Pimanyisa a xikombiso xa vaprofeti — Amosi
1. Hikuyini a xikombiso xa Amosi xi hi tiyisako hlana?
1 Xana u tshuka u ti wona na u nga ringanelwi hi ku xumayela hi ku kala u nga gonzangi ni kuva u wundlelwe wusiwaneni? Loku zi hi tano, a xikombiso xa Amosi xi nga ku tiyisa hlana. I wa hi murisi wa tiyivu niku i wa tira hi tinguva. Hambulezo, Jehova i lo munyika ntamu kasi ku xumayela mahungu ya lisima. (Am. 1:1; 7:14, 15) Nyamutlha konawu, Jehova i tirisa vanhu va nyalidede. (1 Va Le Kor. 1:27-29) Zini zinwani hi zi gonzako ka profeti Amosi wutirelini ga hina?
2. Hikuyini hi zi kotako ku simama hi tiyile wutirelini loku hi kumana ni kukanetwa?
2 Yima uku nde loku u kumana ni ku kanetiwa: A xikhati lexi Amazia, a mupristi wa wukhozeli ga marole mufunweni wa khume ga tixaka wa Israeli le nwalungu, a ngazwa a xiprofeto xa Amosi, i hlamulisile ku khwatsi hi loku aku: ‘Suka laha ka hina, tlhela kaya ka nwina! Laha hi na ni chechi ya hina!’ (Am. 7:12, 13) A xikhati lexi Amazia a nga ya kombela Hosi Jeroboamu lezaku a beletela a ntiro wa Amosi, i lo ya wula zo hambana ni lezi Amosi a nga profetile. (Am. 7:7-11) Kanilezi, Amosi a nga chavangi. Inyamutlha, a varangeli vo kari va wukhongeli va kombela xivuno ka tihosi ta politika ka mizamo yabye ya ku xanisa a vanhu va Jehova. Hambulezo, Jehova i hi tiyisa lezaku a ku na tlhari gi phandelwako ku lovisa hina gi to humelela. — Isa. 54:17.
3. Zipanze muni za zimbiri zi wumbako a mahungu lawa hi ma xumayelako nyamutlha ke?
3 Kanela kulamula ka Nungungulu ni makatekwa hi ma rinzelako: Hambu lezi Amosi a nga profeta a kulamulwa ka mufumo wa Israeli wa khume ga tixaka, i gumesile a bhuku legi gi vitanwako hi vito gakwe hi xitsumbiso xa Jehova xa kuaketa a miti ya vaIsraeli ni ku va nehela makatekwa. (Am. 9:13-15) Hinawu hi wulawula hi ‘siku ga Nungungulu ga kulamula’ legi ga ha tako, kanilezi a siku legi xipanze ntsena xa ‘mahungu yo saseka ya mufumo’ lawa hi faneleko ku ma kanela. (2 Ped. 3:7; Mat. 24:14) A xikhati lexi Jehova a to lovisa vakubiha le Har–Magedoni, ku ta vululeka ndlela ya ku a misava yi maha paradise. — Tis. 37:34.
4. Xini xi hi tiyisako lezaku hi nga zi kota ku maha kuranza ka Jehova?
4 A ku xumayela mahungu ya Mufumo lomu ka tiko gi teleko hi vakaneti zi ringa a ndlela leyi hi ti yimiseleko hi yona ku hanya hi kutihendleleta ka hina ni ku maha kuranza ka Jehova. (Joh. 15:19) Hambulezo, ha tsumba lezaku Jehova i ta simama ku hi nyika zontlhe zi lavekako kasi hi zi kota ku maha kuranza kakwe, a ku fana ni lezi a nga vuna Amosi. — 2 Va Le Kor. 3:5.