U nga ti vekeli mimbhingano — Ti xavele xikhati kukhomekeni ka wena
1. Hikuyini a vokari va kanakanako ku sangula zigonzo za Biblia?
1 A vokari va tsika ku sangula zigonzo za Biblia hi lezi va tshamako na va khomekile. A ku khatalela xigonzani xa Biblia zi lava xikhati. Ku laveka xikhati xa ku vuxeta a xigonzo, ku xi fambisa, ni ku vuna a xigonzani lezaku xi hlula a zikarato za xona wutsumbu. Mupostoli Paule i wulile lezaku i wa nyikela muhefemulo wakwe kasi ku vuna vaTesalonika lezaku va tiva Jehova. (1 Tes. 2:7, 8) Hi nga fambisisa kuyini xigonzo xa Biblia hambu loku hi tshama na hi khomekile?
2. Xana a liranzo la hina hi Jehova li nga khumbisa kuyini a ndlela leyi hi tirisako hi yona a xikhati xa hina?
2 A wukhozeli gi lava xikhati: A mhaka ya lisine hi leyi yaku a wukhozeli gi lava xikhati. Hi xikombiso, hi ti nyika xikhati hi kukhanzakanya lezaku hiya mitlhanganweni, hiya sinwini, hi gonza Biblia, kutani ku khongela. A munhu a ngheneleko wukati wa ti nyika xikhati hi kutsaka lezaku a tshama ni munghana wakwe wa wukati hambu loku a hi munhu wo khomeka nguvu. Zi la su dlunya lezaku hi fanele ku ti xavela nguvu xikhati hi kutsaka kasi ku khozela Jehova hi ku mu ranza. (Efe. 5:15-17; 1 Joh. 5:3) Kota lezi Jesu a zi wulileko, a ntiro wa ku maha vapizani xipanze xa lisima nguvu xa wukhozeli ga hina. (Mat. 28:19, 20) A ku ehleketa hi mhaka leyi zi ta hi vuna ku nga ali a wutihlamuleli ga ku fambisa zigonzo za Biblia.
3. Hi nga khatalelisa kuyini xigonzo xa Biblia hambu loku a xikhati xa hina xa simu xi kamiwa hi zinwani?
3 Ahati loku a xikhati xa hina xi kamiwa hi ntiro, mababyi ya simasima, kutani ziavelo za bandla? A vahuweleli vo kari va talako ku suka-suka va fambisa zigonzo zabye hi telefone kutani hi Internet. Lava a xikhati xabye xi kamiwako hi mababyi ya simasima va tala ku bhula ni xigonzani lezaku xi va yela kaya kasi ku ya gonza. A vanwani kambe va kombela muhuweleli wo tsumbeka lezaku a va fambisela xigonzo loku va nga hi kona.
4. Makatekwa muni hi ma kumako hi ku hlengela ntirweni wa ku fambisa zigonzo za Biblia?
4 Paule i wa kuma nguvu litsako hi ku nyika xikhati xakwe ni ntamu kasi ku vuna vanwani lezaku va gonza a lisine. (Miti. 20:35) Laha a nga kari a alakanyela a mbhanzu wa kutikarata kakwe le Tesalonika, Paule i lo kuceka ku bonga Jehova. (1 Tes. 1:2) A litsako la hina wutirelini li nga engeteleka loku hi nga tsiki ku hlengela ntirweni wa ku fambisa zigonzo za Biblia hi kota ya kukhomeka ka hina.