Ndlela ya ku vhunetela andzhako ka khombo ga ntumbuluko

Inyamutlha, a makhombo ya ntumbuluko ma khandzakanya ku humelela. Loku gi humelele, ku laveka ku a zvilo zvi xaxametiwa zvi tlhela zvi rangelwa khwatsi kasi zvi koteka ku vhuna lava va welweko hi khombo lego. Kasi lezvo zvi koteka, a Hubye yi Fumako yi mahile malulamiselo kasi a ravi ni ravi gi yimisa a Kometi ya ku Lamulela Timhako.

Loku a vamakabye va tirako ka dhepartamento leyi va tiva lezvaku ku humelele khombo ga ntumbuluko, va tekela ku bhula ni madhota ya cipandze leco va ta tiva lezvi zvi lavekako kasi ku vhuna vamakabye. Loku ku wonhekile zva hombe laha ka ku a vahuweleli lavo va nga zvi koti ku ti lungisela hi voce, a ravi gi yimisa vamakabye va wu tivako khwatsi ntiro kasi va rangela ntiro lowu wa ku va vhuna. A vamakabye lavo, va nga kombela vahuweleli kasi va vhunetela kutani minyikelo ya zvilo zvo kari, kutani va nga xava ka wutshamu lego lezvi zvi lavekako va tlhela va zvi phakela ka lava va nga welwa hi khombo.

A ku mahisa lezvi zvilo zvi ngava ni mabhindzu yo kari. Zvi maha ku ku nga mahiwi ntiro wa cinghemani, zvi tiveka khwatsi ku himani a vhunako vamani, ku nga xakelwi mali ni zvilo. Lezvo zvontlhe zvi wa ta humelela loku munhu ni munhu i wo ti mahela lezvi a zvi lavako kasi ku va vhuna.

A vamakabye lava va yimisiwako hi ravi, va nga hlola va tiva ku i mali muni ni vatiri vangani va to laveka kasi ku vhunetela. Zva koteka ku va bhulisana ni tihosana ta cipandze leco kambe kasi zvi koteka ku a ntiro lowo wu mahiwa hi cihatla kambe. Hikwalaho, loku ku humelela a khombo ga ntumbuluko, u nga zvi sukeli u hlengeleta mali, u rumela zvilo kasi ku vhuna vamakabye lavo, kutani ku endza u ya vhunetela na u nga kombeliwangi ku maha zvilo lezvo.

Hambulezvo, a lisine hi ku loku ku humela khombo ga ntumbuluko, hi lava ku vhuna vamakabye va hina. (Mah. 13:16) A cigelo hi ku ha va randza. Makunu, hi nga va vhunisa kuyini? A ca lisima ka zvontlhe, hi nga khongelela vamakabye lava va welweko hi khombo ni lava va va vhunako. Hi nga maha minyikelo kambe yiya ka ntiro wa hina wa misava yontlhe. A Hubye yi Fumako yi nga vhuna ravi a ku tiva ndlela ya yinene ya ku tirisa mali leyo. Loku hi lava ku vhunetela hi ntamu wa hina, hi nga komba lezvaku ha zvi lava hi ku prenxera a Petição para Voluntário do Departamento Local de Desenho/Construção (DC-50).

SIXTIRA VHIDHIO NDAMBI YI HOHLOTILEKO LE BRAZIL, U GUMESA U HLAMULA CIWUTISO LECI:

Cini ci ku tsakisileko xungetano hi ntiro wu mahilweko hi vamakabye kasi ku vhunetela andzhako ka ndambi le Brazil hi 2020?