Vuna zikhumu lezaku zi gonza xungetano hi Jehova
1. Jesu i ku kombisisile kuyini kuzwela wusiwana hi zikhumu?
1 A masiku ya kufa ka Jesu ma wa kari ma tshinela. Na a kari a huma doropeni ga Jeriko, a zikhumu zimbiri zi lo kanyuluka ziku: “Hosi, . . . hi mahele wuxinji.” Hambu lezi a nga binziwa hloko hi minzhingo leyi yi nga mu rinzele, Jesu i lo nyima, a va vitana a tlhela a va hanyisa. (Mat. 20:29-34) Hi nga ku pimanyisisa kuyini a kuzwela wusiwana loku Jesu a nga hi nako hi zikhumu?
2. Hi nga zi kotisa kuyini ku nyika wukustumunyu a xikhumu hi xi kumako laha ndleleni?
2 Mu vune: Loku u kuma xikhumu laha ndleleni kutani ka wutshamu ginwani ti tivekise u tlhela u mu vuna. Kota lezi a vanhu lavo va tolovelako ku xololwa, a nga tshuka a ku kanakanela kusanguleni. Hambulezo, a xinghana xa wena ni kukhatala ka wena ka mbilu ku ta mu maha a tlhatlheka. Alakanya kambe lezaku a wukhumu ga vanhu ga hambana, niku lezo zi nga komba a ku xivuno xo kota kwihi xi lavekako. Anzhako ka ku mu vuna, kuzilava u nga ha mu byela lezaku u kari u maha ntiro wa ku gonzisa a Biblia. Mu gonzele mutsalo wo kota Tisimu 146:8 kutani Isaya 35:5, 6. Loku a zi kota ku gonza xiBraile, mu wutise ku wa zi lava ku kuma bhuku hi xiBraile legi gi to mu vuna ku gonza zotala xungetano hi Biblia ke. U nga tlhela u mu chisela mahungu ma thepilweko ka jw.org. Loku a hi ni komputadori yi nga ni longoloko wa ku lera zilo zi tsalilweko, a nga ha tsakela ku kuma tinzima ti nga ka jw.org zinwe ni mabhuku lawa ma nga chisiwako hi tshamela ga RTF. — Wona kwadru “A xikhati u vunako xikhumu . . . ”
3. Hi nga lavetelisa kuyini a zikhumu xipanzeni xa hina?
3 Lavetela a zikhumu: Za kala ku kuma zikhumu wutirelini ga hina ga muti ni muti hakuva a kutala ka zona a zi tlhatlheki ku wulawula ni munhu wo kala zi nga mu tivi. Hikwalaho, zi lava ku ti karata ka hombe kasi ku lavetela vanhu lavo kasi hi va nyika wukustumunyu. (Mat. 10:11) Xana u na ni mutiri-kuloni kutani xigonzani-kuloni xi nga xikhumu? Bhula naye. Loku a xipanze xa nwina xi hi ni xikola xa zikhumu, nyikela mabhuku ya hina ya xiBraile ka biblioteka ga xikola. Wa tiva munhu a nga ni xaka gi nga xikhumu ke? Lomu xipanzeni xa nwina ku na ni hlengeletano yi vunako zikhumu kutani tiyindlu ti hanyako zikhumu ke? Tlhamusela a munhu loyi u to mu kuma laha mutini, kutani a hosana ya wutshamu lego, lezaku a Timboni ta Jehova ti xuva nguvu ku vuna a zikhumu; mu nyike a mabhuku ya xiBraile kutani mahungu ma thepilweko. Mu kombe a xitsumbiso xa Biblia xa lezaku lokuloku Nungungulu i ta fuvisa wukhumu hi kumbhelela. U nga ha mu komba a vidiyu yi nga ka jw.org yi nga ni hloko ya mhaka, “Sem ela, eu me sentiria perdido,” yi hlawutelako a tshango ga wanuna wa xikhumu a bhinzulako hi kuva ni Biblia hi xiBraile. Hi ku tlhamusela a kungo ga wena ga ku mu enzela, zi nga ha vula ndlela ya lezaku u wulawula ni vanhu va nga zikhumu.
4. Zigonzo muni hi nga zi kumako ka tshango ga Janet?
4 A makabye wo kari wa xisati wa xikhumu a vitwako Janet, i lo enzela wutshamu gi tshamako zikhumu. I lo sangula bhulo ni nhanyana. Janet i lo mu byela lezaku, “Jesu i hanyisile zikhumu kasi ku komba lezi a to mahela vontlhe lava va nga zikhumu.” Va lo gonza zinwe a bhuku ga Kuvululelwa 21:3, 4, zonake Janet a tlhamusela lezi a xitsumbiso lexi xi to tatisiswa zona hi Mufumo wa Nungungulu. A nhanyana loyi i lo miyela aku hwi a guma aku: “Cima a nzi sezwa zilo zo kota lezi zi huma nonwini wa xikhumu. A vanhu vo tala va wonako va kholwa lezaku a vanhu va maha zikhumu hi kota ya nchumu wo kari va mahileko kutani wu mahilweko hi vakokwani vabye.” Janet i lo rumela khero ga bhuku A Biblia Gi Gonzisako ka nhanyana loye, niku zalezi va kari va gonza zinwe Biblia kumbiri hi viki.
5. Hambu lezi hi nga zi kotiko ku hanyisa zikhumu a ku fana ni lezi Jesu a nga maha, hi ta kuma makatekwa muni loku hi kombisa kukhatala hi zikhumu?
5 Kunene, a hi nge zi koti ku vulula matihlo ya vanhu a ku fana ni lezi Jesu a nga maha, kanilezi hi nga zi kota ku vuna vontlhe lava va pfhupelisilweko kupima hi nungungulu wa misava leyi, a ku patsa ni lava va nga zikhumu za xiviri, lezaku va zwisisa a lisine la Mhaka ya Nungungulu. (2 Kor. 4:4) Jesu i lo hanyisa vavanuna vambiri kusuhani ni Jeriko hi ku ‘va zwela wusiwana.’ (Mat. 20:34) Loku hi kombisa kukhatala ko fana ni loku Jesu a nga hi nako hi zikhumu, hi ta kuma lungelo ga ku vuna zokari lezaku zi gonza xungetano hi Jehova, loyi a to fuvisa a wukhumu giku bhi.
[Mufota ka phajina 3]
A xikhati u vunako xikhumu . . .
• Wulawula naye hi kukongoma, kanilezi u nga banguleki. A zikhumu a zi woni, kanilezi a kutala ka zikhati za ingisa khwatsi.
• Loku u kari u mu rangela, petsa woko ga wena, u mu tsika a ku khoma laha hehla ka xisungunu. I ta zi kota ku ku lanzela a xikhati u fambako na a hi ka pfhuka wa ku ringana khihlanya ga zambo nzhako ka wena. Loku u wona xibho, sinya, xikada kutani nchumu wunwani waku wu nga mu phinganyeta, mu tlharihise.
• Tlhatlheka ku tirisa magezu ma yelanako ni matihlo yo kota “wona” ni “cuwuka.” A zikhumu zonawu za ma tirisa. Za “wona” hi tindlela tinwani, hambu ku alakanyela a nchumu lowu wu wuliwako.
• Bhulani ka wutshamu go rula. A zikhumu a zi tizwi khwatsi ka matshamu lawa ma nga ni guwa ga hombe, hakuva za va karatela ku tiva a ku zini zi humelelako.
• Loku u suka mu byele. Lezo zi ta mu vikela a tingana ta ku wulawula ni munhu wo kala a nga ha hi kona.
• Loku a xikhumu xi kombisa kutsakela kanilezi na xi nga hanyi xipanzeni xa nwina, tatisa a formulario Queira Visitar (S-43) u nyika matsalani wa bandla.