Engetela wutlhari ga wena wutirelini — Hi ku longisela magezu yo sangula ya xingheniso

Hikuyini zi nga za lisima? Loku a xingheniso xa hina xi nga vuxi kutsakela, a nwinyi wa muti a nga ha tsema bhulo na hi nga se mu nyika wukustumunyu. Hikwalaho, a vahuweleli vo tala va wona a magezu yabye yo sangula ya xingheniso kota xipanze xa lisima xa kuxumayela kabye. Hambu lezi a Wutireli ga hina ga Mufumo ni bhuku Raciocínios zi hi nyikako a zingheniso, a hi xontlhe xikhati zi nyikako xingheniso xo mbhelela lexi xi vumelelanako ni ziyimo zontlhe. Hambu loku a xingheniso xi mbhelele, a vahuweleli va nga ha hlawula ku xi cica kutani ku longisela xabye. Hikwalaho, hi ta bhinzula nguvu loku hi longisela khwatsi xingheniso xa hina, wutshanwini ga ku wula ni xihi xi tako maalakanyweni a xikhati lexi a nwinyi wa muti a hi amukelako. — Mav. 15:28.

Mamahela ya kona:

• Hlawula a mhaka u to yi tirisa. Yi fanele ku ngha yi seketelwa ka mabhuku lawa u ma nyikelako niku yi fanele kuva yo tsakelwa hi vanhu va xipanze xa nwina.

• Longisela khwatsi a magezu yo sangula kutani ya wumbiri lawa u to ma wula anzhako ka kulosana. U nga ha sangula hi ku wula lezi: “Nzita laha kasi . . . ,” “A vanhu vo tala va karateka xungetano hi . . . ,” “Makunu nzi tsakela kuzwa a mawonela ya wena ka . . . ,” kutani zinwani. A magezu yo koma, ni yo olova ma anda ku vuna nguvu. A vahuweleli vo kari va hlawula a ku hlayisa xingheniso xabye hi hloko.

• Maha xiwutiso xa ku lava ku tiva mawonela le’xi to maha a nwinyi wa muti a patseka ka bhulo. (Mat. 17:25) Alakanya lezaku na u nga se chikela kuzilava i wa ehleketa hi timhaka to kari, hikwalaho a xiwutiso a xi faneli kuva xo karata nguvu kutani xa ku mu chavisa.

Ringisa lezi ka hweti leyi:

• Ti vekeleni xikhati ka wukhozeli ga ngango lezaku mu longisela ni ku maha mikombiso ya zingheniso za nwina.

• A xikhati u nga wutirelini, byela vahuweleli vanwani lezi u zi longiseleko ku wula. (Maheb. 10:24) Cica xingheniso xa wena loku xi nga bhinzuli.