Yimbelela hi kutsaka!

1. A ku yimbelela zvi hi vhuna ku maha yini?

A MUTSALI wo kari wa tisimu i te: “A magezu ma ku maha u pimisa. A wucenje gi ku vhuxela manyawunyawu. Kanilezvi a lisimu li dhunga mbilu ya wena.” A tisimu ta hina ti dhumisa ti tlhela ti kombisa lirandzo hi Papayi wa hina wa le tilweni, Jehovha. Ti hi maha hi tshinela nguvhu ka yena. Hikwalaho, a ku yimbelela zva lisima nguvhu wukhozelini go basa.

2, 3. a) A vokari va yi wonisa kuyini a mhaka ya ku yimbelela tisimu lomu bandleni? b) Zviwutiso muni hi to bhula hi zvona ka ndzima leyi?

² U ti zwisa kuyini loku ci chikela cikhati ca ku yimbelela tisimu lomu bandleni? Xana wa dhana ku yimbelela? Ka matshamu yo kari, a vavanuna va dhana ku yimbelela mahlweni ka van’wani. Lezvo zvi nga maha ku a bandla gontlhe gi nga randzi ku yimbelela, nguvhunguvhu loku a madhota ma dhana ku yimbelela kutani loku ma ti hungatela hi mitiro yin’wani hi cikhati ca ku yimbelela tisimu. — Lisimu 30:12.

³ A ku yimbelela zvi maha cipandze ca ku khozela Jehovha. Hikwalaho, a hi lavi ku luza cipandze leco ca mutlhangano wa hina. Hi nga humi handle hi cikhati ca ku yimbelela. Hontlheni hi fanele ku ti wutisa lezvi: ‘Ndzi ti zwisa kuyini xungetano hi ku yimbelela mitlhanganweni? Ndzi nga maha yini loku ndzi dhana ku yimbelela mahlweni ka van’wani? Ndzi nga yimbelelisa kuyini zvi huma mbilwini?’

A KU YIMBELELA CIPANDZE CA LISIMA CA WUKHOZELI GA LISINE

4, 5. Malulamiselo muni ya ku yimbelela tisimu ma nga mahilwe tempeleni le Izrayeli wa kale?

⁴ Kale ni kale, a vakhozeli va Jehovha va tirisa tisimu kasi ku mu dhumisa. Ka cikhati contlhe leci a vaIzrayeli va nga tsumbekile ka Jehovha, a ku yimbelela zvi wa hi cipandze ca lisima ca wukhozeli gabye. Hi cikombiso, a cikhati leci Dhavhidha a nga longisela zvo aka hi zvona tempeli, i xaxametile 4 000 wa vaLevhi kasi ku dhumisa Jehovha hi wucenje. A 288 wa vona va wa hi vanhu ‘va tivako a tisimu ta Jehovha, a zviyimbeleli’. — 1 Kronekele 23:5; 25:7.

⁵ A ku chaya ni ku yimbelela zvive ni cipandze ca hombe kambe a cikhati leci a tempeli yi nga hendleletwa. A Bhibhiliya gi ngalo: ‘A vabi va mipundzu ni vayimbeleli va no yimbelela khatigin’we, hi gezu gin’we a ku dhumisa ni ku bonga Jehovha. Laha va nga waba mipundzu ni tingoma, ni tin’wani timbila, na va kari va yimbelela vaku: Dhumisani Jehovha . . . a kungangamela ka Jehovha ku wa tatile a yindlu ya Nungungulu.’ Hi nga alakanyela lezvi a cimaho leco ci nga tiyisisa zvona a kukholwa ka vaIzrayeli! — 2 Kronekele 5:13, 14; 7:6.

6. Malulamiselo muni ya ku chaya ni ku yimbelela lawa Nehemiya a nga maha a cikhati a nga hi govhernanadhori wa Jerusalema?

⁶ Nehemiya, loyi a nga rangela vaIzrayeli kuaketeni ka makhurisi ya Jerusalema, yenawu i xaxametile vaLevhi kasi ku chaya ni ku yimbelela. Lezvo zvi engetele litsako labye a cikhati va nga hendleleta a makhurisi lawo. I wa yimisile “mitlawa mimbiri ya hombe ya vayimbeleli”. A mitlawa leyo yi fularelene yi famba le hehla ka khurisi kala yi ya tlhangana laha kusuhani ni tempeli. Va wa yimbelela hi gezu go tlakuka nguvhu laha ka kuza zvi zwala kule. (Nehemiya 12:27, 28, 31, 38, 40, 43) Handle ko kanakana, Jehovha i xalele hi kuzwa vakhozeli vakwe na va yimbelela tisimu ta ku mu dhumisa hi kuhiseka.

7. Jesu i kombisile kuyini lezvaku a ku yimbelela ci wa tava cipandze ca lisima ca wukhozeli ga maKristu?

⁷ Masikwini ya Jesu, a wucenje gi wa ha hi ga lisima wukhozelini ga lisine. Alakanya lezvi zvi nga maheka ka wusiku ga lisima nguvhu ga wutomi gakwe kota munhu wa nyama. Andzhako ka kuga Cilalelo ca Hosi ni vapizani vakwe, va yimbelele tisimu kasi ku dhumisa Jehovha. — Gondza Matewu 26:30.

8. A maKristu yo sangula ma hi vekele cikombiso ci nene ca ku dhumisa Nungungulu hi tisimu hi ndlela muni?

⁸ A maKristu yo sangula ma hi vekele cikombiso ci nene ca ku dhumisa Nungungulu hi tisimu. Va wa ngayi tempeleni kasi ku ya khozela Jehovha a ku fana ni vaIzrayeli. Kanilezvi va wa tlhangana lomu mimitini. A mimiti leyo yi wa nga sasekangi nguvhu a ku fana ni tempeli, hambulezvo a vamakabye va wa yimbelela hi kuhiseka. Mupostoli Pawule i zile a byela vamakabye vakwe va maKristu aku: ‘Gondzisanani hi wutlhari gontlhe, mu khongotelana hi tixangu ni tisimu ni zvizimba zva moya, na mu bonga Nungungulu hi tisimu timbilwini ta n’wina.’ (Va Le Kolosi 3:16) Hinawu hi fanele ku yimbelela tisimu ta hina na hi “bonga”, hakuva ti maha cipandze ca zvakuga zva moya lezvi a ‘nandza gi tsumbekileko ni go tlhariha’ gi hi nyikako ‘hi cikhati ci faneleko’. — Matewu 24:45.

U NGA ZVI KOTISA KUYINI KU YIMBELELA NA U NGA CHAVI?

9. a) Cini ci nga mahako vokari va dhana ku yimbelela hi kutsaka mitlhanganweni ya hina? b) Hi fanele ku yi wonisa kuyini a mhaka ya ku yimbelela tisimu ta ku dhumisa Jehovha, niku hi vamani va faneleko ku rangela? (Wona mufota kusanguleni ka ndzima.)

⁹ Cini ci nga ku mahako u dhana ku yimbelela? Kuzvilava hi tshamela ga n’wina laha kaya kutani cipandzeni ca n’wina a mu randzi ku yimbelela. Kutani u tolovela kuzwa vayimbeleli vo buvha lomu ka radhu kutani ka televhizawu, vaku loku u ti fananisa navo u ti wona na u nga vhuni nchumu. Kanilezvi i ntiro wa hina hontlheni a ku dhumisa Jehovha hi tisimu. Hikwalaho, tlakusa lisimu la wena, u tlakusa hloko, u yimbelela hi kuhiseka! (Ezra 3:11; gondza Lisimu 147:1.) A tiSalawu to tala ta Mufumo ti na ni titelevhizori ti humesako tisimu ta hina. Lezvo zvonawu zvi nga hi vhuna ku yimbelela hi gezu go zwala. U ta wona lezvaku ka masikwana lawa a Cikola ca Wutireli ga Mufumo ci mahelwako madhota conawu ci patsa ku yimbelela tisimu. Lezvo zvi vhuna madhota ku zwisisa lezvaku ma fanele ku nyika cikombiso mhakeni ya ku yimbelela tisimu mitlhanganweni ya bandla.

10. Zvini hi faneleko ku zvi alakanya loku hi chava ku yimbelela hi gezu go zwala?

¹⁰ A vokari va chava ku yimbelela zvi zwala hi ku alakanya ku va nga cwanga. A van’wani va chava ku zwiwa lezvaku va na ni madiyo. Kanilezvi, alakanya lezvaku “hontlhe ha khubeka” makhati yo tala kuwulawuleni. Hambulezvo, a hi tsiki ku wulawula. (Jakobe 3:2) Makunu, hi ta tsikela yini ku yimbelela tisimu ta ku dhumisa Jehovha hi kota ya lezvi a magezu ya hina ma kalako ma nga mbhelelangi?

11, 12. Cini ci nga hi vhunako ku yimbelela khwatsi?

¹¹ Kuzvilava leci ci hi mahako hi dhana ku yimbelela ku kala hi nga zvi tivi ku yimbelela. Kanilezvi hi nga zvi kota ku yimbelela khwatsi, niku a hi zva hombe zvi lavekako.a — Wona tlhamuselo wa lahasi.

¹² Kasi ku yimbelela hi gezu go zwala ni ga ntamu u fanele ku gondza ku koka moya hi ndlela yi faneleko. A ku fana ni gezi gi mahako lampadha yi vhura, a moya lowu hi hefemulako wu maha lezvaku hi zvi kota ku humesa gezu a cikhati hi wulawulako kutani ku yimbelela. A gezu ga wena gi fanele ku zwalisa zvalezvi gi zwalisako zvona loku u wulawula, kutani ku hundza laho. (Wona a mawonela ma nga ka bhuku Beneficie-se da Escola do Ministério Teocrático, maphajina 181 ni 184, ka cihlokwana ca mhaka ci nge “Controle correto da respiração”.) Hi lisine a Bhibhiliya ga tshuka gi byela vakhozeli va Jehovha lezvaku va maha “guwa ga hombe” ga kutsaka a cikhati va yimbelelako. — Lisimu 33:1-3.

13. Tlhamusela lezvi hi nga zvi kotisako zvona ku yimbelela na hi nga chavi.

¹³ Ka wukhozeli ga ngango, pimani ku hlawula lisimu lin’we mu li randzako, mu li lera hi gezu go zwala khwatsi, na gi nga hi na kuchava. Hi kulandzela, kokani moya mu wula magezu wontlhe ya vhesi gin’we hi gezu galego na mu nga se phinda ku koka moya. Andzhako ka lezvo, yimbelelani vhesi lego hi gezu galegi ga gin’we. (Isaya 24:14) A gezu ga n’wina gi tava ni ntamu nguvhu, niku hi zvalezvo zvi lavekako. Zvi nga mu chavise kutani ku mu dhanisa!

14. a) A ku vhulula khwatsi nomu zvi nga ku vhunisa kuyini ku yimbelela? (Wona a kwadru “Maha lezvi kasi u yimbelela khwatsi.”) b) Mawonela muni ma nga ku vhunako ku yimbelela khwatsi?

¹⁴ Kasi ku yimbelela hi gezu go zwala khwatsi, u fanele ku gi vhululela ndlela. Hikwalaho, a cikhati u yimbelelako, vhulula khwatsi nomu wa wena a ku hundza lezvi u vhululisako zvona loku u wulawula. Kanilezvi u nga ku yini loku u wona ku a gezu ga wena ga loloha? Kasi ku engetela a ntamu wa gezu ga wena, u fanele ku olovisa miri wa wena. Ti tolovete ku “hum, hum, hum” na u nga vhululi nomu. Ahati loku gi tlhava ke? Zama ku tsika a cikolwana ci tlhatlheka kasi lomu a gezu gi humako hi kona ku olova. Lezvo zvi ta hungula a kutlhava ka gezu ga wena.

YIMBELELA ZVI HUMA MBILWINI

15. a) Citiviso muni ci nga mahiwa ka mutlhangano wa lembe hi 2016? b) Zvigelo muni zvi nga maha ku a bhuku ga tisimu gi chukwatiswa?

¹⁵ Lava va nga yile mutlhanganweni wa lembe hi 2016 va tsakile nguvhu a cikhati leci makabye Stephen Lett, wa Hubye yi Fumako, a nga tivisa a kuhumesiwa ka bhuku giswa ga tisimu gi nge: Yimbelela ka Jehovha hi kutsaka. I tlhamusele lezvaku a cin’we ca zvigelo zvi nga maha lezvaku ku laveka bhuku giswa ga tisimu hi lezvi a Tradução do Novo Mundo gi nga chukwatisiwa. A tisimu ta hina ti wa fanele ku hloliwa kasi ku susa magezu ma kalako ma nga ha hi kona lomu ka Tradução do Novo Mundo. Ahandle ka lezvo, ku engetelwe tisimu tiswa ti wulawulako hi ntiro wa kuchumayela ni ndzhiho, niku kota lezvi a ku yimbelela ci nga cipandze ca lisima ca wukhozeli ga hina, a Hubye yi Fumako yi wa lava ku humesa bhuku go tiya ga tisimu. Hikwalaho, a kapa ya gona yi tshamisile zvalezvi yi nga tshamisa zvona leyi ya Tradução do Novo Mundo.

16, 17. Zvini kambe zvi nga cica ka bhuku ga hina ga tisimu?

¹⁶ Kasi a bhuku ga hina gi olova ku gi tirisa, a tisimu ta kona ti veketelwe hi mitlawa hi kuya hi lezvi ti wulawulako hi zvona. Hi cikombiso, leti ta 12 to sangula ti wulawula hi Jehovha; leti ti landzelako ta 8 ti wulawula hi Jesu ni ndzhiho. Seno kusanguleni ku na ni xaxameto wa tisimu tontlhe. Lezvo zvi vhuna nguvhu loku a makabye wo kari, hi cikombiso, a lava ku hlawula lisimu la ku li tirisa ka kanelo yakwe.

¹⁷ Kasi hontlheni hi zvi kota ku yimbelela zvi huma mbilwini, a magezu ya tisimu to kari ma cicilwe kasi zvi dlunyateka khwatsi lezvi ti wulako. A magezu ma kalako ma nga ha tirisiwi nguvhu ma susilwe ku cheliwa magezu hi ma tirisako kuwulawuleni ka siku ni siku. A tisimu tin’wani, loku u yimbelela, u wa ku khwatsi wo byela van’wani lezvi va faneleko ku maha. Lezvo zvi nga maha ku a vaswa, ni vatsakeli, ni vamakabye va cisati lava hi nga navo mitlhanganweni ya hina va yimbelela na va chava. Hikwalaho, ti cicilwe kasi ti khumba khwatsi mbilu.

18. Hikuyini hi faneleko ku gondza a tisimu ta hina ta tiswa? (Wona tlhamuselo wa lahasi.)

¹⁸ A tisimu to tala ta bhuku ga hina ga giswa ti tshamisile ku khwatsi mikhongelo. Lezvo zvi hi vhuna ku byela Jehovha lezvi hi ti zwisako zvona. A tin’wani ti hi susumetela ‘lirandzweni ni mitirweni yo saseka’. (Mahebheru 10:24) Hi fanele ku ti karatela ku tiva a wucenje, mabela, ni magezu ya tisimu ta hina. A yin’we ya tindlela ta ku maha lezvo ku ingisela vamakabye va hina lava va nga thepiwa na va yimbelela. A tisimu leto hi nga ti kuma lomu ka jw.org. Loku u vhuxeta tisimu na wa ha hi kaya, u ta gondza ku yimbelela zvi huma mbilwini na u nga chavi.b — Wona tlhamuselo wa lahasi.

19. I ndlela muni leyi hontlheni lomu bandleni hi nga mu khozelako hi yona Jehovha?

¹⁹ Alakanya lezvaku a ku yimbelela cipandze ca lisima nguvhu ca wukhozeli ga hina. I ndlela ya ntamu ya ku komba Jehovha lezvaku ha mu randza niku ha mu bonga hi zvontlhe lezvi a hi mahelako. (Gondza Isaya 12:5.) Loku u yimbelela hi kuhiseka, u nga kuca van’wani lezvaku vonawu va maha zvalezvo. Hontlheni lomu bandleni, vanana ni vahombe, zvin’we ni lava va ha gondzako lisine, hi nga khozela Jehovha hi ndlela leyo. Hikwalaho, u nga chavi ku yimbelela zvi huma mbilwini. Ingisa a wusungukati ga mutsali wa tisimu gaku: ‘Yimbelelani ka Jehovha,’ u yimbelela hi kutsaka! — Lisimu 96:1.