Ku pswaliwa n’wana loyi a nga tsumbisilwe

Josefa na Mariya a va tekelangi ku tlhela Nazareta, va tshamile le Bhetlehema. Laha Jesu a nga tlhanganisa 8 wa masiku, va no mu nghenisa wukwera, va ingisa Nayo lowu Nungungulu a nga nyikile vaIzrayeli. (Levhi 12:2, 3) Ka siku lego kambe, va wa tolovela ku mu chula vito a n’wanana. Va no chula n’wana wabye vaku hi Jesu.

Ku no hundza hweti, zvonake Jesu a tlhanganisa 40 wa masiku. A vapswali va Jesu va no mu teka va famba naye tempeleni le Jerusalema. Ku wa nga hi kule nguvhu ni laha va nga tshama kona. A Nayo wu wa laya lezvaku andzhako ka 40 wa masiku a wasati na a phulukile mufana, i wa fanele kuya tempeleni a ya maha munyikelo wa ku ti basisa. — Levhi 12:4-8.

Hi zvalezvo Mariya a nga maha. I no teka zvinyanyani zvimbiri zva zvi tsongwani a ya maha hi zvona munyikelo. Lezvo zvi hi komba ciyimo cabye hi tlhelo ga timali. Hi kuya hi Nayo, va wa fanele ku nyikela ciyivhana ca matsune ni cinyanyani. Kanilezvi loku a wasati loye a hi cisiwana, a nga zvi koti ku nyikela ciyivhana ca matsune, i wa nyikela matuva mambiri kutani zvipomba zvimbiri. Zvalezvo zvi wa enela. Mariya i wa hi ka ciyimo leco, niku hi zvalezvo a nga nyikela futsi.

Loku Josefa na Mariya va chikele le tempeleni, va no tshinelelwa hi madhala wo kari wa wanuna. A vito gakwe ku wa hi Simiyoni. Jehovha i wa mu byelile lezvaku a nga tafa na a nga se wona Kristu kutani Mesiya loyi a nga tsumbisilwe. Ka siku lego, Simiyoni i noya tempeleni hi ku kongomiswa hi moya wa ku basa, a ya kuma Josefa, na Mariya, ni cihlangi cabye ca mufana. Simiyoni i no teka cihlangi a ci welela mawokweni yakwe.

Laha Simiyoni a nga ha hi na Jesu mawokweni yakwe, i no bonga Nungungulu, aku: “Makunu Hosi, tsika a nandza ga wena gi famba hi kurula, khwatsi hi mhaka ya wena; hakuva a mahlo ya mina ma wonile a kuhanyisa ka wena, loku u ku longisileko kuwoneni ka matiko wontlhe; a kuwonekela ka ku woninga a vamatiko, ni wudzundzo ga vanhu va wena va Izrayeli.” — Luka 2:29-32.

A cikhati leci Josefa na Mariya va nga zvizwa, va no hlamala. Simiyoni i no va katekisa, a gumesa a byela Mariya lezvaku a n’wana wakwe ‘i yimiselwe a kuwa ni kuvhuka ka vanyingi ka lomu Izrayeli’. A tlhela aku Mariya i ta xanisekisa ku khwatsi hi loku a tlhaviwa hi cipadha. — Luka 2:34.

Ka siku lego, ku wa hi ni munhu mun’wani kambe. Hi muphrofeti Ana, a nga hi 84 wa malembe. Hi lisine, a wasati loyi i wa nga vhumaleki laha tempeleni. Ka cikhati leco, i nota ka Josefa, na Mariya, ni ka n’wanana Jesu. Ana i no sangula ku bonga Nungungulu a tlhela a wulawula ha Jesu mahlweni ka vontlhe va nga hi kona.

Kunene wa zvi wona ku Josefa na Mariya va tsakile nguvhu hi zvontlhe zvi nga maheka le tempeleni. Handle ko kanakana, zvontlhe zvi tiyisekisa lezvaku a mufana wabye, i n’wana loyi Nungungulu a nga tsumbisile.