xipanze “Um guia prático para beneficiar toda a humanidade.” Anzhako ka lezo, va nga ha humesa a bhuku A Biblia Gi Gonzisako va tlhela va mu byela lezi: “Hambu loku u nga kholwi ka Nungungulu, a ku gonza Biblia za vuna nguvu hakuva gi na ni zileletelo zi vunako nguvu.” A phayona go kari le Estados Unidos gi tirako ka xipanze xa vaChina gi te ngalo: “A votala xipanzeni xa hina va zi ranza nguvu ku lera. Hikwalaho va tolovela ku lera bhuku gontlhe na hi nga se va tlhelela. Kanilezi, va nga tshuka va nga zi zwisisi loku hi wulawula hi xigonzo xa Biblia. Hikwalaho nzi ranza ku va nyika a broxura Mahungu yo Saseka ka lienzo lo sangula hakuva gi tsalilwe hi ndlela yi kucako mabhulo.” A muwoneleli wo kari wa xipanze a enzelako mabandla ya xiChina le Estados Unidos i bika lezaku za koteka ku tirisa bhuku A Biblia Gi Gonzisako ka lienzo lo sangula. Kanilezi, zi ngava zi nene a ku sangula xigonzo hi xipimo xa wumbiri, lexi xi kongomisako munhu ka Biblia, wutshanwini ga ku tirisa xipimo xo sangula xi wulawulako hi Nungungulu.
5. Hikuyini zi nga za lisima a kuva ni lihlaza-mbilu?
5 Zi teka xikhati xo leha lezaku a munhu ava ni kukholwa ko tiya ka Nungungulu, hikwalaho ku laveka lihlaza-mbilu. Ka masiku yo sangula hi nga tshuka hi nga zi koti ku maha munhu a kholwa lezaku ku na ni Muvangi. Kanilezi, hi kufamba ka xikhati a nga ha vumela lezaku za koteka a ku ngha a hi kona, kutani a nga ha wula lezaku makunu wa zwisisa a ku hikuyini a vanwani va kholwako lezaku i kona.
6. Zini zi mahako vanhu vo kari va nga khatali hi Biblia?
6 Lava va kalako va nga khatali hi Biblia kutani va kalako ku gi tsumba: Hambulezo, a kutala ka zikhati a munhu a nga ha vumela lezaku Nungungulu i kona, kanilezi a nga khatali hi lezi a Biblia gi zi gonzisako hi ku kala a nga kholwi lezaku i Mhaka ya Nungungulu. Kuzilava i hanya ka tiko ku nga hiko na wuKristu, hikwalaho i alakanya lezaku a Biblia gi fambisana ni wuKristu ga mawunwa. Kutani ku ngha a hanya ka tiko gi tiviwako kota tiko ga wuKristu, kanilezi na vanhu va kona va nga khatali hi wukhongeli, hikwalaho i alakanya lezaku a Biblia a gi nge mu vuni. Hi nga va vunisa kuyini a vanhu va matshamela lawo lezaku va tsakela Biblia va tlhela va vumela xigonzo xa Biblia hi bhuku A Biblia Gi Gonzisako ke?
7. Yi tolovela kuva yihi a ndlela ya yi nene ya ku vuna munhu a kuva a tsakela Biblia?
7 A hofisa ya ravi le Grekia yi tsalile lezi: “A ndlela ya yi nene ya ku vuna vanhu va kalako va nga khatali hi Biblia ku gi vulula ntsena hi va komba lezi gi zi wulako. A vahuweleli vo tala va polile lezaku a mahungu ya Biblia ma khumba nguvu mbilu ya munhu ku hunza ni xihi lexi vona wutsumbu va nga xi wulako. (Maheb. 4:12) A ku wona vito ga Nungungulu lomu ka Biblia zi vuna vanhu vo tala a kuva va navela ku tiva zinwani lomu ka Biblia.” A hofisa ya ravi le Índia yi tsalile lezi: “A lisine xungetano hi wutomi ni kufa la khumba vaHindu vo tala hakunene. Zi tano kambe ni xitsumbiso xa Biblia xa misava yi nga hiko na xihlawulela.” A ku wulawula hi lezi zi karatako vanhu xipanzeni xabye zi tala ku vulula ndlela ya ku a vahuweleli va komba lezi a Biblia gi nge ngalo a Mufumo wa Nungungulu wu ta zi maha kasi ku lulamisa zikarato lezo.
8. Hi nga kuyini ka lava va chepetako Biblia hi kota ya wuKristu ga mawunwa ke?
8 Loku a wokari a chepeta Biblia hi kota ya wuKristu ga mawunwa, mu tlhamusele lezaku a wuKristu ga mawunwa go chakisa a Biblia ni lezi gi zi gonzisako. A hofisa ya ravi le Índia yi tsalile lezi: “Ka zikhati zinwani hi fanele ku vuna vanhu lezaku va wona ku a tichechi a ti yimeli Biblia.” Yi bika lezaku a vaHindu va tolovela ku khumbiwa nguvu hi xipanze 4 xa broxura Qual É o Objetivo da Vida? Como Encontrá-lo?, legi gi tlhamuselako lezi a tichechi ti zamisileko zona ku chakisa ni ku fuvisa a Mhaka ya Nungungulu. A phayona go kari le Brasil gi tolovela ku wula lezi ka vanhu: “A hi chukwana u zama ku tiva khwatsi lezi a Biblia gi wulawulako hi zona? A vanhu vo tala va maha lezo na va tlhatlhekile, na va nga kurumeteki ku lumba wukhongeli go kari. U nga tshuka u hlamala hi lezi u to zi gonza.”
9. Hikuyini hi nga faneliko ku tsukula loku a wokari a nga tekeli ku zi tsakela lezi a Biblia gi zi gonzisako?
9 Jehova i wona mbilu ya munhu munwe ni munwani. (1 Sam. 16:7; Mav. 21:2) I kokela vanhu va timbilu ti nene wukhozelini ga lisine. (Joh. 6:44) A kutala ka vanhu lavo a va se tshuka va gonzisiwa nchumu xungetano hi Nungungulu kutani ku gonzisiwa Biblia. A wutireli ga hina gi va vululela ndlela ya kuva ‘va hanyiswa, vava ni kutiva ka lisine.’ (1 Tim. 2:4) Hikwalaho, loku a vokari va nga tekeli ku zi tsakela lezi a Biblia gi zi gonzisako, u nga tsukuli! Tirisa ginwe ga mabhuku ma nga kona kasi ku vuxa kutsakela kabye. Hi magumo, u nga ha zi kota ku cica a bhuku lego, u teka legi gi nga gona xitiro-tshinya xa ku fambisa zigonzo za Biblia, ku nga bhuku Zini Lezi A Biblia Gi Zi Gonzisako Hakunene?
[Tlhamuselo wa mifota ka phajina 4]
Loku a nwinyi wa muti aku a nga kholwi ka Nungungulu, ringisa lezi:
• Mu wutise uku: “Kale na u hi ni mawonela lawo ke?” kasi ku tiva lexi xi mu mahako a nga kholwi.
• Loku a hi muBhuda, tirisa a broxura Como Ter Verdadeira Paz e Felicidade, maphajina 9-12.
• Loku a hi munhu a kholwako ka evolusawu, a mahungu lawa ma lanzelako ma nga ha vuna:
Tinzima ta Despertai! leti ti nge “Teve um Projeto?”
Vidiyu As Maravilhas da Criação Revelam a Glória de Deus
Mabroxura Como Ter uma Vida Satisfatória, xipanze 4; A Vida — Teve um Criador?; ni A Origem da Vida — Cinco Perguntas Que Merecem Resposta
• Loku ku hi wubihi ni kuxaniseka zi nga mu maha a nga ha kholwi ka Nungungulu, a nga ha vuniwa hi timhaka leti ti lanzelako:
Bhuku Existe um Criador Que Se Importa com Você?, xipimo 10
Mabroxura Xana Nungungulu Wa Hi Khatalela Hakunene?, xipanze 6, ni Qual É o Objetivo da Vida?, xipanze 6
• Cica u tirisa bhuku A Biblia Gi Gonzisako neti a nwinyi wa muti a sangula ku vumela lezaku Nungungulu i kona. Zi ngava zi nene ku sangula hi xipimo 2 kutani mhaka yinwani yi mu ringanako.
[Tlhamuselo wa mifota ka phajina 5]
Loku a nwinyi wa muti a nga kholwi ka Biblia, ringisa lezi:
• Bhula naye hi zipimo 17 ni 18 za bhuku A Vida — Qual a Sua Origem? A Evolução ou a Criação?
• Ka vaHindu, tirisa broxura Por Que Devemos Adorar a Deus com Amor e Verdade?
• Ka vaJuda, tirisa broxura Haverá Algum Dia um Mundo sem Guerra?, maphajina 3-11.
• Mu kombe a xivuno xa ku hanya hi matshinya ya milayo ya Biblia. Kasi ku maha lezo, u nga ha tirisa a mabhuku lawa ma lanzelako:
Tinzima ta Despertai! leti ti nge “Ajuda para a Família”
Vidiyu A Bíblia: O Poder Dela na Sua Vida
Mabroxura Mahungu yo Saseka ya Nungungulu!, zigonzo 9 ni 11; Um Livro Para Todas as Pessoas, maphajina 22-26; ni Como Ter uma Vida Satisfatória, xipanze 2
Ka vaBhuda, tirisa broxura O Caminho para a Paz e Felicidade, maphajina 3-7.
Ka vaMwinyi, tirisa broxura Verdadeira Fé — O Segredo de uma Vida Feliz, xipanze 3.
Loku u tira ka xipanze lexi a vanhu va vengako a Biblia, zi ngava chukwana a ku kala u nga wuli lomu a magezu lawo ya wutlhari ma susiwako kona kala nzhako ka masiku yo tala na u mu enzela.
• Tlhamusela lezi a ziprofeto za Biblia zi tatisekisako zona. U nga ha tirisa mabhuku lawa:
Vidiyu A Bíblia — História Exata, Profecias Confiáveis
Broxura Um Livro Para Todas as Pessoas, maphajina 27-29
• Cica, u tirisa bhuku A Biblia Gi Gonzisako neti a munhu loye a wutisa lezi a Biblia gi zi gonzisako ka timhaka to hambanahambana.
[Tlhamuselo wa mifota ka phajina 6]
Loku a nwinyi wa muti aku: “A nzi kholwi ka Nungungulu,” u nga haku:
• “Nzi nga ku tlhamusela kutsongwani lexi xi nga nzi maha nzi kholwa lezaku ku na ni Muvangi?” Hi kulanzela mu bhulele timhaka ta bhuku Ku Hlamulana, maphajina 212-213, kutani ku maha malulamiselo kasi ku mu wuyela ni bhuku gi nga ku tsakisa nguvu a ku gi lera.
• “Kanilezi loku Nungungulu i wa hi kona, u wa ta tsakela ku ava wo tshamisa kuyini?” A vanhu vo tala va hlamula lezaku va tsakela Nungungulu wa liranzo, wo lulama ni wa wuxinji, loyi a nga hiko na xihlawulela. Mu kombe lomu ka Biblia lezaku Nungungulu i nawo matshamela lawo. (Zi nga ha koteka kambe ku tirisa a xipimo 1 xa bhuku A Biblia Gi Gonzisako, kusukela ka nzimana 6.)
Loku a nwinyi wa muti aku: “A nzi kholwi ka Biblia,” u nga ha wula lezi:
• “A hi wena wece; va tele va nga ni mawonela lawo. A vokari ve ngalo a Biblia a gi zi tivi za siensia kutani ku a matshinya ya milayo ya Biblia a ma vuni nchumu. Hi nga nzi byela, u tshuka u lera a Biblia? [Rinzela hlamulo, zonake u mu komba a xingheniso xi nga ka phajina 3 ga broxura Um Livro Para Todas as Pessoas, u tlhela u mu nyika broxura lego.] A votala va chipisa Biblia hi kota ya lezi a wukhongeli gi chakisako a tigonzo ta gona. Nzi wa tsakela ku wuya siku ginwani hi ta bhula hi xikombiso xinwe ka maphajina 4 ni 5.”
• “Ku na ni vanhu vo tala va nga ni mawonela lawa. Nzi nga ku komba nchumu wu nzi hlamalisako nguvu lomu ka Biblia? [Gonza Joba 26:7 kutani Isaya 40:22, ma nga mabhuku ma kombako lezaku a Biblia gi na ni mahungu ya lisine ya siensia.] A Biblia gi na ni timhaka ta wutlhari kasi ku vuna mingango. Nzi tsakela ku wuya nzi ta ku komba xikombiso xinwe xa timhaka leto.”
• “Nzi bongile ku tiva mhaka leyi. Hi mawonela ya wena, loku gi wova kona a bhuku gi tsalelweko vanhu hi Nungungulu, gi wa tava ni mahungu yo tshamisa kuyini?” Hi kulanzela, mu kombe mahungu yo kari lomu ka Biblia ma zwananako ni lezi a nga zi wula.