Pimanyisa a xikombiso xa vaprofeti — Nahume
1. Zini hi gonzako ka bhuku ga Nahume?
1 A marumbi ya Niniva wa kale ma zi veka laha kubaseni lezaku kota lezi Nahume a profetileko, Jehova wa ti photela ka valala vakwe niku hambu a zanga yabye a yi na ntamu hehla Kakwe. (Nah. 1:2, 6) Loku hi hlola khwatsi a xiprofeto xa Nahume hi ta wona lezaku xa hi gonzisa zokari wutirelini ga hina.
2. Hi nga ma mahisa kuyini a mahungu ya hina mava yo tsakisa?
2 Chavelela u tlhela u nyika kutsumba: Hi mawonela yo sangula, a bhuku ga Nahume gi wonekisa ku khwatsi gi wulawula ntsena hi kuhahlulwa ka Niniva — tsinza wa matshanza wa Assiria wa kale. (Nah. 1:1; 3:7) Hambulezo, a mahungu lawo ma tile kota mahungu yo saseka ka vanhu va Jehova. Nahume, loyi a vito gakwe gi wulako ku “Mutangalisi,” i lo tiyisa vaJuda-kulobye lezaku a valala vabye va wa ta loviswa hi xihatla! Nahume i lo tlhela a va tiyisekisa lezaku Jehova i “khokhola a sikwini ga zikarato.” (Nah. 1:7) A xikhati lexi hi xumayelako, hinawu hi wulawula hi mahungu yo saseka ni ku tlhela hi kuca vanwani lezaku va lava wuchavelo ka Jehova. — Nah. 1:15.
3. Hi nga mu pimanyisisa kuyini Nahume kutiriseni ka zikombiso ni mifananiso?
3 Tirisa zikombiso ni mifananiso: Jehova i lo pimisela Nahume lezaku a fananisa a kuloviswa ka Niniva ni Tebas (Noamoni), doropa ga Gipite, legi gi nga lovisilwe hi Assiria. (Nah. 3:8-10) A xikhati lexi hi wulawulako ni vanhu hi ku loviswa ka matshamela yo biha ya tiko legi, hi nga tlhela hi va komba a ziprofeto za lomu ka Biblia le’zi kombako lezaku Jehova wa tatisa a gezu gakwe kala ka zilo za zi tsongwani nguvu. Hi xikombiso, a xikhati lexi a vaBabuloni ni vaMedi va nga vukela a doropa ga Niniva hi 632 Mahlweni ka Nguva ya Hina, ku lona vula ya hombe yi tata a Congo wa Tigre laha ka kuza a mati ya kona ma ya khungumula a xipanze xa khokhola go tiya nguvu ga doropa legi. Zonake Niniva i lo khoziswa hi xihatla, hi laha Jehova a nga wulile ha kona. — Nah. 1:8; 2:6.
4. Hi nga wulawulisa kuyini a zilo zo dlunyateka ni zo zwisiseka wutirelini?
4 Wulawula zilo zo dlunyateka ni zo zwisiseka: A matsalela ya Nahume ma wa hi yo tlhamuka ni yo hanya. A timhaka takwe ti wa hi to dlunyateka. (Nah. 1:14; 3:1) Hinawu hi fanele ku tirisa mawulawulela yo zwisiseka. (1 Kor. 14:9) Ka lienzo lo sangula, tekela ku dlunyatisa a xigelo xa lienzo la wena. Laha u gonzako Biblia ni vanhu, va vune ku engetela kukholwa kabye ka Jehova ni ka Mhaka yakwe ni ku tlhela va wona lezi a mahungu lawo ma tirisako zona ka vona wutsumbu. — Rom. 10:14.
5. Kutiyiswa muni hi ku kumako ka xiprofeto xa Nahume?
5 A bhuku ga Nahume, gi dlunyatisa khwatsi lezaku Nahume i wa kholwa hi kumbhelela lezaku a gezu ga Jehova ga tatiseka handle ko kanakana. Laha a tiko ga Satani gi yako kugumeseni ka gona, ha chavelelwa hi magezu ya Jehova lawa ma nge: “A hlokiselelo wu nga ta hata khati ga wumbiri.” — Nah. 1:9.