“I Lo Gonza Kuingisa”

1, 2. Hikuyini a dadani wa liranzo a tsakako hi ku wona a n’wana wakwe na a mu ingisa, niku xana a kutizwa kakwe ku kombisisa kuyini a kutizwa ka Jehova?

DADANI i cuwuka handle hi laha njhaneleni, a wona n’wana wakwe wa mufanyana na a hlakana ni vanghana vo kari. A bhola yabye yi tlula yi huma mutini yiya ruweni. A mufanyana a lanzelela bhola hi mahlo hi kunavela ka hombe. A munwe wa vanghana vakwe i mu kuca lezaku a tsutsumela ruweni kasi aya yi teka, kanilezi a mufanyana i ninginiza hloko hi kuala aku: “A nzi vumelelwi ku maha lezo.” Dadani a hlekelela.

² Hikuyini dadani a tsakileko nguvu? Hilezaku yena i gonzisile a n’wana wakwe lezaku a ngayi ruweni na a hi yece. A xikhati lexi a mufana a ingisako — hambu loku a nga zi tivi lezaku a dadani wakwe wa mu wona — ​dadani wa zi tiva lezaku a n’wana wakwe wa gonza kuingisa niku hi kota ya lezo a nga ta wela mhangweni. A dadani loye i tizwa a ku fana ni Dadani wa hina wa le tilweni, Jehova. Nungungulu wa zi tiva lezaku loku hi lava ku tshama na hi tsumbekile ni kuva hi wona a wumanziko go hlamalisa legi a hi vekeleko, hi fanele ku gonza a ku mu tsumba ni ku mu ingisa. (Mavingu 3:5, 6) Kasi ku chikelela magumo lawo, yena i hi rumelele a mugonzisi wa chukwana a ku hunza vanhu vontlhe.

3, 4. Xana zi kotekisa kuyini lezaku Jesu ‘a gonza kuingisa’ ni kuva ‘a mbheleliswa’? Kombisa hi mufananiso.

³ A Biblia gi wula nchumu wu hlamalisako xungetano hi Jesu: “Hambu lezi a nga hi N’wana, i lo gonza kuingisa hi lezi a nga xaniseka ha zona; na a mbhelelisilwe i lo maha a muvangi wa kuhanyiswa ka pinzukelwa ka vontlhe lava va mu ingisako.” (Maheberu 5:8, 9) A N’wana loyi i wa sina a hi kona hi kale le tilweni hi tinguva ta tsanza-vahlayi. Yena i wonile Satani ni tingelosi-kulobye ta vahluwuki na va hluwuka, kanilezi a N’wana wa matewula a nga zangi a ti patsa na vona. A xiprofeto xi pimisilweko xi tirisa magezu lawa ka yena: “A nzi alangi [“hluwukangi,” NM].” (Isaya 50:5) Makunu, xana a magezu “i lo gonza kuingisa” ma tirisisa kuyini ka N’wana loyi wo ingisa hi kumbhelela? Xana a xivangwa lexi xo mbhelela xi wa ta ‘mbheleliswa’ kuyini?

⁴ Ehleketa hi mufananiso lowu. A sochwa go kari gi na ni supado ya xiketse. Hambulezi yi kalako yi nga se ringisiwa yimpini, yi bethilwe hi kumbhelela yi tlhela yi sasekiselwa khwatsi. Hambulezo, yena i cicisa supado leyo hi yinwani yi bethilweko hi simbi yo tiya nguvu. A supado leyi ya yiswa yi sina yi tirisilwe khwatsi yimpini. Xana loku a hi kucicisa ka wutlhari? Hi kufanana, a kuingisa loku Jesu a ku kombisileko mahlweni ka kuta misaveni ku wa nga hi na xihoxo. Kanilezi anzhako ka ku tshama xikhatanyana laha misaveni, a kuingisa kakwe ku lo kuma matshamela yo hambana hi kumbhelela. Makunu ku lo ringiwa, ku tiyisiwa, hi mawulawulela yo fananisa, ku tlhela ku hloliwa hi ziringo lezi Jesu cima a nga wa ta kala a nga tlhanganangi nazo le tilweni.

5. Xini xi mahileko lezaku a kuingisa ka Jesu kuva ka lisima nguvu, niku zini hi to zi kambisisa ka xipimo lexi?

⁵ A kuingisa ku wa hi tshinya ka ntiro wa Jesu wa kuta misaveni. Kota “Adamu wo gumesa,” Jesu i lota laha misaveni lezaku a ta maha lezi a raru wa hina wo sangula a nga tsika ku maha — a ku simama a tsumbekile ka Jehova Nungungulu, hambu loku a hi kuringweni. (1 Va Le Korinte 15:45) Hambulezo, a kuingisa ka Jesu ku wa nga hi ka ku mahiwa hi ku tatisa nayo ntsena. Jesu i ingisile hi kupima, hi mbilu, ni muhefemulo wakwe wontlhe. Niku i zi mahile hi kutsaka. A ku maha kuranza ka Dadani wakwe ku wa hi ka lisima nguvu a ku hunza kuga! (Johani 4:34) Zini zi nga hi vunako a ku pimanyisa a kuingisa ka Jesu? A kusangula a hi kambisiseni a zigelo zakwe. A ku hlakulela a zigelo zo fana ni zakwe zi ta hi vuna kambe lezaku hi ala ziringo zonake hi tatisa kuranza ka Nungungulu. Makunu hi ta vuxeta a michachazelo yo kari yi kumiwako hi ku kombisa kuingisa ko fana ni ka Kristu.

A Zigelo Za Kuingisa Ka Jesu

6, 7. Kuve zihi a zigelo zo kari za kuingisa ka Jesu?

⁶ A kuingisa ka Jesu ku wa huma hi ka matshamela ma nene ya mbilu yakwe. Kota lezi hi zi wonileko ka Xipimo 3, Kristu i wa hi ni mbilu yi koramileko. A matshanza ma maha vanhu va nyenya kuingisa, kuveni a kutikoramisa ku hi vuna a ku ingisa Jehova hi kuziranza. (Eksodusi 5:1, 2; 1 Pedro 5:5, 6) A ku hunza lezo, a kuingisa ka Jesu ku tumbulukele ka lezi a nga zi ranza ni ka lezi a nga zi venga.

⁷ Hehla ka zontlhe, Jesu i wa ranza Dadani wakwe wa le tilweni, Jehova. A liranzo lelo li ta kambisiswa hi kuetileko nguvu ka Xipimo 13. A liranzo lelo li mahile lezaku Jesu ava ni kuchava Nungungulu. A liranzo lakwe hi Jehova li wa hi la hombe nguvu ni kuchava kakwe ku wa etile nguvu, laha ka kuza a chava ku khunguvanyisa a Dadani wakwe. A kuchava Nungungulu kuve xigelo xa kuva a mikhongelo ya Jesu yi zwiwa. (Maheberu 5:7) A kuchava Jehova i tshamela go dlunyateka ga kufuma ka Jesu kota Hosi ya wuMessia. — Isaya 11:3.

8, 9. Kota lezi zi profetilweko, xana Jesu i ti zwisile kuyini xungetano hi kululama ni kubiha, niku xana i ku kombisile kuyini a kutizwa loko?

⁸ A liranzo ha Jehova li lava livengo kambe xungetano hi lezi Jehova a zi vengako. Hi xikombiso, wona a xiprofeto lexi xi kongomiswako ka Hosi ya wuMessia: “Wena u ranza kululama, u venga kubiha; hikwalaho Nungungulu, a Nungungulu wa wena, i ku totile hi mafura ya litsako ku hunza vanakuloni.” (Tisimu 45:7) A “vanakuloni” va Jesu va wa hi tinwani tihosi ta lomu lixakeni la Hosi Davida. A ku hunza vontlhe lavo, Jesu i na ni xigelo xa kunengela, kutani kutsaka ka hombe, kutotiweni kakwe. Hikuyini? A nchachazelo wakwe ngwa hombe nguvu a ku hunza wabye, a wuhosi gakwe gi bhinzula kala kupinzuka. Yena i nchachazelwa hakuva a kuranza kakwe kululama ni kuvenga kakwe kubiha zi mu kucile a ku ingisa Nungungulu zilweni zontlhe.

⁹ Xana Jesu i kombisile kuyini a kutizwa kakwe xungetano hi kululama ni kubiha? Hi xikombiso, a xikhati lexi a valanzeli vakwe va nga lanzela a wurangeli gakwe ntirweni wa kuxumayela zonake va katekiswa hi zalezo, xana Jesu i hlamulisile kuyini? I lo tala hi kutsaka. (Luka 10:1, 17, 21) Niku a xikhati lexi a vanhu va le Jerusalema va nga kombisa moya wa kungaingisi hi kuphindaphinda, va ala a kutikarata kakwe ka liranzo ka ku lava ku va vuna, xana Jesu i ti zwisile kuyini? I lo rila hi kota ya wuhluwuki ga doropa lego. (Luka 19:41, 42) Jesu i khumbekile nguvu xungetano hi mahanyela ma nene ni lawa ya kubiha.

10. Hi kwihi kutizwa loku hi faneleko ku ku hlakulela xungetano hi mitiro yo lulama ni zimaho za hava, niku xini xi ta nga hi vuna a ku maha lezo?

¹⁰ A ku ehleketa hi kutizwa ka Jesu ka hi vuna a ku hlola zigelo za hina za ku ingisa Jehova. Hambulezi hi nga mbhelelangiko, ha zi kota a ku hlakulela liranzo lo eta hi mitiro yi nene ni ku venga mahanyela yo biha hi mbilu yontlhe. Hi fanele ku khongela ka Jehova, hi mu kombela lezaku a hi vuna a ku hlakulela kutizwa ko fana ni loku ka yena ni loku ka N’wana wakwe. (Tisimu 51:10) Ka xikhati xalexi xa xinwe, hi fanele ku potsa mikucetelo leyi yi ta nga onha a kutizwa loko. A ku hlawula khwatsi a kutihungata ni vanghana za lisima. (Mavingu 13:20; Va Le Filipi 4:8) Loku hi hlakulela a zigelo za ku fana ni lezi za Kristu, a kuingisa ka hina ku nga tava ka ku tatisa nayo ntsena. Hi ta maha za kululama hakuva ha ranza ku maha lezo. Hi ta potsa mitiro ya hava, na ku nga hi hi kota ya ku chava ku kumiwa, kanilezi hi kota ya ku venga mahanyela lawo.

“Yena A Nga Onhangi”

11, 12. (a) Zini zi nga humelela Jesu kusanguleni ka wutireli gakwe? (b) Xana Satani i ringisile kuyini Jesu hi khati go ranga, na a tirisa mano wahi?

¹¹ Xungetano hi kuvenga kakwe xionho, Jesu i ringilwe kusanguleni ka wutireli gakwe. Anzhako ka kubapatizwa kakwe, yena i mbhetile 40 wa masiku ni 40 wa wusiku le xiwuleni, na a nga hi na zakuga. A kumbheleni ka xikhati lexo, Satani i tile a ku ta mu ringa. Wona lezi Diyabu a nga hi ni mano ha zona. — Mateu 4:1-11.

¹² A kuranga Satani i te ngalo: “Loku wena u hi N’wana wa Nungungulu, laya a maribye lawa lezaku ma maha zibaba.” (Mateu 4:3) Xana Jesu i ti zwisile kuyini anzhako ka kuva a yilile xikhati xo leha? A Biblia gi wula hi kudlunyatekileko giku: “I lozwa ndlala.” (Mateu 4:2) Hikwalaho Satani i lo lonzowota a kunavela ka ntumbuluko ka zakuga, niku handle ko kanakana yena i rinzele kala Jesu a rereka. Wona kambe a xiruko xa Satani ka magezu lawa: “Loku wena u hi N’wana wa Nungungulu.” Satani i wa zi tiva lezaku Jesu i wa hi “matewula ya zivangwa zontlhe.” (Va Le Kolosi 1:15) Hambulezo, Jesu a nga vumelangi lezaku Satani a mu kuca a ku hluwuka. Jesu i wa zi tiva lezaku ku wa nga hi kuranza ka Nungungulu a kuva a tirisa ntamu wakwe zilweni za makangwa. Yena i alile ku maha lezo, a komba hi kutikoramisa lezaku yena i wa khegela ka Jehova kasi a kuma zakuga ni wurangeli. — Mateu 4:4.

13-15. (a) Xive xihi a xiringo xa Satani xa wumbiri ni xa wunharu ka Jesu, niku xana Jesu i hlamulisile kuyini? (b) Xana hi zi tivisa kuyini lezaku Jesu a nga zangi a tsika ku ti wonela ka Satani?

¹³ Ka xiringo xakwe xa wumbiri, Satani i lo yisa Jesu xixungweni xa tempeli xi hunzeleleko kutlakuka. Hi ku soholota Mhaka ya Nungungulu hi ku tirisa mano, Satani i lo ringa Jesu lezaku a kombisa wudzunzo gakwe hi ku ti tsikeleta hi le hehla kasi a tingelosi ti mu tlhatlhisa. Loku a zidlemo lezi zi nga hi lomu tempeleni zi wa wonile a xihlamaliso lexo, xana ngha ku vile ni munwe loyi a nga wa tava ni kukanakana ka lezaku Jesu i wa hi Messia loyi a tsumbisilweko? Niku loku a zidlemo zi wa vumele Jesu kota Messia ka xiseketelo lexo xa ku ti kombisa hi mitiro ya kuhlamalisa, xana Jesu na a nga potsangi a kuxaniseka ni timhango to tala? Kuzilava. Kanilezi Jesu i wa zi tiva lezaku ku wa hi kuranza ka Jehova lezaku Messia a maha ntiro wakwe hi ndlela ya kutikoramisa, na ku nga hi ku kucetela vanhu a kuva va kholwa ka yena hi ku maha mitiro ya zihlamaliso. (Isaya 42:1, 2) Laha kambe, Jesu i alile a ku hluwukela Jehova. A ndhuma a yi vangi xinavetiso kakwe.

¹⁴ Hambulezo, ku nga wuliwa yini hi xinavetiso xa wukosi? Ka xiringo xakwe xa wunharu, Satani i lo nyika Jesu yontlhe mifumo ya misava loku ku wa hi lezaku Jesu i ta maha xo kari xi kombako ku khozela Satani. Xana yena i alakanyele khwatsi hi xinyikiwo xa Satani? “Suka Satani,” kuve hlamulo wakwe. I lo engeta aku: “Hakuva ku tsalilwe ku ngalo: Wena u ta khozela Hosi Nungungulu wa wena, hi yena yece u to mu tirela.” (Mateu 4:10) Ku hava ni xinwe xi nga wa ta kucetela Jesu lezaku a khozela munwani nungungulu. Ge hambu xinyikiwo xa wukosi kutani ndhuma ka tiko legi zi wa nga ta mu djikisa a maha nchumu wunwe wa kungaingisi.

¹⁵ Xana Satani i tlhelele nzhako? I mu tsikile hi kulaya ka Jesu. Hambulezo, a Ivangeli ya Luka yi wula lezaku Diyabu “i lo suka ka yena xikhatanyana.” (Luka 4:13) Hakunene, Satani i wa ta kuma xinwani xikhati xa ku ringa Jesu, kala kugumesa. A Biblia gi hi byela lezaku Jesu ‘i lo ringwa hi matlhelo wontlhe.’ (Maheberu 4:15) Hikwalaho Jesu a nga zangi a tsika ku ti wonela; ge hambu hina a hi faneli.

16. Xana Satani i ringisa kuyini malanza ya Nungungulu inyamutlha, niku hi nga alisa kuyini a mizamo yakwe?

¹⁶ Satani wa ha simama ku ringa a malanza ya Nungungulu inyamutlha. Lexi xi nga tsakisiko hi lezaku a kungambheleli ka hina ku tala ku hi maha hiva zipotiyelo zo hehuka ka yena. Satani hi mano i tirisa makangwa, matshanza, ni kunavela wukosi. Hi wuxengeteli ga kutinyiketela titshombeni, Satani a nga ha tirisa a mano wontlhe lawa hi khati ginwe! Za lisima a kuva hi nyimanyana ka zikhati zo kari kasi hi kambisisa a wutsumbu ga hina. Hi maha khwatsi hi ku ehleketa hi magezu ya 1 Johani 2:15-17. A xikhati lexi hi mahako lezo, hi nga ha ti wutisa lezaku xana a kunavela ka nyama ka mafambisela lawa ya zilo, a ku kokiwa hi titshomba, ni kunavela ka ku maha vanwani va ku hlamala a zi mbhetangi a liranzo la hina hi Dadani wa hina wa le tilweni. Hi fanele ku alakanya lezaku a tiko legi ga hunza, a ku fana ni mufumeli wa gona, Satani. A hi aleni a mizamo yakwe ya mano ya ku lava ku hi wisa xionhweni! Ngha hi pimanyisa a xikombiso xa Hosi ya hina hakuva “yena a nga onhangi.” — 1 Pedro 2:22.

“Xontlhe Xikhati Nzi Maha Lezi Zi Mu Xalalisako”

17. Xana Jesu i wa ti zwisa kuyini xungetano hi ku ingisa a Dadani wakwe, hambulezo xikarato muni lexi a vo kari va zi kotako a ku xi vuxa?

¹⁷ A kuingisa ku patsa zo tala a ku hunza ku ti khoma kumaheni ka xionho; Kristu i tatisile a zileletelo zontlhe za Dadani hi kukhatala. I te ngalo: “Xontlhe xikhati nzi maha lezi zi mu xalalisako.” (Johani 8:29) A kuingisa loko ku nehile litsako la hombe ka Jesu. Hakunene, a vo kari va nga ha vuxa xikarato xa lezaku a kuingisa ku wa nga nonohi ka Jesu. Va nga ha alakanya lezaku yena i wa fanele ku ingisa Jehova ntsena, loyi a mbheleleko, kuveni hina a kutala ka zikhati hi fanele ku ingisa a vanhu va nga mbhelelangiko zikhundleni zabye za wufumeli. Hambulezo, a lisine hi lezaku Jesu i wa ingisa a vanhu va nga mbhelelangiko lava va nga hi ni zikhundla ni wufumeli.

18. Kota munhu muswa, xana Jesu i vekile xikombiso muni xa kuingisa?

¹⁸ A xikhati lexi a nga kari a kula, Jesu i wa fumelwa hi vapswali vakwe va nyama va nga mbhelelangiko, Josefa na Maria. Kuzilava, a ku hunza vanana vo tala, yena i wa zi kota a ku wona zihoxo ka vapswali vakwe. Xana i hluwukile, a ti kulisa a tsika wutshamu gakwe a nyikilweko hi Nungungulu a tlhela a va byela lezi va faneleko ku rangelisa zona ngango? Wona lezi Luka 2:51 a zi wulako xungetano hi Jesu a xikhati a nga hi ni 12 wa malembe: “Yena i wa va ingisa.” Ka kuingisa loko, i vekile xikombiso xi nene ka vanhu vaswa va nga maKristu, lava va zamako ku ingisa a vapswali vabye ni ku va kombisa xichawo xi faneleko. — Va Le Efesusi 6:1, 2.

19, 20. (a) Hi yihi a minzhingo yo hambana ni yontlhe leyi Jesu a yimiseneko nayo xungetano hi ku ingisa vanhu va nga mbhelelangiko? (b) Hikuyini a maKristu inyamutlha ma faneleko ku ingisa lava va rangelako xikari kabye?

¹⁹ Xungetano hi ku ingisa vanhu va nga mbhelelangiko, Jesu i yimisanile ni zikarato lezi a maKristu ya lisine inyamutlha ma nga tshukiko ma yimisana nazo. Alakanyela a zikhati zi nga tolovelekangiko lezi a hanyileko ka zona. A mafambisela ya zilo ya wukhongeli ya xiJuda, ma nga hi ni tempeli zinwe ni wupristi le Jerusalema, ma wa sina ma amukeleka ka Jehova hi kale kanilezi ma wa hi kusuhani ni ku aliwa zonake ma valetwa hi malulamiselo ya bandla ga wuKristu. (Mateu 23:33-38) Na zi nga se maheka lezo, a varangeli vo tala va wukhongeli va wa kari va gonzisa mawunwa ma nga seketelwa ka filozofia ya xiGreki. Lomu tempeleni, a kubiha ku wa anzile nguvu laha ka kuza Jesu a yi vitana lezaku i “mhako ya vaphangi.” (Marku 11:17) Xana Jesu i potsile kuya tempeleni ni lomu masinagogeni? Ahihi! Jehova i wa ha tirisa a malulamiselo lawo. Kala a xikhati lexi Nungungulu a nga nghenela zilo lezo a cica zo kari, Jesu i waya tempeleni ni masinagogeni hi kuingisa. — Luka 4:16; Johani 5:1.

²⁰ Loku Jesu a ingisile matshameleni lawo, a maKristu ya lisine inyamutlha ma fanele ku simama ku ingisa nguvu! Hakunene, hina hi hanya ka xikhati xo hambana nguvu, ku nga nguva ya kutlheliselwa ka wukhozeli gi basileko leyi yi wulilweko na ka ha hi mahlweni nguvu. Nungungulu wa hi tiyisekisa lezaku cima a nga ta vumelela Satani lezaku a onha a vanhu vakwe va tlheliselweko. (Isaya 2:1, 2; 54:17) Hi lisine, ku kona kuonha ni kungambheleli nzeni ka bandla ga wuKristu. Kanilezi xana hi fanele ku wona a zihoxo za vanwani kota xigelo xa ku nga ingisi Jehova, kuzilava hi tsika kuya mitlhanganwini ya wuKristu kutani ku tshamela ku solasola madota? Ne ni kutsongwani! A kuhambana ni lezo, hi seketela hi mbilu yontlhe lava va rangelako lomu bandleni. Hi kuingisa, ha kumeka mitlhanganwini ya bandla ni mitlhanganwini ya hombe ya wuKristu hi tlhela hi tirisa wusungukati ga lomu Mitsalweni legi hi gi kumako kwalomo. — Maheberu 10:24, 25; 13:17.

21. Xana Jesu i hlamulisile kuyini a tshikelelo wu ngata hi ka vanhu wa kuva a tsika ku ingisa Nungungulu, a hi vekela xikombiso muni?

²¹ Jesu a nga zangi a vumelela vanhu, hambu vanghana va nga hi ni mixuvo yi nene lezaku va mu tsikisa a ku ingisa Jehova. Hi xikombiso, mupostoli Pedro i zamile ku kuca Hosi yakwe lezaku zi wa nga laveki a kuva a xaniseka ni kufa. Hi kutiya Jesu i lo ala wusungukati gi nene ga Pedro kanilezi na gi tirisiwa hi ndlela yi nga faneliko ga kuva a Ti tsetsa. (Mateu 16:21-23) Inyamutlha, a valanzeli va Jesu zikhati zo tala va yimisana ni maxaka ma nga ni mixuvo yi nene lawa ma nga zamako a ku va tsema hlana kuingiseni ka milayo ni matshinya ya milayo ya Nungungulu. A ku fana ni valanzeli va Jesu va zana go sangula ga malembe, hina hi simama hi tiyile lezaku “hi fanele ku ingisa Nungungulu ku hunza ku ingisa vanhu.” — Mitiro 5:29.

Mabhinzu Ya Kuingisa Ko Fana Ni Ka Kristu

22. Xana Jesu i nyikile hlamulo ka mhaka yihi, niku hi ndlela muni?

²² A xikhati lexi Jesu a nga yimisana ni kufa, a kuingisa kakwe ku lo ringelwa magumo. Ka siku lego go bayisa “i lo gonza kuingisa” hi kumbheleleko. I lo maha kuranza ka Dadani wakwe, na ku nga hi ka yena nwinyi. (Luka 22:42) Ka mamahela lawo, yena i lo veka xikombiso xa kutsumbeka ko mbhelela. (1 Timote 3:16) I lo nyika hlamulo ka mhaka leyi yi nga hi kona hi kale: Xana a munhu wo mbhelela wa zi kota ku simama a ingisa Jehova, hambu loku a ringwa? Adamu i wa tsikile ku maha lezo, Eva yenawu. Zonake Jesu i lota a ta hanya, afa, a tlhela a nyika a hlamulo wo tiya. A xivangwa xa Jehova xa hombe ka zontlhe xi nyikile a hlamulo wo tiya nguvu a ku hunza yontlhe leyi yi nga koteka. Yena i ingisile hambulezi zi nga mu nehela kuxaniseka ni kufa.

23-25. (a) Xana a kuingisa ku zwananisa kuyini ni kutsumbeka? Kombisa hi mufananiso. (b) Hi yihi a mhaka ya xipimo xi lanzelako?

²³ A kutsumbeka, kutani a kutinyiketela ka Jehova hi mbilu yontlhe, ku kombiswa hi kuingisa. Hi kota ya lezi Jesu a nga ingisa, i lo hlayisa a kutsumbeka kakwe zonake a vuna vanhu vontlhe. (Va Le Roma 5:19) Jehova i lo chachazela Jesu hi kuteleko. Loku hi ingisa Kristu kota Hosi, Jehova i ta hi chachazelawo. A ku ingisa Kristu ku yisa ‘kuhanyisweni ka pinzukelwa’! — Maheberu 5:9.

²⁴ A ku hunza lezo, a kutsumbeka ha koce i nchachazelo. A bhuku ga Mavingu 10:9 gi ngalo: “Loyi a fambako hi kululama i famba hi kurula.” Loku ku hi ku a kutsumbeka ka fananiswa ni yindlu ya hombe yi mahilweko hi zitini za zi nene, a ximaho xinwe ni xinwani xa kuingisa xi nga fananiswa ni xitini xinwe ni xinwani. A xitini xinwe xi nga ha ti komba na xi nga vuni nchumu, kanilezi a xinwe ni xinwani xi na ni wutshamu ga xona, ni lisima la xona. Niku a xikhati lexi zi patsiwako, a xilo xo kari xa xinene nguvu xa akiwa. A xikhati lexi a zimaho za kuingisa zi patsiwako, a xinwe xi engetelwa ka xinwani siku ni siku ni lembe ni lembe, ha aka yindlu yo saseka ya kutsumbeka ka hina.

²⁵ A mahanyela ya kuingisa lawa ma anzako hi kufamba ka xikhati ma neha a ginwani tshamela mapinwini ya hina — ku nga kutimisela. A tshamela lego ga xikombiso xa Jesu i mhaka ya xipimo xi lanzelako.