Sangula zigonzo za Biblia ni vatsakeli va marevista

1. Hikuyini a hlengeletano ya Jehova yi kucako a vahuweleli lezaku vava ni vanhu va va nyikako marevista hi kukhanzakanya?

¹ A vanhu vo tala a va tekeli ku vumela ku gonza Biblia na hina, kanilezi va zi ranza ku gonza marevista ya hina. Hikwalaho, a hlengeletano ya Jehova yita na yi kuca vahuweleli lezaku vava ni vanhu va va nyikako marevista hi kukhanzakanya. A xikhati lexi a vanhu va gonzako marevista ya hina hi kukhanzakanya, va tala ku sangula ku tsakela a Mhaka ya Nungungulu. (1 Ped. 2:2) Hi magumo, va nga ha gonza zilo zo kari zi va tsakisa zonake va vumela xigonzo xa Biblia.

2. Hi nga hlakulelisa kuyini kutsakela ka lava hi va nyikako marevista hi kukhanzakanya ke?

² Cheletela mati a timbewu ta lisine: Wutshanwini ga ku mu nyika marevista ntsena, bhula naye u zama ku maha wunghana. Lezi zi ta ku vuna ku tiva xiyimo xakwe, kutsakela kakwe ni lezi a zi kholwako, lezi zi to ku vuna ku wulawula naye hi wutlhari. (Mav. 16:23) Ni gihi siku u mu enzelako, ranga hi ku ti longisela. Loku zi koteka, khanyisa kutsongwani mhaka yo kari yi nga ka marevista lawo, zinwe ni mutsalo wu yelanako nayo. Hi ndlela leyo, u ta ngha u cheletela mati a timbewu ta lisine mbilwini yakwe. (1 Kor. 3:6) Tsala siku u mu enzeleko hi gona, mabhuku u mu nyikileko, ni timhaka zinwe ni mitsalo leyi mu bhulileko hi yona.

3. Hi fanele ku va enzela makhati mangani hi hweti lava hi va nyikako marevista hi kukhanzakanya?

³ Nzi mu enzela makhati mangani? U fanele ku mu enzela khati ginwe hi hweti kasi ku ya mu nyika marevista ya maswa. Kanilezi, hi kuya hi xiyimo xa wena ni kutsakela ka munhu loye, u nga ha boha a ku mu enzela makhati yo hlaya hi hweti. Hi xikombiso, anzhako ka viki ginwe kutani mambiri na u mu nyikile marevista, u nga ha tlhela u yaku: “Nzi tela ku ta ku komba zokari ka marevista lawa nzi nga ku nyika.” Lezo zi ta mu vuxela manyawunyawu ya ku lera nzima leyo. Loku a sina a lerile, u nga ha mu wutisa lezi a zi alakanyako hi nzima leyo mu tlhela mu bhulanyana hi zona. Kutani loku a munhu loye a ranza ku lera mabhuku ya hina, u nga ha tlhela u ya mu komba xiphephana, broxura, kutani a bhuku legi hi nyikelako ka hweti leyo.

4. Zini lezi hi nga tako na hi zi maha kasi ku tiva lezaku lava hi tolovelako ku va nyika marevista va nga vumela a xigonzo xa Biblia ke?

⁴ U nga rinzeli ku kala a nwinyi wa muti a ku kombela xigonzo xa Biblia. Ranga hi wena. Hambu loku a alile xigonzo xa Biblia xikhatini xi hunzileko, u ngata na u mu komba a nzima “Mihlamulo ya Biblia” ka Murinzeli zonake u wona lezaku wa zi tsakela ku hi bhula hi zona ke. Kuzilava u nga ha sangula xigonzo xa Biblia. Hambulezo, loku u nga zi koti ku sangula xigonzo xa Biblia, u nga ha simama ku mu fambela ni marevista lezaku u hlakulela kutsakela kakwe.