Pimanyisa a xikombiso xa vaprofeti — Habakuka
1. Hikuyini hi nga ha vunekako hi xikombiso xa muprofeti Habakuka?
1 Laha hi wonako kuengeteleka ka wubihi tikweni legi hi nga ka gona, hi nga ha ti zwisa ko khwatsi hi lezi Habakuka a nga ti zwisa zona. I lo wutisa Jehova aku: “Hiyini u nzi kombisako kubiha, u nzi wonisa hlokiselelo?” (Hab. 1:3; 2 Tim. 3:1, 13) A ku ehleketa hi mahungu ya Habakuka ni xikombiso xakwe xo tsumbeka zi nga hi tiyisa hlana laha hi rinzelako siku ga Jehova ga kulamula. — 2 Ped. 3:7.
2. Hi nga kombisa kuyini lezaku hi hanya hi kukholwa nyamutlha?
2 Hanya hi kukholwa: Wutshanwini go mbhela ntamu hi ku alakanyela zikarato zakwe, Habakuka i lo simama ku tlhariha ni ku hiseka hi tlhelo ga moya. (Hab. 2:1) Jehova i lo mu tiyisa lezaku a gezu Gakwe gi wa ta tatiseka hi xikhati xi faneleko niku “loyi a lulamileko i ta hanya hi kukholwa kakwe.” (Hab. 2:2-4) Zi wula yini lezo ka maKristu lawa ma hanyako xikhatini lexi xa magumo ke? A ku kholwa lezaku a kugumesa ku ta chikela za lisima nguvu a ku hunza ku tiva lezaku ku tata rini. A kukholwa ku hi kuca ku tshama hi tlharihile hi tlhela hi rangisa a ntiro wa kuxumayela. — Maheb. 10:38, 39.
3. Hikuyini hi faneleko ku simama hi tirela Jehova hi kutsaka?
3 Tsaka hi ku tirela Jehova: A xikhati lexi Goge wa Magoge a to vukela a vanhu va Jehova, a kukholwa ka hina ku ta ringwa. (Ezek. 38:2, 10-12) A yimpi yi neha kuxaniseka, hambu ka lava hi magumo va hlulako. A zakuga zi nga ha kala. A vanhu va nga ha lahlekelwa hi zilo zabye, niku va nga ha sala wusiwaneni. Hi ta maha yini loku a zikarato lezo zi humelela? Habakuka i wa zi rinzele zikarato, hikwalaho i lo ti yimisela ku simama a tirela Jehova hi kutsaka. (Hab. 3:16-19) Hinawu, “a litsako la Jehova” li ta hi vuna ku timisela a zikarato lezi zi tako. — Neh. 8:10; Maheb. 12:2.
4. Litsako muni hi nga vako nalo zalezi ni xikhatini xi tako?
4 Vontlhe lava Jehova a to va ponisa ka siku gakwe ga kulamula le’gi tako va ta simama ku gonzisiwa a ku hanyisa lezi Nungungulu a zi lavisako zona. (Hab. 2:14) Lava va to vuxiwa vonawu va ta gonza xungetano hi Jehova. Hambu zezi, ngha hi lonzowota ni gihi lungelo kasi ku wulawula hi Jehova ni mitiro yakwe yo saseka! — Tis. 34:1; 71:17.