U Nga Ali!
1. Xana hina a hi “ali ni xivuno” hi ndlela muni?
1 Hi ku hlengela kuhuweleleni ka mahungu yo saseka ya Mufumo wa Nungungulu hi kuhiseka, a hi “ali ni xivuno” xa ku chikelela lava va hanyako zipanzeni lezi hi avelweko simu ka zona. (Mav. 3:27) A ku na mahungu ya chukwana nguvu lawa hi faneleko ku ma hlengela ni vanhu a ku hunza ku va bhulela hi zikhati za chukwana lezi zi to tiswa hi kufuma ka Nungungulu. Hambu lezi u zi kotako ku ngha u hlengela a kutsumba ka Mufumo hi matsenya hi kuxumayela ka xitshuketi kutani hi ku nyikela mabhuku, hikuyini u nga ti vekeliko mixuvo ya ku fambisa a xigonzo xa Biblia, loku ku hi lezaku a wu se sangula ku zi maha?
2. Zini lezi zi nga hi alisako ku sangula a xigonzo xa Biblia?
2 Ka zikhati zo kari, a xinwe xa zihingakanyiso za hombe nguvu kufambiseni ka xigonzo xa Biblia kutizwa ka hina wutsumbu xungetano hi mhaka leyo. A vo kari va ala ku fambisa a xigonzo xa Biblia hakuva va tizwa na va nga faneleki kutani hi kota ya ku talelwa hi zo maha. A mawonela lawa ma lanzelako ma zi kota ku ku vuna lezaku u nga ali a ku hlengela ntirweni wo fambisa zigonzo za Biblia. — Mat. 28:19; Miti. 20:20.
3. Hikuyini hi fanelekako ku gonzisa a Biblia?
3 Ku Tizwa Na U Nga Faneleki: Kuzilava u munhu a nga gonzangiko nguvu kutani hi kota ya zinwani zigelo u tizwa na u nga faneleki a ku fambisa xigonzo xa Biblia. A maKristu lawa ma nga hi vatireli vo humelela ka zana ga malembe go sangula va wa hi vanhu “va nga gonzangiko, va nga vanhu ntsena.” Xini xi va vunileko a ku gonzisa zinene vanwani? “Va wa hi zinwe na Jesu.” (Miti. 4:13) Va lo gonza ka Mugonzisi wa Hombe, Jesu, loyi a tigonzo takwe ni magonzisela yakwe zi hlayiselweko hina lomu Mitsalweni. Hambu loku u nga gonzangi nguvu, wa kuma a gonziselelo ya moya leyi yi nga hunziwiko hi tinwani tigonziselelo. — Isa. 50:4; 2 Kor. 3:5.
4. Zini lezi hi nga zi gonzako ka xikombiso xa Amosi?
4 Zikhati zo kari Jehova i tirisile a vaprofeti lezaku va kawuka a tihosi kutani vanhu vanwani va nga hi ni xikhundla lava va nga hoxisile. A vo kari, vo kota Amosi, va wa hi va xiyimeko xa lahasi. Amosi i vumelile: ‘Nzi wa nga hi muprofeti mina, ge hambu a kuva n’wana wa muprofeti; kanilezi nzi wa hi murisi ni muhlayisi wa tisinya ta mikuwu.’ (Am. 7:14, Tradução do Novo Mundo) Hambulezo, Amosi a nga alangi ku yisa mahungu ya Jehova ya kulamula ka mupristi Amazia loyi a nga hi mukhozeli wa marole. (Am. 7:16, 17) Xikhati xontlhe hi fanele ku alakanya lezaku a ntiro lowu hi wu mahako ngwa Nungungulu niku yena i ta hi maha hi faneleka khwatsi ka ntiro lowu a hi nyikileko wona. — 2 Tim. 3:17.
5. Hikuyini hi fanele ku ti karatela ku sangula xigonzo xa Biblia hambu loku hi talelwe hi zo maha?
5 Kutalelwa Hi Zo Maha: Hambu loku u talelwe hi zo maha, kuzilava u sina u ti vekele xikhati xa ku hlengela wutirelini hi kukhanzakanya. A ku fambisa xigonzo xa Biblia i xinwe xa zipanze zo tsakisa za wutireli. I lungelo a ku wona a wuyelo ga Mhaka ya Jehova wutomini ga munhu. (Maheb. 4:12) Jehova wa tsaka loku a munwe ni munwani wa hina a ti karata kasi ku vuna wo kari lezaku ‘ava ni kutiva ka zinene.’ (1 Tim. 2:4) Hambu tingelosi ta tsaka loku a wo kari a ti sola mitirweni yakwe ya kale a tlhela a kula hi tlhelo ga moya. — Luka 15:10.
6. I lungelo muni hi nga nago kutatiseni ka kuranza ka Nungungulu?
6 A kuranza ka Nungungulu hi “lezaku vanhu vontlhe va hanyiswa, vava ni kutiva ka zinene.” (1 Tim. 2:4) Hakunene i lungelo ga hombe hi nga nago ga ku tira hi kuyelana ni kuranza ka Nungungulu, hi nga ali a ku fambisa zigonzo za Biblia!