Engetela wutlhari ga wena wutirelini — hi ku khatalela lava va tsakelako marevista

Hikuyini zi nga za lisima: A vanhu vo tala va ranzako ku gonza marevista ya hina a va zi tsakeli ku gonza Biblia na hina. Kuzilava va xalala hi wukhongeli gabye, kutani va ti wona na va nga hi na xikhati xa ku gonza. Hambulezo, a xikhati lexi va gonzako a marevista ya hina hi kukhanzakanya, va nga ha sangula ku tsakela a Mhaka ya Nungungulu. (1 Ped. 2:2) A nzima yo kari yi nga tshuka yi va khumba mbilu, kutani a ziyimo zabye zi nga ha cica. A maenzo yo koma yo khanzakanya ma nga va maha va tlhatlheka ku bhula na hina, hi ndlela leyo zi hi vuna ku tiva lezi va zi ranzako ni lezi va karatekako hi zona. Hi magumo ku ga ha sangula xigonzo xa Biblia.

Mamahela ya kona:

• Hweti ni hweti, ti nyike xikhati xa ku mu yela ni marevista ya maswa — A Murinzeli ni Despertai! Kuzilava u nga mu enzela ka masiku manwani nzeni ka hweti leyo kasi ku mu engetela manyawunyawu ya ku lera a nzima yo kari yi nga ka marevista lawa u nga mu siyela kutani ku ya mu nyika bhuku gi nyikelwako ka hweti leyo. U nga rivali ku tsala timhaka ta siku ginwe ni ginwani u mu enzelako. — Wona a Wutireli ga hina ga Mufumo ga Janeiro wa 2014, p. 3.

• Ti longisele khati ni khati u lavako ku mu enzela. Wutshanwini ga ku ya siya marevista u ti fambela, koka bhulo ni nwinyi wa muti, u zama ku wumba wunghana naye kasi u zi kota ku hlakulela a kutsakela kakwe.

• Tshama na u longile ku lonzowota ni yihi nyangwa yi vululekako kasi ku sangula xigonzo. Loku a wokari ka lava u tolovelako ku va nyika marevista hweti ni hweti a ku wutisa lezi a Biblia gi zi wulako xungetano hi mhaka yo kari, mu yele ni bhuku ga xigonzo legi gi nga ni hlamulo wa kona, zonake mu bhula zinwe hi mhaka leyo. Na u nga se suka, vuxa xiwutiso xi yelanako ni mhaka leyo kasi ku ta bhula hi xona ka lienzo li tako. Loku mu tolovela kuva ni mabhulwana yo khanzakanya na mu tirisa Biblia kutani ginwe ga mabhuku ya hina ya xigonzo, wo fambisa xigonzo xa Biblia. Xana u mu nyikile a broxura Mahungu yo Saseka u tlhela u kombisanyana xigonzo xa Biblia? U mu kombile a tividiyu Hikuyini u faneleko ku gonza a Biblia? ni Xi mahisiwa kuyini a xigonzo xa Biblia? Hambu loku a munhu loye a nga vumelangi ku gonza xikhatini xi hunzileko, a ziyimo za cica. Xana zi nga vuna ku tlhela u ringisa ke?

Ka hweti leyi, ringisa lezi:

• Maha xaxameto wa vanhu va ringanako kuva ka xaxameto wa wena wa vatsakeli va marevista. Va nyike a marevista ya hweti leyi, u tlhela u va byela lezaku u ta va tela ni ya le’yi tako.