Ndlela yo vhuxa wunghana ga wena na Jehovha

LEMBE ni lembe ku wuyela tiyivhu to tala bandleni ga wuKristu. A tiyivhu leto ta lisima nguvhu. Hi nga alakanyela a ‘litsako li vaku kona le tilweni’ laha ku wuyelako a yivhu yin’we ni yin’wani! (Luka 15:7, 10) Loku u wuyele bandleni, tiyiseka lezvaku Jesu, ni tingilozi, na Jehovha va tsakile nguvhu hi ku ku wona na u wuyele. Hambulezvo, laha u vhuxako wunghana ga wena na Jehovha, u nga tshuka u kumana ni zvikarato. Zvikarato muni u nga kumanako nazvo niku zvini zvi nga ku vhunako?

ZVIKARATO MUNI U NGA KUMANAKO NAZVO?

A vamakabye vo tala va tizwa na va nga vhuni nchumu andzhako ka loku va wuyele bandleni. Kuzvilava wa zvi zwisisa lezvi Hosi Dhavhidha a nga ti zwisa zvona, hambu andzhako ka loku a tsetselelwe zviwonho zvakwe. I wulile lezvi: ‘A zvigoho zva mina zva ndzi bindzela.’ (Lis. 40:12; 65:3) Andzhako ka loku a wokari a wuyele ka Jehovha, a nga tizwa nandzu ni tingana hi malembe yo tala. Isabel,a a nga mbheta cipimo ca 20 wa malembe na a susilwe bandleni, i wulile lezvi: “Zvi ndzi karatele nguvhu a ku vhumela ku Jehovha a nga ndzi tsetselela.” Phela loku u mbhela ntamu, u nga tlhelela ndzhako, u hola hi tlhelo ga moya. (Mav. 24:10) Zama ku nga zvi tsiki zvi ku humelela.

A vokari va alakanya lezvaku va nga ta zvi kota ku maha zvontlhe zvi lavekako kasi va vhuxa wunghana gabye na Jehovha. Andzhako ka loku António a wuyele bandleni, i wulile lezvi: “Ndzi wa ti zwisa ku ndzi wa gi rivele wutomi gontlhe ndzi nga hanya a cikhati ndzi nga hi muKristu.” A vokari a va mahi zvontlhe va zvi kotako ntirweni wa Jehovha hi kota ya ku ti zwisa lezvo.

Kota cikombiso, loku a wokari a hahlulelwa yindlu hi cingulo, a nga tshuka a karateka a zvi wona na zvi bindza ku yi vhuxa loku a alakanyela cikhati ni ntamu wu lavekako kasi ku yi vhuxa. Hi kufanana, loku a wunghana ga wena na Jehovha gi wonhekile hi kota ya ciwonho ca hombe, u nga zvi wonisa ku zvi lava ntiro wo bindza kasi ku vhuxa wunghana lego. Hambulezvo, u nga kuma civhuno.

Jehovha wa ku ramba, aku: ‘Tana, hi [ta] wulawulisana timhaka’. (Isa. 1:18) Phela a kuza u wuyela bandleni hi ku u sina u tirile yi nga chayi kasi ku lulamisa “timhaka” na Jehovha. Jehovha wa ku randza nguvhu hi kota ya lezvi u ti karatileko u maha. Hi nga ehleketa hi lezvi: Lezvi u nga wuyela, Jehovha a nga ku tirisa kasi ku hlamula loyi a mu rukako, ina, kota cikombiso ci nene ca ku Sathani muhembi! — Mav. 27:11.

Lezvi u nga wuyela bandleni, u lomu ko tshinela ka Jehovha u vhuxa wunghana ga wena naye, yenawu i tsumbisa ku tshinela ka wena. (Jak. 4:8) Zvi nene kambe a ku a van’wani va ku wona na u wuyile kota ciro ca bandla. Hambulezvo, ku ni zvin’wani u faneleko ku maha. U fanele ku simama u tiyisa lirandzo la wena hi Jehovha, a Papayi tlhelo Munghana wa wena. U nga zvi mahisa kuyini?

TI VEKELE MIXUVO ZVI KOTEKAKO KU YI TATISA

Zama ku ti vekela mixuvo zvi kotekako ku yi tatisa. Zva koteka ku na wa ha zvi alakanya a zvilo zva tshinya u zvi gondzileko xungetano hi Jehovha ni zvitsumbiso zvakwe. Kanilezvi zvezvi, u fanele ku vhuxeta kuva ni longoloko wa wu nene hi tlhelo ga moya. Hi cikombiso, u fanele ku chumayela, uya mitlhanganweni, u mbheta cikhati ni vamakabye, zvontlhe u zvi maha hi kukhandzakanya. Wona mixuvo u nga ti vekelako.

Bhula na Jehovha hi kukhandzakanya. Papayi wa wena Jehovha wa zvi tiva ku a ku tizwa nandzu hi kota ya zvilo zvo biha lezvi u zvi mahileko zvi nga maha ku zvi ku karatela ku khongela ka yena. (Rom. 8:26) Hambulezvo, ‘khongela u nga tsiki’ u byela Jehovha lezvi u zvi lavisako zvona kuva munghana wakwe. (Rom. 12:12) André i alakanya lezvi: “Ndzi wa tizwa nandzu ni tingana ta hombe nguvhu. Kanilezvi, khati ni khati ndzi nga khongela, zvi wo hunguleka. Ndzi waya ndzi kuma kurula ka hombe.” Loku u nga ci tivi ca ku khongela, wona mikhongelo leyi Hosi Dhavhidha a nga yi maha a cikhati a nga ti sola, yi tsalilweko ka Lisimu 51 ni 65.

Gondza Bhibhiliya hi kukhandzakanya. Lezvo zvi ta ku vhuna ku uva ni kukholwa ko tiya zvi tlhela zvi ku vhuna ku a lirandzo la wena hi Jehovha li kula. (Lis. 19:7-11) Felipe i wula lezvi: “Phela leci ci nga ndzi maha ndzi khunguvanyisa Jehovha, hi ku ndzi wa nga hi na longoloko wa ku lera Bhibhiliya ni ku maha cigondzo ca mina wutsumbu. Ndzi wa nga lavi ku phinda ciwonho leco. Hikwalaho, ndzi no ti mahela ciboho ca ku maha a cigondzo ca mina wutsumbu hi kukhandzakanya.” Wenawu u nga maha zvalezvo. Loku u lava ku tiva lezvi u nga gondzako ka cigondzo ca wena, u nga kombela makabye a nga ni wunghana go tiya na Jehovha lezvaku a ku vhuna?

Vhuxa wunghana ga wena ni vamakabye. A vokari va wuyeleko bandleni va karateka hi ku alakanya ku a vamakabye va nga ta va randza. Larisa i wulile lezvi: “A cikhati ndzi nga wuyela ndzi wa dhana zvo khwatsi ndzo lava ni ku nyeka. Ndzi wa ti zwisa ku ndzi wonhele vamakabye vontlhe. Ku hundzile cikhati co leha na ndzi ti zwisa lezvo.” Tiyiseka lezvaku a madhota ni vamakabye van’wani vo buvha va zvi lava ku ku vhuna ku vhuxa wunghana ga wena na Jehovha. (Wona kwadru “Lezvi a madhota ma nga mahako!”) Va tsaka nguvhu hi lezvi u wuyeleko, niku va lava ku zvi ku fambela khwatsi! — Mav. 17:17.

Zvini u nga mahako kasi a vamakabye va tlhatlheka ku maha wunghana na wena va tlhela va ku randza? Ti patse ni vamakabye ka zvontlhe va mahako hi kuya mitlhanganweni ni kuchumayeleni hi kukhandzakanya. Lezvo zvi ta ku vhunisa kuyini? Félix i wula lezvi: “A vamakabye va wa zvi lava nguvhu a ku ndzi wuyela. Lezvo zvi ndzi mahile ndzi tizwa na ndzi hi wa lisima. Vontlhe va ndzi vhunile ku ndzi tizwa na ndzi lumba bandla kambe, Jehovha na a ndzi tsetselele, ndzi tlhela ndzi zvi wona ku ndzi ta zvi kota a ku simama ndzi tirela Jehovha.” — Wona kwadru: “Lezvi u nga mahako!”

U NGA MBHELI NTAMU!

Sathani i ta simama ku ku vangela zvikarato kasi u mbhela ntamu laha u zamako ku vhuxa wunghana ga wena na Jehovha. (Luka 4:13) Tshama na u longile hi ku tiyisa wunghana ga wena na Jehovha zvezvi.

Jehovha i tsumbisa lezvi xungetano hi tiyivhu takwe: ‘Ndzi ta lava leyi yi nga lahlekile, ndzi wuyisa leyi yi nga pengisilwe, ndzi bohelela leyi yi tshovilweko, ndzi tiyisa leyi yi babyako.’ (Ezek. 34:16) Jehovha i sina a vhunile votala va nga wonhile lezvaku va vhuxa wunghana naye. Tiyiseka lezvaku i zvi lava nguvhu a ku ku vhuna ku vhuxa wunghana ga wena naye — a wunghana go tiya gi ku nde.

Lezvi a madhota ma nga mahako!

A madhota hi wona ma nga ni ntiro wa hombe kasi ku vhuna munhu a wuyeleko bandleni lezvaku a vhuxa wunghana gakwe na Jehovha. Wona lezvi ma nga va vhunisako zvona:

Va tiyiseni. Mupostoli Pawule i wa zvi tiva ku loyi a wuyeleko bandleni a nga tshuka a ‘reriwa hi kubayiseka ka hombe’. (2 Kor. 2:7) Zva olova ku azwa tingana a tlhela a mbhela a ntamu. Pawule i kucile bandla, aku: “Mu fanele ku mu tsetselela ni ku mu chavelela.” Loyi a wuyeleko bandleni i zvi lava nguvhu a ku tiyisekisiwa lezvaku Jehovha ni vamakabye va mu randza nguvhu. Loku a madhota ma tolovela ku mu dzundza ni ku mu vhuna, zvi nga mu tiyisa nguvhu.

Khongelani navo. A Bhibhiliya gi: “A mukhongelo wa munhu wo lulama wa vhuna nguvhu.” (Jak. 5:16) Larisa, hi mu kumbukileko kusanguleni, i wula lezvi: “Ndzi no byela madhota lezvi ndzi nga zvi kanakanela ni lezvi ndzi nga zvi chava. Ma no khongela na mina ma tlhela ma ndzi khongelela. Ndzi no zvi zwisisa ku a madhota ma wa nga ndzi zangarelangi. Ma wa lava ku ndzi vhuna ku vhuxa wunghana ga mina na Jehovha.” Teófilo i wula lezvi: “A mikhongelo ya madhota yi ndzi mahile ndzi tiyiseka ku Jehovha wa ndzi randza niku i wona zva zvi nene ka mina, na ku nga hi zva hava.”

Mahani wunghana navo. A munhu a wuyeleko i lava vanghana lomu bandleni. A dhota go kari ga ku hi Justino gi wula lezvi: “Zva lisima nguvhu a ku londzowota ni wihi mole u va ramba ku ya tira navo kuchumayeleni, ni ku va vhuxela lomu mitini yabye. A nchumu wun’wani wa lisima nguvhu ku maha wunghana navo. Lezvo zva vhuna nguvhu.” A dhota gin’wani ga ku hi Henrique gi wula lezvi: “Loku a vamakabye lomu bandleni va wona madhota na ma maha wunghana ni loyi a wuyeleko, vonawu va ta ti karatela ku maha zvezvo.”

Va vhuneni ku gondza. A munghana wo buvha hi tlhelo ga moya a nga vhuna loyi a wuyeleko a ku a randza ku gondza. A dhota go kari ga ku hi Dário, gi wula lezvi: “Ndzi randza ku va bhulela lezvi ndzi zvi kumileko ka cigondzo ca mina, ni ku va komba lezvi ndzi tsakisako zvona hi ku gondza Bhibhiliya. Ndzi tlhela ndzi maha malulamiselo ya ku gondza navo mahungu yo kari yo tiyisa.” A dhota gin’wani ga ku hi Clayton, gi wula lezvi: “Ndzi va kuca ku gondza matimu ya Bhibhiliya ya vanhu va kumeneko ni ciyimo co fana ni leci cabye, ni ku va wona lezvi va nga gondzako ka wona.”

Va maheleni tiendzo ta wurisi. Lava va nga wuyela va wa wona madhota kota valamuli. Lezvi va nga wuyela, zvi laveka nguvhu a ku va va wona kota varisi. (Jer. 23:4) Hatlisani kuzwa ni ku va dzundza. Bhulani navo hi kukhandzakanya. Wona lezvi a dhota go kari ga ku hi Marku gi mahako loku gi va mahela liendzo la wurisi: “Hi gondza navo Mitsalo, hi va dzundza hi tlhela hi va tiyisekisa lezvaku ha tizwa matshandza hi lezvi va ti karatileko va wuyela bandleni, niku Jehovha yenawu i ti zwisa lezvo. Loku hi gumesa liendzo lelo, hi tekela ku boha siku ga liendzo lin’wani.”

a A mavito ma cicilwe.