Pimanyisa a xikombiso xa vaprofeti — Jona
1. Matshamela muni ya ma nene a nga hi nawo Jona?
1 Zini zi tako maalakanyweni ya wena loku u alakanya muprofeti Jona? A vokari va nga ha mu wona kota munhu wa wutoya kutani wo nonoha mbilu. Hambulezo, handle ko kanakana i kombisile a kutikoramisa, kutiya-hlana, ni moya wa kutikarata. Xana hi nga pimanyisisa kuyini a matshamela ya ma nene ya Jona? — Jak. 5:10.
2. Xana hi nga pimanyisisa kuyini a kutikoramisa ka Jona?
2 Kutikoramisa: Kusanguleni, Jona i tsutsumile a kongoma ka tlhelo go hambana ni legi a nga rumilwe kona. Lezo a zi hlamalisi hakuva a vaAssiria va wa tiveka nguvu hi tihanyi, niku a tiko ga Niniva gi wa tiviwa kota ‘muti wa nkhata.’ (Nah. 3:1-3) Hambulezo, a xikhati lexi Jehova a nga mu kawuka, Jona i kombisile kutikoramisa hi ku vumela a xiavelo lexo a xikhati a nga rumiwa ga wumbiri. (Mav. 24:32; Jona 3:1-3) Hambu lezi a nga ranga hi ku ala, hi magumo i mahile a kuranza ka Jehova. (Mat. 21:28-31) Xana hinawu hi ti yimisele ku simama hi xumayela a mahungo yo saseka, hambu loku hi kawukiwa kutani hi avelwe ku tira ka xipanze xo karata?
3. Wutirelini ga wena, zilo muni zi lavako kutiya-hlana ni kutikarata ke?
3 Kutiya-hlana ni moya wa kutikarata: A xikhati lexi a nga wona lezaku a xiboho xakwe xa hava xa veka mhangweni vamarinyero, Jona i wa ti yimisele kufa kasi ku ponisa a wutomi gabye. (Jona 1:3, 4, 12) Hi nzhako ka xikhati, laha a nga kari a tatisa a xiavelo xakwe le Niniva, Jona i lo khokhovela mutini lowo, kuzilava na a lava a wutshamu ga gi nene kasi ku kanela a kulamula ka Jehova. A zilo lezo a zi mahiwangi hi munhu wa wutoya, kanilezi zi mahilwe hi muprofeti wo tiya-hlana wa Nungungulu! (Jona 3:3, 4) Hina nyamutlha ke? Hi fanele kuva ni kutiya-hlana ku tako hi ka Nungungulu kasi ku nyika a wukustumunyu go tiya hambu loku hi lwisana ni kukanetwa. (Miti. 4:29, 31) Hi fanele ku ti karata kasi ku tirisa a xikhati xa hina ni titshomba wutirelini. — Miti. 20:24.
4. Hikuyini hi faneleko ku ti nyika xikhati xa ku ehleketa hi xikombiso xi nene lexi hi vekelweko hi vaprofeti va Jehova?
4 Khati ni khati u gonzako a tlhatlhambutelo xungetano hi munwe wa vaprofeti va Jehova, u ta vuneka loku u ti alakanyela na u hi ka xiyimo lexi a nga hi ka xona. Ti wutisi lezi: ‘Xana na nzi mahisile kuyini? Xana nzi nga pimanyisisa kuyini a matshamela yakwe ya ma nene wutomini ga mina?’ (Maheb. 6:11, 12) Ka tinzima tinwani ta Wutireli ga hina ga Mufumo hi ta wona zigonzo zinwani za lisima lezi hi nga zi kumako ka vaprofeti vanwani vo tsumbeka va Jehova.