U nga hanya kala kupindzuka

1. A ku ehleketa hi citsumbiso ca Jehovha ca wutomi ga pindzukelwa zvi hi vhunisa kuyini?

JEHOVHA i tsumbisa lezvaku lava va mu ingisako va ta kuma “wutomi ga pindzukelwa”. (Rom. 6:23) A cikhati leci hi ehleketako hi citsumbiso leci, handle ko kanakana a lirandzo la hina hi Jehovha liya li kula nguvhu. Ehleketa hi lezvi: A Papayi wa hina wa le tilweni wa hi randza nguvhu laha ka ku hi nga ta tshuka hi hambana naye.

2. A citsumbiso ca wutomi ga pindzukelwa ci hi vhunisa kuyini?

² A citsumbiso ca Nungungulu ca wutomi ga pindzukelwa ci hi vhuna ku timisela a zvikarato lezvi hi kumanako nazvo zvezvi. Hambu loku a valala va hina va hi dzukisela va ku va ta hi daya, hi nga ta tshuka hi nyima ku tirela Jehovha. Hikuyini? A cin’we ca zvigelo hi ku ha zvi tiva lezvaku loku hifa na hi tsumbekile ka Jehovha, i ta hi vhuxa hi ka vafileko na hi hi ni kutsumba ka ku hanya kala kupindzuka. (Joh. 5:28, 29; 1 Kor. 15:55-58; Mah. 2:15) Hikuyini hi nga tiyisekako lezvaku zva koteka ku hi hanya kala kupindzuka? A hi woneni a zvigelo lezvi zvi landzelako.

JEHOVHA I HANYA KALA KUPINDZUKA

3. Cini ci hi tiyisekisako lezvaku Jehovha a nga hi maha ku hi hanya kala kupindzuka? (Lisimu 102:12, 24, 27)

³ Ha zvi tiva lezvaku Jehovha a nga zvi kota ku hi maha ku hi hanya kala kupindzuka hakuva hi yena cibuka ca wutomi, niku i hanya kala kupindzuka. (Lis. 36:9) Wona a mavhesi ma tsongwani ma kombako lezvaku Jehovha contlhe cikhati i vile kona niku contlhe cikhati i tava kona. A Lisimu 90:2 li wula lezvaku Jehovha i kona ‘kusukela kupindzukeni kala kupindzuka’. A Lisimu 102 li wula zvilo zvo fana. (Lera Lisimu 102:12, 24, 27.) Muphrofeti Habhakuka i tsalile lezvi xungetano hi Papayi wa hina wa le tilweni: ‘Kasi a wu sukeli kupindzukeni, wena Jehovha Nungungulu wa mina, loyi a Basileko wa mina ke? A wufi.’ — Hab. 1:12, NWT.

4. Xana hi fanele ku karateka loku zvi hi karatela a ku zwisisa lezvaku Jehovha contlhe cikhati i kona? Tlhamusela.

⁴ Zva ku karatela a ku zwisisa lezvaku Jehovha i ‘Nungungulu wa pindzukelwa’? (Isa. 40:28) Lezvo a zvi hlamalisi. Elihu i wulile lezvi xungetano hi Nungungulu: ‘A ntsengo wa malembe yakwe a wu na ku hlayiwa [wu hundza kupimisisa ka hina].’ (Joba 36:26) Kanilezvi a ku kala ku zwisisa nchumu wo kari a zvi wuli ku a hi lisine. Hi cikombiso, hambu lezvi kuzvilava hi kalako hi nga zvi zwisisi hi kumbhelela lezvi a kuwonekela ku tirisako zvona, a ku lezvo zvi wula ku a ku na kuwonekela? Ne ni kutsongwani! Hi kufanana, hina vanhu kuzvilava hi nga ta tshuka hi zvi zwisisa hi kumbhelela a ku hi ndlela muni contlhe cikhati Jehovha a nga kona niku hi ndlela muni contlhe cikhati a tova kona. Kanilezvi lezvo a zvi wuli ku Nungungulu a nga hanyi kala kupindzuka. A Muvangi a nga gumelwi ka lezvi hi zvi zwisisako kutani ka lezvi hi kalako hi nga zvi zwisisi. (Rom. 11:33-36) Jehovha i vile kona wuakweni gontlhe na ku nga seva ni nchumu, a ku patsa ni zvibuka zvontlhe zva kuwonekela zvo kota gambo. Ha tiyiseka lezvaku Jehovha “i vangile misava hi ntamu wakwe”. Ina, i vile kona mahlweni ka ku a “tshambulutile tilo”. (Jer. 51:15; Miti. 17:24) Hi cihi cin’wani cigelo ci hi tiyisekisako lezvaku zva koteka ku hi hanya kala kupindzuka?

HI VANGILWE KASI HI HANYA KALA KUPINDZUKA

5. Kutsumba muni loku Adhamu na Evha va nga hi nako?

⁵ Jehovha i vangile a zvilo zvontlhe zvi hanyako laha misaveni kasi zvi hanya hi cikhati co kari, kanilezvi a vanhu i va vangele ku hanya kala kupindzuka. I hi nyikile a kutsumba ko hlawuleka ka ku hanya hi ngafi. Hambulezvo, Jehovha i tlharihisile Adhamu, aku: “A sinya ya ku tiva kusaseka ni kubiha u nga yigi; hakuva a siku lego u ta nga yiga, u tafa.” (Gen. 2:17) Loku Adhamu na Evha va wa no ingisa Jehovha na va nga fangi. Zva zwisiseka a ku chikelela lezvaku hi magumo, Jehovha na a va vhumelele ku vaga a “sinya ya wutomi”. Lezvo na zvi va tiyisekisile lezvaku va wa ta ‘hanya kala kupindzuka’.b — Gen. 3:22.

6-7. a) Zvini zvin’wani zvi kombako lezvaku a vanhu a va vangelwangi kufa? b) Zvini u zvi lavako ku maha misaveni yiswa? (Wona mifota.)

⁶ Zva hlamalisa lezvi a titlhari to kari ti polileko a zvikombiso zvi kombako ku a wongo ga hina gi na ni ntamu wa ku vekisa a mahungu yo tala nguvhu ya ku hundza lawa hi ma vekisako ka cikhati contlhe ca wutomi ga hina. Hi 2010, a jornali go kari gi tlhamusele lezvaku a wongo ga munhu gi na ni ntamu wa ku vekisa a mahungu ya kwalomo ka 2,5 wa timiliyoni ta ma gigabaite, zvi nga kwalomo ka 3 wa timiliyoni wa tihora (ku nga 300 wa malembe ni ku hundza) ta vhidhio yi gravharilweko. Lezvo zvi komba ku a wongo ga hina gi nga vekisa a mahungu yo tala nguvhu yo hundza lawo, lezvi zvi kombako ku Jehovha i vangile a wongo ga hina na gi hi ni ntamu wa ku vekisa mahungu yo tala nguvhu a ku hundza lawa a munhu a ma vekisako ka 70 kutani 80 wa malembe lawa a hanyako. — Lis. 90:10.

⁷ Jehovha i hi vangile na hi hi ni kuxuva ka hombe ka ku hanya kala kupindzuka. A Bhibhiliya gi wula lezvaku Nungungulu ‘i vekile timbilwini ta hina a ku alakanya cikhati ci nga mbheliko’. (Mutsh. 3:11) Leco cin’we ca zvigelo zvi hi mahako hi wona a kufa kota nala. (1 Kor. 15:26) Loku hi babya, a ku ho tshama hi rindzela kufa basi hi nga mahi nchumu? Ahihi. A kutala ka zvikhati hiya cipitali hi tlhela hinwa mimiri ya ku tira mababyi ya hina. Hi lisine, hi maha zvontlhe hi zvi kotako kasi hi ngafi. Loku kufa munhu wo kari hi mu randzako, kani i n’wanana kutani munhu wa hombe, hizwa kubayisa ka hombe hi cikhati co leha. (Joh. 11:32, 33) Kunene, a Muvangi wa hina wa lirandzo na a nga hi mahangi na hi hi ni kuxuva ni ntamu wa ku hanya kala kupindzuka loku i wa nga hi na kungo ga ku a vanhu va hanya kala kupindzuka. Ku na ni zvin’wani zvigelo zvo tala zvi hi kholwisako lezvaku zva koteka ku hi hanya kala kupindzuka. A hi woneni zvilo zvo kari lezvi Jehovha a zvi mahileko cikhatini ci hundzileko ni lezvi a zvi mahako zvezvi zvi kombako lezvaku a nga cicangi a kungo gakwe go sangula.

A KUNGO GA JEHOVHA A GI CICANGI

8. Hi kuya hi kungo legi Jehovha a nga nago hi hina, citiyisekiso muni hi ci kumako ka Isaya 55:11?

⁸ Hambu lezvi Adhamu na Evha va nga wonha va tlhela va va tisela kufa a vana vabye, Jehovha a nga cicangi maalakanyo yakwe xungetano hi kungo gakwe. (Lera Isaya 55:11.) Jehovha wa ha hi ni kungo ga lezvaku a vanhu vo tsumbeka va hanya kala kupindzuka. Lezvo hi zvi tiva hi kota ya lezvi Jehovha a nga wula ni ku maha kasi ku tatisa kungo gakwe.

9. Zvini lezvi Nungungulu a hi tsumbisileko? (Danieli 12:2, 13)

⁹ Jehovha i tsumbisile lezvaku i ta vhuxa vafileko, a va nyika a lungelo ga ku hanya kala kupindzuka. (Miti. 24:15; Tit. 1:1, 2) Joba, a wanuna wo tsumbeka, i wa tiyiseka lezvaku Jehovha wa zvi xuva nguvhu a ku vhuxa vafileko. (Joba 14:14, 15) Muphrofeti Dhaniyeli i wa zvi tiva lezvaku a vanhu va na ni kutsumba ka ku vhuxiwa hi ka vafileko, va nyikiwa a lungelo ga ku hanya kala kupindzuka. (Lis. 37:29; lera Danieli 12:2, 13.) A vaJudha va masikwini ya Jesu vonawu va wa zvi tiva lezvaku Jehovha i ta ma nyika a “wutomi ga pindzukelwa” a malandza yakwe yo tsumbeka. (Luka 10:25; 18:18) Jesu i wulawulile hi citsumbiso leci hi kuphindaphinda niku yena wutsumbu i vhuxilwe hi ka vafileko hi Papayi wakwe.— Mat. 19:29; 22:31, 32; Luka 18:30; Joh. 11:25.

10. A kuvhuxiwa ka vafileko loku ku mahekileko cikhatini ci hundzileko ku komba yini? (Wona mufota.)

¹⁰ Jehovha hi yena Munyiki wa Wutomi niku i na ni ntamu wa ku vhuxa vafileko. I mu nyikile ntamu muphrofeti Elija wa ku a vhuxa a n’wana wa noni ya le Zarefate. (1 Tih. 17:21-23) Andzhako ka lezvo, hi ku vhuniwa hi Nungungulu, muphrofeti Elixa i vhuxile a n’wana wa wasati wa muXuname. (2 Tih. 4:18-20, 34-37) A zvikombiso lezvi ni zvin’wani zva kuvhuxiwa ka vafileko zvi komba lezvaku Jehovha i na ni ntamu wa ku vhuxa vanhu hi ka vafileko. A cikhati leci Jesu a nga hi laha misaveni i kombile lezvaku a Papayi wakwe i mu nyikile a ntamu lowo wa ku vhuxa vafileko. (Joh. 11:23-25, 43, 44) Zvezvi Jesu i le tilweni niku i nyikilwe “ntamu wontlhe le tilweni ni laha misaveni”. Hikwalaho, Jesu i ta tatisa a citsumbiso ca ku “vontlhe lava va nga zvilahleni” va ta vhuxiwa va hanya na va hi ni kutsumba ka ku simama va hanya kala kupindzuka. — Mat. 28:18; Joh. 5:25-29.

11. A hakhelo ya kutlhatlhisa yi maha ku zvi koteka lezvaku hi hanya kala kupindzuka hi ndlela muni?

¹¹ Hikuyini Jehovha a nga vhumelela lezvaku a N’wana wakwe wo randzeka afa hi fela go bayisa? Jesu i wulile a cigelo ca kona, aku: “Hakuva Nungungulu i no randza nguvhu tiko laha ka kuza a nyikela N’wana wakwe a pswalilweko yece, kasi ni wihi loyi a kholwako kakwe a nga lovisiwi, kanilezvi a kuma wutomi ga pindzukelwa.” (Joh. 3:16) Hi ku nyikela a n’wana wakwe kota hakhelo ya kutlhatlhisa kasi hi tsetselelwa a zviwonho zva hina, Nungungulu i no maha lezvaku zvi koteka ku hi kuma wutomi ga pindzukelwa. (Mat. 20:28) Mupostoli Pawule i tlhamusele a cipandze leci ca lisima ca kungo ga Nungungulu a cikhati a nga tsala ku: “Kota lezvi a kufa ku tileko hi ka munhu, a kuvhuka ka vafileko konawu kuta hi ka munhu. Hakuva kota lezvi vontlhe va fako hi ka Adhamu, hizvalezvo ni ka Kristu vontlhe va ta hanyisiwa.” — 1 Kor. 15:21, 22.

12. A Mufumo wa Nungungulu wu ta vhunisa kuyini lezvaku a kungo ga Jehovha hi hina gi tatiseka?

¹² Jesu i gondzisile a vapizani vakwe lezvaku va khongelela ku a Mufumo wa Nungungulu wuta niku a kurandza ka Nungungulu ku mahiwa laha misaveni. (Mat. 6:9, 10) A cipandze ca kungo ga Nungungulu ku a vanhu va hanya kala kupindzuka laha misaveni. Kasi ku tatisa lezvo, Jehovha i yimisile a N’wana wakwe kota Hosi ya Mufumo wa wuMesiya. Nungungulu i kari a hlengeleta a 144 000 wa vanhu va laha misaveni kasi va tira zvin’we na Jesu kutatiseni ka kurandza ka Nungungulu.— Kuv. 5:9, 10.

13. Zvini lezvi Jehovha a mahako zvezvi, niku zvini lezvi hina hi faneleko ku maha?

¹³ Zvezvi Jehovha i kari a hlengeleta “citshungu ca hombe” ca vanhu a va gondzisa ku hanya hi nayo wa Mufumo wakwe. (Kuv. 7:9, 10; Jak. 2:8) Hambu lezvi va hanyako ka tiko gi avanyekileko hi kota ya kuchava ni tiyimpi, lava va wumbako a ntlawa lowo va ti karatela a ku hlula ni lihi livengo, kani la tiko kutani lixaka. Va komba hi mitiro yabye lezvaku va ‘bethile zvipadha zvabye zvi maha zvikomu’. (Mika 4:3) Wutshan’wini ga ku ti patsa ka tiyimpi leti ti mahako lezvaku kufa vanhu vo tala, va vhuna vanhu a ku kuma a “wutomi legi hakunene gi nga wutomi” hi ku va gondzisa xungetano hi Nungungulu wa lisine ni makungo yakwe. (1 Tim. 6:19) A maxaka yabye ma nga tshuka ma va vhukela kutani ku tshuka va xaniseka hi ku vhumala mali hi lezvi va seketelako a Mufumo wa Nungungulu, kanilezvi Jehovha i maha lezvaku va kuma lezvi zvi lavekako kabye. (Mat. 6:25, 30-33; Luka 18:29, 30) Lezvo zvi hi tiyisekisa lezvaku a Mufumo wa Nungungulu Mufumo wa lisine niku wu ta simama ku tatisa kungo ga Jehovha.

HI RINDZELA ZVILO ZVO SASEKA NGUVHU

14-15. A citsumbiso ca Jehovha ca ku fuvisa kufa kala kupindzuka ci ta tatisekisa kuyini?

¹⁴ Zvezvi Jesu i Hosi ya Mufumo wa Nungungulu le tilweni niku i ta tatisa zvontlhe a zvitsumbiso lezvi Jehovha a zvi mahileko. (2 Kor. 1:20) Kusukela hi 1914, Jesu i kari a fuma cikari ka valala vakwe. (Lis. 110:1, 2) Jesu ni lava a to fuma navo zvezvanyana va ta mbhetisa a kuhlula kabye, va lovisa vontlhe a vanhu va kubiha. — Kuv. 6:2.

¹⁵ Ndzeni ka 1000 wa malembe ya kufuma ka Jesu, a vafileko va ta vhuxiwa niku a vanhu vo ingisa va ta mbhelela. Andzhako ka ku ringwa go gumesa, lava Jehovha a to va lamula kota valulamileko ‘va taga tshomba ya tiko, va aka ka gona kala kupindzuka’. (Lis. 37:10, 11, 29) Leci ci tsakisako hi ku a nala wo gumesa, a “kufa”, i ta “lovisiwa”. — 1 Kor. 15:26.

16. Hi cihi cigelo ca hombe ci hi mahako hi tirela Jehovha?

¹⁶ Kota lezvi hi zvi wonileko, a kutsumba ka hina ka ku hanya kala kupindzuka ku na ni ciseketelo co tiya lomu ka Mhaka ya Nungungulu. A kutsumba loko ku hi vhuna ku simama hi tsumbekile ndzeni ka masiku lawa yo gumesa ya zvikarato. Kanilezvi kasi ku tsakisa Jehovha hi fanele ku kuciwa hi zvo hundza a kuxuva ku hanya kala kupindzuka. A cigelo ca hina ca hombe ci hi mahako hi simama hi tsumbekile ka Jehovha na Jesu hi lezvaku ha va randza nguvhu. (2 Kor. 5:14, 15) A lirandzo lelo li hi kuca ku hi va pimanyisa hi tlhela hi byela van’wani a kutsumba loku hi nga nako. (Rom. 10:13-15) Laha hi gondzako ku nga ti kokeli ga hina hi tlhela hi hana, hiva vanhu lava Jehovha a lavako lezvaku vava vanghana vakwe kala kupindzuka. — Mah. 13:16.

17. Zvini lezvi a mun’we ni mun’wani wa hina a faneleko ku maha? (Matewu 7:13, 14)

¹⁷ Xana hi tava cikari ka lava va to kuma wutomi ga pindzukelwa? Jehovha i vhululile ndlela ya lezvaku lezvo zvi koteka. Makunu zvi le ka hina a ku hi simama ku famba ndleleni yi yisako wutomini. (Lera Matewu 7:13, 14.) Gi ta tshamisa kuyini a wutomi a cikhati leci hi to hanya kala kupindzuka? A ndzima yi landzelako yi ta hlamula a ciwutiso leci.