Jerusalema gi lovisiwa

Hi ku phindaphinda, a vanhu va ka Judha va no fularela Jehovha va khozela a vanungungulu va mawunwa. Jehovha i no simama ku zama ku va vhuna hi malembe yo tala. I no rumela vaphrofeti vo tala kasi ku ya va tlharihisa, kanilezvi a va ingisangi. Wutshan’wini ga lezvo, va wo hleka vaphrofeti lavo. Zvini a nga maha Jehovha kasi ku fuvisa wukhozeli gabye ga zvifananiso?

Nebhukadnezare, a hosi ya Bhabhuloni, i wa kari a hlula matiko yo tala hi gin’we gin’we. Ka khati go sangula a nga hlula Jerusalema, i khomile hosi Jehoyakina, ni tihosana, ni masochwa ni vavatli a famba navo Bhabhuloni. I no teka ni titshomba tontlhe ta lomu tempeleni ya Jehovha, a gumesa a yimisa Zedhekiya lezvaku a maha hosi ya Judha.

Kusanguleni, Zedhekiya i wa ingisa Nebhukadnezare. Kanilezvi, a vanhu va matiko lawa va nga gamekene nawo ni vaphrofeti va mawunwa va no kucetela Zedhekiya lezvaku a tsika ku ingisa hosi ya Bhabhuloni. Jeremiya i no tlharihisa Zedhekiya, aku: ‘Loku u tsika ku ingisa vaBhabhuloni, lomu Judha ku ta dayelwa vanhu, kuva ni ndlala ni mababyi yo tala’.

Loku ku hundzile 8 wa malembe na a kari a fuma, Zedhekiya i no tsika ku ingisa vaBhabhuloni. I no kombela masochwa ya vaGibhite lezvaku ma mu vhuna. Hikwalaho, Nebhukadnezare i no rumela masochwa yakwe lezvaku ma ya dhumela Jerusalema. Loku ma chikele, ma no ya gwimba matenda lomu matlhelweni ya dhoropa. Jeremiya i no byela Zedhekiya aku: ‘Jehovha i wula lezvaku loku u ti nyikela ka vaBhabhuloni, wena ni dhoropa mu ta pona. Kanilezvi loku u nga ti nyikeli, a vaBhabhuloni va ta hisa Jerusalema va tlhela va ku khoma va ya ku vhalela’. Zedhekiya aku: ‘Ndzi nga ta ti nyikela’!

Loku ku hundzile lembe ni khihlanya, a masochwa ya Bhabhuloni ma no khungumula makhurisi ya Jerusalema ma gi hisa hi ndzilo. Ma no hisa tempeli, ma daya vanhu vo tala ma tlhela ma khomela van’wani va ku tala nguvhu ma ya va maha tikhumbi.

Zedhekiya i no huma lomu Jerusalema a tsutsuma. Kanilezvi a vaBhabhuloni va no mu hlongolisela. Va no ya mu khoma kusuhani ni Jeriko, va gumesa va mu heleketa ka Nebhukadnezare. Nebhukadnezare, a hosi ya Bhabhuloni, i no maha ku Zedhekiya a wona vana vakwe na va dawa. Hi kulandzela, i no mu bhoxa matihlo a gumesa a mu teka a ya mu vhalela paxweni, lomu a nga fela kona. Hambulezvo, Jehovha i no tsumbisa vanhu va ka Judha, aku: ‘Loku ku hundzile 70 wa malembe, ndzi ta mu wuyisa kaya ka n’wina Jerusalema.’

Zvini zvi nga wa ta humelela a vaswa lava va nga khomilwe va ya Bhabhuloni? Va wa ta simama va tsumbeka ka Jehovha?