Engetela wutlhari ga wena wutirelini — Sangula xigonzo xa Biblia ni munhu a nga ni xikhati xitsongwani hi broxura Mahungu yo Saseka ya Nungungulu!

Hikuyini zi nga za lisima? Kasi ku maha vapizani, hi fanele kuva vagonzisi va Mhaka ya Nungungulu. (Mat. 28:19, 20) Hontlheni hi nga gonzisa khwatsi lisine hi ku tirisa a zitiro lezi hi sinako hi hi nazo. A broxura Mahungu yo Saseka ya Nungungulu! gi mahelwe ku hi vuna ku gonzisa vanwani a lisine. Kunene, hi nga gi tirisa kasi ku sangula xigonzo xa Biblia ni nwinyi wa muti ka lienzo lo sangula kwalaha hi mu kumako na a yimile kona.

Mamahela ya kona:

• Vuxeta a xingheniso lexi xi nga ka kwadru. — Wona kambe a Wutireli ga hina ga Mufumo ga Março wa 2013.

• Fambafamba ni broxura ga wena lomu ka paxta ya ntiro wa simu. Tiyiseka lezaku u na ni mabroxura yo enela kasi ku nyikela.

• Kambisisani a nzimana yinwe kutani timbiri hi khume ga timeneti kuya hasi.

Ka hweti leyi, ringisa lezi:

• Khongelela kuxuva ka ku fambisa xigonzo xa Biblia. Kombela Jehova kambe lezaku a ku vuna ku sangula xigonzo xa Biblia ni kuva mugonzisi wa lisine a bhinzulako. — Fil. 2:13.

• Wukhozelini ga nwina ga ngango kutani ka xigonzo xa munhu wutsumbu, ti nyike xikhati xa ku nameka a xingheniso mbilwini ya wena. Hi ndlela leyo, u ta zi kota ku wulawula hi ku tiya u tlhela u sangula a xigonzo xa Biblia wutirelini ga wena.

[Kwadru ka phajina 1]

A xikhati u fambako hi muti ni muti:

“Nzi ku enzela hakuva a vanhu vo tala va karateka va lava ku tiva lezaku a tiko legi gi hi yisa kwihi. U alakanya ku a matshamela ya gona ma ta tshuka ma chukwata? [Rinzela hlamulo.] A vanhu vo tala va hlamala hi ku tiva lezaku a Biblia gi na mahungu yo saseka lawa ma nga hi nyikako kutsumba. Wona a ziwutiso lezi a Biblia gi zi hlamulako.” Nyika broxura a nwinyi wa muti, u mu kombela ku hlawula a xiwutiso lexi xi mu tsakisako nguvu le nzhako ka broxura. Hi kulanzela, vulula a xigonzo lexo, u mu komba a magonzela ya kona. Maha malulamiselo ya kuva u tlhela mu ya kambisisa a xiwutiso xi lanzelako ka xigonzo lexo.