“Tshamani hi kurula ni vanhu vontlhe”
1. Wusungukati muni ga Biblia hi faneleko ku gi tirisa loku hi zangarelwa hi venyi va muti?
1 A vanhu va Jehova va rulile niku a wutireli ga hina gi rulilewo. (Isa. 52:7) Kanilezi, ha tshuka hi kumana ni vanhu va zangarako hi kuva hi va enzele. Xini xi to hi vuna ku simama hi rulile ka ziyimo lezo? — Rom. 12:18.
2. Hikuyini zi nga za lisima a kuva hi tirisa wutlhari?
2 Tirisa wutlhari: Hambu lezi a vokari va zangarako hi ku venga a lisine, a vanwani va zangara hi zigelo zi nga yelaniko ni mahungu ya hina. Kuzilava hi no va enzela hi xikhati xa hava. A nwinyi wa muti a nga hava a zangarisilwe hi zikarato za yena nwinyi. Hambu loku ku hi mahungu yo saseka ma mu zangarisako, hi fanele ku alakanya lezaku kuzilava i maha lezo hi kuva a khohlisilwe. (2 Kor. 4:4) A ku tirisa wutlhari zi ta hi vuna ku simama hi rulile hi tlhela hi nga alakanyi lezaku i zangarela hina vanhu va kona. — Mav. 19:11.
3. Hi nga kombisisa kuyini xichawo hi nwinyi wa muti?
3 Kombisa xichawo: A votala lomu xipanzeni va na ni zilo va zi kholwako niku va tiyile nguvu ka zona. (2 Kor. 10:4) Va na ni fanelo ya ku hlawula a ku hi ingisela kutani ku nga hi ingiseli. A hi faneli ku chipisa a zilo lezi a nwinyi wa muti a zi kholwako ge hambu ku hi ti kulisa. Loku a hi hlongola, hi fanele ku tekela ku suka hi xichawo.
4. Zi wula yini ku wulawula hi tipswalo?
4 Wulawula hi tipswalo: Hambu loku hi rukiwa, hi fanele ku hlamula hi kurula ni tipswalo. (Kol. 4:6; 1 Ped. 2:23) Wutshanwini ga ku zama ku mu komba lezaku lezi a zi kholwako mawunwa, ti karatele ku kuma nchumu lowu nwentlhe mu wu kholwako. Kuzilava hi nga ha mu wutisa hi wunene a ku hikuyini a kanetako mahungu ya hina. Kasi ku potsa ku engetela zanga yakwe, ka zikhati zinwani zi chukwana ku nga zami ku koka bhulo. — Mav. 9:7; 17:14.
5. Hi wahi mabhinzu ma tako hi kuva hi kombisa kurula wutirelini?
5 Loku hi kombisa kurula, a nwinyi wa muti a nga ha alakanya a maangulela ya hina loku a tshuka a enzelwa kambe hi Mboni. (Rom. 12:20, 21) Hambu loku a wonekisa ku khwatsi a nga ta cica mawonela yakwe, za koteka ku a tshuka a maha makabye wa hina. (Gal. 1:13, 14) Niku hambu loku a nga tshuki a tsakela a lisine, loku hina hi simama ku ti khoma hi tlhela hi hlayisa kurula, hi ta dumisa Jehova hi tlhela hi bombisa a gonzo ya hina. — 2 Kor. 6:3.