“Longa Ku Maha Mitiro Yontlhe Yo Saseka”
1 A xikhati lexi Jesu a nga sangula a tsima giswa go xumayela, yena i ti siyele xikhati lezaku a longisela a vapizani vakwe. (Mat. 10:5-14) Hambu lezi hontlheni hi talelweko hi zo maha, a ku ti siyela xikhati hambu xova xi tsongwani xa kuva hi ti longisela na hi nga seya wutirelini ga muti-ni-muti zi ta hi vuna lezaku hi kuma a wuyelo gi nene. — 2 Kor. 9:6.
2 Lezi Hi Nga Ti Longiselisako Zona: A kutilongisela ka ku nene ku sangula hi ku tiva a mahungu ma nga lomu ka mabhuku lawa hi lavako ku ma nyikela. Hi fanele kambe ku alakanyela a vanhu va lomu xipanzeni xa hina. Hi tihi a timhaka leti ti va karatako nguvu? Tigonzo muni ta wukhongeli leti va kholwako ka tona? Hi nga ha cuwuka a zingheniso za xikombiso zi nga ka Wutireli Ga Hina Ga Mufumo ni ka Raciocínios à Base das Escrituras lezaku hi kuma a mawonela yo kari.
3 A ku cuwukela khwatsi a mikombiso yi mahiwako ka Mutlhangano wa Ntiro zonawu zi ta hi vuna. A xikhati lexi hi yako hi tolovela a ku tirisa zingheniso za hina, hi nga ta ha lava a xikhati xo leha lezaku hi vuxeta. Hambulezo, hi ta humelela nguvu loku hi alakanyela khwatsi lezi hi lavako ku zi wula hi tlhela hi chukwatisa a zingheniso za hina khati ni khati legi hi lavako kuya wutirelini. Hi fanele kambe ku ti nyika xikhati xo kari xa kuva hi kambisisa lezaku a paxta ya hina yi nazo zontlhe lezi hi to lava ku zi tirisa ke.
4 Zini zi ta nga hi vuna a ku alakanya a zingheniso za hina? A ku vuxeta hi gezu go tlakuka i ndlela yinwe yo khoma lezi hi lavako ku zi wula. A vo kari va ranza ku maha mikombiso nzeni ka xigonzo xabye xa ngango. Vanwani va zi wona na zi vuna a ku tsala magezu ma tsongwani ya xingheniso xabye ka phepha go kari lezaku va ma cuwukanyana loku va hi laha kusuhani ni muti.
5 Hikuyini Zi Vunako: A ku ti longisela khwatsi zi engetela a litsako ni kuhumelela ka hina wutirelini. Zi hi vuna a ku tlhatlheka hi tlhela hi nga chavi nguvu loku hihi laha mutini wa vambe. Zi maha lezaku hi kota ku khatalela nguvu a nwinyi wa muti, wutshanwini ga ku karateka nguvu hi lezi hi ta nga zi wula. Hi kuengetela, a ku ma tiva khwatsi a mahungu ma nga lomu ka mabhuku lawa hi nyikelako zi ta hi vuna lezaku hi hiseka a xikhati lexi hi ma nyikelako.
6 A Mitsalo yi hi kuca lezaku hi “longa ku maha mitiro yontlhe yo saseka.” (Tit. 3:1) Xana ku na ni ntiro wunwani wa chukwana a ku hunza ku xumayela a mahungu yo saseka? Loku hi ti longisela khwatsi, hi kombisa xichawo ka nwinyi wa muti loyi a vumelako ku ingisela, ni ka Jehova, a Nungungulu loyi hi mu yimelako. — Isa. 43:10.