Vhuna zvigondzani zva wena lezvaku zvi yimela lisine

1-2. a) Hikuyini a zvigondzani zvo kari zva Bhibhiliya zvi kanakanako a ku yimela lisine? b) Zvini hi to bhula hi zvona ka ndzima leyi?

XANA u wa kanakana a kuva Kustumunyu wa Jehovha, kuzvilava na u chava ku a vatiri-kuloni, ni vanghana kutani maxaka va wa ta ku vhukela? Kutani u wa alakanya lezvaku u nga ta tshuka u zvi kota a ku hanya hi milayo ya Nungungulu? Loku zvi hi lezvo, wa zvi zwisisa a zvigondzani zva Bhibhiliya lezvi zvi kanakanako a ku yimela lisine.

² Jesu i wa zvi zwisisa lezvaku zva olova ku a kuchava loko ku maha munhu a nga kuli hi tlhelo ga moya. (Mat. 13:20-22) Kanilezvi a nga va tsukulangi lava va ga kanakana a ku mu landzela. Wutshan’wini ga lezvo, i no komba vapizani vakwe lezvi va nga va vhunisako zvona a vanhu lavo lezvaku 1) va pola lezvi zvi va vhalelako a ku kula hi tlhelo ga moya, 2) va engetela lirandzo labye hi Jehovha, 3) va cica lezvi va zvi rangisako wutomini gabye ni 4) va hlula zvikarato zvabye. Hi nga zvi tirisisa kuyini lezvi Jesu a byelileko a vapizani vakwe laha hi tirisako a bhuku Ti buze hi wutomi kala kupindzuka! kasi ku vhuna cigondzani ca Bhibhiliya lezvaku ci yimela lisine?

VHUNA CIGONDZANI CA WENA A KU POLA LEZVI ZVI CI VHALELAKO A KU KULA

3. Zvini lezvi kuzvilava zvi nga vhalela Nikodhemusi lezvaku ava mupizani wa Jesu?

³ Nikodhemusi, a murangeli wa nduma wa vaJudha, i kumene ni cikarato kasi ava mupizani wa Jesu. Andzhako ka 6 wa tihweti basi Jesu na a sangulile a ntiro wakwe wa kuchumayela, Nikodhemusi i no zvi zwisisa lezvaku Jesu i wa rumilwe hi Nungungulu. (Joh. 3:1, 2) Hambulezvo, Nikodhemusi i no hlawula a kuya ka Jesu cihundleni hakuva i wa “chava vaJudha”. (Joh. 7:13; 12:42) Kuzvilava i alakanyile lezvaku i wa ta luza zvotala loku ava mupizani wa Jesu.a

4. Jesu i mu vhunisile kuyini Nikodhemusi lezvaku a zvi zwisisa lezvi Nungungulu a nga rindzela ku a zvi maha?

⁴ Nikodhemusi i wa wu tiva Nayo kanilezvi i wa lava ku vhuniwa kasi a zwisisa lezvi Jehovha a nga zvi rindzela ka yena. Jesu i mu vhunisile kuyini? Jesu i no ti yimisela ku tirisa cikhati cakwe laha ka kuza a tlhangana na Nikodhemusi ni wusiku. Jesu i no mu byela hi kukongoma lezvi a nga fanele ku maha kasi ava mupizani wakwe: I wa fanele ku ti sola ka zviwonho zvakwe, a bhabhatisiwa hi mati a tlhela a kombisa kukholwa ka N’wana wa Nungungulu. — Joh. 3:5, 14-21.

5. U nga ci vhunisa kuyini a cigondzani ca Bhibhiliya a ku pola lezvi zvi ci vhalelako ku kula hi tlhelo ga moya?

⁵ Hambu loku a cigondzani ca Bhibhiliya ci zwisisa khwatsi a Mitsalo zvi nga lava ku u ci vhuna a ku zwisisa lezvi zvi ci vhalelako a ku kula hi tlhelo ga moya. A ntiro wa ku ti hanyisa kutani ku vhukelwa hi maxaka zvi nga colopetela a mixuvo ya cona ya moya. Hikwalaho, ti nyike cikhati ca ku ci vhuna. Kuzvilava u nga ci ramba lezvaku mu taga zvin’we kutani ku paseyara. Ka zviyimo lezvo, kuzvilava u nga ci vhuna ku ci ti tlhatlha ci ku byela a zvikarato lezvi ci kumanako nazvo. Kuca cigondzani ca wena lezvaku ci cica ni cihi ci lavekako, na ku nga hi ku fela ku tsakisa wena kanilezvi kasi ku kombisa lirandzo la cona hi Jehovha.

6. U nga ci vhunisa kuyini a cigondzani ca wena lezvaku ci tiya-hlanha ci yimela lisine? (1 Va Le Korinte 16:13)

⁶ Loku a cigondzani ca Bhibhiliya ci tsumba lezvaku Jehovha i ta ci vhuna ku hanya hi milayo ya Bhibhiliya, ci ta tiya-hlanha ci tirisa lezvi ci gondzako. (Lera 1 Va Le Korinte 16:13.) A ntiro wa wena wu nga fananisiwa ni lowu wa mugondzisi le cikoleni. Loku u alakanya hi cikhati leci u nga haya cikoleni, hi wihi a mugondzisi loyi a nga ku tsakisa nguvhu? Handle ko kanakana, hi loyi a nga ku vhuna hi lihlazva-mbilu lezvaku u tsumba ku wenawu u nga zvi kota. Hi kufanana, a mugondzisi wa munene wa Bhibhiliya a nga gondzisi ntsena lezvi Nungungulu a lavako lezvaku hi maha kanilezvi i tlhela a tiyisekisa cigondzani lezvaku hi ku vhuniwa hi Jehovha ci nga zvi kota a ku cica ni cihi wutomini ga cona. U nga zvi mahisa kuyini lezvo?

VHUNA A CIGONDZANI CA WENA LEZVAKU CI ENGETELA LIRANDZO LA CONA HI JEHOVHA

7. Jesu i va vhunisile kuyini lava va nga mu ingisela lezvaku va engetela a lirandzo labye hi Jehovha?

⁷ Jesu i wa zvi tiva lezvaku a ku randza Nungungulu zvi wa ta kuca vapizani vakwe lezvaku va tirisa lezvi va nga gondza. I wa tolovela ku gondzisa zvilo zvi nga wa ta vhuna a vapizani vakwe lezvaku va engetela lirandzo labye hi Papayi wabye wa le tilweni. Hi cikombiso, i fananisile Jehovha ni papayi loyi a va nyikako a zvilo zva zvinene a vana vakwe. (Mat. 7:9-11) A vokari va nga ingisela Jesu kuzvilava va wa nga hi na papayi wa lirandzo. Hi nga alakanyela lezvi va nga ti zwisisa zvona a cikhati leci Jesu a nga hlawutela a mufananiso wa papayi wa lirandzo loyi a nga tlhela a amukela a n’wana wakwe loyi a nga mahile zvilo zvo tala zvo biha. Va zvi zwisisile khwatsi lezvaku Jehovha wa va randza a vana vakwe va laha misaveni. — Luka 15:20-24.

8. U nga ci vhunisa kuyini a cigondzani ca Bhibhiliya lezvaku ci engetela ku mu randza nguvhu Jehovha?

⁸ Wenawu u nga vhuna cigondzani ca Bhibhiliya lezvaku ci engetela ku mu randza nguvhu Jehovha hi ku khanyisa a matshamela ya Nungungulu a cikhati leci mu gondzako. Khati ni khati mu gondzako, ci vhune a ku wona a kuyelana ka lezvi mu gondzako ni lirandzo la Jehovha. Laha mu gondzako hi hakhelo ya kutlhatlhisa khanyisa lezvi yi tirisako zvona ka cona. (Rom. 5:8; 1 Joh. 4:10) A cigondzani ci nga kuciwa ku randza Jehovha loku ci ehleketa hi lezvi Jehovha a ci randzisako zvona cona wutsumbu. — Gal. 2:20.

9. Zvini zvi vhunileko a wanuna wo kari wa ku hi Michael lezvaku a cica mahanyela yakwe?

⁹ Wona cikombiso ca Michael, wa le Indonésia. Michael i wundlilwe lisineni kanilezvi a nga bhabhatisiwangi. A cikhati leci a nga hi ni 18 wa malembe i noya tira ka tiko gin’wani kota mufambisi wa kamiyawu. Hi ndzhako ka cikhati, i no chadha Indonésia, kanilezvi i no siya ngango wakwe a simama ku tira ka tiko gin’wani. Ndzeni ka cikhatanyana leco, a sati wakwe ni nhanyana wakwe va no sangula ku gondza Bhibhiliya va tlhela va kula hi tlhelo ga moya. Andzhako ka loku a mamani wakwe a file, Michael i no boha ku tlhela kaya kasi a ya khatalela papayi wakwe niku i no vhumela ku gondza Bhibhiliya. A cikhati leci va nga kari va gondza laha ka cipandze “Gondza zvi eta” ka cigondzo 27 ca bhuku Ti buze hi wutomi kala kupindzuka!, zvi no mu khumba nguvhu Michael. Laha a nga ehleketa hi lezvi Jehovha kuzvilava a nga ti zwisisa zvona laha a nga wona N’wana wakwe na a xaniseka, i no huma ni mihloti. I no engetela ku yi bonga nguvhu a hakhelo ya kutlhatlhisa zvi tlhela zvi mu kuca a ku cica mahanyela yakwe ni ku bhabhatisiwa.

VHUNA A CIGONDZANI CA WENA A KU CICA LEZVI CI ZVI RANGISAKO WUTOMINI GA CONA

10. Jesu i va vhunisile kuyini a vapizani vakwe vo sangula lezvaku va cica lezvi va nga zvi rangisa? (Luka 5:5-11) (Wona ni mufota.)

¹⁰ A vapizani vo sangula va tekele ku zvi wona lezvaku Jesu i wa hi yena Mesiya loyi a nga tsumbisilwe, kanilezvi zvi lavile ku va vhuniwa kasi va rangisa a ntiro wa kuchumayela wutomini gabye. Pedro na Andrewu va wa sina va hi ni cikhati co kari na va hi vapizani va Jesu, a cikhati leci Jesu a nga va ramba lezvaku va mu landzela hi cikhati contlhe. (Mat. 4:18, 19) Va wa hi ni bhindzu ga ginene ga ku kukuta tinjhanjhi niku zvo khwatsi va wa tirisana na Jakobe na Johani. (Mar. 1:16-20) A cikhati leci Pedro na Andrewu va nga “tsika tikoka tabye” kuzvilava va mahile malulamiselo ya ku simama va khatalela mingango yabye laha va nga kari va landzela Jesu. Zvini zvi nga va kuca a ku cica lezvi va nga zvi rangisa? A matimu ya Luka ma hi byela lezvaku Jesu i mahile cihlamaliso leci ci nga tiyisa a kutsumba kabye ka ku Jehovha i ta va hlayisa. — Lera Luka 5:5-11.

11. Hi nga ma tirisisa kuyini a matshango ya hina kasi hi tiyisa a kukholwa ka cigondzani?

¹¹ A hi nge mahi zvihlamaliso a ku fana na Jesu, kanilezvi hi nga hlawutela matshango ya lezvi Jehovha a va seketelisako zvona lava va mu rangisako wutomini gabye. Hi cikombiso, wa zvi alakanya lezvi Jehovha a nga ku vhunisa zvona a cikhati leci u nga sangula kuya mitlhanganweni? Kuzvilava zvi lavile ku u ya bhula ni patrawu wa wena u mu tlhamusela lezvaku hikuyini u to kala u nga ha tiri cikhati co engeteleka loku lezvo zvi ku colopetela kuya mitlhanganweni. Laha u ci hlawutelako matshango ya wena, ci tlhamusele lezvi a kukholwa ka wena ku nga tiyisiswa zvona hi ku wona Jehovha na a seketela ciboho ca wena ca ku rangisa wukhozeli gakwe wutomini ga wena.

12. a) Hikuyini hi faneleko ku ramba vahuweleli vo hambanahambana lezvaku hi ya fambisa navo cigondzo? b) U nga ti tirisisa kuyini a tivhidhio kasi ku gondzisa khwatsi a cigondzani ca wena? Nyika cikombiso.

¹² A cigondzani ca wena ci ta vhuneka kambe hi kuzwa lezvi a maKristu man’wani ma nga cicisa zvona lezvi ma nga zvi rangisa. Hikwalaho, ramba vamakabye vo hambanahambana lezvaku u ya fambisa navo cigondzo. Va kombele lezvaku va hlawutela lezvi va nga gondzisa zvona lisine ni lezvi va nga maha kasi va rangisa ntiro wa Jehovha wutomini gabye. A cin’wani kambe, ti nyike cikhati ca ku u sixtira ni cigondzani ca wena a tivhidhio ti nga ka cipandze “Gondza zvi eta” kutani ka cipandze “Gondza zvin’wani” ka bhuku Ti buze hi wutomi kala kupindzuka!. Hi cikombiso, a cikhati leci mu gondzako a cigondzo 37, u nga khanyisa matshinya ya milayo ma nga ka vhidhio Jehovha i ta hi nyika lezvi zvi lavekako.

VHUNA CIGONDZANI CA WENA LEZVAKU CI HLULA ZVIKARATO

13. Jesu i va longiselisile kuyini a vapizani vakwe kasi va lwisana ni kuvhukelwa?

¹³ Jesu i phindaphindile ku byela a vapizani vakwe lezvaku va wa ta vhukelwa hi van’wani hambu hi maxaka. (Mat. 5:11; 10:22, 36) Laha a ntiro wa Jesu wu ngaya kugumeseni, i no tlharihisa a vapizani vakwe lezvaku hambu hi kudawa va wa ta dawa. (Mat. 24:9; Joh. 15:20; 16:2) I no va kuca lezvaku va ti wonela ntirweni wabye. I no va tlharihisa lezvaku va nga holovisani ni lava va nga va vhukela va tlhela va tlhariha kasi va simama ku chumayela.

14. Hi nga ci vhunisa kuyini a ci gondzani a ku ti longisela kuvhukelwa? (2 Timote 3:12)

¹⁴ Hi nga vhuna a cigondzani ca hina lezvaku ci ti longisela a kuvhukelwa hi ku ci tlhamusela lezvi kuzvilava a vatiri-kuloni, ni vanghana, ni maxaka va to ci byela. (Lera 2 Timote 3:12.) A vokari va tirako naco va nga ci hleka hi kota ya mahanyela ya cona ya maswa. A van’wani, hambu hi maxaka ya laha kusuhani, va nga solasola lezvi ci zvi kholwako zvi seketelwako lomu ka Bhibhiliya. Loku hi hatlisa ku longisela zvigondzani zva hina kasi zvi lwisana ni kuvhukelwa, zvi tava zvi longile khwatsi a cikhati leci zvi to vhukelwa.

15. Zvini zvi nga vhunako a cigondzani ca Bhibhiliya lezvaku ci lwisana ni kuvhukelwa hi maxaka?

¹⁵ Xungetano hi kuvhukelwa hi maxaka, kuca a cigondzani ca wena lezvaku ci ehleketa hi lezvi kuzvilava zvi mahako a maxaka ya cona ma swireka. Kuzvilava wona ma alakanya ku co kanganyisiwa kutani ma nyenya a Vakustumunyu va Jehovha. Hambu hi Jesu, a maxaka yakwe ma wa nga tsaki hi yena. (Mar. 3:21; Joh. 7:5) Gondzisa cigondzani ca wena lezvaku ci simama civa ni lihlazva-mbilu ni ku wulawula hi wunene ni van’wani a ku patsa ni maxaka ya cona.

16. Hi nga ci vhunisa kuyini a cigondzani ca Bhibhiliya a ku ci bhula hi lezvi ci zvi kholwako hi ndlela ya yinene?

¹⁶ Hambu loku a maxaka ma kombisa kutsakela, a cigondzani ci fanele a ku ti wonela lezvaku ci nga ma tlhamuseli zvontlhe hi khati gin’we. Loku ci ma tlhamusela zvontlhe hi khati gin’we, a maxaka ya cona ma ta bhineka ma nga ha zvi lavi ku bhula kambe. Hikwalaho, kuca a cigondzani ca wena lezvaku ci bhula hi lezvi ci zvi kholwako hi ndlela ya ku a maxaka ya cona ma sala na ma ha zvi lava ku bhula kambe. (Kol. 4:6) Kuzvilava ci nga byela maxaka ya cona lezvaku ma nghena ka saite ya hina ya jw.org. Lezvo zvi ta vhuna a maxaka ya cona lezvaku ma tiva zvo tala hi Vakustumunyu va Jehovha hi zambo gabye.

17. U nga ci treinarisa kuyini a cigondzani ca wena lezvaku ci yimisana ni mawonela ya hava lawa a van’wani va nga nawo hi Vakustumunyu va Jehovha? (Wona ni mufota.)

¹⁷ Kuzvilava u nga tirisa tindzima ta jw.org ti nga ka cipandze “Lezvi va talako ku wutisa” kasi ku vhuna a cigondzani ca wena lezvaku ci longisela a hlamulo wo olova wa zviwutiso lezvi a maxaka kutani vatiri-kuloni va nga ci wutisako. (2 Tim. 2:24, 25) Loku mu mbheta a cigondzo cin’we ni cin’wani vhuxetani a cipandze “A vokari ve” ca bhuku Ti buze hi wutomi kala kupindzuka!. Kuca a cigondzani ca wena lezvaku ci hlamula a zviwutiso lezvo hi magezu ya cona. U nga kanakani ku ci nyika mawonela ya lezvi ci nga chukwatisisako zvona a mihlamulo ya cona. A ku ti nyika cikhati ca ku vhuxeta lezvi ci nga hlamulisako zvona zvi ta ci vhuna a ku yimela lezvi ci zvi kholwako hi kutiya.

18. U nga ci kucisa kuyini a cigondzani ca Bhibhiliya lezvaku ci sangula ku chumayela? (Matewu 10:27)

¹⁸ Jesu i kucile a vapizani vakwe lezvaku va chumayela a mahungu ya manene laha kubaseni. (Lera Matewu 10:27.) Loku a cigondzani ci hatlisa ku sangula ku bhula hi lezvi ci zvi kholwako ci ta hatla ci gondza ku tsumba Jehovha. U nga ci vhunisa kuyini a cigondzani ca wena lezvaku ci tatisa a kungo lego? A cikhati leci ku tivisiwako lezvaku ku tava ni tsima ga kuchumayela laha bandleni ga wena, kuca cigondzani ca wena lezvaku ci ehleketa hi lezvi ci nga mahako kasi ci ringanelwa hi kuva muhuweleli. Tlhamusela ku hikuyini a votala zvi nga va olovela ku sangula ku chumayela ndzeni ka tsima. A mixuvo yin’wani ci nga ti vekelako ku sangula ku maha zvipandze ka mitlhangano ya laha cikari ka vhiki. Laha ci ti karatelako ku tatisa a mixuvo leyo ci ta gondza ku tlhamusela lezvi ci zvi kholwako hi kutiya.

KOMBA LEZVAKU WA CI TSUMBA A CIGONDZANI CA WENA

19. Jesu i kombisile kuyini lezvaku i wa va tsumba a vapizani vakwe, niku hi nga mu pimanyisisa kuyini?

¹⁹ Na a nga se tlhela tilweni, Jesu i byelile a vapizani vakwe lezvaku va wa ta tlhela vava zvin’we naye. A vapizani a va zvi zwisisangi lezvaku Jesu i wa wula ku va wa taya tilweni. Hambulezvo, Jesu i no veka kupima ka kutsumbeka kabye na ku nga hi ka kukanakana kabye. (Joh. 14:1-5, 8) Jesu i wa zvi tiva lezvaku zvi wa lava cikhati kasi va zwisisa a zvilo zvo kari zvo kota a kutsumba ka le tilweni. (Joh. 16:12) Hinawu hi nga komba lezvaku ha tsumba ku a cigondzani ca hina ci lava ku tsakisa Jehovha.

20. A makabye wo kari wa le Malawi i kombisile kuyini lezvaku i wa ci tsumba a cigondzani cakwe?

²⁰ Hi fanele ku simama hi tsumba lezvaku a zvigondzani zva hina zvi lava ku maha lezvi zvi nga zvinene. Wona cikombiso ca makabye wo kari wa cisati wa le Malawi wa ku hi Chifundo. Makabye Chifundo i no sangula ku gondza Bhibhiliya ni nhanyana wo kari a vitaniwako ku hi Alinafe, wa muKatolika, hi bhuku Ti buze hi wutomi kala kupindzuka!. Laha va nga mbheta a cigondzo 14, Chifundo i no mu wutisa a mawonela yakwe xungetano hi ku tirisa zvifananiso wukhozeleni. Alinafe i no hlamula na a swirekile, aku: “Leco ciboho ca munhu ni munhu!” Chifundo i no alakanya ku a cigondzo ca Bhibhiliya ci wa ta gumesa kwalaho. Kanilezvi i no simama ku gondza naye hi lihlazva-mbilu na a tsumba lezvaku hi kufamba ka cikhati i wa ta zvi zwisisa. Andzhako ka tihweti titsongwani, Chifundo i no mu wutisa a ciwutiso ci nga ka cigondzo 34, ci nge: “Lezvi u nga gondza hi Bhibhiliya ni Nungungulu wa lisine, Jehovha, zvi ku vhunisa kuyini kala lezvi?” Chifundo i alakanya lezvi Alinafe a nga hlamulisa zvona, i te: “I hlawutele zvilo zvo tala zva zvinene niku a cin’we ca kona ku wa hi ku a Vakustumunyu va Jehovha a va hlengeli ka zvilo lezvi zvi koniwako hi Bhibhiliya.” Na zvi nga seya kule, Alinafe i no tsika ku tirisa zvifananiso a tlhela a ringanelwa hi kubhabhatisiwa.

21. Hi nga ci vhunisa kuyini a cigondzani lezvaku ci hlawula ku tirela Jehovha?

²¹ Hambu lezvi ku nga Jehovha “a kulisako” hinawu hi nga vhuna a zvigondzani zva Bhibhiliya lezvaku zvi kula hi tlhelo ga moya. (1 Kor. 3:7) Hi fanele ku maha zvo hundza ku gondzisa a cigondzani ca Bhibhiliya lezvi Nungungulu a lavako ku ci maha. Zvi lava ku hi ci vhuna ku ci mu randza nguvhu Jehovha. Hi fanele ku ci kuca kambe lezvaku ci kombisa a lirandzo la cona hi ku cica lezvi ci zvi rangisako. Niku hi fanele ku ci gondzisa lezvi ci nga mu tsumbisako zvona Jehovha loku ci kumana ni zvikarato. Loku hi komba lezvaku ha ci tsumba zvi maha ku ci kholwa ku conawu ci nga zvi kota ku hanya hi milayo ya Jehovha ni ku yimela lisine.