Ndlela yo longisela zingheniso zi bhinzulako
1. Hikuyini zi nga za lisima a ku longisela zingheniso za zi nene?
1 A ku fana ni xiwoso xo nanziha lexi xi mahako munhu a donela mari zakuga lezi zi bhikiwako, a xingheniso xi nene xi maha munhu a donela mari a mabhulo ya Mitsalo lawa ma to lanzela. A zingheniso zi bhinzulako zi nga ha hambana hi kuleha ni magezu ya zona, kanilezi a ku fana ni zakuga zo nanziha, zontlhe zi lava lezaku hi ranga hi ku longisela. (Mav. 15:28) Xini xi lavekako kasi ku a xingheniso xi bhinzula?
2. Hi nga longiselisa kuyini xingheniso xi vuxako kutsakela?
2 Hlawula timhaka ti tsakelwako: A xingheniso xa hina xi fanele ku vuxa kutsakela, hakuva loku zi nga hi tano, a nwinyi wa muti a nga ha tsema bhulo. Hikwalaho loku u kari u ti longisela, ehleketa hi lezi a vanhu va ranzako ku bhula hi zona. Xana a vanhu xipanzeni xa nwina va ranza ku wulawula hi mufumo wa wu nene, litsako ngangweni, kutani kumbhela ka yimpi? A kutala ka vanhu va zi ranza ku nyika mawonela, hikwalaho longisela xiwutiso xa ntamu xi va kucako ku nyika mawonela. Xana u nga tirisa a xinwe xa zingheniso zi nga ka Wutireli ga hina ga Mufumo, u xi zwananisa ni xiyimo xa xipanze xa wena ke? Zi ngo yini a kuta na mu vuxeta zingheniso zo kari Wukhozelini ga nwina ga Ngango ke?
3. Hi nga zwananisa kuyini xingheniso xa hina ni midawuko zinwe ni wukhongeli xipanzeni xa hina ke?
3 Alakanyela a mudawuko ni wukhongeli ga vanhu lavo: Ka matshamu yo kari, a vanhu va rinzela lezaku hi tekela ku wula a xigelo xa lienzo la hina zalezo hi chikelako. Kasike, ka matshamu manwani loku a mupfhumba a nga rangi hi ku wutisa kuvuka ka venyi va muti a tlhela kuzilava a wula kuvuka ka yenawu, zi kombisa ku kala xichawo. Ka matshamu yo kari, a wukhongeli ga vanhu ga vumela lezaku hi kumbuka a Biblia na hi tlhatlhekile xinghenisweni xa hina. (Miti. 2:14-17) Kanilezi, ka matshamu lawa a vanhu va kona va lumbako wukhongeli gi nga hiko ga wuKristu, kutani va kalako va nga lumbi wukhongeli ni ginwe, zi wa tava chukwana a ku kumbuka Biblia ka lienzo la wumbiri, wutshanwini ga ku gi kumbuka ka lienzo lo sangula. — Miti. 17:22-31.
4. Xini hi faneleko ku xi khatalela ka magezu yo sangula ya xingheniso xa hina ke?
4 Magezu yo sangula ya xingheniso: Longisela a magezu lawo hi wukheta. A kutala ka zikhati, a magezu matsongwani ni yo olova hi wona ma vunako nguvu. A ndlela leyi hi ma wulako hi yona yonawu ya lisima. Ma wule hi kuhiseka. Kombisa kukhatala hi nwinyi wa muti hi kunwayitela ka lisine ni ka wunghana. A ku lanzela a mawonela lawa zi ta hi vuna ku longisela zingheniso zo nanziha lezi zi to kuca vanhu xipanzeni xa hina lezaku va ‘gela mezeni ya Jehova.’ — 1 Kor. 10:21.