Engetela wutlhari ga wena wutirelini — Ndlela yo hlamula nwinyi wa muti a zangarileko
Hikuyini zi nga za lisima? A vanhu vo tala hi va kumako wutirelini va kombisa wunene. Kanilezi, Jesu i profetile lezaku a vokari va ta hi venga. (Joh. 17:14) Hikwalaho, a hi faneli ku hlamala loku a wokari a hi zangarela. Loku lezo zi humelela, hi lava ku hlamula hi ndlela yi to tsakisa loyi hi mu yimelako, ku nga Jehova. (Rom. 12:17-21; 1 Ped. 3:15) A ku maha lezo zi nga hi vikela ku tshingisa zanga yakwe. Zi ta tlhela zi nyika wukustumunyu ka nwinyi wa muti ni lava va hi wonako, zi va maha va byekelela ku demba ndleve loku va enzelwa hi Timboni ta Jehova xikhatini xi tako. — 2 Kor. 6:3.
Mamahela ya kona:
• Simama ku kombisa kurula ni xinghana. Lezo zi ta ku vuna ku bohlisa zanga yakwe. U nga ma tekeli hlokweni a magezu ya nwinyi wa muti. (Mutsh. 7:9) Kuzilava i zangariswa hi zikarato za yena nwinyi kutani ku ngha hi mu enzele hi xikhati xa hava. Hambu loku ku hi ku i zangariswa hi mahungu ya hina, kuzilava zi vangiwa hi mawunwa a ma zwileko xungetano hi hina. — 2 Kor. 4:4.
• Hlamula hi kurula ni tipswalo. (Mav. 15:1) U mu vuxile na a etlele kutani ku mu tsemarisa zokari? Hambu lezi hi nga kombeliko ku tsetselelwa hi kota ya ntiro wa hina, u nga kombela rivalelo hi kuva u mu enzele hi xikhati xa hava. I zangara hi kota ya mawunwa a ma zwileko xungetano hi hina ke? Loku zi hi nghaho, u ngaku: “Nza ku zwisisa. U na ni xigelo xa ku zangara. Hambulezo, ko khwatsi lezi u zi zwileko hi hina a hi lisine. Nzi nga ku tlhamusela?” Xana i sola a nchumu wo kari hi wu kholwako, wo kota kususiwa bandleni kutani nkhata ke? U nga haku: “Nza ku zwisisa. A hi wena wece u nga ni kukarateka loko. Nzi nga ku komba lomu a gonzo leyo yi seketelwako kona lomu ka Biblia?”
• Loku a munhu loye a vindlukile nguvu, zi ngava zi nene a ku tekela ku suka, hi ngazi hi zama ku mu hlamula nchumu. Loku aku a nga ha lavi ku wona Timboni ta Jehova mutini wakwe, u nga mu tiyisa lezaku a kuxuva kakwe ku ta khatalelwa.
Ka hweti leyi ringisa lezi:
• Ti nyikeni xikhati xa ku vuxeta wukhozelini ga nwina ga ngango.
• Anzhako ka ku suka mutini wa munhu a zangarileko, wutisa munghana wa wena wa simu lezaku ku na ni ndlela ya chukwana u nga wa tava u hlamulile hi yona ke.