Wa Gi Tirisa Khwatsi Ke?

¹ “A nza ha hlweli. Nzo ya gi nyikela sinwini zalezi!” Ku tsalile a makabye wo kari wa xisati anzhako ka kugonza A Sentinela ga 1 ka Janeiro wa 2008. Wa tshuka u kambisisa a to kari ta tinzima ti humako hi kukhanzakanya ka revista ga vanhu vontlhe, u tlhela u pola tindlela ta ku tirisa khwatsi a tinzima leto wutirelini ga wena ga simu?

² “O Que Aprendemos de Jesus” (Lezi Hi Zi Gonzako Ka Jesu): Kuzilava u wonile lezaku a nzima leyi ya vuna a ku sangula a zigonzo za Biblia. Loku ku hi lezaku a wu se zi maha, zama ku gonzela a nwinyi wa muti a hloko ya mhaka ya nzima zonake u yisa kupima ka lezi Jesu a nga zi wula xungetano hi mhaka leyo, kota lezi zi hlawutelwako ka nzimana yo sangula. A xikhati lexi a munhu a sangulako ku kombisa kutsakela, ti karatele ku yisa bhulo mahlweni hi ku tirisa a zihlokwana za mhaka, lezi zi tsalilweko kota ziwutiso zi tlhotlhako maalakanyo. Kombela a munhu loye lezaku a wula xo kari xungetano hi mhaka leyo. Hi kukomisa, tlhamusela a mifananiso yi yelanako ni lezo zonake uya ka nzimana yi lanzelako. Wa zi kota ku wulawula hi khihlanya go sangula ga nzima ka lienzo lo sangula zonake u wulawula hi khihlanya ga wumbiri loku u mu wuyela. Ti longisele kuya mahlweni ni xigonzo hi bhuku A Biblia Gi Gonzisako.

³ “Como Ter uma Família Feliz” (Tindlela To Kuma Litsako Ngangweni): A xaxameto lowu wu humako a khati ni khati ku hunzako tihweti tinharu, wu mahelwe ku vuna a vanuna, vasati, ni vapswali lezaku va wona tindlela to tirisa a matshinya ya milayo ya Biblia a xikhati lexi va yimisanako ni zikarato lezi zi vekako mhangweni a kurula ka ngango. Wa zi kota kambe a ku tirisa a tinzima leto kasi ku vuna lava va nga hiko Timboni lezaku va wona a wutlhari gi kumekako ka Biblia. — 2 Tim. 3:16, 17.

⁴ Tinzima Ta Vanhu Vaswa: A xaxameto wu nge ngalo “Para os Jovens” (Ka Vanhu Vaswa) wu na ni kanelo wa kubhulisana wu zi kotako ku tiriswa kasi ku gonza a tlhatlhambutelo wo kari wa Biblia. Wa zi kota ku tirisa a tinzima leti kasi ku vuna a vanhu vaswa lava u va kumako wutirelini ga wena lezaku va wona a xivuno xa lisine xa ku gonza a Mhaka ya Nungungulu. (Tis. 119:9, 105) A xikhati lexi u wulawulako ni vapswali, u nga ha khanyisa a xaxameto “Ensine Seus Filhos” (Gonzisa Vana Va Wena), lowu wu humako khati ni khati ku hunzako tihweti timbiri. A tinzima leti ti nga vuna a vana lava va ha hiko vaswa lezaku va kuma zigonzo za lisima ka matimu ya vanhu va lomu ka Biblia. Xana wa tshuka u ti nyika xikhati xa ku lera a tinzima leti ni vana va wena?

⁵ Tinzima Tinwani: Ka hweti ni hweti, a nzima “Nossos Leitores Perguntam” (A Vagonzi Va Wutisa) yi kambisisa a xiwutiso lexi lava va nga hiko Timboni va byekelelako ku xi maha. U nga ha dlunyatisa a nzima leyi a xikhati lexi u nyikelako a marevista hi muti-ni-muti. A xaxameto “Uma Carta de . . . ” (Papilo Gi Tako Hi . . . ) mubiko wo hanya wa matshango ya munhu wu kombako a zikarato lezi a varumiwa zinwe ni vanwani va yimisanako nazo kutatiseni ka wutireli gabye. A tinzima leti ti nga vuna a vanhu lava va kombisako kutsakela a ku wona lezaku a mahungu yo saseka ma kari ma xumayelwa misaveni yontlhe kota kutatiseka ka xiwoniso xa kuvakona ka Kristu. — Mat. 24:3, 14.

⁶ A nzima ya hweti ni hweti yi nge “Achegue-se a Deus” (Tshinela Ka Nungungulu), yi seketelwako ka kugonza ka Biblia ka Xikola xa Wutireli ga Nungungulu, yi nga kuca vanhu va timbilu ti nene lezaku va xuva ku gonza zinwani xungetano hi Jehova. A xaxameto “Imite a Sua Fé” (Pimanyisa A Kukholwa Kabye), wu humako mune wa makhati hi lembe, wu mahelwe ku vuna vanhu kasi va wona a mitlhatlhambutelo ya Biblia hi mahlo ya maalakanyo, wu maha lezaku a matimu ya vanhu va lomu ka Biblia — a kuhlawula kabye, zikarato zabye, kukholwa kabye — ma tiviwa hi vagonzi va xikhati lexi.

⁷ A hi kutsaka hi nga nako hi kuva a hweti ni hweti hi amukela a revista A Sentinela gi mahelweko ku tiriswa sinwini! Hi tindlela tontlhe, ngha hi tiva zontlhe zi nga nzeni ka gona hi kumbhelela hi tlhela hi gi tirisa khwatsi wutirelini ga hina.