Wumun’we go tsakisa hi gi kumako Cialakanyisweni

1, 2. Hi 2018, cimaho muni ci to hi tlhanganisa hi ndlela yo hlamalisa, niku hikuyini? (Wona mufota laha hehla.)

HI DHIYA 31 ka Março wa 2018, a vanhu va timiliyoni misaveni yontlhe va taya ka mutlhangano wu mahiwako khati gin’we basi hi lembe. A Timboni ta Jehovha ni vanhu van’wani vo tala va ta tlhangana ni wusikwana kasi ku alakanya a muphahlo lowu Jesu a hi maheleko. Lembe ni lembe, a Cialakanyiso ca kufa ka Jesu ci tlhanganisa vanhu va Nungungulu hi ndlela yo hlamalisa, a ku hundza ni cihi cimaho cin’wani ci mahekako laha misaveni.

² Jehovha na Jesu va tsaka nguvhu loku va wona vanhu va timiliyoni na va famba ka cimaho leco misaveni yontlhe. A Bhibhiliya gi wulawula hi “cidlemo ca tsandza-vahlayi, ca matiko wontlhe, ni tixaka, ni mifumo, ni tirimi” ci kanyulukako ciku: “A kuhanyisa ku lumba Nungungulu wa hina loyi a tshamileko citshan’wini ca wuhosi ni Yivhana.” (Kuvhululelwa 7:9, 10) A zvo ku tsakisa ku wona vanhu vo tala Cialakanyisweni lembe ni lembe, na va dhumisa Jehovha na Jesu hi kota ya zvilo zva hombe lezvi va hi maheleko!

3. Zviwutiso muni zvi to hlamuliwa ka ndzima leyi?

³ Ka ndzima leyi, u ta kuma mihlamulo ya zviwutiso lezvi zva mune: 1) Ndzi nga ti longiselisa kuyini kasi kuya Cialakanyisweni ndzi tlhela ndzi ya vhuneka khwatsi? 2) A Cialakanyiso ci vhunisa kuyini vanhu va Nungungulu lezvaku vava ni wumun’we? 3) Ndzi nga maha yini kasi ku hlanganyetela kurula cikari ka vanhu va Nungungulu? 4) Xana ku ta tshuka ku mahiwa Cialakanyiso co gumesa? Loku zvi hi tano, ci ta mahiwa rini?

HI NGA TI LONGISELISA KUYINI KASI KUYA CIALAKANYISWENI HI TLHELA HI YA VHUNEKA?

4. Hikuyini zvi nga zva lisima kuva kona Cialakanyisweni?

⁴ Hikuyini zvi nga zva lisima kuva kona Cialakanyisweni? A cin’we ca zvigelo hi ku a kuva kona mitlhanganweni i ndlela ya ku khozela Jehovha. Jehovha na Jesu va va wona vontlhe lava va ti karatako hi mbilu yontlhe kasi kuva kona ka mutlhangano lowo wa lisima nguvhu ka yontlhe yi mahiwako hi lembe. Hi lava ku Jehovha na Jesu va zvi wona lezvaku hi tava kona Cialakanyisweni ahandle ka loku zviya hi ku tsandza. Loku a zvimaho zva hina zvi komba ku ha yi nyika nguvhu lisima a mitlhangano ya hina, hi mu nyika cigelo Jehovha ca kuva a tsika vito ga hina lomu ka ‘bhuku gakwe ga cialakanyiso’. A bhuku lego gi tlhela gi vitaniwa lezvaku i “bhuku ga wutomi”. Gi na ni mavito ya vontlhe lava Jehovha a lavako ku va nyika wutomi ga pindzukelwa. — Malaki 3:16; Kuvhululelwa 20:15.

5. Na ku kiyela mavhiki yo kari kasi a Cialakanyiso ci chikela, u nga ti ‘hlolisa kuyini kasi ku wona lezvaku u kona kukholweni’ ke?

⁵ Na ku kiyela mavhiki yo kari kasi a Cialakanyiso ci chikela, hi nga ti lavela cikhati co engeteleka ca ku khongela ni ku ehleketa khwatsi hi lezvi a wunghana ga hina na Jehovha gi nga tiyisa zvona. (Gondza 2 Va Le Korinte 13:5.) Mupostoli Pawule i byelile maKristu aku: “Ti hloleni wutsumbu ga n’wina, mu wona loku mu hi kona kukholweni.” Hi nga zvi mahisa kuyini lezvo? Hi nga ti wutisa lezvi: ‘Ndza kholwa hakunene lezvaku a hlengeletano leyi hi yona yoce leyi Jehovha a yi hlawulileko kasi ku maha kurandza kakwe? Ndza maha zvontlhe ndzi zvi kotako kasi ku chumayela ni ku gondzisa mahungu yo saseka? A mahanyela ya mina ma komba ku ndza kholwa lezvaku hakunene hi hanya masikwini yo gumesa niku a kugumesa ka tiko ga Sathani ku laha kusuhani ke? Xana ndza ha mu tsumba nguvhu Jehovha na Jesu a ku fana ni cikhati leci ndzi nga sangula hi cona ku mu tirela?’ (Matewu 24:14; 2 Timote 3:1; Mahebheru 3:14) A ku ehleketa hi mihlamulo ya zviwutiso lezvi zvi ta hi vhuna ku ‘ti hlola’ hi wona lezvi hi nga zvona.

6. a) Hi yihi a ndlela yin’we ntsena ya ku hi kuma wutomi ga pindzukelwa? b) A dhota go kari gi ti longiselisa kuyini lembe ni lembe kasi kuya Cialakanyisweni, niku u nga gi pimanyisisa kuyini?

⁶ A yin’we ya tindlela ta ku ti longisela kasi kuya Cialakanyisweni ku lera tindzima ti tlhamuselako a ku hikuyini a cimaho leci ci nga ca lisima nguvhu u tlhela u ehleketa hi tona. (Gondza Johani 3:16; 17:3.) A ku na ndlela yin’wani ya ku kuma wutomi ga pindzukelwa ahandle ka ku gondza hi tiva Jehovha hi tlhela hi kholwa ka N’wana wakwe, Jesu. Hikwalaho, kota ndlela ya ku ti longisela kasi kuya Cialakanyisweni, hi nga ti mahela longoloko wa cigondzo wu to hi vhuna ku tshinela nguvhu ka Jehovha na Jesu. Hi zvalezvo a makabye wo kari a nga ni malembe na a tira kota dhota a mahako. I na ni malembe yo tala na a hlengeletela tindzima ta Murindzeli ti wulawulako hi Cialakanyiso ni lirandzo leli Jehovha na Jesu va li kombisileko hi hina. Loku a Cialakanyiso ci kari ci tshinela, i khoma tindzima leto a gondza kambe a tlhela a ehleketa hi lisima la cimaho leci. A zvikhati zvin’wani i tlhela a engetela ndzima yin’we kutani timbiri. I tlhela a lera a mavhesi ya kugondza ka Bhibhiliya ku yelanako ni Cialakanyiso a tlhela a ehleketa hi wona. A dhota lego gi wula lezvaku lembe ni lembe gi gondza zvilo zviswa hi ku maha lezvo. A ca hombe nguvhu hi ku a cigondzo cakwe ci mu maha a engetela lirandzo lakwe hi Jehovha na Jesu. Loku wo landzela cikombiso leco, wenawu u ta va randza nguvhu. U ta zvi bonga nguvhu kambe lezvi va ku maheleko, u tlhela u vhuneka nguvhu hi Cialakanyiso.

A CIALAKANYISO CI HI VHUNA KUVA NI WUMUN’WE

7. a) Zvini lezvi Jesu a nga zvi khongelela ka wusiku ga Cilalelo co sangula ca Hosi? b) Cini ci kombako ku Jehovha i hlamulile mukhongelo lowo?

⁷ Ka wusiku ga Cilalelo co sangula ca Hosi, Jesu i mahile mukhongelo wo hlawuleka. I khongele a wulawula hi wumun’we go tsakisa legi yena ni Papayi wakwe va nga nago, a tlhela a khongelela lezvaku a vapizani vakwe vontlhe vava ni wumun’we lego. (Gondza Johani 17:20, 21.) Handle ko kanakana, Jehovha i hlamulile a mukhongelo lowo wa N’wana wakwe wo randzeka. A Cialakanyiso ci komba khwatsi ku hundza ni wihi mutlhangano wun’wani lezvaku a Timboni ta Jehovha ti na ni wumun’we. Ka siku lego, ku tlhangana timiliyoni ta vanhu va matiko yo hambana ni tihlonge to hambana misaveni yontlhe va komba lezvaku va kholwa ku Jehovha i rumele N’wana wakwe. Ka matshamu yo kari, zva kala nguvhu ku a vanhu va tihlonge to hambana va tlhangana ka wutshamu gin’we kasi ku khozela. Loku a vokari va maha lezvo, a van’wani va zvi wona na zvi nga faneli. Kanilezvi, Jehovha na Jesu a va zvi wonisi lezvo. Ka vona, a wumun’we ga hina Cialakanyisweni i nchumu wo saseka.

8. Zvini lezvi Jehovha a nga wula hi ku tirisa Ezekiyeli?

⁸ A wumun’we legi hi nga nago kota vanhu va Nungungulu a gi hi hlamalisi. Jehovha i wa sina a wulawulile hi wumun’we lego ka magezu yo kari a nga byela Ezekiyeli. I mu rumile ku teka tinhonga timbiri a ti patsa ti maha yin’we, aku a yin’we “ya Judha”, a yin’wani “ya Josefa”. (Gondza Ezekiyeli 37:15-17.) A ndzima ya “Zviwutiso zva vagondzi” yi humesilweko ka Murindzeli wa Julho wa 2016 yi tlhamusele lezvi: “Hi ku tirisa muphrofeti wakwe Ezekiyeli, Jehovha i no phrofeta lezvaku a vanhu vakwe va wa ta tlhela Tikweni gi Tsumbisilweko niku va wa ta tlhela va bohana kota tiko gin’we. A ciphrofeto leco ci kombile kambe lezvaku lava va khozelako Nungungulu masikwini yo gumesa va wa ta bohana kota vanhu van’we.”

9. A wumun’we legi gi phrofetilweko hi Ezekiyeli hi gi wonisa kuyini lembe ni lembe a cikhati hi nga Cialakanyisweni?

⁹ Hi 1919, Jehovha i sangulile ku xaxametisa vatotilweko ni ku va tlhanganisa hi kutsongwani-kutsongwani. Va wa fana ni nhonga “ya Judha”. Hi kulandzela, a vanhu vo tala va rindzelako ku hanya kala kupindzuka laha misaveni va sangulile ku ti patsa ni vatotilweko. A vanhu lavo va fana ni nhonga “ya Josefa”. Jehovha i tsumbisile ku patsa tinhonga leto ta timbiri ti maha “nhonga yin’we” mandleni yakwe. (Ezekiyeli 37:19) I mahile ku a vatotilweko ni lava va “tiyivhu tin’wani” va maha “ntlhambi mun’we”. (Johani 10:16; Zakariya 8:23) Inyamutlha a mitlawa leyi ya yimbiri yi tirela Jehovha hi wumun’we. Yi na ni Hosi yin’we kambe, ku nga Jesu Kristu, loyi lomu ka ciphrofeto ca Ezekiyeli a vitaniwako ku hi “Dhavhidha a nandza” ga Nungungulu. (Ezekiyeli 37:24, 25) Lembe ni lembe, a cikhati hi tlhanganako kasi ku alakanya a kufa ka Jesu, hi wona a wumun’we ga mitlawa leyi ya yimbiri kota lezvi zvi phrofetilweko hi Ezekiyeli. Kanilezvi zvini lezvi a mun’we ni mun’wani wa hina a nga mahako kasi ku hlanganyetela wumun’we cikari ka vanhu va Nungungulu?

ZVINI HI NGA MAHAKO KASI KU HLANGANYETELA WUMUN’WE?

10. Zvini hi nga mahako kasi ku hlanganyetela wumun’we cikari ka vanhu va Nungungulu?

¹⁰ A ndlela yo sangula leyi hi nga hlanganyetelako hi yona wumun’we cikari ka vanhu va Nungungulu ku ti karatela kuva vanhu vo ti koramisa. A cikhati leci Jesu a nga hi laha misaveni, i byelile vapizani vakwe lezvaku va fanele ku ti koramisa. (Matewu 23:12) A vanhu lomu tikweni va tolovela ku ti wona va hi va lisima nguvhu ku hundza van’wani. Kanilezvi loku hi ti koramisa, hi ta kombisa cichavo ka vamakabye va rangelako lomu bandleni hi tlhela hi landzela wurangeli gabye. Ntsena loku hi maha lezvo, hi kona a bandla gi tova ni wumun’we. A ku hundza lezvo, loku hi ti koramisa, hi ta tsakisa Nungungulu, hakuva “wa ala a vamatshandza, kanilezvi i nyika tipswalo ka lava va ti koramisako”. — 1 Pedro 5:5.

11. A ku ehleketa hi cibaba ni vhinya zvi tirisiwako Cialakanyisweni zvi nga hi vhunisa kuyini ku hlanganyetela wumun’we?

¹¹ A ndlela ya wumbiri ya ku hlanganyetela wumun’we ku ehleketa khwatsi hi lezvi a cibaba ni vhinya zvi yimelako zvona. Hi fanele ku maha lezvo na ci nga se chikela Cialakanyiso hi tlhela hi zvi maha nguvhunguvhu ka wusiku ga kona. (1 Va Le Korinte 11:23-25) A cibaba leco co kala ci nga hi na comelo ci yimela a miri wo mbhelela lowu Jesu a wu nyikeleko kota muphahlo. A vhinya go pswhuka gi yimela nkhata wakwe. Kanilezvi a hi faneli ku zwisisa zvilo lezvo zva tshinya hi nyima kwalaho. Hi fanele ku alakanya lezvaku a muphahlo wa Jesu wu patsa tindlela timbiri ta hombe leti hi nga kombiwa hi tona lirandzo. 1) Jehovha i hi nyikile N’wana wakwe; 2) Jesu a nyikela wutomi gakwe hi ku zvi randza. A ku ehleketa hi lirandzo labye zvi ta hi kuca ku va randzawu, niku loku hontlheni hi randza Jehovha, a wumun’we ga hina gi ta tiya.

12. Ka mufananiso wa hosi ni zvitiri zva yona, Jesu i kombisile kuyini lezvaku Jehovha i lava ku hi tsetselela van’wani?

¹² A ndlela ya wunharu ya ku hlanganyetela wumun’we, ku tsetselela van’wani. Loku hi maha lezvo, hi komba lezvaku ha mu bonga Jehovha hi lezvi a hi tsetselelako zviwonho zva hina hi ku tirisa muphahlo wa Jesu. Kasi ku komba lisima la ku tsetselela van’wani, Jesu i hlawutele mufananiso wa hosi ni zvitiri zva yona. Lera Matewu 18:23-34, u guma u ti wutisa lezvi: ‘Ndza kuceka ku maha lezvi Jesu a gondzisileko? Ndza kombisa lihlazva-mbilu ndzi tlhela ndzi zwisisa vamakabye va mina ke? Ndza vhumela ku va tsetselela lava va ndzi wonheleko?’ Lisine ku a zviwonho zvo kari zva hombe ku hundza zvin’wani. Ku na ni zviwonho zvaku zvi nga hi karatela nguvhu ku tsetselela kota vanhu vo kala kumbhelela. Kanilezvi a mufananiso wa Jesu wu hi gondzisa lezvi Jehovha a lavako ku hi zvi maha. (Gondza Matewu 18:35.) Jesu i zvi dlunyatisile lezvaku Jehovha a nga ta hi tsetselela loku hi nga tsetseleli vamakabye va hina va ti solako hi mbilu yontlhe. Leyo i mhaka hi faneleko ku ehleketa khwatsi hi yona. Kasi ku vhikela ni ku hlayisa a wumun’we ga hina go tsakisa, hi fanele ku tsetselela van’wani kota lezvi Jesu a hi gondzisileko.

13. Hi hlanganyetela wumun’we hi ndlela muni loku hi hlota kurula ni van’wani?

¹³ Loku hi tsetselela van’wani, hi hlayisa kurula ni vamakabye va hina. Mupostoli Pawule i te hi fanele ku ti karatela kuva ni wumun’we hi tlhela hiva ni kurula. (Va Le Efesusi 4:3) Hikwalaho, ka masiku ya Cialakanyiso, nguvhunguvhu ka wusiku ga kona, ehleketa khwatsi hi lezvi u khomisako zvona van’wani. Ti wutise lezvi: ‘Xana a vanhu va ndzi tiva na ndzi nga tshami ni civiti hi lava va ndzi wonhelako? Va ndzi wona na ndzi ti karatela ku vhuxa kurula ndzi tlhela ndzi hlanganyetela wumun’we ke?’ Zva lisima nguvhu ku ti maha zviwutiso lezvo hi tlhela hi ehleketa khwatsi hi zvona.

14. Hi nga kombisisa kuyini lezvaku hi “timiselana hi lirandzo”?

¹⁴ A ndlela ya wumune ya ku hlanganyetela wumun’we ku pimanyisa Jehovha, hi kombisa lirandzo. (1 Johani 4:8) Hi nga ti byeli ku: “Ndza zvi tiva ku ndzi fanele ku randza vamakabye va mina, kanilezvi a zvi wuli ku ndzi fanele ku xalala hi vona.” Loku hi hi ni kupima loko, a hi landzeli a wusungukati ga Pawule gaku hi fanele ku “timiselana hi lirandzo”. (Va Le Efesusi 4:2) Pawule a nga wulangi lezvaku hi fanele ku “timiselana” basi, kanilezvi i te hi fanele ku “timiselana hi lirandzo.” Lomu mabandleni ya hina, ku na ni vanhu vo hambanahambana, niku vontlhe va kokilwe hi Jehovha lezvaku vata kakwe. (Johani 6:44) Hikwalaho ku na ni zvigelo zvo tala zva zvi nene zvi mu mahako a va randza. Maku, loku Jehovha a va wona na va ringanelwa hi lirandzo lakwe, hi zvi kuma kwihi zvigelo zva ku va wona na va nga ringanelwi hi lirandzo la hina? Hi fanele ku ti karatela ku va randzisa lezvi Jehovha a zvi lavisako zvona. — 1 Johani 4:20, 21.

HI RINI HI TO MAHA CIALAKANYISO CO GUMESA?

15. Hi zvi tivisa kuyini lezvaku ku tava ni Cialakanyiso co gumesa?

¹⁵ Ku ta chikela siku hi to maha Cialakanyiso co gumesa. Hi zvi tivisa kuyini? Pawule i byelile maKristu ma totilweko aku a cikhati ma alakanyako kufa ka Jesu lembe ni lembe, ‘moba hungu hi kufa ka Hosi kala yi wuya’. (1 Va Le Korinte 11:26) Jesu yenawu i wulawulile hi ‘kuta’ kakwe a cikhati a nga nyika ciphrofeto ca masiku yo gumesa. Na a wulawula hi kuxaniseka ka hombe loku ku to chikela lokuloku, i te: “Ku ta woneka le tilweni a ciwoniso ca N’wana wa munhu; kwalaho a tixaka tontlhe ta misava ti ta rila loku ti wona a N’wana wa munhu na ata hi marefu ya tilo ni ntamu ni kungangamela ka hombe. Yena i ta ruma a tingilozi takwe na tiba mipundzu yo vhuma nguvhu; ti ta tsombanyisa a vahlawulilweko vakwe hi ka mune wa matlhelo ya misava, kusukela magemeta-musi ya tilo kala ka man’wani magemeta-musi.” (Matewu 24:29-31) Jesu i ta “tsombanyisa a vahlawulilweko vakwe” a cikhati a to teka vatotilweko vontlhe lava va to ngha va ha hi laha misaveni vaya tilweni. Lezvo zvi ta maheka na ku sangulile a kuxaniseka ka hombe kanilezvi a yimpi ya Har–Magedhoni na yi nga se sangula. Ka yimpi leyo, Jesu ni lava va 144 000 va talwa ni tihosi ta misava va ti hlula. (Kuvhululelwa 17:12-14) A Cialakanyiso leci hi to ci maha na Jesu a nga ‘seta’ a ta hlengeleta vatotilweko ci tava cona co gumesa.

16. Hikuyini u ti yimiseleko kuva kona Cialakanyisweni lembe legi?

¹⁶ Ti yimisele kuva kona Cialakanyisweni hi dhiya 31 ka Março wa 2018. Kombela Jehovha kambe lezvaku a ku vhuna ku maha cipandze ca wena kasi hiva ni wumun’we kota vanhu vakwe. (Gondza Lisimu 133:1.) Ku ta chikela siku hi toya Cialakanyisweni hi khati go gumesa. Na gi nga se chikela siku lego, a hi simameni hi komba lezvaku ha xalala nguvhu hi wumun’we go tsakisa hi gi kumako lembe ni lembe Cialakanyisweni ca kufa ka Jesu.