Xaxamelo Wuswa Wo Sangula Hi Wona A Zigonzo Za Biblia

1. Hi wihi a xaxamelo wuswa wu tota ka A Sentinela ga vanhu vontlhe, niku wu mahelwe yini?

¹ Kusukela hweti yi tako, ku tava ni xaxamelo wuswa wa tinzima ka A Sentinela ga vanhu vontlhe wu to hi vuna ku sangula a zigonzo za Biblia. Wu na ni hloko ya mhaka “Aprenda da Palavra de Deus” (Gonza Ka Mhaka Ya Nungungulu). Hambu lezi a vokari lomu xipanzeni handle ko kanakana va to tsakela ku lera a nzima yinwe ni yinwani ya xaxamelo lowu, hi lisine la kona a tinzima leti ti mahelwe ku bhulisana hi tona ni nwinyi wa muti.

2. Hi wahi a matshamela yo kari ya tinzima leti?

² Matshamela Ya Xaxamelo Lowu: A hloko ya mhaka ni zihlokwana za mhaka zita kota ziwutiso zi faneleko ku wutisiwa a nwinyi wa muti kubhulisaneni. A mitsalo-tshinya yo kumbukiwa, a yi tshahiwi, kasi a nwinyi wa muti a ti gonzela ha yece lomu ka Mhaka ya Nungungulu. A tinzimana ti komile kasi zi olova a ku ti kambisisa zalezo u sangulako ku wulawula ni nwinyi wa muti. A tinzima tontlhe ti nyiketa ka bhuku A Biblia Gi Gonzisako kasi zi ku vuna a ku tlhavinyeta a xigonzo ka bhuku legi loku zi fanela.

3. A xikhati lexi hi tirako hi muti ni muti, xana hi nga wu tirisisa kuyini a xaxamelo lowu lezaku hi sangula a xigonzo xa Biblia zalezo hi sangulako ku wulawula ni nwinyi wa muti?

³ Ndlela Yo Wu Tirisa: A xikhati lexi u nyikelako a marevista u nga ha maha a xiwutiso xi vuxako kutsakela xungetano hi mhaka yo kari ka nzima. Hi xikombiso, A Sentinela ga 1 ka Janeiro gi wulawula hi lisima la Biblia. Wa zi kota ku wutisa lezi: “Hi mawonela ya wena, xana a Biblia i Mhaka ya Nungungulu kutani gova bhuku ga gi nene ntsena? [Rinzela hlamulo.] Nzi na ni nchumu wo tsakisa xungetano hi mhaka leyi.” Maha a xiwutiso xo sangula, u gonza a nzimana yo sangula u tlhela u vulula a mutsalo lowu wu kumbukilweko. Tlhela u lera a xiwutiso zonake u mu kombela lezaku a tlhamusela zo kari. Bhula naye hi mahungu wontlhe ma faneleko, na u tirisa a ziwutiso zi xaxametilweko hi tinombora kota timhaka-tshinya ta bhulo. Na u nga se suka, mu kombe a xiwutiso xa nombora yi lanzelako u tlhela u boha siku go tiya ga ku ta bhulisana hi xona. Zama a ku mu tlhelela kasi mu ya gonza zo engeteleka ka nzima leyo viki ni viki kala u mu fambela ni revista gi lanzelako. A mahela ginwani ku maha xingheniso xo kongoma, u tekela ku sangula a xigonzo xa Biblia ni nwinyi wa muti. Zonake tirisa a nzima yi nga ka revista kasi ku kombisa a mahela ga xigonzo.

4. Hi nga ti tirisisa kuyini a tinzima leti a xikhati lexi hi mahako a maenzo yo wuyela?

⁴ Wa zi kota kambe a ku tirisa khwatsi a xaxamelo lowu wa wuswa ka vanhu lava u va nyikako marevista ni ka manwani maenzo yo wuyela. U nga ha wula lezi: “Ku na ni hloko ya mhaka ya yiswa lomu ka A Sentinela. Khwatsi nzi ku komba a magonzela ya yona.” Hi khongelela lezaku a xaxamelo lowu wa wuswa wa tinzima wu vuna vanhu vo tala lezaku “vava ni kutiva ka zinene.” — 1 Tim. 2:4.