U nga yi chukwatisisa kuyini a mikhongelo ya wena?

1-2. a) Cini ci nga hi vhalelako a ku mu vhulela cifuva ca hina Jehovha? b) Hi zvi tivisa kuyini a ku Jehovha wa demba ndleve ka mikhongelo ya hina?

WA TSHUKA u ti zwisa ku khwatsi a mikhongelo ya wena ya phindaphinda, kutani ya ku mahela ku hundzisa ntungu? Loku zvi hi lezvo, a hi wena wece. Kota lezvi hi talelweko hi zvo maha hi nga tshuka hi tolovela ku maha mikhongelo yo koma. Kutani zvi nga tshuka zvi hi karatela a ku mu vhulela cifuva ca hina Jehovha hi kota ya lezvi hi ti wonako na hi nga ringanelwi hi ku wulawula naye.

² A Bhibhiliya gi hi tiyisekisa ku a ca lisima ka Jehovha, a hi ku tirisa magezu yo sasekiselwa laha hi khongelako, kanilezvi ku khongela hi ku ti koramisa na zvi sukela mbilwini. Jehovha wazwa “a cikombelo ca lava va kurula”. (Lis. 10:17) I demba khwatsi ndleve a ingisela a magezu ya hina, hakuva wa khatala nguvhu hi hina. — Lis. 139:1-3.

3. Zviwutiso muni hi to bhula hi zvona ka ndzima leyi?

³ Kuzvilava hi nga wutisa ku: Hikuyini hi nga khongelako ka Jehovha na hi nga chavi nchumu? Zvini hi nga mahako kasi a mikhongelo ya hina yiva yo zwala khwatsi? A ku ehleketa hi mikhongelo yo huma mbilwini yi tsalilweko lomu ka Bhibhiliya zvi nga hi vhunisa kuyini ku chukwatisa mikhongelo ya hina? Zvini hi nga mahako loku zvi hi karatela ku kuma magezu ya ku mu tlhamusela lezvi hi ti zwisako zvona Jehovha? A hi bhuleni hi mihlamulo ya zviwutiso lezvi.

U NGA CHAVI KU KHONGELA KA JEHOVHA

4. Cini ci nga hi vhunako ku khongela ka Jehovha na hi nga chavi? (Lisimu 119:145)

⁴ Loku hi zvi zwisisa ku Jehovha munghana wo tsumbeka a lavako ku zvi hi fambela khwatsi, hi nga ta chava ku khongela kakwe hi mu byela lezvi hi zvi alakanyako ni lezvi hi ti zwisako zvona. A mutsali wa Lisimu 119 i wa ti karatela ku mu wonisa lezvo Jehovha a cikhati leci a nga khongela. A hi ku khwatsi i wo kala a nga kumani ni zvikarato. A vokari va wa wulawula mawunwa hi yena. (Lis. 119:23, 69, 78) Zvi wa lava ku a tlhela a yimisana ni kungambheleli kakwe. (Lis. 119:5) Hambulezvo, i wa nga chavi ku mu vhulela mbilu yakwe Jehovha. — Lera Lisimu 119:145.

5. Hikuyini hi nga faneliko ku tsika maalakanyo ya hava ma hi vhalela ku khongela? Nyika cikombiso.

⁵ Jehovha i ramba hambu lava va mahileko zviwonho zva hombe lezvaku va khongela kakwe. (Isa. 55:6, 7) Hikwalaho, a hi faneli ku tsika a maalakanyo ya hava ma hi vhalela ku khongela kakwe. Kasi ku fananisa, a mufambisi wa avhiyawu wa zvi tiva ku a nga wulawula ni lava va wonelelako a miavhiyawu loku yi kari yi famba loku a lava civhuno. Xana i wa ta kanakana a ku va kombela civhuno hi kota ya kuwa tingana hi kuva a lahlekile kutani a mahile cihoxo? Ne ni kutsongwani! Hi kufanana, hambu loku ka zvikhati zvo kari hi mahile ciwonho, hi nga tiyiseka lezvaku hi nga kombela civhuno ka Jehovha hi mukhongelo. — Lis. 119:25, 176.

LEZVI U NGA MAHAKO KASI A MIKHONGELO YA WENA YIVA YO ZWALA KHWATSI

6-7. A ku ehleketa hi matshamela ya Jehovha zvi hi vhunisa kuyini ku maha mikhongelo yo zwala? Nyika cikombiso. (Wona ni tlhamuselo wa lahasi.)

⁶ A cikhati leci hi wulawulako na Jehovha hi kutlhatlheka, hi mu byela a maalakanyo ya hina ni kutizwa ka hina ka le ndzeni, a mikhongelo ya hina yi zwala khwatsi. Makunu, hi nga yi chukwatisisa kuyini a mikhongelo ya hina?

⁷ Ehleketa hi matshamela ya Jehovha.a Laha hi ehleketako nguvhu hi matshamela ya Jehovha, hi taya hi zvi kota ku ti phofula. (Lis. 145:8, 9, 18) Wona cikombiso ca makabye Kristine, loyi a nga hi ni papayi wa tihanyi. I wula lezvi: “A ku bhula na Jehovha kota Papayi zvi wa nga ndzi oloveli. Ndzi wa ti zwisa ku khwatsi a kungambheleli ka mina ku wa maha ku Jehovha a ndzi tsika.” I tshamela muni ga Jehovha gi mu vhunileko? I wula lezvi: “A lirandzo li nga mbheliko la Jehovha li ndzi maha ndzi tizwa na ndzi vhikelekile. Ndza zvi tiva ku a nga ta tshuka a ndzi tsika. Hambu loku ndziwa, i ta ndzi rola hi lirandzo. Lezvo zvi ndzi maha ndzi tlhatlheka ku mu byela lezvi zvi ndzi mahako ndzi tsaka nguvhu ni lezvi zvi ndzi mahako ndzi karateka.”

8-9. Hi wahi mabhindzu ya ku ranga hi ku ehleketa na hi nga se khongela? Nyika cikombiso.

⁸ Ehleketa hi lezvi u to wula. Na u nga se khongela, ranga hi ku ti maha zviwutiso zvo kari. Hi cikombiso: ‘Zvikarato muni zvo kongoma ndzi lwisanako nazvo? Ku na ni wokari zvi lavako ku ndzi mu tsetselela? Ndza kumana ni cikarato ca ciswa ndzi lavako ku vhuniwa hi Jehovha a ku ndzi ci hlula?’ (2 Tih. 19:15-19) Hi nga landzela cikombiso ca Jesu kambe hi ku ehleketa hi lezvi hi nga kombelako Jehovha zvi yelanako ni vito Gakwe, ni Mufumo Wakwe, ni kurandza Kakwe. — Mat. 6:9, 10.

⁹ A cikhati leci a makabye wo kari wa ku hi Aliska a nga tiva ku a nuna wakwe i wa hi ni kankro ka wongo, niku i wa nga ta ha hanya cikhati co leha, zvi wa mu karatela ku khongela. Aliska i ngalo: “Ndzi wa karatekile nguvhu laha ka ku ndzi wa nga zvi koti ni ku pimisa khwatsi zva ku khongela hi zvona.” Zvini zvi mu vhunileko? I wula lezvi: “Ndzi ti nyika cikhati na ndzi nga se khongela kasi ndzi xaxameta khwatsi maalakanyo ya mina, lezvo zvi ndzi vhuna ku tiyiseka lezvaku ka mikhongelo ya mina a ndzi veki kupima ka mina basi. A mahela legi gi ndzi maha ndzi rula ni ku ndzi vhuna ku khongela hi zvilo zvo hambanahambana.”

10. Hikuyini hi faneleko ku lehisa mikhongelo ya hina? (Wona ni mifota.)

¹⁰ U nga khongeli hi kutsutsuma. Hambu lezvi a mikhongelo yo koma yi nga vako yo zwala khwatsi, loku hi maha mikhongelo yo leha hi kona hi ti phofulako khwatsi.b Elijah, a nuna wa Aliska, i wula lezvi: “Ndzi zama ku khongela makhati yo tala hi siku niku a cikhati ndzi mahako mikhongelo yo leha hi kona ndzi ti zwako na ndzi hi kusuhani nguvhu na Jehovha. Jehovha a nga tshuki a karala hi ku ndzi ingisela; hikwalaho, ndzi nga lehisa mikhongelo ya mina kala laha ndzi ku lavako.” Zama ku maha lezvi: Hlawula cikhati ni wutshamu ga ginene gi to ku vhumelela ku khongela kuzvilava hi gezu go zwala, na u nga cholopetelwi hi nchumu ni ku ti toloveta ku maha mikhongelo yo leha.

EHLEKETA HI MIKHONGELO YO HUMA MBILWINI YI TSALILWEKO LOMU KA BHIBHILIYA

11. Hi vhunekisa kuyini hi ku ehleketa hi mikhongelo yo huma mbilwini yi tsalilweko lomu ka Bhibhiliya? (Wona ni kwadru: “A ciyimo ca wena ca fana ni zviyimo zvabye?”)

¹¹ Kuzvilava u nga vhuneka hi ku ehleketa hi mikhongelo yo huma mbilwini ni tisimu ti tsalilweko lomu ka Bhibhiliya. Laha u wonako lezvi a malandza ya Nungungulu ma nga ti phofulisa zvona zvi ta ku kuca ku u mu vhululela mbilu ya wena Jehovha. Kuzvilava u nga pola magezu maswa ya ku dhumisa Jehovha u nga ma tirisako ka mikhongelo ya wena. A cin’wani kambe, u nga kuma mikhongelo yi yelanako ni ciyimo ca wena.

12. Zviwutiso muni hi nga ti mahako laha hi ehleketako hi mongo wa mukhongelo wo kari wa lomu ka Bhibhiliya?

¹² Laha u ehleketako hi mongo wa mukhongelo wu tsalilweko lomu ka Bhibhiliya, ti wutise lezvi: ‘Himani a nga wula magezu lawa, kona i wa hi ka ciyimo muni? Lezvi zvi wuliwako ka mukhongelo lowu zva yelana ni lezvi ndzi ti zwisako zvona? Zvini ndzi gondzako ka wona?’ Zvi nga lava ku u kambisisa kasi u kuma mihlamulo ya zviwutiso lezvi, kanilezvi a kutikarata loko a hi ka mahala. Wona zvikombiso zvo kari.

13. Zvini hi gondzako ka mukhongelo wa Hana? (1 Samuweli 1:10, 11) (Wona ni mufota .)

¹³ Lera 1 Samuweli 1:10, 11. A cikhati leci Hana a nga maha mukhongelo lowu i wa kumana ni zvikarato zvimbiri zva hombe. I wa hi ngon’wa niku a katakuloni wakwe i wa mu gisa mbhinyeto. (1 Sam. 1:4-7) Loku u kumana ni cikarato co kala ci nga hundzi, u nga gondza yini ka mukhongelo wa Hana? Hana i zwile kupepa laha a nga maha mukhongelo wo leha a rula ndzwalo wakwe ka Nungungulu. (1 Sam. 1:12, 18) Hinawu hi nga kuma kupepa loku hi “hoxela a ndzhwalo wa [hina] ka Jehovha” hi ku mu tlhamusela lezvi hi ti zwisako zvona hi cikarato co kari co kongoma hi kumanako naco. — Lis. 55:22.

14. a) Zvini zvin’wani hi gondzako ka cikombiso ca Hana? b) A ku ehleketa hi Mitsalo zvi nga yi chukwatisisa kuyini a mikhongelo ya hina? (Wona tlhamuselo wa lahasi.)

¹⁴ Andzhako ka malembe matsongwani Hana na a pswalile n’wana wakwe, Samuweli, i no mu nyikela ka Mupristi wa Hombe, Eli. (1 Sam. 1:24-28) Ka mukhongelo wakwe wo huma mbilwini, i kombile lezvaku i wa kholwa hi mbilu yakwe lezvaku Jehovha wa vhikela ni ku khatalela malandza yakwe yo tsumbeka.c (1 Sam. 2:1, 8, 9) A zvikarato zva ngango wakwe kuzvilava zvi wa nga se mbhela, kanilezvi i wa veka kupima ka lezvi Jehovha a nga mu katekisisa zvona. Hi gondza yini? Hi ta zvi kota khwatsi a ku lwisana ni zvikarato zvo kala zvi nga hundzi loku hi veka kupima ka lezvi Jehovha a hi vhunisileko zvona kala zvezvi.

15. Loku hi mahelwa kungalulami, hi nga gondza yini ka mukhongelo wa ku khongotela wa muphrofeti Jeremiya? (Jeremiya 12:1)

¹⁵ Lera Jeremiya 12:1. Ka cikhati co kari wutomini gakwe, Jeremiya i wa ngagi gi relela hi lezvi a nga wona a vakubiha na zvi va fambela khwatsi. I wa mbhela ntamu kambe hi lezvi a vaIzrayeli-kuloni va nga mu khomisa zvona. (Jer. 20:7, 8) Hi nga ti zwisa a ku khwatsi hi Jeremiya loku hi wona vanhu vo kala ku tsumbeka na va vhuvhuma kutani loku va hi tseketselela. Hambu lezvi Jeremiya a nga phofula kukarateka kakwe, a nga kanakanelangi kululama ka Nungungulu. Laha a nga wona lezvi Jehovha a nga va kawukisa zvona a vanhu vakwe vo hluwuka, i no engetela ku tsumba a kululama ka Nungungulu. (Jer. 32:19) Hinawu hi nga chulula kukarateka ka hina kontlhe ka Jehovha hi mukhongelo, na hi tsumba ku hi cikhati ci faneleko i ta lulamisa a kungalulami loku hi kumanako nako.

16. Zvini hi gondzako ka mukhongelo wa muLevhi? (Lisimu 42:1-4) (Wona ni mifota.)

¹⁶ Lera Lisimu 42:1-4. A lisimu leli li tsalilwe hi muLevhi a nga hi wukhumbini zvi nga kala zvi nga koteki ku a tlhangana ni vakhozeli-kuloni. A lisimu lakwe li komba lezvi a nga ti zwisa zvona. Hinawu hi nga ti zwisa lezvo, loku zvi nga koteki ku hi suka laha kaya kutani loku hi vhalelwe hi kota ya kukholwa ka hina. Lezvi hi ti zwisako zvona zvi nga cicacica, kanilezvi hi fanele ku byela Jehovha hi mukhongelo. Lezvo zvi nga hi vhuna a ku hlola maalakanyo ya hina ni ku wona zvilo hi mawonela manene. Hi cikombiso, a muLevhi i polile ku i wa hi ni tindlela tiswa ta ku dhumisa Jehovha. (Lis. 42:5) I ehleketile kambe hi lezvi Jehovha a nga mu khatalelisa zvona. (Lis. 42:8) A ku khongela ka Nungungulu hi mbilu yontlhe zvi nga hi vhuna ku hlola lezvi hi ti zwisako zvona ni ku tlhela hiva ni kuringanisela ni ntamu wa ku timisela.

17. a) Hi gondza yini ka mukhongelo wa muphrofeti Jona? (Jona 2:1, 2) b) A magezu yo kari ya Tisimu ma hi vhunisa kuyini a cikhati leci hi kumanako ni zvikarato? (Wona tlhamuselo wa lahasi.)

¹⁷ Lera Jona 2:1, 2. Muphrofeti Jona i mahile mukhongelo lowu na a hi lomu khwirini ga njhanjhi ya hombe. Hambu lezvi a nga kala a nga ingisangi Jehovha, Jona i wa tsumba lezvaku Yena i wa tazwa gezu gakwe. Ka mukhongelo wakwe, Jona i tirisile a magezu yo tala ma kumekako lomu ka Tisimu.d Zvi wonekisa ku khwatsi i wa ti tiva khwatsi a Tisimu leto. Laha a nga ehleketa hi tona i tiyisekile ku Jehovha i wa ta mu vhuna. Hi kufanana, loku hi zama ku khoma mavhesi yo kari hi hloko, hi ta ma alakanya ma tlhela ma hi tiyisa a cikhati leci hi khongelako ka Jehovha zvikhatini zva zvikarato.

SIMAMA KU TIYISA WUNGHANA GA WENA NA JEHOVHA HI MUKHONGELO

18-19. Loku ka zvikhati zvin’wani zvi hi karatela a ku wula lezvi hi ti zwisako zvona, citiyisekiso muni hi ci kumako ka Va Le Roma 8:26, 27? Nyika cikombiso.

¹⁸ Lera Va Le Roma 8:26, 27. Ka zvikhati zvin’wani hi nga tizwa na hi kukaratekile nguvhu laha ka ku ne hi nga zvi koti a ku tlhamusela hi magezu lezvi hi ti zwisako zvona. Kanilezvi ci kona ca ku ci nga hi vhuna. Ka zvikhati lezvo, a moya wo basa wa Nungungulu “wa hi kombelela”. Hi ndlela muni? Hi ku tirisa moya wo basa, Jehovha i mahile lezvaku ku tsaliwa mikhongelo yo tala nguvhu lomu ka Mhaka yakwe. Loku hi nga zvi koti a ku tlhamusela khwatsi lezvi hi zvi pimisako, Jehovha a nga vhumela magezu yo kari ma kumekako ka mikhongelo leyo a khwatsi hi loku ma hi ya hina a tlhela a hi hlamula.

¹⁹ Lezvo zvi vhunile makabye wo kari wa le Rússia, wa ku hi Yelena. Yelena i khomilwe hi kota ya ku khongela ni ku lera Bhibhiliya. I karatekile nguvhu laha kuza zvi mu karatela ku khongela. I wula lezvi: “Ndzi no gumesa ndzi alakanya ku loku ndzi karatekile nguvhu ndzi nga tivi ni co wula ka mikhongelo ya mina, Jehovha i ta wona a mikhongelo ya malandza yakwe ya kale . . . a ku khwatsi hi loku yi hi ya mina wutsumbu. . . . Lezvo zvi ndzi tiyisile nguvhu ndzeni ka cikhati co bindza.”

20. Loku hi karatekile, hi nga longiselisa kuyini a maalakanyo ya hina kasi ku khongela?

²⁰ A cikhati leci hi karatekileko nguvhu zvi nga hi karatela a ku veka kupima laha hi khongelako. Kasi ku longisela maalakanyo ya hina, hi nga ingisela tiaudhio ti gravarilweko ta Tisimu. A cin’wani kambe, hi nga zama ku chulula lezvi hi ti zwisako zvona hi ku zvi tsala laha ka phepha, a ku khwatsi hi lezvi Dhavhidha a nga maha. (Lis. 18, 34, 142; magezu ya laha hehla ka zvipimo.) Hi lisine, a ku bethiwangi milayo ya lezvi hi faneleko ku ti longiselisa zvona kasi ku khongela. (Lis. 141:2) Maha lezvi zvi tirako khwatsi ka wena.

21. Hikuyini hi nga khongelako hi mbilu ya hina yontlhe?

²¹ Zva hi tiyisa nguvhu a ku tiva ku Jehovha wa zvi zwisisa lezvi hi ti zwisako zvona hambu loku hi nga se wula nchumu. (Lis. 139:4) Kanilezvi i zvi lava nguvhu a kuzwa a magezu ya hina ma kombako ku ha mu tsumba. Hikwalaho, u nga kanakani ku khongela ka Papayi wa wena wa le tilweni. Tirisa magezu ya mikhongelo yi tsalilweko lomu ka Mhaka yakwe. Khongela hi mbilu yontlhe. Mu byele lezvi zvi ku mahako u tsaka ni lezvi zvi ku mahako u karateka. Kota Munghana wa wena wa lisine, contlhe cikhati Jehovha i ta ku vhuna!