Zvini zvi nga ku vhunako ku u gondza hi kukhandzakanya?

XANA zva ku karatela a ku maha cigondzo ca wena vhiki ni vhiki ci tlhela ci ku tsakisa? Hontlheni zva tshuka zvi hi karatela. Kanilezvi hi nga ehleketa hi zvilo zvo kari hi zvi mahako hi khandzakanya, zvo kota ku hlamba. A ku hlamba zvi lava cikhati ni ntamu, kanilezvi andzhako ka lezvo hizwa kupepa ka hombe! A cigondzo ca Bhibhiliya conawu ci nga fana ni kupepa ka ‘ku hlazviwa hi mati ya mhaka’. (Efe. 5:26) Wona mawonela yo kari ma nga ku vhunako:

• Maha programa: A cigondzo ca Bhibhiliya ca munhu wutsumbu cin’we ca zvilo zva “lisima nguvhu” lezvi a muKristu a faneleko ku chela nguvhu kota hi zvona. (Filp. 1:10) Kasi u zvi kota ku landzela a programa ya wena yi veke laha kubaseni, ko kota ku yi nameka laha ka kwadru kutani laha ka livati la geleira. A cin’wani kambe u nga sertara alarmi ka fone ya wena na ku kiyela cikhati citsongwani kasi u sangula ku gondza.

• Ti zwananise ni zvilaveko zva wena: Zva ku olovela a ku u mbheta cikhati co leha na u vekile kupima ka nchumu wo kari kutani u olovelwa hi ku veka kupima hi cikhati citsongwani? Wena n’winyi hi wena u ci tivako khwatsi a ciyimo ca wena. A cikhati leci u mahako programa ya wena ya ku gondza, ehleketa hi zvilo lezvo. Loku ci chikela a cikhati leci u ci yimisileko kasi ku gondza, kanilezvi u tizwa na u nga tsaki hi gondza, gondzanyana 10 minuto basi. Hi ku gondza 10 minuto u nga gondza zvo tala a ku hundza loku u wa no kala ku gondza. Niku neti u sangula zvi ta ku kuca ku u simama. — Filp. 2:13.

• Ranga u hlawula lezvi u to gondza: Loku u ranga hi ku tshama u gumesa u ti wutisa ku u ta gondza yini, u nga ta ci “tirisa khwatsi a cikhati” ca wena. (Efe. 5:16) Ti mahele lista ya tindzima ni tihloko ta mhaka leti u lavako ku gondza. Ni cihi leci ci ku telako hlokweni co kala u nga ci zwisisi khwatsi, ci tsale kasi u gondza hi cona. Andzhako ka cigondzo cin’we ni cin’wani, kuzvilava u nga engetela timhaka to kari u lavako ku gondza hi tona.

• Cica zvokari loku zvi laveka: Ka programa ya wena, engetela zvilo zvo kari zvo kota cikhati leci u mbhetako na u gondza ni timhaka leti u gondzako hi tona. A mhaka a hi wutshamu, ni cikhati kutani ku zvini u gondzako — kanilezvi ku gondza hi kukhandzakanya.

Ha vhuneka nguvhu hi ku gondza hi kukhandzakanya. Zvi hi tshineta nguvhu ka Jehovha, hi gondza lezvi hi nga mahisako zvona zvilo zvo kari, zvi tlhela zvi hi tiyisa. — Jox. 1:8.