Tlhariha loku u hi wutirelini
1. Hikuyini hi faneleko ku tlhariha a xikhati lexi hi nga wutirelini?
1 Khwatsi hi “tiyivu xikari ka timhisi,” a malanza ya Nungungulu ma xumayela “xikari ka xizukulwana xi gombonyekileko.” (Mat. 10:16; Fil. 2:15) Masikwini ya hina, hi tolovela kuzwa mibiko yo tsema hlana ya gujeguje, tihanyi, ni xapi. Lexo xikombiso xa lezaku a vanhu va kubiha va “nonohisa vaya mahlweni kubiheni.” (2 Tim. 3:13) Hi wahi a matshinya ya milayo ya Biblia lawa ma to hi vuna a ku tshama na hi tlharihile a xikhati lexi hi nga wutirelini? — Mat. 10:16.
2. Xini xi nga tshukako xi hi kurumeta ku suka hiya xumayela ka wutshamu ginwani?
2 Tlhariha: Mavingu 22:3 i komba lezaku mbutlhari a ku ‘wona mhango u fihlala.’ Tshama na u tlharihile! Ka matshamu lawa ku nga toloveliko ku maheka makhombo, a zilo zi nga tshuka zi cica hi xitshuketi. U nga tshuka u wona a maphoyisa yo tala kutani xidlemo na xi hlengeletana lomu maruweni. Kuzilava u nga ha tlharihiswa hi muakelane. Wutshanwini ga kuga xikhati na wu lava ku tiva a ku zini zi mahekako, wutlhari a ku tekela ku suka ka wutshamu lego uya xumayela kunwani. — Mav. 17:14; Joh. 8:59; 1 Tes. 4:11.
3. Hi nga gi tirisisa kuyini a tshinya ga nayo gi nga ka Mutshawuteli 4:9 wutirelini ga hina?
3 Tirani zinwe: Mutshawuteli 4:9 i ngalo: “A vambiri va chukwana ku hunza munwe.” Kuzilava u wa tolovele ku tira wece sinwini hi ku tiva lezaku a ku na mhango wutshanwini ga nwina. Kanilezi, xana za ha hi tano ke? Ka matshamu yo kari a zi na mhango. Kanilezi ka matshamu manwani zi na ni mhango a kuva a makabye wa xisati kutani muswa a tira yece hi muti ni muti, nguvunguvu loku a gambo gi pelile. Hambu lezi hi ti wonelako nguvu kasi hi nga kumani ni timhango, a matshango ma komba lezaku a ku tira ni munhu a tivako ku ti wonela, za lisima nguvu. (Mutsh. 4:10, 12) Khatalela kambe lava u tirako navo. Xikhati xontlhe u lavako ku suka xipanzeni lexi mu tirako ka xona, tivisa vanghana.
4. Hi nga maha yini kasi hontlheni hi vikeleka laha bandleni?
4 A madota ma faneleko ku komba matirela lomu xipanzeni xa nwina hakuva hi wona ma ‘rinzelako a mihefemulo ya hina.’ (Maheb. 13:17) Loku hi lanzela a zileletelo zabye, Jehova i ta hi katekisa. (Mika 6:8; 1 Kor. 10:12) Ngha malanza wontlhe ya Nungungulu ma ti karatela ku nyika wukustumunyu ga ntamu xipanzeni xa hina. Hambulezo, ngha hi ti wonela xontlhe xikhati.