Xana wa vumela ku cica kasi ku ti zwananisa ni xiyimo?
1. A kucica ka zilo tikweni legi ku hi kurumeta ku cica yini?
1 Ka 1 Va Le Korinte 7:31, a Biblia gi fananisa a tiko legi ni xiluvelo xa drama xi cicacicako miwoniso. A kucica ka zilo tikweni legi ku hi kurumeta kuta na hi cica a maxumayela ya hina, longoloko wa hina wa matirela, ni xingheniso xa hina. Xana wa vumela ku cica kasi ku ti zwananisa ni xiyimo?
2. Hikuyini hi faneleko ku cica kasi ku longoloka ni hlengeletano ya Jehova?
2 Maxumayelela ya wena: A bandla ga wuKristu gita na gi cica hi kale kasi ku ti zwananisa ni xiyimo. Ka khati go sangula legi Jesu a nga ruma vapizani vakwe, i va byelile lezaku va nga teki kwama kutani mali. (Mat. 10:9, 10) Kanilezi hi nzhako ka xikhati i lo cica a zileletelo lezo hi ku tiva a tihanyi leti a vapizani vakwe va nga wa ta kumana nato ni kuhangalaka ka mahungu yo saseka ma chikela ka matshamu manwani. (Luka 22:36) Ka zana ga malembe legi gi hunzileko, a hlengeletano ya Jehova yi tirisile machumayelela yo hambanahambana — hi xikombiso, makartawu ya wukustumunyu, milongoloko ya radiyu, ni mimova ya pfumawulo — hi kuya hi lezi zi nga laveka xikhatini lexo. Inyamutlha, kota lezi a ka matshamu yo tala zi kalako ku kuma vanhu mitini, ku khanyiswa nguvu a kuva hi nga xumeyeli hi muti ni muti ntsena, kanilezi hi xumayela kambe hi xutshuketi ni lomu maruweni kutani mabazarini. Hi kuciwa kambe a ku famba hi muti ni muti ni wusikwanyana loku ku hi lezaku ni mumu va lomu mitirweni. Xana loku a kareta ya Jehova yi djikisa maroda wa longoloka nayo? — Ezek. 1:20, 21.
3. Xana a ku tiva ku ti zwananisa ni xiyimo zi hi vunisa kuyini ku bhinzula xipanzeni xa hina?
3 Xingheniso xa wena: Zini lezi a vanhu xipanzeni xa nwina va karatekako nguvu hi zona zezi? Kuvumaleka ka mali? I ngango? I yimpi? Za lisima ku tiva a zikarato ni xiyimo xa wunyingi ga vanhu xipanzeni xa nwina kasi u longisela xingheniso xa xi nene. (1 Kor. 9:20-23) Loku a venyi va muti va ti phofula, wutshanwini ga kuya mahlweni ni xingheniso xa hina, zi chukwana nguvu a kuva hi wulawula hi lezi zi va karatako.
4. Hikuyini hi faneleko ku hatlisa hi cica?
4 Lokuloku a “muwoniso” wo gumesa wa tiko legi wu ta chikela magumo ku tlhela ku sangula a kuxaniseka ka hombe. “A xikhati [xi seleko] xi komile.” (1 Kor. 7:29) Hikwalaho, za lisima nguvu a ku cica hi xihatla kasi hi maha zontlhe zi kotekako xikhatini lexi xi seleko!