“Hlawulani ha n’wece . . . loyi mu to mu tirela”

1. Hi fanele ku maha yini kasi hiva ni litsako la lisine, niku hikuyini? (Isaya 48:17, 18)

A PAPAYI wa hina wa le tilweni wa hi randza nguvhu niku i lava ku hi ti buza hi wutomi zvezvi ni cikhatini ci tako. (Mutsh. 3:12, 13) I hi vangile na hi hi ni wutlhari go hlamalisa kanilezvi a nga hi nyikangi a wutlhari ga ku zvi hi fambela khwatsi loku hi ti fuma hi hoce kutani loku hi ti vekela hi hoce a milayo ya zvazvinene ni zvakubiha. (Mutsh. 8:9; Jer. 10:23) Wa zvi tiva lezvaku kasi hiva ni litsako la lisine hi fanele ku mu tirela hi tlhela hi ingisa milayo yakwe. — Lera Isaya 48:17, 18.

2. Sathani i wa lava lezvaku hi kholwa yini, niku Jehovha i hlamulisile kuyini a mawunwa lawo?

² Sathani i wa lava lezvaku hi kholwa ku a vanhu va nga tsaka na va nga tireli Jehovha, kutani ku, zvi nga va fambela khwatsi loku va ti fumela. (Gen. 3:4, 5) Jehovha i no hlamula mawunwa lawo hi ku vhumelela vanhu vo kala kuingisa lezvaku va ti fumela hi voce hi cikhati co kari. A zvi lavi ku hiya kule kasi ku wona a mawuyawuya ya ku a vanhu va ti fuma. Kanilezvi, a Bhibhiliya gi tele hi zvikombiso zva vavanuna ni vavasati lava va vileko ni litsako hi ku tirela Jehovha. A cikombiso ca hombe ka zvontlhe hi Jesu. A kusangula, a hi woneni lezvaku hikuyini a nga hlawula ku tirela Jehovha. Hi kulandzela, hi ta wona lezvaku hikuyini a Papayi wa hina wa le tilweni a ringanelwako hi ku hi mu khozela. Hi kugumesa, hi ta vhuxeta zvigelo zvo kari zvi hi mahako hi hlawula ku tirela Jehovha.

HIKUYINI JESU A NGA HLAWULA KU TIRELA JEHOVHA?

3. Zvini lezvi Sathani a nga tsumbisa Jesu, niku zvini lezvi Jesu a nga hlawula ku maha?

³ A cikhati leci a nga hi laha misaveni, Jesu i wa fanele ku hlawula a ku himani loyi a to mu tirela. Cikhatanyana andzhako ka loku Jesu a bhabhatisilwe, Sathani i no mu tsumbisa lezvaku i wa ta mu nyika a mifumo yontlhe ya misava loku a mu khozela khati gin’we basi. Jesu i no mu hlamula, aku: “Suka Sathani! Hakuva ku tsalilwe ku: ‘Khozela Jehovha, a Nungungulu wa wena, niku hi yena yece u faneleko ku mu tirela.’” (Mat. 4:8-10) Hikuyini Jesu a nga hlawula ku tirela Jehovha? A hi woneni zvigelo zvo kari.

4-5. Hi zvihi zvigelo zvo kari zvi mahileko Jesu a hlawula ku tirela Jehovha?

⁴ A cigelo ca hombe ci nga maha ku Jesu a hlawula ku tirela Jehovha lirandzo — Jesu i na ni lirandzo la hombe nguvhu hi Papayi wakwe la ku a li nge mbhetiwi hi nchumu. (Joh. 14:31) A cin’wani kambe, Jesu i tirela Jehovha hakuva hi zvona zvazvinene ku maha. (Joh. 8:28, 29; Kuv. 4:11) Wa zvi tiva lezvaku Jehovha hi yena cibuka ca wutomi niku wa tsumbeka a tlhela a hana. (Lis. 33:4; 36:9; Jak. 1:17) Contlhe cikhati Jehovha i wa mu byela lisine Jesu niku hi yena a nga mu nyika zvontlhe a nga nazvo. (Joh. 1:14) Kanilezvi Sathani hi yena a nga vanga kufa. Muhembi wa hombe a kuciwako hi makangwa ni ku ti kokela gakwe. (Joh. 8:44) Lezvi a nga tiva lezvo, Jesu a nga tshukangi a alakanyela hi ku pimanyisa Sathani a vhukela Jehovha. — Filp. 2:5-8.

⁵ A cigelo cin’wani ci mahileko Jesu a hlawula ku tirela Jehovha hi ku i wa alakanyela hi lezvi zvi nga ta koteka hi kota ya kutsumbeka kakwe. (Mah. 12:2) Jesu i wa zvi tiva lezvaku loku a simama a tsumbekile i wa ta basisa vito ga Papayi wakwe a tlhela a vhulula ndlela ya ku fuvisa a kuxaniseka kontlhe loku ku vangilweko hi Dhiyabho.

HIKUYINI JEHOVHA A RINGANELWAKO HI KU HI MU KHOZELA?

6-7. Hikuyini a vanhu vo tala nyamutlha va kalako va nga khozeli Jehovha, kanilezvi hikuyini a ringanelwako hi ku hi mu khozela?

⁶ A vanhu vo tala nyamutlha a va tireli Jehovha hakuva a va ma tivi a matshamela yakwe ya manene niku a va zvi tivi zvontlhe lezvi a va maheleko. A vanhu lavo va fana ni lava Pawule a nga va chumayela le Atensi. — Miti. 17:19, 20, 30, 34.

⁷ Pawule i tlhamusele a va le Atensi lezvaku a Nungungulu wa lisine “hi yena a nyikako wutomi ka vanhu vontlhe ni kuhefemula ni zvilo zvontlhe”. Niku i engetile, aku: “Ha yena, ha hanya, ha fambafamba, hi kona”. Nungungulu hi yena Muvangi loyi a mahileko “tixaka tontlhe ta vanhu” hi ka munhu mun’we. Hikwalaho, wa ringanelwa hi ku hi mu khozela. — Miti. 17:25, 26, 28.

8. Zvini lezvi Jehovha a to kala ku tshuka a maha? Tlhamusela.

⁸ Kota Muvangi tlhelo Hosi ya Hombe wuakweni gontlhe, Jehovha a nga kurumeta vanhu lezvaku va mu tirela. Hambulezvo, Jehovha a nga ta tshuka a maha lezvo. Wutshan’wini ga lezvo, siku ni siku i hi nyika zvikombiso zva ku i kona niku wa randza a mun’we ni wun’wani wa hina. I lava lezvaku a vanhu vo tala hi laha zvi kotekako hi kona vava vanghana vakwe kala kupindzuka. (1 Tim. 2:3, 4) Kasi lezvo zvi koteka, Jehovha i hi gondzisa lezvaku hi bhulela van’wani a makungo yakwe hi tlhela hi va byela a zvilo zva zvinene lezvi a to mahela vanhu. (Mat. 10:11-13; 28:19, 20) Jehovha i hi xaxametile hi mabandla a tlhela a hi nyika vawoneleli va lirandzo kasi va hi khatalela. — Miti. 20:28.

9. A lirandzo la Jehovha li wonekisa kuyini?

⁹ A lirandzo la Jehovha lo hlamalisa la woneka ka ndlela leyi a va khomako hi yona lava va zvi bako hi makatla a zvikombiso zva ku i kona. Ehleketa hi mhaka leyi: Matin’wini wontlhe ya vanhu, a vanhu va talela ga cima va hlawula ku hanya hi milayo yabye ya zvazvinene ni zvakubiha. Hambulezvo, hi wunene Jehovha i va nyika lezvi zvi lavekako kasi va hanya va tlhela va tsaka. (Mat. 5:44, 45; Miti. 14:16, 17) Jehovha i va nyikile a matshamela ma va vhunako kuva ni vanghana, ku wundla ngango ni ku tshovela mihandzu ya ntiro wabye. (Lis. 127:3; Mutsh. 2:24) Zva woneka laha kubaseni lezvaku a Papayi wa hina wa le tilweni wa va randza a vanhu vontlhe. (Ekso. 34:6) A hi vhuxeteni a zvigelo zvo kari zvi hi mahileko hi hlawula ku tirela Jehovha ni lezvi Jehovha a hi katekisisako zvona.

HIKUYINI HI HLAWULAKO KU TIRELA JEHOVHA?

10. a) Hi cihi cigelo ca hombe ci hi mahako hi tirela Jehovha? (Matewu 22:37) b) U vhunekisa kuyini hi lihlazva-mbilu la Jehovha? (Lisimu 103:13, 14)

¹⁰ A ku fana na Jesu, a cigelo ca hombe ci hi mahako hi tirela Jehovha hi ku ha mu randza nguvhu. (Lera Matewu 22:37.) Hi tizwa na hi hi kusuhani nguvhu na Jehovha a cikhati leci hi gondzako hi matshamela yakwe. Hi cikombiso, hi nga ehleketa hi lihlazva-mbilu leli Jehovha a nga nalo hi hina. A cikhati leci a vaIzrayeli va nga tsika ku mu ingisa, Jehovha i no va khongotela, aku: “Hundzulukani tindleleni ta n’wina ta kubiha”. (Jer. 18:11) Jehovha a nga rivali lezvaku a hi mbhelelangi niku hi ntshuri. (Lera Lisimu 103:13, 14.) Loku u ehleketa hi lihlazva-mbilu la Jehovha ni man’wani matshamela yakwe yo hlamalisa, a zvi ku kuci ku mu tirela kala kupindzuka?

11. Hi zvihi zvin’wani zvigelo zvi hi mahako hi hlawula ku tirela Papayi wa hina wa le tilweni?

¹¹ A cin’wani ci hi kucako ku tirela Jehovha hi ku lezvo hi zvona zvilo zva zvinene hi nga mahako. (Mat. 4:10) Ahandle ka lezvo, ha zvi tiva lezvaku a kutsumbeka ka hina ku na ni mabhindzu yo tala ya manene. A kutsumbeka ka hina ku maha lezvaku ku basisiwa vito ga Jehovha, ku komba lezvaku Dhiyabho muhembi ku tlhela ku tsakisa mbilu ya Papayi wa hina. Niku loku hi hlawula ku tirela Jehovha nyamutlha, hi tava ni thomo ga ku mu tirela kala kupindzuka! — Joh. 17:3.

12-13. Zvini hi gondza ka tshango ga Janete na Palmira?

¹² Na ha ha hi vanana, hi ngava ni lirandzo la hombe nguvhu hi Jehovha niku a lirandzo lelo li nga simama ku tiya laha hi kulako. Wona cikombiso ca vakamakabye vambiri, vaku hi Janete na Palmira.a A mun’we i wa hi ni 11 wa malembe loyi mun’wani i wa hi ni 10 a cikhati leci va nga sangula ku gondza Bhibhiliya. Hambu lezvi a vapswali vabye va nga kala va nga hi na mhaka ni ku gondza Bhibhiliya, va no vhumela ku a vana vabye va gondza Bhibhiliya ni Vakustumunyu va Jehovha kanilezvi kumbheleni ka vhiki na va simama kuya chichini ni vapswali vabye. Janete i wula lezvi: “Lezvi a Vakustumunyu va Jehovha va ndzi gondzisileko lomu ka Bhibhiliya zvi ndzi vhunile a ku hlula kucetelo wa vanghana wa ku ti nghenisela ka madroga ni ku maha wubhayi.”

¹³ Andzhako ka malembe matsongwani, hi wumbiri gabye va nova vahuweleli. Hi kufamba ka cikhati va nova maphayona na va khatalela vapswali vabye va nga kulile hi tanga. Janete i tlhamusela lezvi a ti zwisako zvona hi zvontlhe lezvi Jehovha a va mahelako: “Ndzi zvi wonile hi ndzoce lezvaku Jehovha wa khatalela vanghana vakwe hi kutsumbeka niku kota lezvi 2 Timote 2:19 a wulako, ‘Jehovha wa va tiva lava va nga vakwe’.” Handle ko kanakana, Jehovha wa va khatalela lava va hlawulako ku mu randza niku mu tirela!

14. A magezu ya hina ni mitiro zvi vhunisa kuyini a ku basisa vito ga Jehovha ka zviruko? (Wona ni mifota.)

¹⁴ Hi lava ku vhunetela a ku basisiwa ka vito ga Jehovha ka zviruko zvontlhe. Ehleketa hi mufananiso lowu: U na ni munghana wa hombe wa munene, wa ku hana, ni ku tsetselela. Ka siku go kari uzwa munhu na a lumbeta munghana wa wena lezvaku munhu wo biha ni wo kala kutsumbeka. Zvini u nga wa ta maha? U wa ta mu yimelela. Hi kufanana, a cikhati leci Sathani ni lava a va kucetelako va zamako ku chakisa wumunhu ga Jehovha hi ku hangalasa mawunwa xungetano hi yena, hina hi wulawula lisine xungetano hi Jehovha, hi yimela vito gakwe hi kuhiseka. (Lis. 34:1; Isa. 43:10) Hi komba lezvaku hi lava ku tirela Jehovha hi muhefemulo wontlhe hi magezu ya hina ni mitiro.

15. Mupostoli Pawule i vhunekisile kuyini hi ku cica zvokari wutomini gakwe? (Va Le Filipi 3:7, 8)

¹⁵ Hi ti yimisele ku cica zvokari wutomi kasi hi zvi kota ku tirela Jehovha kutani ku maha zvotala ntirweni wakwe. Hi cikombiso, mupostoli Pawule i hlawulile ku tsika a cikhundla ca nduma leci a nga hi naco ka wukhongeli ga ciJudha kasi ava mupizani wa Kristu ni ku tirela Jehovha. (Gal. 1:14) Hi kota ya lezvo, Pawule i vile ni matshango yo tsakisa wutomini gakwe a tlhela ava ni thomo ga ku ya fuma zvin’we na Kristu le tilweni. Pawule a nga tshukangi a ti laya hi ciboho cakwe ca ku tirela Jehovha, niku hinawu hi nga ta tshuka hi ti laya. — Lera Va Le Filipi 3:7, 8.

16. Zvini hi gondzako ka tshango ga Júlia? (Wona ni mifota.)

¹⁶ Loku hi veka nguvhu kupima ka ku tirela Jehovha, yena i ta hi katekisa zvezvi ni cikhatini ci tako. Wona tshango ga makabye wo kari, wa ku Júlia. Na a nga se gondza lisine, Júlia i wa hi ka ntlawa wa ku yimbelela lomu chichini kusukela ka cikhati leci a nga ha hi muswa. A murangeli wa ntlawa lowo i no mu tlhatlhela cihuko hi kota ya nyiko yakwe ya ku yimbelela a tlhela a mu treinara. Na zvi nga seya kule, Júlia i nova ni nduma niku i no sangula ku yimbelela lomu ka matshamu ya hombe. A cikhati leci a nga gondza ka cikola ca nduma ca Muzka, a cigondzani-kuloni ci no sangula ku wulawula naye hi Nungungulu niku ci no mu tlhamusela lezvaku Nungungulu i na ni vito, ku nga Jehovha. Andzhako ka cikhati ci tsongwani Júlia i no sangula ku gondza Bhibhiliya makhati mambiri hi vhiki. Hi magumo, i no boha ku veka kupima ka ku tirela Jehovha, wutshan’wini ga ku yimbelela. A ciboho leco a ci olovangi. Júlia i wula lezvi: “A vanhu vo tala va no ndzi byela lezvaku ndzi wo xakela nyiko ya mina kanilezvi ndzi wa lava ku tirisa wutomi ga mina gontlhe kasi ku tirela Jehovha.” Júlia i ti zwisa kuyini nyamutlha hi ciboho leci a mahileko ka 30 wa malembe ndzhako? I wula lezvi: “Ndzi na ni kurula ka maalakanyo niku ndza tsumba lezvaku Jehovha i ta tatisa mixuvo ya mina yontlhe cikhatini ci tako.” — Lis. 145:16.

SIMAMA KU TIRELA JEHOVHA

17. A ku hanya tichokeni ta masiku yo gumesa zvi va khumbisa kuyini lava va mahileko ciboho ca ku tirela Jehovha ni lava va kalako va nga se maha?

¹⁷ Hi hanya tichokeni ta masiku yo gumesa. Mupostoli Pawule i tsalile lezvi: “Hakuva ‘ku kiyela kutsongwani’, ‘loyi a tako i ta chikela, a nga ta hlwela.’” (Mah. 10:37) Lezvo zvi wula yini? A cikhati ci saleleko lava va kalako va nga tireli Jehovha lezvaku va hlawula ku mu tirela citsongwani. Hikwalaho, va fanele ku maha cokari hi cihatla. (1 Kor. 7:29) Loku makunu hi mahile ciboho ca ku tirela Nungungulu, ha zvi tiva lezvaku hambu loku zvi lava ku hi timisela zvikarato zvi tava zva cikhatanyana ‘citsongwani’ basi.

18. Zvini lezvi Jehovha na Jesu va lavako lezvaku hi maha?

¹⁸ Jesu a nga kucangi vapizani vakwe lezvaku va sangula ku mu landzela basi, kanilezvi i tlhelile a va kuca lezvaku va simama ku maha lezvo. (Mat. 16:24) Hikwalaho, loku hi kari hi tirela Jehovha hi malembe yo tala, ngha hi ti yimisela a ku hi nga tshuki hi zvi tsika. Hi fanele ku kulula hi n’watseka kasi hi hanya hi kuyelana ni ciboho ca hina ca ku tirela Jehovha. Lezvo zvi nga tshuka zvi nga olovi, kanilezvi hambu zvezvi ha ti buza hi makatekwa yo tala ni litsako! — Lis. 35:27.

19. Zvini hi gondzako ka tshango ga Gerson?

¹⁹ A vokari va ti zwisa ku khwatsi a ku tirela Jehovha zvi lava kutikarata ka hombe nguvhu. Loku u hi muswa, u zvi wonisa ku khwatsi wa luza zvokari hi lezvi u tirelako Jehovha? A jaha go kari ga ku hi Gerson, gi wulile lezvi: “Ndzi wa ti zwisa ku khwatsi a kuva Kustumunyu wa Jehovha zvi ndzi tsona zvotala. Zvi wa wonekisa ku khwatsi a vanana-kuloni va wa ti buza hi zvilo zvo kota tifesta, ku namorara kutani ku bela tivhidhio-geme ta tihanyi, kuveni mina ndzi wa mbheta cikhati co tala mitlhanganweni ni kuchumayeleni.” Lezvo zvi mu khumbisile kuyini Gerson? I wula lezvi: “Ndzi no sangula ku hanya wutomi gimbiri ndzi tlhela ndziva ni litsako la cikhatanyana. Kanilezvi a litsako lelo a li tshanelwangi hi gambo. Ndzi no sangula ku ehleketa hi mabhindzu ya ku ingisa lezvi a Bhibhiliya gi wulako ndzi tlhela ndzi boha ku tirela Jehovha hi mbilu yontlhe. Kusukela ka cikhati leco, zva woneka lezvaku Jehovha wa hlamula mikhongelo ya mina yontlhe.”

20. Zvini hi faneleko ku ti yimisela ku maha?

²⁰ A muyimbeleli wo kari i yimbelele ka Jehovha, aku: “Wa tsaka loyi u mu hlawulako u mu neha kusuhani na wena kasi a hanya lomu mitsendzeleni ya wena.” (Lis. 65:4) Ngha hinawu hiva ni kutiyimisela ko fana ni loku Joxuwa a nga hi nako. I wulile lezvi: “Mina ni ngango wa mina, hi ta tirela Jehovha”. — Jox. 24:15.