A Tshamela Ga Lisima Nguvu Ka Wontlhe Matshamela Ya Mugonzisi Mu Nene
1. Hi gihi a tshamela ga lisima nguvu ka wontlhe matshamela ya mugonzisi mu nene?
1 Xini xi vunako munhu a kuva mugonzisi wa mu nene wa Biblia? I gonziselelo ya tiko? Wukale? Wuzikoti ga mabeleko? A lisine hi lezaku a tshamela lego hi galegi a Nayo wu hlengeletelweko ka gona, legi gi tivekisako a vapizani va Jesu, gi tlhela gihi gona ga hombe ni go tsakisa nguvu ka wontlhe a matshamela ya lisima ya Jehova. (Joh. 13:35; Gal. 5:14; 1 Joh 4:8) Liranzo. A vagonzisi va va nene va kombisa liranzo.
2. Hikuyini zi nga za lisima a ku ranza vanhu?
2 Ranza Vanhu: Jesu, a Mugonzisi wa Hombe, i kombisile liranzo hi vanhu, niku lezo zi va kucile a ku mu ingisela. (Luka 5:12, 13; Joh. 13:1; 15:13) Loku hi khatala hi vanhu, hi ta kustumunya ni ka xihi xikhati xi mahekako. A zihingakanyiso zo kota kuxaniswa kutani a kungakhatali ka vanhu zi nga ta hi valela ku kustumunya. Hi ta kombisa kukhatala ka lisine hi lava hi va xumayelako, niku hi ta zwananisa a manghenela ya hina ni kukarateka kabye. Hi ta ti yimisela ku nga ti nyiki xikhati ntsena loku hi hi zinwe ni xigonzani xinwe ni xinwani xa Biblia, kanilezi hi ta tlhela hi ti nyika xikhati loku hi kari hi ti longisela na ka ha hi mahlweni lezaku hi ya fambisa xigonzo xinwe ni xinwani.
3. Xana a ku ranza a zinene za Biblia zi ta hi vunisa kuyini wutirelini?
3 Ranza Zinene Za Biblia: Jesu kambe i wa ranza a zinene za Biblia a tlhela a zi wona kota tshomba. (Mat. 13:52) Loku hi ranza a zinene, hi ta wulawula hi kuhiseka, niku lezo zi nga ha vuxa litsako ka vaingiseli va hina. A liranzo lelo li ta hi vuna ku veka a kupima ka hina ka mahungu ya lisima lawa hi ma kanelako wutshanwini ga ku karateka hi kugumelwa ka hina wutsumbu, niku lezo zi nga ha hungula a kukarateka ka hina wutirelini.
4. Xana hi nga hlakulelisa kuyini a liranzo?
4 Hlakulela Liranzo: Xana hi nga hlakulelisa kuyini liranzo hi vanhu? Hi ku ehleketa hi liranzo leli Jehova ni N’wana wakwe va li kombisako ni xiyimo xa moya xi nga nyawuliko lexi a vanhu xipanzeni xa hina va nga ka xona. (Mar. 6:34; 1 Joh. 4:10, 11) A liranzo la hina hi zinene za Biblia li ta etiswa hi xigonzo xa munhu wutsumbu ni kuehleketa. A liranzo ginwe ga matshamela ya mbhanzo wa moya. (Gal. 5:22) Hikwalaho hi fanele ku khongelela a moya wa ku basa ka Jehova hi tlhela hi mu kombela lezaku a hi vuna ku kula liranzweni. (Luka 11:13; 1 Joh. 5:14) Na ku nga khataliseki a gonziselelo ya hina ya tiko, wukale zineneni, kutani wuzikoti ga mabeleko, hi nga zi kota kuva vagonzisi vo humelela va Biblia hi ku kombisa liranzo.