Nzima yi vunako nguvu wutirelini ga hina
1. Hi wahi a makungo mambiri ya nzima “Mabhulo ni muakelane”?
1 Zikhati ni zikhati A Murinzeli wa vanhu vontlhe i huma na a hi ni nzima leyi, “Mabhulo ni muakelane.” A nzima leyi yi na ni makungo mambiri — ku tlhamusela a tigonzo ta Biblia hi ndlela yo tsakisa ni ku hi komba lezi hi nga tlhamuselisako zona a gonzo yo kari hi ndlela ya xichawo. (1 Ped. 3:15) Hi nga ti tirisisa kuyini a tihloko ta mhaka leto ke?
2. Hi nga ti tirisisa kuyini a tihloko ta mhaka ta nzima leyi wutirelini ga hina?
2 Yi tirise wutirelini: U nga ha hlayisa A Murinzeli munwe a nga ni hloko ya mhaka yo kari ya nzima leyi. Loku a nwinyi wa muti, mutsakeli, kutani xigonzani xa Biblia a hi tsema bhulo kutani ku hi maha xiwutiso xi tshukileko xi tlhamuselwa ka yinwe ya tinzima leti, mu nyiki A Murinzeli a nga ni mhaka leyo zonake mu bhula hi yona. Loku u nga hi nago a revista lego, kuzilava u nga maha a download ka jw.org.
3. Hi nga bhulisanisa kuyini ni munhu hi ku tirisa a yinwe ya tihloko ta mhaka ta nzima leyi?
3 U nga bhulisanisa kuyini ni munhu hi ku tirisa a yinwe ya tihloko ta mhaka leto ke? A vahuweleli vo kari va tolovela ku kombela nwinyi wa muti lezaku a lera magezu ya muakelane hi gezu go tlakuka vona na va lera a magezu ya Mboni. A ku bhulisana ni munhu hi ku tirisa a revista gi gandlilweko zi nene hakuva zi vuna munhu a ku hlola tigonzo ta hina na a tlhatlhekile. — Deut. 32:2.
4. Hi nga ti tirisisa kuyini a tihloko ta mhaka ta nzima leyi kasi ku ti gonzisa?
4 Ti gonzise u tlhela u gonzisa vanwani: A xikhati lexi u gonzako tihloko ta mhaka leti, zwisisa khwatsi a mitsalo, mifananiso, ni mongo wa mitlhamuselo leyo. Ti karatele ku zwisisa khwatsi lezi a mhaka leyo yi tlhamuseliswako zona. Zonake u zama ku mahisa lezo loku u hi wutirelini. (Mav. 1:5; 9:9) A makabye wo kari wa xisati i wulile lezi: “A ku gonza a tihloko ta mhaka leti zi fana ni ku gonza ka munghana a nga phayona gi ‘mbheleleko’ — loyi xontlhe xikhati a tivako lezi zi faneleko ku wuliwa!”
5. Hi nga zi vunisa kuyini a zigonzani za hina za Biblia lezaku zi tiva ku xumayela ke?
5 A mabhulo lawo ma tsalilweko u nga ma tirisa kambe kasi u vuna zigonzani za wena za Biblia lezaku zi tiva ku xumayela. Gonzani zinwe a mahungu lawo, a xigonzani na xi yimela muhuweleli. A ku maha lezo, zi ta vuna zigonzani za Biblia lezaku zi zi kota ku tlhamusela a kukholwa ka zona hi ndlela yi kombisako xichawo. (Kol. 4:6) Hakunene, a tihloko ta mhaka leto yinwe ya tindlela to tala leti Jehova a hi vunako hi tona a ku maha khwatsi a ntiro wa hina wa kuxumayela. — 2 Tim. 4:5.