Ntlhanu wa tindlela ta ku kuma a xigonzo xa Biblia
1. Loku zi hi karatela ku kuma xigonzo xa Biblia xipanzeni xa hina, zini hi faneleko ku maha, niku hikuyini?
1 Xana za ku karatela ku kuma munhu wa ku gonza naye a Biblia? Simama a ku zama. Jehova i katekisa lava va nga mbheliko ntamu kumaheni ka kuranza kakwe. (Gal. 6:9) Lahasi ku lanzela a ntlhanu wa mawonela lawa ma to ku vuna.
2. Xana hi nga rambisa kuyini vanhu hi kukongoma lezaku hi sangula navo a xigonzo xa Biblia?
2 Va rambe hi kukongoma: A vanhu vo tala va zi tiva lezaku hina ha avela A Murinzeli ni Despertai!, kanilezi kuzilava a va zi tivi ku ngalo ha gonza a Biblia ni vanhu. Zi ngo yini loku wo wutisa vanhu hi kukongoma a xikhati u xumayelako hi muti ni muti lezaku va zi lava ku gonza a Biblia ke? U nga wutisa kambe a vatsakeli lava u tolovelako ku va enzela lezaku a va zi lavi ku gonza a Biblia ke. Loku va ala, u nga simama ku va yisela mabhuku na u hlakulela a kutsakela kabye. A makabye wo kari wa xinuna i wa kari a enzela a patswa wa vatekani hi malembe kasi ku va siyela marevista. Ka siku go kari, anzhako ka ku va siyela marevista ya maswa, i lo va salisa kanilezi a guma a ku khwatsi i no rivala xo kari zonake aku: “Ma zi lava ku gonza a Biblia ke?” Va lo vumela, kuveni makabye wa hina i wa nga zi rinzelangi. Va bapatizilwe makunu.
3. Xana hi fanele ku alakanya lezaku vontlhe lava va tako mitlhanganweni va sina va gonza a Biblia ni munhu? Tlhamusela.
3 Ramba lava va tako mitlhanganweni: U nga alakanyi lezaku vontlhe lava va tako mitlhanganweni ya bandla va gonza a Biblia. Makabye wo kari wa xinuna i bika lezi: “A ku hunza khihlanya ga zigonzo nzi vileko nazo nzi zi sangulile hi ku wulawula ni vanhu va tako mitlhanganweni.” Makabye wo kari wa xisati i lo boha ku tshinelela a wasati wo miyela a nga hi ni vana va xisati va bapatizilweko bandleni. A wasati loye i wa sina ata mitlhanganweni hi 15 wa malembe niku a xikhati xontlhe i wata Salawini ya Mufumo na yi sangula mitlhangano a tlhela a suka neti yi nga kari yi mbhela. A wasati loye i lo vumela ku gonza a gumesa a khoma a lisine hi mandla mambiri. Makabye loye wa xisati i tsala lezi: “Nzi tizwa nanzu hi lezi nzi nga rinzela a 15 wa malembe lezaku nzi mu wutisa a ku wa zi lava ku gonza ke!”
4. Xana hi nga kumisa kuyini xigonzo hi ku lonzowota vanhu vo laviwa hi vanwani?
4 Lonzowota a va ku laviwa hi vanwani: A makabye wo kari wa xisati i ti karatela ku pangalata vanwani zigonzweni zabye. Loku loyi a gonzisako a vumela, makabye loyi i wutisa a xigonzani kugumeseni ka xigonzo lezaku wa tiva vanwani va zi lavako ku gonzawu a Biblia ke. Loku u nyikela a bhuku A Biblia Gi Gonzisako ka munhu u sinako u mu enzela, u nga mu wutisa lezi: “Wa tiva munwani munhu a tsakelako kuva ni bhuku legi?” Ka zikhati zo kari, a xiyimo a xi vumeleli vahuweleli ni maphayona a ku fambisela xigonzo a munhu va mu kumako sinwini. Hikwalaho, tivisa vanwani lezaku wa zi lava ku fambisa zigonzo lezo.
5. Hikuyini hi faneleko ku wutisa a vanghana va wukati va nga hiko makholwa lezaku xana va zi lava ku gonza ke?
5 Vanghana va wukati va nga hiko makholwa: Xana ku na ni vahuweleli bandleni ga nwina lava va tekeneko ni vangakholwiko? A vangakholwiko vo kari va ala ku wulawula hi Biblia ni vanghana vabye va wukati va nga maKristu kanilezi va nga vumela ku gonza a Biblia loku va rambiwa hi munhu wa le handle. A kutala ka zikhati zi chukwana ku sangula hi ku wutisa a nuna kutani sati wakwe a nga mukholwa kasi ku tiva a manghenela ya chukwana.
6. Lisima muni wu nga nalo a mukhongelo loku hi ti karatela kuva ni zigonzo?
6 Mukhongelo: U nga kanyisi a ntamu wa mukhongelo. (Jak. 5:16) Jehova i tsumbisa kuzwa a zikombelo za hina loku zi yelana ni kuranza kakwe. (1 Joh. 5:14) A makabye wo kari wa xinuna a nga hi wa ku khomeka nguvu hi mitiro i lo sangula ku khongela a kombela a xigonzo xa Biblia. Sati wakwe i lo ti wutisa lezaku xana a nuna i wa ta xi kuma a xikhati xa ku khatalela a xigonzo lexo, nguvunguvu loku a xigonzani xi hi ni zikarato zo tala. Hikwalaho loyi wasati i lo tivisa a kukarateka loko ka Jehova loku a khongelela a nuna wakwe lezaku a kuma xigonzo. A mikhongelo yabye yi lo hlamuliwa anzhako ka maviki mambiri a xikhati lexi a phayona go kari bandleni gi nga kuma wanuna loyi a nga lava ku gonza zonake gi mu nyikela ka makabye loye wa xinuna. Sati wakwe i tsalile lezi: “Ka vontlhe lava va alakanyako lezaku a va nge zi koti ku fambisa xigonzo hi kota ya xikhati, nzi ngalo: Wulani hi kukongoma mikhongelweni ya nwina lezi mu zi lavako, mu tlhela mu simama ku khongela mu nga tsiki. Hi na ni litsako la hombe nguvu la ku cima nzi wa nga li alakanyelangi.” Loku u timisela, wenawu u nga zi kota ku kuma xigonzo xa Biblia u tlhela u kuma litsako la ku vuna munhu a ku nghena ka “nyangwa ya wutomi.” — Mateu 7:13, 14.