Wa Ha Zvi Alakanya ke?

U gondzile zvi buvha a marevhista A Murindzeli ma ha hi ku hundzako? Loku zvi hi lezvo, zama ku hlamula a zviwutiso lezvi zvi landzelako:

Hi ta vhunekisa kuyini loku hi ti nyika cikhati ca ku bhula na Jehovha, hi mu ingisela hi tlhela hi ehleketa hi yena?

Hi ta maha zviboho zva zvinene, hi gondzisa khwatsi, hiva ni kukholwa ko tiya hi tlhela hi mu randza nguvhu Jehovha. — w22.01, paj. 30-31.

Hi ta vhunekisa kuyini loku hi gondza ku tsumba Jehovha ni lava a va tirisako kasi ku hi rangela?

Leci hi cona cikhati ca ku gondza ku tsumba lezvi Nungungulu a mahisako zvona zvilo ni ku nga kanakaneli a zviboho zva madhota. A cikhati leci a kuxaniseka ka hombe ku to sangula, hi tava hi longile ku ingisa hambu loku hi nyikiwa zvileletelo zvi wonekisako ku khwatsi zva hlamalisa kutani ku nga zwisiseki. — w22.02, paj. 4-6.

A ngilozi yi wa lava ku wula yini laha yi nga wulawula na Zakariya xungetano hi ‘lipimo canjeni ga [govhernadhori] Zerubhabheli’? (Zak. 4:8-10)

A muwoniso lowu wu tiyisekisile vanhu va Nungungulu lezvaku a tempeli leyi yi nga kari yi akiwa yi nga wonekisa ku khwatsi a hi ya nchumu yi wa ta mbhela niku yi wa ta longoloka ni milayo ya Nungungulu. — w22.03, paj. 16-17.

Hi yihi ndlela ya kuva cikombiso ci nene kuwulawuleni? (1 Tim. 4:12)

Ku wulawula zva zvinene ni hi ndlela ya cichavo kuchumayeleni, hi yimbelela hi mbilu yontlhe mitlhanganweni hi tlhela hi hlamula hi kukhandzakanya, hi wulawula lisine hi tlhela hi tiyisa van’wani hi magezu ya hina, hi tlhela hi nga rukateli. — w22.04, paj. 6-9.

Hikuyini a matshamela ya mune wa zvivandza (mifumo) zvi kumbukiwako ka Danieli cipimo 7 ma nga patsiwa laha ka civandza cin’we, hi kuya hi lezvi hi zvi wonako ka Kuvhululelwa 13:1, 2?

A civandza ci kumbukiwako ka Kuvhululelwa 13 a ci yimeli a mufumo mun’we basi, wo kota wa Roma. Kanilezvi, ci yimela mifumo yontlhe ya politika yi fumelako vanhu. — w22.05, paj. 9.

Hi yihi ndlela-tshinya ya ku komba lezvaku wa tsumba kululama ka Nungungulu?

Loku a wokari a hi mahele zvakubiha, a hi khunguvanyisa kutani a hi wonhela, hi zama ku nga mu zangareli hi tlhela hi nga mu vekeli civiti, hi zvi tsika mandleni ya Jehovha. Yena i ta lulamisa zvontlhe zvi wonhekileko hi kota ya ciwonho leco. — w22.06, paj. 10-11.

A makabye loyi a mahako mukhongelo mitlhanganweni zvini a nga faneliko ku zvi rivala?

A mukhongelo a wu mahelwangi ku gi nyika wusungukati a bandla kutani ku maha citiviso. Nguvhunguvhu kusanguleni ka mutlhangano, loyi a mahako mukhongelo a nga faneli “ku wulawula nguvhu”. (Mat. 6:7) — w22.07, paj. 24-25.

Lava va “mahileko a zvilo zva kubiha” va “vhuka vaya kulamulweni” hi ndlela muni? (Joh. 5:29)

A hi ku khwatsi va to koniwa hi kota ya zvilo zvo biha lezvi va zvi mahileko na va nga sefa. Va ta hloliwa hi kuya hi mawonela yabye ni mahanyela yabye andzhako ka ku vhuxiwa. — w22.09, paj. 18.

Zvilo muni zvo tsakisa lezvi J. F. Rutherford a nga kuca vanhu ka gotsovanyano wa Setembro wa 1922?

Ka gotsovanyano wu mahilweko le Cedar Point, Ohio, a Estados Unidos, i wulile lezvi: “A Hosi yi sangulile ku fuma! Mu nyikilwe ntiro wa ku byela van’wani kasi va zvi tiva. Hikwalaho, Huwelelani, huwelelani, huwelelani a Hosi ni Mufumo wa yona!” — w22.10, paj. 3-5.

Isaya, cipimo 30, i komba tindlela muni ta tinharu leti Nungungulu a hi vhunako hi tona ku timisela?

A cipimo leci ci komba lezvaku Jehovha 1) wa ingisela mikhongelo ya hina a tlhela a yi hlamula, 2) wa hi nyika zvileletelo kasi ku hi rangela, a tlhela 3) a hi katekisa zvezvi niku i ta hi katekisa cikhatini ci tako. — w22.11, paj. 9.

Hikuyini hi nga wulako lezvaku lezvi zvi nga ka Lisimu 37:10, 11, 29 zvi tatisekile cikhatini ci nga hundza ni ku zvi ta tatiseka cikhatini ci tako?

Lezvi Dhavhidha a nga wula zvi yelana khwatsi ni wutomi go tsakisa legi a vaIzrayeli va nga ti buza hi gona a cikhati ku nga fuma Hosi Solomoni. Jesu i wulawulile hi paradhise legi gi tako a tlhela a tshaha vhesi 11 ga Lisimu 37. (Mat. 5:5; Luka 23:43) — w22.12, paj. 8-10, 14.