Tiyisanani, ‘nguvhunguvhu lezvi a siku gi yako gi tshinela’

1. Hikuyini mupostoli Pawule a nga kuca maKristu yo sangula lezvaku ma tiyisana nguvhu?

KA ZANA ga malembe go sangula, mupostoli Pawule i kucile maKristu ya maHebheru aku: ‘Ngha hi khatalelana kasi ha susumetana lirandzweni ni mitirweni yo saseka; na hi nga tsiki a tinkhozo ta hina khwatsi hi mukhuwo wa van’wani kanilezvi hi khongotelana; nguvhunguvhu kota lezvi mu wonako lezvaku a siku gi tshinela kusuhani.’ (Mahebheru 10:24, 25) Kuzvilava a vamakabye va ti wutisile ku hikuyini Pawule a nge va fanele ku tiyisana nguvhu. A cin’we ca zvigelo ci wonekile na ku nga se hundza ntlhanu wa malembe. Ka cikhati leco, va wonile lezvaku a siku ga Jehovha ga kulamulwa ka Jerusalema gi laha kusuhani. Va wa zvi tiva ku va fanele ku huma dhoropeni lego kota lezvi Jesu a nga va byelile. (Luka 21:20-22; Mitiro 2:19, 20) A siku lego ga Jehovha gi chikele hi lembe ga 70, a cikhati a vaRoma va nga lovisa Jerusalema.

2. Hikuyini hi faneleko ku khatala nguvhu hi kuva hi tiyisana nyamutlha?

² Inyamutlha hi ka ciyimo co fana ni leco. ‘A siku ga Jehovha ga hombe, ni go chavisa nguvhu’ gi laha kusuhani. (Joyeli 2:11) A magezu ya muphrofeti Zefaniya yaku: ‘A siku ga hombe ga Jehovha gi kusuhani, ga tshinela hi cihatla’ ma tira kambe ni nyamutlha. (Zefaniya 1:14) Hi cigelo leco, hi fanele ku ‘khatalelana kasi ha susumetana lirandzweni ni mitirweni yo saseka’. (Mahebheru 10:24) Hi fanele ku khatala nguvhu hi vamakabye va hina, kasi hi va tiyisa loku zvi laveka.

HI VAMANI VA LAVAKO KU TIYISIWA?

3. Zvini lezvi Pawule a nga wula xungetano hi ku tiyisa van’wani? (Wona mufota kusanguleni ka ndzima.)

³ ‘A kubindza ka mbilu ku maha munhu a korama; kanilezvi a gezu gi nene gi tsakisa a mbilu.’ (Mavingu 12:25) Hontlheni ha tshuka hi lava ku tiyisiwa. Pawule i kombile lezvaku hambu lava va nyikilweko ntiro wa ku tiyisa van’wani va zvi lava ku tiyisiwa. I tsalele vamakabye vakwe va le Roma aku: ‘Ndza navela ku mu wona, kasi ndza fela ku mu nyika a cinyikiwo co kari ca ka moya, lezvaku mu fela ku tiyiswa. Hi lezvaku, loku ndzi hi cikari ka n’wina ndzi fela ku tsakiswa zvin’we na n’wina hi kukholwa loku ku nga kona ka hina hontlhe, a ka n’wina ni ka mina.’ (Va Le Roma 1:11, 12) Hikwalaho, hambu mupostoli Pawule i wa tshuka a lava ku tiyisiwa. — Gondza Va Le Roma 15:30-32.

4, 5. Hi nga tiyisisa kuyini van’wani nyamutlha, niku hikuyini?

⁴ Inyamutlha, hi nga tiyisa vamakabye va nga ntirweni wa cikhati contlhe, vo kota maphayona. A kutala kabye va tsikile zvilo va zvi randzako wutomini kasi va zvi kota ku maha maphayona. Hi zvalezvo kambe ni varumiwa, vatiri va Bheteli, vawoneleli va cipandze ni vasati vabye, ni vamakabye va tirako ka mimiti ya wuhundzuluseli. Vontlhe va ti tsona zvokari kasi va tirela Jehovha cikhati contlhe. Hikwalaho, hi fanele ku va tiyisa. Ku na ni vamakabye vo tala kambe va xuvako ku simama va hi ntirweni wa cikhati contlhe, kanilezvi a ciyimo a ca ha vhumeli. Vonawu va bonga loku hi va tiyisa.

⁵ Hi vamani van’wani va ringanako ku tiyisiwa? Vamakabye vo tala lava va simamako kuva magwendza hi ku lava ku ingisa Jehovha va chadha ‘ntsena Hosini’. (1 Va Le Korinte 7:39) A vanuna va nga tiyisa vasati vabye hi ku va byela lezvaku va va randza va tlhela va va bonga hi lezvi va mahako. (Mavingu 31:28, 31) A vamakabye lava va timiselako tixanisa kutani mababyi vonawu va zvi lava ku tiyisiwa. (2 Va Le Tesalonika 1:3-5) Jehovha na Jesu va va chavelela a vamakabye vontlhe lavo vo tsumbeka. — Gondza 2 Va Le Tesalonika 2:16, 17.

A MADHOTA MA NGA HI TIYISA

6. Hi gondza yini ka Isaya 32:1, 2 xungetano hi ntiro wa madhota?

⁶ Gondza Isaya 32:1, 2. Kota lezvi hi hanyako ka masiku ya zvikarato, zva olova ku hi xukuvala hi tlhela hi mbhela ntamu. Jesu Kristu i tirisa vamakabye vakwe va totilweko ni “tihosana” ta ntlawa wa tiyivhu tin’wani kasi ku hi tiyisa. A madhota lawo ya bandla a ma “fumeli” a kukholwa ka hina, kanilezvi ma hi “vhuna” kuva hi tsaka hi tlhela hi simama hi tsumbekile. — 2 Va Le Korinte 1:24.

7, 8. A madhota ma nga tiyisisa kuyini van’wani hi magezu ni mitiro?

⁷ A madhota ma nga tekelela mupostoli Pawule, loyi a nga ti karatela ku tiyisa vamakabye contlhe cikhati. I tsalele maKristu ya le Tesalonika ma nga kari ma xanisiwa, aku: ‘Kota lezvi hi nga mu randza nguvhu hi no tsaka a ku mu nyika ivhangeli ya Nungungulu, na ku nga hi yona yoce, kanilezvi hi wa longile a ku nyikela hambu ni wutomi ga hina, hakuva mu wa randzeka nguvhu ka hina.’ — 1 Va Le Tesalonika 2:8.

⁸ A madhota ma nga tiyisa van’wani hi ku va chavelela. Kanilezvi a ku chavelela hi magezu basi a zvi eneli. Pawule i byelile maKristu ya le Efesusi, aku: ‘Mu yimelwe hi ku vhunetela lava va nga ni gome, ni ku alakanya a timhaka ta Hosi Jesu, leti yena wutsumbu a nga wula, aku: Ku katekile ku nyika ku hundza ku nyikiwa.’ (Mitiro 20:35) Pawule i wa ti yimisele ku ‘nyikela zvontlhe’ a ku patsa ni “wutsumbu” gakwe hi kota ya vamakabye. I zvi kombisile hi mitiro lezvaku i wa ti yimisele ku va mahela ni cihi ci nga laveka. (2 Va Le Korinte 12:15) A madhota wonawu ma fanele ku tiyisa van’wani ma tlhela ma va chavelela hi magezu ni mitiro. Lezvo zvi ta komba ku hakunene ma khatala hi hina. — 1 Va Le Korinte 14:3.

9. A madhota ma nga nyikisa kuyini wusungukati hi ndlela yi tiyisako?

⁹ A zvikhati zvin’wani, a ku tiyisa van’wani zvi patsa ku va nyika wusungukati. A madhota ma nga gondza ka zvikombiso zva lomu ka Bhibhiliya kasi ma tiva ku maha lezvo hi ndlela yi tiyisako. Jesu i nyikile cikombiso ci nene mhakeni leyi a cikhati a nga rumela mahungu mabandleni ya le Aziya Menor andzhako ka loku a delwe a tlhela a vhuxiwa. I wa hi ni wusungukati ga ntamu a nga lava ku nyika bandla ga le Efesusi, ni ga le Pergamumi, ni ga le Tiyatira. Hambulezvo i rangile hi ku va dzundza hi zvilo zva zvi nene lezvi va nga zvi maha. (Kuvhululelwa 2:1-5, 12, 13, 18, 19) I byelile bandla ga le Lawodhikeya, aku: ‘Ndzi kawuka ni ku tsayisa vontlhe lava ndzi va randzako; hikwalaho pinyama u hundzuluka.’ (Kuvhululelwa 3:19) A madhota ya hina ma ti karatela ku pimanyisa Kristu a cikhati ma nyikako wusungukati van’wani.

A HI MADHOTA WOCE MA FANELEKO KU TIYISA VAN’WANI

10. Hi nga tiyisisa kuyini van’wani?

¹⁰ A madhota a hi wona woce ma faneleko ku tiyisa van’wani. Pawule i kucile maKristu wontlhe lezvaku ma wulawula ‘timhaka ta zvinene ta ku vhunetela laha ku lavekako, lezvaku tiva cikatekiso’ ka van’wani. (Va Le Efesusi 4:29) A mun’we ni mun’wani wa hina i fanele ku tiva lezvi a van’wani va karatekako hi zvona kasi a va vhuna. Pawule i tsalele maKristu ya vaHebheru, aku: ‘Tiyisani a mandla ma rerekileko, ni madzolo laya ma hlekahlekako; lulametani a tindlela ta mikondzo ya n’wina, lezvaku leci ci khwitako ci nga khuyuki, kanilezvi ci hanyiswa.’ (Mahebheru 12:12, 13) Hontlheni hi nga tiyisa van’wani hi lezvi hi wulako, hambu loku ha ha hi vaswa nguvhu.

11. Cini ci nga vhuna Marta a cikhati a nga hi ni gome?

¹¹ A makabye wo kari waku hi Marta ive ni gome hi cikhati co kari.a (Wona tlhamuselo wa lahasi.) I tsalile lezvi: “Ka siku go kari na ndzi kari ndzi khongela ndzi kombela ku tiyisiwa, ndzi kumene ni makabye wa cisati a kulileko a ndzi komba lirandzo ni tipswalo, lezvi ndzi nga zvi lava nguvhu ka cikhati leco. I tlhelile a ndzi hlawutela ciringo a kumeneko naco co fana ni caleci ndzi nga kari ndzilwa naco. Lezvo zvi ndzi mahile ndzi wona ku kasi a hi mina ndzoce.” Kuzvilava a makabye loye a nga zvi polangi ku a magezu yakwe ma mu vhunile nguvhu Marta!

12, 13. Hi nga gi tirisisa kuyini wusungukati gi nga ka Va Le Filipi 2:1-4?

¹² Pawule i tsalele maKristu ya le Filipi, aku: ‘Loku ku hi kona a kutangaliswa ka Kristu, loku ku hi kona a kuchavelelwa ka lirandzo, loku ku hi kona a kutlhangana ka moya, loku ku hi kona wuxinji ni ku zwela wusiwana, tatisani a kutsaka ka mina hi ku alakanya cilo cin’we, na mu hi ni lirandzo lin’we, ni mbilu yin’we, mu xuva cilo cin’we; mu nga mahi nchumu hi mubango ni kutikukumukisa, kanilezvi ngha mun’we ni mun’wani a ti koramisa a wula mun’wani aku i chukwana ku hundza yena. Ngha mun’we ni mun’wani a nga khataleli a zvakwe ntsena, kanilezvi a khatalela ni zva van’wani.’ — Va Le Filipi 2:1-4.

¹³ Hontlheni hi fanele ku hlota tindlela ta ku vhuna van’wani hi ‘kuchavelela ka lirandzo’, ‘kutlhangana ka moya’, ku va mahela “wuxinji” ni ku va “zwela wusiwana”. Loku hi maha lezvo, hi ta tiyisa vamakabye va hina.

TINDLELA TA KU TIYISA VAN’WANI

14. Hi yihi a yin’we ya tindlela ta ku tiyisa van’wani?

¹⁴ A cin’we ca zvilo zvi tiyisako hlana hi loku hizwa ku lava hi nga va vhuna cikhatini ci hundzileko va simama va tirela Jehovha hi kutsumbeka. Mupostoli Johani i zile aku: ‘A ndzi na kutsaka ka hombe ku hundza loku ndzi nga nako, laha ndzi zwako lezvaku a vana va mina va famba lisineni.’ (3 Johani 4) A maphayona yo tala ma tsaka nguvhu loku mazwa ku a munhu wo kari ma nga mu vhuna ku gondza lisine wa ha simama a tirela Jehovha hi kutsumbeka; a ha ha wuli hi loku mazwa ku i phayona. Hikwalaho, loku a phayona go kari gi hi ni gome, hi nga gi alakanyisa a zvilo zvontlhe zva zvi nene lezvi gi zvi mahileko kasi ku vhuna van’wani.

15. Cini cin’wani hi nga mahako kasi ku tiyisa vamakabye va tirelako Jehovha hi kutsumbeka?

¹⁵ A vawoneleli vo tala va cipandze ni vasati vabye va wula lezvaku va tiyisiwa nguvhu loku va amukela zvipapilwana zva ku va bonga andzhako ka loku va endzele bandla go kari. Hi zvalezvo kambe ni madhota, varumiwa, maphayona, ni vatiri va Bheteli, lava vontlhe va tirelako Jehovha hi kutsumbeka. Loku hi va bonga, hi nga va tiyisa nguvhu a ku hundza lezvi hi zvi alakanyako.

HONTLHENI HI NGA TIYISA VAN’WANI

16. I ndlela muni yo olova leyi hi nga tiyisako hi yona van’wani?

¹⁶ Ahati loku zvi nga ku oloveli ku byela van’wani lezvi u ti zwisisako zvona hi vona? Hi lisine, a zvi karati ku tiyisa van’wani. Zama ku n’wayitela loku u losa munhu. Loku yena a nga n’wayiteli, kuzvilava ci kona ci mu karatako. Zvi nga maha na a lava munhu wo mu tlhatlhela cifuva. U nga mu chavelela hi ku mu ingisela basi.— Jakobe 1:19.

17. Cini ci nga tiyisa makabye wo kari wa muswa?

¹⁷ A makabye wo kari wa muswa waku hi Henri i xukuvalile nguvhu a cikhati leci a kutala ka maxaka yakwe ma nga nyima ku tirela Jehovha. A mun’we wa kona i papayi wakwe, a nga hi dhota. Laha a muwoneleli wo kari wa cipandze a nga wona lezvaku Henri wa swihala, i no mu teka vaya ka wutshamu go kari a ya mu tsika a ti phofula. Henri i wonile ku a caku a nga maha kasi ku vhuna maxaka yakwe lezvaku ma tlhelela ka Jehovha ku simama a tsumbekile. I chavelelwe kambe hi ku gondza Lisimu 46, na Zefaniya 3:17, na Marku 10:29, 30.

18. a) Zvini lezvi Hosi Solomoni a nga tsala xungetano hi ku tiyisa van’wani? b) Mawonela muni lawa mupostoli Pawule a nga nyika?

¹⁸ Hi gondza yini ka matshango ya Marta na Henri? Hi gondza ku hontlheni hi nga zvi kota ku tiyisa van’wani. Hosi Solomoni i tsalile lezvi: ‘Yi nandzihisa kuyini a mhaka yi wuliwako hi cikhati ca yona! A mubiko wu nene wu tiyisa marambu.’ (Mavingu 15:23, 30) Wa tiva munhu a nga ni gome kutani a swihalako? U nga mu vhuna hi ku maha zvilo zvi tsongwani zvo kota ku mu lerela ndzima yo kari lomu ka Murindzeli kutani lomu ka saite ya hina. Ahandle ka lezvo, Pawule i gondzisile lezvaku a ku yimbelela tisimu ta Mufumo zvi nga hi tangalisa. I tsalile lezvi: ‘Gondzisanani hi wutlhari gontlhe, mu khongotelana hi tixangu ni tisimu ni zvizimba zva moya, na mu bonga Nungungulu hi tisimu timbilwini ta n’wina.’ — Va Le Kolosi 3:16; Mitiro 16:25.

19. Hikuyini a ku tiyisana zvi toya zvi laveka nguvhu zvezvanyana, niku zvini hi faneleko ku maha?

¹⁹ Laha a siku ga Jehovha gi yako gi tshinela, a ku tiyisana zvi taya zvi laveka nguvhu. (Mahebheru 10:25) Hi ta kuma litsako loku hi maha lezvi Pawule a nga zvi wula, zvaku: ‘Tiyisetanani, mu akana, kota lezvi mu zvi mahako.’ — 1 Va Le Tesalonika 5:11.