Jesu “i gondzile ku ingisa”

Contlhe cikhati Jesu i ingisa Jehovha. (Joh. 8:29) Makunu, hikuyini a Bhibhiliya gi wulako ku “i gondzile ku ingisa ka zvilo lezvi a nga xaniseka hi zvona”? — Mah. 5:8.

A cikhati leci a nga hi laha misaveni, Jesu i kumene ni zviyimo zva ku a zvi kona le tilweni. I wundlilwe hi vapswali va nga randza Jehovha kanilezvi vo kala kumbhelela. (Luka 2:51) I xanisilwe hi varangeli va wukhongeli va vakanganyisi ni tihosi to kala ku lulama. (Mat. 26:59; Mar. 15:15) A cin’wani kambe, i nofa hi ndlela yo bayisa nguvhu kanilezvi a Bhibhiliya gi wula ku “i no ti koramisa a ingisa kala kufeni”. — Filp. 2:8.

A zvilo lezvi zvontlhe a kumeneko nazvo zvi mu gondzisile ku ingisa hi ndlela ya ku i wa nga se yi gondza le tilweni. Hi lezvo zvi mu vhunako ku ava Hosi ya yinene nguvhu ni Mupristi wa Hombe, loyi a nga hi zwelako wusiwana. (Mah. 4:15; 5:9) Jesu i nova wa lisima nguvhu ka Jehovha andzhako ka loku a gondzile ku ingisa ka zvilo lezvi a nga xaniseka hi zvona. Hinawu hi ngava va lisima nguvhu ka Jehovha a tlhela a hi tirisa nguvhu ni ka cihi ciavelo a nga hi nyikako loku hi simama hi ingisa hambu ka zviyimo zvo nonoha. — Jak. 1:4.