Engetela wutlhari ga wena wutirelini — Kombisa kukhatala
Hikuyini zi nga za lisima? Jesu i wa kombisa kukhatala ka liranzo hi vanhu. Hi xikombiso, ka khati go kari kuzilava i wonile lezaku a wanuna wo kari wa xiwiri i wa nga tlhatlheki khwatsi, hikwalaho a xikhati a nga lava ku mu hanyisa, i lo suka naye laha xidlenwini a ya mu hanyisa xihundleni. (Mar. 7:31-35) I lo kombisa kukhatala hi vapizani vakwe hi ku alakanya kugumelwa kabye, a nga va binzisi hi mahungu yo tala. (Joh. 16:12) Hambu ka xikhundla xakwe le tilweni, Jesu wa kombisa kukhatala. (2 Tim. 4:17) Kota valanzeli va Kristu, hinawu hi lava ku mu tekelela. (1 Ped. 2:21; 1 Joh. 3:16, 18) Tlhatakumbiri, hi ta bhinzula nguvu wutirelini loku hi kombisa kukhatala hi nwinyi wa muti hi tlhela hi chela kota hi xiyimo xakwe, ni lezi zi mu tsakisako, zinwe ni lezi a karatekako hi zona. I ta byekelela nguvu kuva a demba ndleve loku a zi wona lezaku a hi mahi ku khwatsi hi no rumiwa ku ya mu bikela mahungu kutani ku mu nyika mabhuku, kanilezi ha khatala hi yena.
Mamahela ya kona:
• Famba na u ti longisele khwatsi. Tlhatlheka, u nwayitela, u tlhela u kombisa xinghana.
• Cuwuka khwatsi a xiyimo xakwe. Wa wona xokari xi kombako lezaku i na ni vana? wa ranza zitsangi kutani ku hlakana ni zihari? i na ni wukhongeli go kari? Kuzilava u nga cica xingheniso xa wena kasi xi yelana ni xiyimo xakwe.
• Kombela mawonela yakwe u tlhela u demba khwatsi ndleve, u nga mu tsemarisi halahala. U nga hambukisi mahlo kasi ku komba lezaku wa demba ndleve. Bonga mawonela yakwe u tlhela u mu dzunza loku zi ringana. Potsa ku kanetisana naye.
• Ti zwananise ni ziyimo. Loku zi laveka, cica a xingheniso xa wena kasi xi zwanana ni lezi zi mu karatako. Lezo zi nga ha olova nguvu ku hunza lezi u zi alakanyako, hakuva a ziphephana za hina, ni mabroxura ni marevista zi wulawula hi timhaka to hambanahambana. Loku u mu enzele hi xikhati xa hava, xo kota loku u mu kuma na a khomekile, kombisa kuzwisisa u tlhela u komisa bhulo.
Ka hweti leyi, ringisa lezi:
• Ti nyikeni xikhati xa ku vuxeta wukhozelini ga ngango, kutani na mu hi wutirelini, laha a muhuweleli a bohekako ku cica xingheniso xakwe kasi ku wulawula hi mhaka yo kari leyi a nwinyi wa muti a yi wulako.
• Ka mitlhangano yo kari ya ntiro wa simu, a makabye loyi a fambisako a nga ha wulawula kutani ku maha mikombiso ya tindlela ta ku kombisa kukhatala.