‘A zakuga za mina hi ku maha a kuranza ka Nungungulu’

Ka lisimu lo kari lo dumisa Muvangi, Hosi Davida wa le Israeli wa kale i lo yimbelela aku: “Nungungulu wa mina, nza nengela ku maha kuranza ka wena; a nawo wa wena wu lomu mbilwini ya mina.” (Tis. 40:8) Hambu lezi a nga kumana ni ziyimo zo nonoha wutomini gakwe, Davida i wa ha tsaka nguvu hi ku maha a kuranza ka Nungungulu. Hakunene, Davida a hi yena yece mukhozeli wa Jehova a nga xalaliswa hi ku tirela Nungungulu wa lisine.

Na a tirisa magezu ya Tisimu 40:8 ka Messia kutani Kristu, mupostoli Paule i lo tsala lezi: “Laha Kristu a ngata laha misaveni, i te ngalo: A miphahlelo ni minyikelo a ku tsaki ha zona, kanilezi u nzi longiselele a miri; a ku tsakangi hi miphahlelo ya kuhiswa ni leyi yi humeselwako kuonha. Zonake nzi wa te ngalo: Languta, nzata a ku ta maha kuranza ka wena Nungungulu. (Lomu bhukwini ku tsalilwe lezo ha mina.)” — Maheb. 10:5-7.

A xikhati lexi a nga hi laha misaveni, Jesu i wa tsaka hi ku cuwukisa zivangwa, ku tshama ni vanghana, ni kuga navo. (Mat. 6:26-29; Joh. 2:1, 2; 12:1, 2) Hambulezo, a nchumu wa lisima ku hunza zontlhe ni lexi xi nga mu tsakisa ku hunza zontlhe ku wa hi ku maha a kuranza ka Dadani wakwe wa le tilweni. Kunene, Jesu i te ngalo: “A zakuga za mina hi ku maha a kuranza ka loyi a nzi rumileko, ni ku mbhetisa a ntiro wakwe.” (Joh. 4:34; 6:38) A vapizani va Jesu va lo gonza ka Mugonzisi wabye a xihundla xa litsako la lisine. Va lo bhulela vanwani a mahungu ya Mufumo hi litsako ni kuxuva ka hombe. — Luka 10:1, 8, 9, 17.

“FAMBANI, MU VA MAHA VAPIZANI”

Jesu i lo laya valanzeli vakwe aku: “Fambani, mu va maha vapizani a matiko wontlhe, mu va bapatiza hi vito ga Dadani ni ga N’wana ni ga Moya wa ku Basa; mu va gonzisa a ku gonga zontlhe lezi nzi mu layileko zona. Mangabye, nzi na nwina a masiku wontlhe, na kona kugumelweni ka xikhati.” (Mat. 28:19, 20) Kasi ku tatisa a xiavelo lexi, hi fanele ku bhula ni vanhu ni kwihi lomu va kumekako kona, ku maha maenzo yo wuyela ka lava va kombisileko kutsakela, ni ku va fambisela zigonzo za Biblia. A ku maha ntiro lowu xibuka xa litsako la hombe.

Kani a vanhu va ma tsakela mahungu yo saseka kani a va ma tsakeli, a mawonela ya hina hi wona nguvunguvu ma to komba lezaku hi tava ni litsako wutirelini kutani hi nga tava nalo. Hikuyini hi simamako ku huwelela mahungu yo saseka hambu loku a vokari va nga khatali? Hi simama ku maha lezo hakuva ha zi tiva lezaku a ku xumayela Mufumo ni ku maha vapizani xikombiso xa liranzo la hina ka Nungungulu ni vaakelane va hina. Phela a wutomi ga vanhu gi le khombyeni — a ga hina ni ga vaakelane va hina kambe. (Ezek. 3:17-21; 1 Tim. 4:16) A hi woneni a zilo zo kari zi vunileko a vatiri-kulori vo tala a ku simama na va hiseka wutirelini ka matshamu yo nonoha.

LONZOWOTA NI WIHI MOLE WU VULULEKAKO

A ku tirisa ziwutiso zi faneleko wutirelini ga hina a kutala ka zikhati zi pswala mihanzu yi nene. Ka mixo yo kari, Amalia i lo wona wanuna wo kari na a lera a phepha-hungu laha parki. I lo mu tshinelela a mu wutisa lezaku i tshukile a lera a mahungu yo kari yo saseka ke. A xikhati lexi a nga hlamula lezaku a nga se lera, Amalia i te ngalo: “Nzi ku nehela mahungu yo saseka ya Mufumo wa Nungungulu.” Lezo zi lo vuxa a kutsakela ka wanuna loye zonake a vumela xigonzo xa Biblia. Kunene, Amalia i zi kotile ku sangula zigonzo zinharu za Biblia ka parki leyo.

Janice i lonzowotile a wutshamu legi a tirako ka gona kota xipanze xa ku xumayela kona. A xikhati lexi a murinzeli wa laha ntirweni ni mutiri-kulobye va nga kombisa kutsakela ka nzima yo kari ya Murinzeli, Janice i lo ti yimisela ku va tela ni marevista hi kukhanzakanya. I lo maha lezo ka munwani mutiri-kulobye, loyi a nga hlamaliswa hi timhaka to tsalangana ti tlhamuselwako ka Murinzeli ni Despertai! A mutiri loyi yenawu i lo kombela marevista. “Hi nga wona makatekwa lawa ma tako hi ka Jehova!” ku wula Janice. Hi kugumesa i lova ni 11 wa vanhu va nga amukela marevista hweti ni hweti ntirweni wakwe.

NGHA UVA NI MAWONELA MA NENE

A muwoneleli a fambafambako i lo leletela lezaku wutirelini ga muti ni muti, a vahuweleli a va faneli ku gumesa mabhulo yabye ni nwinyi wa muti hi ku wula ntsena lezaku va ta wuya ka siku ginwani. Wutshanwini ga lezo, va nga ha mu wutisa lezi: “Wa zi lava lezaku nzi ku komba lezi a xigonzo xa Biblia xi mahiswako zona?” kutani ku, “I siku muni ni xikhati muni u nga wa ta tsakela ku nzi wuya hi ta simama ni mabhulo ya hina ke?” A muwoneleli a fambafambako i lo bika lezaku hi ku tirisa a mamahela lawa, a vamakabye va xinuna ni va xisati ka bandla go kari a nga tira ka gona va lo sangula a 44 wa zigonzo za Biblia ka viki ginwe.

A ku tekela ku maha maenzo yo wuyela — hambu loku ku hunza masiku matsongwani anzhako ka lienzo lo sangula — zi nga neha mabhinzu. Hikuyini? Hakuva a ku maha lezo zi komba lezaku hi tiyimisele ku vuna vanhu va timbilu ti nene lezaku va zwisisa a Biblia. A xikhati lexi a nga wutisiwa lezaku hikuyini a nga vumela ku gonza Biblia ni Timboni ta Jehova, a wasati wo kari i te ngalo: “Nzi lo sangula ku gonza hakuva va lo kombisa kukhatala ka lisine ni liranzo ha mina.”

Nzeni ka xikhatanyana anzhako ka ku gonza a Xikola xa Ntiro wa Wuphayona, Madaí i wa fambisa a 15 wa zigonzo za Biblia niku i lo nyikela zigonzani zo hunza ntlhanu ka vahuweleli vanwani. A zigonzani zakwe za Biblia zo tala zi lo sangula kuya mitlhanganweni ya hina hi kukhanzakanya. Xini xi nga vuna Madaí a ku sangula a zigonzo lezo zo tala? A xikola xi lo dlunyatisa a xilaveko xa ku simama ku maha maenzo yo wuyela kala a kuma lava va nga kombisa kutsakela ka lienzo lo sangula. A Mboni yinwani yi nga vuna votala lezaku va gonza lisine la Biblia yi ngalo: “Nzi gonzile lezaku a ku timisela kumaheni ka maenzo yo wuyela hi xona xinya xa ku vuna vanhu lava va lavako ku tiva Jehova.”

A ku maha maenzo yo wuyela ni ku fambisa zigonzo za Biblia zi lava kutikarata ka hombe. Hambulezo, a mbhanzu wa kona wa hombe ku hunza a kutikarata loko. Loku hi ti tsitsirita ntirweni wa ku xumayela Mufumo hi ta vuna vanwani lezaku ‘vava ni kutiva ka lisine,’ zonake va poniswa. (1 Tim. 2:3, 4) Lezo zi nga hi nehela litsako ni kuxalala ku nga hiko na kuecanyiswa.