U nga hanya misaveni yiswa yo rula ya Nungungulu!

NUNGUNGULU i vekile Adamu na Eva lomu sinwini ga Edeni. Hambu lezi va nga kala ku mu ingisa, Nungungulu i vululile ndlela ya lezaku a vana vabye, a ku patsa na hina inyamutlha, hi hanya kala kupinzuka Paradiseni. A Biblia gi tsumbisa lezi: “A valulamileko va taga tshomba ya tiko, va aka ka gona kala kupinzuka.” — Tisimu 37:29.

A Biblia gi wulawula hi “matilo maswa ni misava yiswa.” (Isaya 65:17; 2 Pedro 3:13) A “matilo” lawa ma nga kona zezi ma wumbiwa hi mifumo ya vanhu, kanilezi Jesu Kristu ni lava va to fuma zinwe naye le tilweni va ta wumba a “matilo maswa.” Hi nga alakanyela lezi zi to tsakisisa zona a xikhati lexi a matilo maswa, ku nga mufumo wo lulama wa Nungungulu, wu to fuma misava yontlhe!

Makunu, xini a “misava yiswa?” — A misava yiswa ku tava vanhu va va nene lava va ranzako Jehova. Tiva lezaku ka zikhati zinwani loku a Biblia gi wulawula hi “misava,” gi wula vanhu va hanyako laha misaveni, na ku nga hi misava ha yoce. (Genesisi 11:1,  Tradução do Novo Mundo; Tisimu 66:4; 96:1) Hikwalaho, a vanhu lava va wumbako misava yiswa va ta hanya kwalaha misaveni.

Ka xikhati lexo, a tiko go biha legi gi nga kona zalezi gi nga ta hava kona. Alakanya lezaku a Ndambi ya xikhatini xa Noa yi lovisile a tiko go biha — ku nga vanhu vo biha. Niku kota lezi hi sinako hi gonzile, a tiko legi go biha gi ta lovisiwa yimpini ya Har–Magedoni. A hi wone a ku wutomi muni gi tova kona misaveni yiswa ya Nungungulu, anzhako ka yimpi ya Har–Magedoni.

Wa zi lava ku hanya kala kupinzuka Paradiseni misaveni yiswa yo rula ya Nungungulu? — A ku na dokodela a zi kotako ku hi tira hi hanya kala kupinzuka, ne a ku na muri kambe wu nga ni ntamu wa ku susa kufa. Lexi xi lavekako kasi hi hanya kala kupinzuka, ku maha vanghana va Nungungulu ntsena. Niku Mugonzisi wa Hombe i wulile lezi hi nga mahisako zona vanghana va Nungungulu.

A hi vulule a maBiblia ya hina ka Johani xipimo 17, vesi 3. Hi kuma a magezu lawa ya Mugonzisi wa Hombe: “A wutomi ga pinzukelwa hi kuva va ku tiva, wena Nungungulu wece wa zinene, na Jesu Kristu loyi u mu rumileko.”

Makunu, zini lezi Jesu a nga wula ku hi fanele ku maha kasi hi hanya kala kupinzuka? — A kuranga, hi fanele ku tiva Jehova, a Papai wa hina wa le tilweni; ni N’wana wakwe, loyi a nyikeleko wutomi gakwe hi kota ya hina. Lezo zi wula ku hi fanele ku gonza a Biblia. A bhuku Gonza ka Mugonzisi wa Hombe, galegi hi lerako, gi hi vuna ku gonza a Biblia.

Kanilezi, a ku gonza xungetano hi Jehova zi ta hi vuna ku hanya kala kupinzuka hi ndlela muni? — A ku fana ni lezi hi lavako zakuga siku ni siku, hi fanele ku gonza xungetano hi Jehova siku ni siku. A Biblia gi ngalo: “A munhu a nga ta hanya hi xibaba xoce, kanilezi hi timhaka tontlhelele leti ti humako nonwini wa Nungungulu.”— Mateu 4:4.

Hi fanele ku tiva Jesu Kristu kambe hakuva Nungungulu i rumele N’wana wakwe Jesu lezaku a ta susa zionho za hina. A Biblia gi wula lezi: “A ku kona kuhanyiswa hi ka munwani.” Gi tlhela giku: “Loyi a kholwako ka N’wana i na ni wutomi ga pinzukelwa.” (Mitiro 4:12; Johani 3:36) Makunu wa kholwa ka Jesu ni lezaku a hi nge hanyi kala kupinzuka ahandle ka yena? — Loku ku hi lezaku wa kholwa, simama ku gonza xungetano hi Mugonzisi wa Hombe siku ni siku, u tlhela u maha lezi a wulako.

A yinwe ya tindlela ta ti nene ta ku maha lezo ku gonza a bhuku legi hi kukhanzakanya, u wona mifota yontlhe u tlhela u ehleketa hi yona. U zama ku hlamula a ziwutiso zi nga lomu ka mifota leyo. U lera a bhuku legi kambe na mamani kutani ni papai wa wena. Loku u nga hanyi ni vapswali va wena, gonza ni munhu munwani wa hombe ni vanana vanwani. Zi wa nga ta tsakisa loku u wo zi kota a ku vuna vanwani lezaku va gonza ka Mugonzisi wa Hombe, lezi va faneleko ku maha kasi va hanya kala kupinzuka misaveni yiswa ya Nungungulu ke? —

A Biblia gi ngalo: “A tiko ga hunza.” Hambulezo, gi tlhela gi tlhamusela lezi hi nga mahako kasi hi hanya kala kupinzuka misaveni yiswa ya Nungungulu. Gi ngalo: “Loyi a mahako kuranza ka Nungungulu i ta tshama kala kupinzuka.” (1 Johani 2:17) Makunu hi nga maha yini kasi hi hanya kala kupinzuka misaveni yiswa ya Nungungulu? — Hi zona, hi ku tiva Jehova na Jesu, a N’wana wakwe a mu ranzako nguvu. Kanilezi, hi fanele ku tlhela hi maha lezi hi zi gonzako. Hi rinzela lezaku a ku gonza bhuku legi, zi ku vuna ku tiva Jehova na Jesu, ni ku maha lezi u zi gonzako.