Vhumela kutsetselela ka Jehovha

1-2. Kupepa muni ku kumiwako hi vawonhi lava va ti solako? (Wona ni mufota wa kapa.)

HOSI Dhavhidha i wa zvi tiva khwatsi lezvi zvi bayisisako zvona a ku tizwa nandzu hi zviwonho zvi hundzileko. (Lis. 40:12; 51:3; magezu ya laha hehla ka cipimo) I wa mahile zviwonho zvo kari zva hombe wutomini gakwe. Hambulezvo, i no kombisa kutisola ka lisine, Jehovha a mu tsetselela. (2 Sam. 12:13) Hi kota ya lezvo, Dhavhidha i zwile kupepa ka hombe loku ku kumiwako hi ku tsetselelwa hi Jehovha. — Lis. 32:1.

² A ku fana na Dhavhidha, hinawu hi ngazwa kupepa loku Jehovha a hi kombisa wuxinji. A zvo ku chavelela a ku tiva lezvaku loku hi ti sola hi lisine, hi wulela zviwonho zva hina, hi tlhela hi maha zvontlhe hi zvi kotako kasi hi nga ha phindi zviwonho lezvo, Jehovha i ti yimisele a ku tsetselela zviwonho zva hina, hambu loku zvi hi zva hombe nguvhu! (Mav. 28:13; Miti. 26:20; 1 Joh. 1:9) Zva tiyisa nguvhu a ku tiva lezvaku i hi tsetselela hi kumbhelela laha ka ku zvi tlhela zvi ku khwatsi hi loku hi nga se tshuka hi maha ciwonho! — Ezek. 33:16.

3-4. A makabye wo kari i ti zwisile kuyini andzhako ka ku bhabhatisiwa, niku hi ta bhula hi yini ka ndzima leyi?

³ Kanilezvi, ka zvikhati zvin’wani a vokari zvi nga va karatela a ku vhumelela a kutsetselela ka Jehovha. Wona cikombiso ca Jennifer a wundlilweko lisineni. Laha a nga hi muswa, i no ti nghenisela ka mahanyela yo biha a tlhela a hanya wutomi gimbiri. Andzhako ka malembe yo kari, i no tlhelela ka Jehovha a gumesa a ringanelwa hi ku bhabhatisiwa. Jennifer i wula lezvi: A wutomi ga mina ga kale ku wa hi ku randza titshomba, ni wubhayi, ni wudhakwa, ni zanga. Maalakanyweni ya mina, ndzi wa zvi tiva lezvaku andzhako ka ku kombela kutsetselelwa hi mbilu yontlhe ndzi tlhela ndzi ti sola, a muphahlo wa Kristu wu wa ndzi maha ndzi basa. Kanilezvi ndzi wa nga zvi koti a ku kholwisa mbilu ya mina lezvaku hakunene ndzi tsetselelwe.”

⁴ Zva tshuka zvi ku karatela a ku kholwisa mbilu ya wena lezvaku Jehovha i tsetselele a zviwonho zva wena zva kale? Jehovha i lava lezvaku hi tiyiseka ku i na ni wuxinji a ku khwatsi hi lezvi Dhavhidha a nga tiyiseka. Ka ndzima leyi, hi ta wona ku hikuyini hi faneleko ku vhumela kutsetselela ka Jehovha niku zvini zvi nga hi vhunako ku vhumela.

HIKUYINI HI FANELEKO KU VHUMELA KUTSETSELELA KA JEHOVHA?

5. Sathani i lava ku hi kholwa yini? Nyika cikombiso.

⁵ Hi ku vhumela a kutsetselela ka Jehovha hi potsa ku wela ka wun’we wa mitlhamu ya Sathani. Alakanya lezvaku Sathani i maha ni cihi a ci kotako kasi ku hi tsikisa ku tirela Jehovha. Hi cikombiso, Sathani a nga zama ku hi maha hi kholwa lezvaku a zviwonho zva hina a zvi nge tshuki zvi tsetselelwa. Wona matimu ya wanuna loyi wa le Korinte a nga susiwa bandleni hi kota ya wubhayi. (1 Kor. 5:1, 5, 13) A cikhati leci hi ndzhako ka cikhati a nga ti sola, Sathani i wa lava lezvaku a vamakabye laha bandleni va nga mu tsetseleli niku va nga mu amukeli laha bandleni. A cin’wani kambe, i wa lava lezvaku a wanuna loye a nga ti solile a tizwa na a nga tsetselelwangi kasi a ‘reriwa hi kubayiseka kakwe ka hombe’ laha kuza a nyima ku tirela Jehovha. Sathani a nga cicangi a kungo gakwe kutani tipulani takwe. Kanilezvi “ha ti tiva a tipulani takwe”. — 2 Kor. 2:5-11.

6. Zvini zvi nga hi vhunako ku rula ndzhwalo wa ku tizwa nandzu?

⁶ Hi ku vhumela a kutsetselela ka Jehovha hi rula ndzhwalo wa ku tizwa nandzu. Loku hi maha ciwonho zvi tolovelekile a ku hi tizwa nandzu. (Lis. 51:17) Lezvo zvi nene. A livhalo la hina li nga hi kuca ku hiba mazambo man’wani ya manene kasi ku lulamisa mahanyela ya hina. (2 Kor. 7:10, 11) Hambulezvo, loku hi simama ku tizwa nandzu hi cikhati co leha andzhako ka loku hi ti solile ka ciwonho ca hina zvi nga hi ringa ku hi tlhelela ndzhako. A cikhati leci hi vhumelako a kutsetselela ka Jehovha, hi veka nandzu wa hina wutshan’wini ga wona, ku nga le ndzhako ka hina. Andzhako ka lezvo, hi tirela Jehovha kota lezvi yena a zvi lavisako zvona, ku nga ku mu tirela na hi hi ni livhalo li basileko ni litsako la hombe. (Kol. 1:10, 11; 2 Tim. 1:3) Hambulezvo, hi nga yi kholwisisa kuyini a mbilu ya hina lezvaku yi vhumela kutsetselela ka Nungungulu.

ZVINI ZVI NGA HI VHUNAKO A KU VHUMELA KUTSETSELELA KA JEHOVHA?

7-8. Jehovha i ti tlhamuselisile kuyini ka Mosi, niku lezvo zvi hi tiyisekisa yini? (Eksodhusi 34:6, 7)

⁷ Ehleketa hi lezvi Jehovha a ti tlhamuselisako zvona. Hi cikombiso, wona lezvi Jehovha a nga byela Mosi le Citsungeni ca Sinayi.a (Lera Eksodhusi 34:6, 7.) Ndzeni ka zvontlhe lezvi zva ku na a wulile xungetano hi matshamela yakwe ni tindlela takwe, i zvi wonile na zvi tshama khwatsi a ku wula lezvi: “A Nungungulu wa wuxinji, ni wa ku zwela wusiwana”. Xana a Nungungulu wo kota loye a nga ala ku tsetselela vakhozeli vakwe lava va ti solako hi mbilu yontlhe ka zviwonho zvabye. Ahihi! Lezvo zvi wa ta wula ku kala wuxinji ni kuva ni xapi, ku nga matshamela ya ku Jehovha a nga tshuki a ma kombisa.

⁸ Hi nga tiyiseka lezvaku loku Jehovha a wula ku i na ni wuxinji, i wula lisine. Jehovha a nga tshuki a hemba. (Lis. 31:5) Hikwalaho, hi nga kholwa lezvi a wulako. Loku zvi ku karatela a ku kala u nga ha tizwi nandzu hi zviwonho zvi hundzileko, ti wutise lezvi: ‘Ndza kholwa lezvaku hakunene Jehovha i na ni wuxinji ni zwela-wusiwana niku a nga tshuki a ala ku tsetselela ni wihi a ti solako? Makunu, hikuyini ndzi nga wa ta kala ku vhumela lezvaku i ndzi tsetselele?’

9. Zvi wula yini a ku tsetselelwa zviwonho zva hina? (Lisimu 32:5)

⁹ Ehleketa hi lezvi Jehovha a nga pimisela a vatsali va Bhibhiliya lezvaku va wula xungetano hi kutsetselela kakwe. Hi cikombiso, wona lezvi Dhavhidha, a mutsali wa Bhibhiliya, a ku tlhamuselisako zvona a kutsetselela ka Jehovha. (Lera Lisimu 32:5.) Dhavhidha i te: “U tsetselele a nandzu wa zviwonho zva mina”. A gezu ga ciHebheru ga ku ‘tsetselela’ gi nga wula ku “tlakula” kutani ku “rwala”. A cikhati leci Jehovha a nga tsetselela Dhavhidha, hi ndlela yo kari, i no tlakula a zviwonho zva Dhavhidha a rwala. Makunu, Dhavhidha a ku hefu ka ndzhwalo wo bindza lowu a nga rwele. (Lis. 32:2-4) Hinawu hi ngazwa a kupepa loko. A cikhati leci hi ti solako ka zviwonho zva hina a zva ha lavi ku hi simama hi rwala ndzhwalo wa ku tizwa nandzu hi zviwonho lezvi Jehovha a tlakulileko a rwala.

10-11. A magezu i “longile ku tsetselela” ma hi byela yini hi Jehovha? (Lisimu 86:5)

¹⁰ Lera Lisimu 86:5. Ka vhesi legi, Dhavhidha i wulawula hi Jehovha kota loyi a ‘longileko ku tsetselela’. Na gi wulawula hi magezu lawa, a bhuku go kari ga ku tlhamusela Bhibhiliya gi wulile lezvi hi Jehovha: “[Yena] ‘mutsetseleli, lego i tshamela gakwe.’” Hikuyini Jehovha a tshamisileko lezvo? A cipandze ci landzelako ca vhesi legi ca tlhamusela: “U tele hi lirandzo li nga mbheliko ka vontlhe lava va khongelako ka wena.” Kota lezvi hi zvi wonileko ka ndzima yi nga hundza, a lirandzo li nga mbheliko li kuca Jehovha lezvaku a bohana nguvhu kala kupindzuka ni vakhozeli vakwe vo tsumbeka. Na a kuciwa hi lirandzo lakwe li nga mbheliko, Jehovha i va “tsetselela hi kumbhelela” vontlhe a vawonhi lava va ti solako. (Isa. 55:7) Loku zvi ku karatela a ku vhumela kutsetselela ka Nungungulu, u nga ti wutisa lezvi: ‘Ndza kholwa lezvaku Jehovha Mutsetseleli a longileko a ku tsetselela vontlhe lava va ti solako ni ku mu kombela lezvaku a va mahela wuxinji? Makunu, hikuyini ndzi kalako ku vhumela lezvaku i ndzi tsetselele a cikhati leci ndzi nga mu rilela lezvaku a ndzi mahela wuxinji?’

¹¹ Zva hi chavelela a ku tiva lezvaku Jehovha wa zvi zwisisa khwatsi lezvaku hi vawonhi. (Lis. 139:1, 2) Lezvo zvi woneka khwatsi ka Lisimu lin’wani la Dhavhidha, leli lonawu li nga hi vhunako ku vhumela a kutsetselela ka Jehovha.

U NGA RIVALI LEZVI JEHOVHA A ZVI ALAKANYAKO

12-13. Hi kuya hi Lisimu 103:14, zvini lezvi Jehovha a zvi alakanyako hi hina, niku lezvo zvi mu kuca ku a maha yini?

¹² Lera Lisimu 103:14. Dhavhidha i wulawulile hi Jehovha kota loyi a ‘alakanyako lezvaku hi ntshuri’. Hi magezu lawa, Dhavhidha i wo tlhamusela a cin’we ca zvigelo zvi mahako ku Jehovha a tshama na a longile ku tsetselela a vakhozeli vakwe lava va ti solako: A nga tshuki a rivala lezvaku hi vawonhi. Kasi ku yi zwisisa khwati a mhaka leyi, a hi ma hloleni khwatsi a magezu ya Dhavhidha.

¹³ Dhavhidha i wulile lezvaku Jehovha “wa zvi tiva khwatsi lezvi hi nga wumbiswa zvona”. Jehovha i ‘wumbile munhu hi ntshuri’. Hikwalaho, wa zvi tiva lezvi a vanhu va nga wumbisiwa zvona ni lezvi va zvi lavako. Hi cikombiso, hi lava kuga, ni ku etlela, ni ku hefemula. (Gen. 2:7) Kanilezvi a cikhati leci Adhamu na Evha va nga wonha, a kuva va wumbilwe hi ntshuri zvi nova ni tlhamuselo wun’wani. Kota pswalo wabye, hi thapelwe hi ciwonho leci ci mahako ku hi byekelela ku maha zvilo zva kubiha. Jehovha a nga tivi basi lezvaku hi vawonhi, kanilezvi Dhavhidha i wulile lezvaku “wa zvi alakanya”. A gezu ga ciHebheru gi tirisilweko laha gi nga wula a ku maha zvilo zva zvinene. Hi nga songa a tlhamuselo wa magezu ya Dhavhidha hi ndlela leyi: Jehovha wa zvi tiva lezvaku ka zvikhati zvin’wani hi ta maha zvihoxo niku a cikhati leci a wonako lezvaku ha ti sola hi mbilu yontlhe i hi kombisa wuxinji a tlhela a hi tsetselela. — Lis. 78:38, 39.

14. a) Dhavhidha i ku tlhamuselisile kuyini a kutsetselela ka Jehovha? (Lisimu 103:12) b) Hi gondza yini ka lezvi Jehovha a nga mu tsetselelisa zvona Dhavhidha? (Wona ni kwadru “Jehovha i tsetselelisa kuyini niku i zvi rivala hi ndlela muni?”)

¹⁴ Cini cin’wani ci nga hi vhunako a ku tiyiseka lezvaku Jehovha i hi tsetselele? (Lera Lisimu 103:12.) Dhavhidha i wulile lezvaku a cikhati leci Jehovha a hi tsetselelako i hoxa zviwonho zva hina kule nguvhu “a ku khwatsi kutsawukana ka mutsuwuka-gambo ni mupela-gambo”. A mutsuwuka-gambo ni mupela-gambo zvi tsawukene nguvhu niku a zvi tshuki zvi kumana. Lezvo zvi hi byela yini hi zviwonho lezvi Jehovha a hi tsetseleleko? A bhuku go kari gi zvi fananisile hi ndlela leyi: “Loku a ciwonho ci susiwa ciya kule, hi nga tiyiseka lezvaku a masema ya cona ma n’walala hi kumbhelela ku nga ha sali ne ni ndzhati wa cona, hikwalaho Nungungulu a nga ha tshuki a ci alakanya kambe.” Hi nga ehleketa hi lezvi: A masema yo kari ma nga hi alakanyisa zvilo zvi hundzileko. Kanilezvi a cikhati leci Jehovha a hi tsetselelako, zvi mahisa ku khwatsi hi loku ku nga salangi ne ni ndzhatanyana wa masema ya ciwonho ya ku ma mu alakanyisa a ciwonho leco kutani ku a ha hi tsayisa hi cona. — Ezek. 18:21, 22; Miti. 3:19.

15. Zvini hi nga mahako loku a kutizwa nandzu hi zviwonho zvi hundzileko ku nga hundzi?

¹⁵ A magezu ya Dhavhidha ma nga ka Lisimu 103 ma nga hi vhunisa kuyini a ku vhumela kutsetselela ka Jehovha? Loku a kutizwa nandzu hi zviwonho zvi hundzileko ku nga hundzi, hi nga ti wutisa lezvi: ‘Xana ndzo rivala lezvi Jehovha a zvi alakanyako, ku nga ku, ndzo rivala lezvaku yena wa zvi alakanya ku ndzi muwonhi niku wa tsetselela a vawonhi lava va ti solako? A cin’wani kambe, ndzi alakanya lezvi Jehovha a bohako ku zvi rivala, ku nga ku, ndzi alakanya a zviwonho lezvi a ndzi tsetseleleko niku a nga ta ha ndzi tsayisa hi zvona?’ Jehovha a nga veki kupima ka zviwonho zvi hundzileko; hikwalaho, hinawu a hi faneli ku veka kupima ka zvona. (Lis. 130:3) A cikhati leci hi vhumelako kutsetselela ka Jehovha, hi ta zvi kota a ku ti tsetselela hina wutsumbu hi tlhela hi simama ku tirela Jehovha na hi tsakile.

16. Nyika cikombiso ca mhango yi nga kona loku hi simama ku tizwa nandzu hi zviwonho zvi hundzileko. (Wona ni mufota.)

¹⁶ Wona mufananiso wo kari. A ku tizwa nandzu hi zviwonho zvi hundzileko zvi nga fananisiwa ni ku fambisa movha na u simama ku cuwuka basi ka cibuko ca le ndzhako. Zvi nene a kuta na u cuwuka a cibuko ca le ndzhako; zvi vhuna ku u ti wonela timhango ta le ndzhako. Kanilezvi kasi u famba khwatsi, u fanele ku veka kupima ka lezvi zva le phambeni. Hi kufanana, zvi nga vhuna a kuta na hi alakanya a zvihoxo lezvi hi zvi mahileko kale; hi nga gondza ka zvona hi tlhela hi tiyisa a kutiyimisela ka hina ka ku hi nga ha zvi phindi kambe. Kanilezvi loku hi veka kupima basi ka zvihoxo lezvi hi zvi mahileko kale, a ku tizwa nandzu ku nga hi tsandzekisa ku maha lezvi hi zvi kotako ntirweni wa Nungungulu. Wutshan’wini ga lezvo, ngha hi simama ku veka kupima ka lezvi zva le mahlweni. Hi ndleleni leyi yi yisako wutomini misaveni leyi Nungungulu a yi tsumbisileko, laha a zvilo zvo bayisa lezvi zvi hi humeleleko zvi to kala ‘zvi nga ha alakanyiwi’. — Isa. 65:17; Mav. 4:25.

SIMAMA KU KHOLWISA MBILU YA WENA

17. Hikuyini hi faneleko ku simama hi kholwisa mbilu ya hina lezvaku Jehovha wa hi randza niku wa hi tsetselela?

¹⁷ Hi fanele ku simama hi kholwisa mbilu ya hina lezvaku Jehovha wa hi randza niku wa hi tsetselela. (1 Joh. 3:19) Hikuyini? Hi ku Sathani a nga karali ku zama ku hi kholwisa lezvaku a hi ringanelwi hi ku randziwa ni ku tsetselelwa. Kani i mahela muni a gi tirisako, a kungo gakwe hi galegi ga gin’we, ku hi tsikisa ku tirela Jehovha. Hi rindzela lezvaku Sathani a engetela nguvhu a kutikarata kakwe hakuva wa zvi tiva lezvaku a cikhati ci mu saleleko ci tsongwani. (Kuv. 12:12) A hi faneli ku mu tsika a hlula!

18. Zvini u nga mahako kasi ku kholwisa mbilu ya wena lezvaku Jehovha wa ku randza niku wa ku tsetselela?

¹⁸ Kasi u tiyiseka lezvaku Jehovha wa ku randza tirisa mawonela hi ma wonileko ka ndzima yi nga hundza. Kasi ku kholwisa mbilu ya wena a kutsetselela ka Jehovha, ehleketa hi lezvi Jehovha a ti tlhamuselisako zvona. Ehleketa kambe hi lezvi Jehovha a nga pimisela a vatsali va Bhibhiliya lezvaku va wula xungetano hi kutsetselela kakwe. U nga rivali lezvaku Jehovha wa zvi tiva lezvaku u muwonhi niku i ta ku mahela wuxinji. Alakanya lezvaku a cikhati leci a hi tsetselelako i hi tsetselela hi kumbhelela. Hikwalaho, u nga tsaka hi lezvi u tiyisekako ku Jehovha i ta ku mahela wuxinji niku u nga wula zvo fana ni lezvi Dhavhidha a wulileko, uku: “Ndzi bongile Jehovha hi ku tsetselela ‘a nandzu wa zviwonho zva mina’!” — Lis. 32:5.