XIPIMO 20

Wutireli ga ku lamulela timhango

KUNGO GA XIPIMO

A liranzo la wuKristu la woneka khwatsi loku ku humelela timhango

1, 2. a) Xikarato muni lexi a maKristu ya le Judia ma nga kari ma yimisana naxo? b) Ximaho muni xa liranzo lexi a maKristu ya le Judia ma vunekileko hi xona?

ZI KWALOMO ka 46 Nguveni ya Hina, niku a tiko ga Judia go xaniseka hi ndlala ya hombe. Kota lezi a zakuga zi kalako, za dura nguvu niku a vapizani va nga maJuda lava va hanyako lomo a va zi koti ku zi xava. Vo sokola hi ndlala. Kanilezi, va lava ku vikelwa hi woko ga Jehova hi ndlela ya ku a ku na vanwani vapizani va Kristu va tshukileko va yi wona. Zini zi lavako ku humelela?

² Na va khumbeka hi kuxaniseka ka maKristu ya maJuda ya le Jerusalema ni Judia, a maKristu ya le Antiokia wa Siria, lawa ma nga hi maJuda ni Vamatiko, ma maha mihlengo kasi ku vuna makholwa-kulobye. Zonake ma hlawula xikari ka wona a vamakabye vambiri vo tsumbeka va xinuna, Barnabasi na Saule, lezaku va yisa a xivuno lexo ka madota ya bandla le Jerusalema. (Gonza Mitiro 11:27-30; 12:25.) Alakanyela ntsena lezi va nga khumbekisa zona a vamakabye lavo va vavumali le Judia hi xikombiso lexi xa liranzo la vamakabye vabye va le Antiokia!

3. a) Xana a vanhu va Nungungulu va masikwini ya hina va simama ku xi lanzelisa kuyini a xikombiso xi vekilweko hi maKristu yo sangula ya le Antiokia? Nyika xikombiso. (Wona a kwadru “Ntiro wa hina wo sangula wa hombe wa ku lamulela timhango masikwini ya hina.”) b) Ziwutiso muni hi to zi hlamula ka xipimo lexi?

³ A ximaho lexo xa zana ga malembe go sangula Nguveni ya Hina xive xona xo sangula matinwini xa kuva maKristu ya tlhelo go kari ga misava ma rumelela xivuno a maKristu ya tlhelo ginwani ga misava. Inyamutlha, hi lanzela a xikombiso lexo hi vekelweko hi vamakabye va hina va le Antiokia. Loku hizwa lezaku a makholwa-kulori ya wutshamu go kari ma welwe hi mhango kutani hi nzhingo wo kari, hi ti karatela ku va vuna.a Kasi ku zwisisa lezi a ntiro wa hina wa ku lamulela timhango wu yelanisako zona ni wutireli ga hina, a hi hlamuleni ziwutiso zinharu xungetano hi wutireli ga ku lamulela timhango. Hikuyini hi nge a ntiro wa ku lamulela timhango wu maha xipanze xa wutireli ga hina? Hi wahi a makungo ya ntiro wa hina wa ku lamulela timhango? Xana hi vunekisa kuyini hi wutireli ga ku lamulela timhango?

Hikuyini a ntiro wa ku lamulela timhango wu nga ntiro wo basa?

4. Zini lezi Paule a nga byela va le Korinte xungetano hi wutireli ga wuKristu?

⁴ Ka papilo gakwe ga wumbiri ka va le Korinte, Paule i tlhamusele lezaku a maKristu ma maha wutireli hi tindlela timbiri. Hambu lezi a papilo ga Paule gi nga kongoma a maKristu ma totilweko, inyamutlha a magezu yakwe ma tira kambe ni ka “tiyivu tinwani” ta Kristu. (Joh. 10:16) A xinwe xa zipanze za wutireli ga hina i “ntiro wa kutlhanganyisa,” ku nga ntiro wa hina wa kuxumayela. (2 Kor. 5:18-20; 1 Tim. 2:3-6) A xinwani xipanze i ntiro lowu hi wu mahelako makholwa-kulori. Mhakeni leyo, Paule i wulawulile hi ntiro wa “ku vunetela lava vo basa.” (2 Cor. 8:4) A magezu “ntiro wa kutlhanganyisa” ni “ku vunetela lava vo basa” mata hi ka gezu ginwe legi hi xiGreki gi nga di·a·ko·ní·a. Hikuyini zi nga za lisima a ku tiva mhaka leyi?

5. Hikuyini zi nga fanele ku Paule a vitana a ntiro wa ku lamulela timhango lezaku wutireli?

⁵ Loku a tirisile a gezu ginwe ga xiGreki ka mitiro leyi ya yimbiri, Paule i lo patsa a ntiro wa ku lamulela timhango ni tinwani tixaka ta wutireli legi gi mahiwako bandleni ga wuKristu. Xikhatanyana mahlweni, yena i wa te ngalo: “Ma kona matirela ma hambeneko, kanilezi a Hosi njinwe. Yi kona mitiro yi hambeneko, . . . Kanilezi zontlhe lezi zi tiriwa hi walowo Moya munwe.” (1 Kor. 12:4-6, 11) Lezi zi wula ku ngalo Paule i lo yelanisa a mitiro yo hambanahambana ya bandla ni “kukhozela” kutani ntiro wo basa.”b (Rom. 12:1, 6-8) Hikwalaho, a zi hlamalisi lezi a ngaza a zi wona na zi faneleka ku a tirisa xipanze xa xikhati xakwe lezaku a “tirela a vobasa.” — Rom. 15:25, 26.

6. a) Kota lezi Paule a zi tlhamuseleko, hikuyini a ntiro wa ku lamulela timhango wu nga xipanze xa wukhozeli ga hina? b) Tlhamusela lezi a ntiro wa ku lamulela timhango wu mahiswako zona misaveni yontlhe nyamutlha. (Wona a kwadru “Loku ku humelela mhango!”)

⁶ Paule i vunile a va le Korinte a ku wona a xigelo xa lezaku a ntiro wa ku lamulela timhango wuva xipanze xa wutireli gabye ni wukhozeli ga Jehova. Wona lezi a nga zi tlhamuselisa zona: A maKristu lawa ma vunako manwani ma maha lezo hi kota ya ‘kuingisa ka wona kukholweni ka ivangeli ya Kristu.’ (2 Kor. 9:13) Hikwalaho, na ma kuciwa hi kuxuva kabye a ku tirisa a tigonzo ta Kristu, a maKristu ma vuna makholwa-kulobye. Paule i te ngalo a mitiro yo saseka leyi ma yi mahelako vamakabye vabye xikombiso xa “tipswalo ta hombe ta Nungungulu.” (2 Kor. 9:14; 1 Ped. 4:10) Hi kumaha loko, na gi wulawula hi ku tirela vamakabye va hina va vumalako, lezi zi patsako a ntiro wa ku lamulela timhango, A Sentinela ga 1 ka Maio wa 1976, gi wulile lezi hi kufaneleko: A hi faneli ku kanakanela a mhaka ya lezaku Jehova Nungungulu ni N’wana wakwe Jesu Kristu va nyika nguvu lisima a ntiro lowu.” Hakunene, a ntiro wa ku lamulela timhango xipanze xa lisima xa wukhozeli kutani ntiro wo basa. — Rom. 12:1, 7; 2 Kor. 8:7; Maheb. 13:16.

Ntiro wa ku lamulela timhango hi makungo yo dlunyateka

7, 8. Hi gihi a kungo go ranga ga wutireli ga hina ga ku lamulela timhango? Tlhamusela.

⁷ Hi wahi a makungo ya wutireli ga hina ga ku lamulela timhango? Paule i hlamulile a xiwutiso lexo ka papilo gakwe ga wumbiri ka va le Korinte. (Gonza 2 Va Le Korinte 9:11-15.) Ka mavesi lawa, Paule i khanyisa makungo-tshinya manharu lawa hi ma tatisako hi ku hlengela ka “hlengo” kutani ntiro wa ku lamulela timhango. A hi wulawuleni hi wona hi ginwe ginwe.

⁸ A kuranga, a wutireli ga hina ga ku lamulela timhango gi dzunza Jehova. Wona a makhati lawa Paule a yisako ha wona a kupima ka vamakabye vakwe ka Jehova Nungungulu ka ntlhanu wa mavesi lawa ma kumbukilweko. Mupostoli loyi i va alakanyisa a “kubonga ka Nungungulu” ni ku “anzisa nguvu a kubongwa ka Nungungulu.” (Mavesi 11, 12) I tlhela a wula lezi a ntiro wa ku lamulela timhango wu mahisako zona maKristu ma “dumisa Nungungulu” ni ku dumisa a “tipswalo ta hombe ta Nungungulu.” (Mavesi 13, 14) Zonake Paule i gumesa a mitlhamuselo yakwe ya wutireli ga ku lamulela timhango hi ku wula lezi: “A ku bongiwe Nungungulu.” — Vesi 15; 1 Ped. 4:11.

9. Kucica muni ka mapimo loku a ntiro wa ku lamulela timhango wu zi kotako ku ku vanga? Nyika xikombiso.

⁹ A ku fana na Paule, a malanza ya Nungungulu inyamutlha ma wona a ntiro wa ku lamulela timhango kota lungelo ga ku dzunza Jehova ni ku sasekisa a tigonzo takwe. (1 Kor. 10:31; Tit. 2:10) Hi lisine, a ntiro wa ku lamulela timhango wu tala ku hungula a mawonela yo biha lawa a vokari va nga nawo ha Jehova ni Timboni takwe. Kasi ku kombisa: A wasati a nga kari a hanya ka wutshamu gi nga hahlulilwe hi xingulu i wa namekile magezu lawa livatini la yindlu yakwe, “Timboni ta Jehova — Mu nga gongonzi.” Ka siku go kari, i lo wona vatiri va ku lamulela timhango na va aketa a yindlu ka muti wu nga hi ka tlhelo ginwani ga ruwa hi laha kaya kakwe. Hi masiku, i lo wona wunghana legi a vatiri lavo va nga kari va gi kombisa zonake a famba a wutisela ku kasi a vanhu lavayani hi vamani ke. Loku a tivile lezaku va wa hi Timboni ta Jehova i lo hlamala a guma aku: “Vanhu nzinwina, nzi mu rwexile nanzu wo kala wu nga mu faneli.” Zini a nga guma a maha? I lo namula a magezu ya ku hi beletela livatini lakwe.

10, 11. a) Zikombiso muni zi kombako lezaku ha chikelela a kungo ga wumbiri ga ntiro wa hina wa ku lamulela timhango? b) I broxura muni gi vunako lava va mahako a ntiro wa ku lamulela timhango? (Wona a kwadru “Xinwani xitiro kasi ku vuna lava va mahako a ntiro wa ku lamulela timhango.”)

¹⁰ Xa wumbiri, hi “vuna” a makholwa-kulori. (2 Kor. 9:12a) Hi xuva nguvu ku tatisa a zilaveko za xihatla hi tlhela hi hungula a kuxaniseka ka vamakabye va hina. Hikuyini? Hi lezaku a ziro za bandla ga wuKristu zi wumba “a miri munwe,” niku “loku a xiro xinwe xi xaniseka, ziro zontlhe zi xaniseka zinwe naxo.” (1 Kor. 12:20, 26) Hikwalaho, a liranzo la wumakabye ni kuzwela wusiwana zi kuca vamakabye vo tala nyamutlha a ku tsika lezi va mahako, va khoma zitiro zabye, vaya lomu ku humeleleko timhango lezaku va ya vuna makholwa-kulori. (Jak. 2:15, 16) Hi xikombiso, anzhako ka kuva a tiko ga Japão gi gobhozilwe hi tsunami, a hofisa ya ravi ya le Estados Unidos yi lo rumela a papilo ka Tikometi ta Zipanze ta ku Aka ta Estados Unidos, na yi wutisa lezaku xana ku nga ngha ku hi ni “vamakabye vo kari va ringanelwako” lava va zi kotako ku ti nyiketela ku ya aketa tiSalawu ta Mufumo le Japão ke. Wuve wihi a hlamulo wa kona? Nzeni ka maviki ntsena, ku ti hendleletile a xipimo xa 600 wa vamakabye — va tlhela va vumela ku ti hakhelela a xihaha-pfhuka vaya Japão! Hi kota ya lezo, a hofisa ya ravi ya Estados Unidos yi te: “Hi khumbekile nguvu hi hlamulo lowu.” Loku a makabye wo kari le Japão a wutisile mutiri wa ku lamulela timhango wa le handle ka matiko lezaku hikuyini a nga tile a ta vunetela, i lo byeliwa lezi: “A vamakabye va hina va Japão ziro za ‘miri wa hina.’ Ha kuzwa a kubayisa ni kuxaniseka kabye.” Na va kuciwa hi liranzo li nga hiko na makangwa, a vatiri va ku lamulela timhango va tshuka va veka wutomi gabye mhangweni kasi ku vuna makholwa-kulobye.c — 1 Joh. 3:16.

Suíça, 1946

NTIRO WA HINA WO SANGULA WA HOMBE WA KU LAMULELA TIMHANGO MASIKWINI YA HINA

Hi Setembro wa 1945, tihwetana nzhako ka ku mbhela ka Yimpi ya Wumbiri ya Misava le Europa, makabye Knorr i tivisile a kusangula ka tsima ga hombe ga ku rumela “xivuno ka vamakabye va vumalako va le Europa Central.”

Mavikana nzhako ka xitiviso lexo, a Timboni ta le Canadá, Estados Unidos ni manwani matiko, ti lo sangula ku hlengeletela ni ku pakela a tinguwo ni zakuga. Kusukela Janeiro wa 1946 kuya mahlweni, ku lo rumelwa a xivuno lexo ka makholwa-kulori ya le Alemanha, Áustria, Bélgica, Bulgária, China, Checoslováquia, Dinamarca, Filipinas, Finlândia, França, Grécia, Holanda, Hungria, Inglaterra, Itália, Noruega, Polônia, ni Romênia.

A longoloko lowo wa ku vuna vanwani a wu mahiwangi khati ginwe ntsena. Ku simamile ku rumelwa xivuno lexo hi malembe mambiri ni khihlanya! Xikhatini lexo, a xipimo xa 85.000 wa vamakabye va xinuna ni va xisati va rumele a kuringana 300.000 wa tikilo ta zakuga, ni kwalomo ka 450.000 wa tikilo ta tinguwo, ni ku hunza 124.000 wa mipatswa ya zilato ka vamakabye vabye va le matikweni ma nga hlaselwe hi yimpi. Hi Agosto wa 1948, a ntiro lowo wa hombe wa ku lamulela mhango wu lo gumesa. Hi 1949, The Watchtower i te ngalo: “Lezo zive xikombiso xa kuranzana. Ha zi tiva lezaku a vamakabye vontlhe lavo va mahile lezi kasi ku dzunza Hosi, na va tiva lezaku a xivuno lexi xa nyama xi wa ta vuna vokari a ku simama wukhozelini ga lisine; hikwalaho va zi wonile na zi hi lungelo ga hombe a ku tirela a vamakabye vabye hi ndlela leyi.” A ntiro lowo wa ku lamulela timhango wu dumisile Jehova, wu humuta makholwa-kulori kuxanisekeni ka wona, ni ku tiyisa a wumunwe xikari ka vamakabye misaveni yontlhe.

¹¹ Lava va nga hiko Timboni vonawu va kombisa kubonga hi ntiro wa hina wa ku lamulela timhango. Hi xikombiso, anzhako ka mhango yo kari yi humeleleko le Arkansas, Estados Unidos, hi 2013, a phepha-hungu go kari gi wulawulile hi lezi a Timboni ti nga ti nyiketele hi kuziranza ti nga chikelisa zona hi xihatla wutshanwini ga mhango, giku: “A Timboni ta Jehova ti gonzisa khwatsi a vatiri va tona vo ti nyiketela laha ka kuza va zi kota ku hatla va chikela wutshanwini ga mhango va tlhela va tira khwatsi kambe.” Hakunene, kota lezi a zi wulileko mupostoli Paule, hina hi “vuna” vamakabye va hina va nga kuxanisekeni.

12-14. a) Hikuyini zi nga za lisima nguvu a ku chikelela a kungo ga wunharu ga ntiro wa hina wa ku lamulela timhango? b) Magezu muni ma khanyisako a lisima la ku simama ni mitiro ya moya?

¹² Xa wunharu, hi vuna lava va xanisekako lezaku va hatla va tlhelela mitirweni yabye ya moya. Hikuyini zi nga za lisima lezo? Paule i ngalo lava va lamulelwako timhangweni va ta kuceka ku “anzisa nguvu a kubongwa ka Nungungulu.” (2 Kor. 9:12b) Yi ngava yihi a ndlela ya chukwana ya lezaku lava va xanisekako va kombisa kubonga kabye ka Jehova na ku nga hi ku tlhelela hi xihatla mitirweni yabye ya moya hi laha zi kotekako hi kona? (Fil. 1:10) Hi 1945, The Watchtower i te ngalo: “Paule i vumelile . . . lezaku ku mahiwa a hlengo hakuva wu wa vuna . . . a vamakabye va wuKristu a ku humulanyana kukaratekeni kabye kasi va tlhelela hi ntamu ni kutlhatlheka ntirweni wa Jehova wa ku nyika wukustumunyu.” A kungo lego ga ha hi galegi hi nga nago inyamutlha. Loku a vamakabye va tlhelela ntirweni wa kuxumayela, a va tiyisi ntsena a vaakelani vabye va xanisekako kanilezi va tiyisa a wutsumbu gabye kambe. — Gonza 2 Korinte 1:3, 4.

¹³ Wona a magezu yo kari ya lava va vunilweko zikaratweni zabye, va tlhelela wutirelini gabye, va guma va tiyiswa hi ku maha lezo. A makabye wo kari wa xinuna i te: “Zive makatekwa ka ngango wa mina a kuya ntirweni wa simu. Zi hi humutilenyene kukaratekeni ka hina a xikhati lexi hi nga zama ku chavelela vanwani.” A makabye wo kari wa xisati, i te: “A ku veka kupima ka mina mitirweni ya moya zi nzi mahile nzi rivala a wusiwana hi nga hi ka gona. Zi nzi tiyisile.” A munwani makabye wa xisati i te: “Hambu lezi ku nga hi ni zotala hi nga kala hi nga zi tivi ku hi ta zi mahisa kuyini, a ntiro wa simu wu nyikile wurangeli a ngango wa mina. A ku wulawula ni vanwani xungetano hi kurinzela ka hina ka ku hanya misaveni yiswa zi tiyisile a kutsumba ka hina ka lezaku a zilo zontlhe zi ta mahiwa ziswa.”

¹⁴ A kuya mitlhanganweni i wunwani ntiro wa moya lowu a makholwa-kulori ma nga zikaratweni ma faneleko ku hatla ma wu tlhelela hi xihatla hi laha zi kotekako ha kona. Wona lezi zi humeleleko Kiyoko, a nga makabye wa xisati a nga hi kusuhani ni ku maha a 60 wa malembe xikhatini lexo. Anzhako ka ku ngha a luzile zontlhe ka tsunami a sala ni tinguwo leti a nga bohile ni masandalia ntsena, i wa nga zi tivi lezi a nga wa ta hanyisa zona. Zonake a dota go kari gi lo mu byela lezaku va wa ta khoma a mitlhangano ya wuKristu moveni wa gona. Kiyoko i lo guma aku: “Ku wa hi mina, a dota ni sati wa gona, ni munwani makabye wa xisati hi nga khoma mitlhangano moveni. Wu wa nga hi na zotala, kanilezi wu wa hi xihlamaliso, hakuva nzi no tekela ku rivala a tsunami. Nzi rula. A mutlhangano lowuyani wu nzi kombile a ntamu wa wuhlengeli ga wuKristu.” Na a wulawula hi mitlhangano leyi a nga yile ka yona anzhako ka mhango, munwani makabye wa xisati i te: “Yi nzi vunile ku timisela!” — Rom. 1:11, 12; 12:12.

A wutireli ga ku lamulela timhango gi neha mabhinzu ya simasima

15, 16. a) Mabhinzu muni lawa a maKristu ya le Korinte ni ya manwani matshamu ma nga wa ta ma kuma hi ku seketela a ntiro wa ku lamulela timhango? b) Xana inyamutlha, hi vunekisa kuyini na hinawu hi ntiro wa ku lamulela timhango?

¹⁵ Na a wulawula hi wutireli ga ku lamulela timhango, Paule i tlhelile a tlhamusela ka va le Korinte a mabhinzu lawa vona ni manwani maKristu va nga wa ta ma kuma hi ku hlengela ntirweni lowo. I te ngalo: “Va mu kombelela na va lava ku mu wona hi kota ya tipswalo ta hombe ta Nungungulu leti ti nga ka nwina.” (2 Kor. 9:14) Hakunene, a wuhana ga va le Korinte gi wa ta kuca a maKristu ya maJuda lezaku ma khongelela a vamakabye vabye va le Korinte, a ku patsa ni maKristu ma nga hi Vamatiko, ma tlhela ma etisa a liranzo la wona ha vona.

¹⁶ Na a khanyisa a magezu ya Paule xungetano hi mabhinzu ya ntiro wa ku lamulela timhango masikwini ya hina, The Watchtower wa 1 ka Dezembro wa 1945, i te ngalo: “A xikhati lexi a ntlawa wo kari wa vanhu va Nungungulu va ti hendleletileko wu vunako a ntlawa wunwani, hakunene ku tiyiswa nguvu a wumunwe ga vona!” Hi zalezo futsi va zi wonako lava va mahako ntiro wa ku lamulela timhango inyamutlha. A dota go kari gi vuneteleko kuvuneni ka lava va nga talelwe hi mati ya ndambi, gi te ngalo: A ku maha ntiro wa ku lamulela timhango zi nzi tshinetile nguvu ka vamakabye va mina a ku hunza kale. A makabye wo kari wa xisati a bongako nguvu hi xivuno a nyikilweko, i ngalo: “A wumakabye ga hina hi wona a nchumu wa ku wu fananisa khwatsi ni Paradise laha misaveni.” — Gonza Mavingu 17:17.

17. a) Xana a magezu ma kumekako ka Isaya 41:13 ma yelanisa kuyini ni ntiro wa ku lamulela timhango? b) Wula a zikombiso zo kari za lezi a ntiro wa ku lamulela timhango wu dzunzisako zona Jehova ni ku tiyisa a wumunwe ga hina. (Wona a kwadru “Lava va ti nyiketelako misaveni yontlhe va humuta vanwani kuxanisekeni.”)

¹⁷ A xikhati lexi a vatiri va ku lamulela timhango va chikelako lomu ku humeleleko mhango, a vamakabye va hina va xanisekako va ku wona hi mahlo a kutatiseka ka xitsumbiso xa Nungungulu xa lezaku: “Hi mina Jehova Nungungulu wa wena loyi nzi khomako a canja ga wena ga xinene, nziku: U nga chavi, nzi ta ku vunetela.” (Isa. 41:13) Anzhako ka ku huluka ka mhango yo kari, a makabye wa xisati i te ngalo: “A nzi xi tivangi ni xo maha loku nzi wonile a kuhahlulwa, kanilezi Jehova i lo nzi nawulutela woko. A xivuno nzi xi kumileko ka vamakabye a xi tlhamuseleki.” Anzhako ka ku humelelwa hi mhango mugangeni wabye, a madota mambiri ma lo tsala lezi a mabandla yabye ma nga ti zwisa zona: “A kutsekatseka ka misava ku hi vangele hlomulo wa hombe kanilezi hi kumile xivuno xa Jehova hi ku tirisa a vamakabye va hina. Hi wa gonzile lezaku ku na ni ntiro wa ku lamulela timhango, kanilezi zezi hi noya hi ku zi wona hi mahlo.”

WU CICILE A KUNGO GA WUTOMI GAKWE

XANA a ku patseka ntirweni wa ku lamulela timhango zi nga khumbisa kuyini a vaswa? Wona lezi zi humeleleko Peter Johnson, loyi a nga maha ntiro lowo na a hi ni 18 wa malembe. Yena i alakanya lezi: “A ku wona a kubonga ka vamakabye ni litsako la ku nyika zi nzi khumbile nguvu. Zi engetele a kuxuva ka mina ka ku lava ku tirisa a wutomi ga mina ntirweni wa Jehova hi kumbheleleko.” Anzhako ka lezo, Peter i lo sangula ku phayona. I tlhelile a tira Beteli a guma ava xiro xa Kometi ya Xipanze ya ku Aka. Inyamutlha Peter i ngalo: “A xikhati nzi nga maha ntiro wa ku lamulela timhango hi khati go sangula hi 1974, wona wu lo cica a kungo ga wutomi ga mina.” Ahati wena, u muswa ke? Xana wa zi kota ku lanzela a xikombiso xa Peter? Himani a zi tivako, kuzilava a ntiro wa ku lamulela timhango wu nga cica a kungo ga wutomi ga wena ntirweni wa Jehova!

U nga patseka ke?

18. Zini u nga mahako loku u lava ku hlengela ntirweni wa ku lamulela timhango? (Wona kambe a kwadru “Wu cicile a kungo ga wutomi gakwe.”)

¹⁸ Xana wa zi lava ku kuma litsako leli li kumiwako ntirweni wa ku lamulela timhango? Loku zi hi tano, tiva lezaku a vatiri va ku lamulela timhango va hlawuliwa xikari ka vaaki va tiSalawu ta Mufumo. Hikwalaho, byela madota ya wena lezaku u navela ku tatisa a xikombelo xa ntiro wa kuaka. A madota ma ta rumela a xikombelo lexo u xi tatisileko ka Kometi ya Xipanze ya ku Aka. Loku u hanya ka tiko gi nga hava Kometi ya Xipanze ya ku Aka na u zi kota ku ti hendleleta lezaku u maha ntiro lowo a xikhati xontlhe, a madota ma ta rumela a xikombelo xa wena hofiseni ya ravi. A dota go kari gi mahako ntiro wa ku lamulela timhango kusukela kale nguvu gi nyika xialakanyiso lexi: “U ngayi lomu ku nga humelela mhango na u nga se kuma xirambo xa kuta hi ka Kometi ya ku Lamulela Timhango na xi ku leletela kuya kona.” Hi ndlela leyo, a ntiro wa hina wa ku lamulela timhango wu ta famba hi nayo.

19. Xana lava va mahako a ntiro wa ku lamulela timhango va vunisa kuyini a ku kombisa lezaku hi vapizani va lisine va Kristu?

¹⁹ Hakunene, a ntiro wa ku lamulela timhango i ndlela yo hlamalisa ya ku ingisa a xilayelo xa Kristu xa kuva hi “ranzana.” Hi ku kombisa a liranzo lelo, hi komba lezaku hi vapizani va Kristu hakunene. (Joh. 13:34, 35) A hi kutsakisa ka makatekwa lawa hi nga nawo inyamutlha hi kuva ni vatiri vo tala nguvu va kuziranza lava va dzunzako Jehova hi ku lamulela timhango lava va seketelako a Mufumo wa Nungungulu hi kutsumbeka!

a A xipimo lexi xi wulawula hi mitiro ya ku lamulela timhango yi mahelwako makholwa-kulori. Kanilezi, a makhati yo tala, a ntiro wa hina wa vuna ni lava va nga hiko Timboni. — Gal. 6:10.

b Paule i tirisile a gezu di·á·ko·nos na gi wula zilo zo tala kasi ku wula malanza ya wutireli. — 1 Tim.3: 12, NM.

c Wona a nzima “Ajudamos nossa família da fé na Bósnia,” ka A Sentinela ga 1 ka Novembro wa 1994, maphajina 23-27.

LAVA VA TI NYIKETELAKO MISAVENI YONTLHE VA HUMUTA VANWANI KUXANISEKENI

AFRIKA WA LAHA XIKARI NI WA LE MUPELA-GAMBO

Hi 1994, a xipimo xa 800.000 wa vanhu kutani ku hunza va lo dawa le Ruanda hi kota ya xihlawulela xa tixaka. Anzhako ka kuhihiritwa loko, a matiko ya xikari ka Afrika ma lo thapelwa hi gujeguje leyo, lezi zi nga maha lezaku a matshamu ya ku rurela lava va tsutsumako zikarato ma tala nguvu hi vanhu. Kasi ku vuna makholwa-kulobye ma nga hi kuxanisekeni, a Timboni ta Jehova ta le Bélgica, França, ni Suíça ti lo rumela hi xihaha-pfhuka a xipimo xa 300 wa matonelada ya tinguwo, mimuri, matenda, zakuga ni zinwani. Anzhako ka maviki yo kari, a xivuno lexo xi lo chikelela a vamakabye va hina va nga hi kuvumaleni.

Ka tiko ginwani ga Afrika, a ntlawa wa khume ga vadokodela ni vaenfermeiro va nga Timboni va le França vata na va hungula a kuxaniseka ka vamakabye va hina loku ku vangilweko hi yimpi, ndlala ni mababyi. Ka malembe mambiri ntsena lawa ma ha hi ku hunzako, a ntlawa lowo wu tirile a ku hunza 10.000 wa vanhu. A ntiro wabye wu dzunza Jehova ni hlengeletano yakwe. A munwe wa vaenfermeira i wula lezi: “Loku hi chikela ka wutshamu lezaku hi vuna a vamakabye va hina, a vanhu va wula lezi hi xichawo, ‘Lava Timboni ta Jehova. Vata va ta vuna a vamakabye vabye.’” Anzhako ka ku tiriwa hi enfermeira wo kari, a Mboni yo kari ya xisati yi te ngalo: “Nzi bongile, makabye wa mina. Nzi bongile, Jehova!”

A xinwani xikhati, a ntiro wa ku lamulela timhango wu vuna lava va humelelwako hi timhango ta mova. Hi 2012, a mhango yo kari ya mova yi humeleleko le Nigéria yi dele a 13 wa Timboni, tontlhe ta bandla ginwe ga gi tsongwani, ku tlhela ku bayisiwa nguvu a 54 wa tona. A kometi ya ku lamulela timhango yi lo maha malulamiselo ya simasima kasi ku khatalela a munwe ni munwani wa lava va nga welwe hi mhango leyo. A xikhati lexi a mubabyi wo kari wa xisati le xipitali a nga wona lezi a vamakabye va hina va nga bayisilwe va nga kari va vunisiwa zona, i lo fonela a murisi wakwe, aku: “A ku na ni munwe wa le chechini ya hina a ngata a ta nzi kamba. Nghone seno xipitali u ta wona lezi a Timboni ta Jehova ti kombisisako zona liranzo!”

Hambu lezi a vamakabye va hina vo ranzeka va xibandlana lexo va nga lahlekelwa nguvu, va chavelelwe hi mitiro ya liranzo ya makholwa-kulobye. Tlhatakumbiri, anzhako ka ku wona lezi lava va mahako ntiro wa ku lamulela timhango va nga kari va hlayisisa zona hi liranzo a vamakabye va nga hi kuxanisekeni, a vanhu vo tala bandleni lego va lo kuceka ku hiseka nguvu wutirelini. Mahlweni ka mhango leyo, a bandla gi wa hi ni 35 wa vahuweleli. Nzeni ka lembe ginwe, a hlayo leyo yi lo engetela yi maha 60.

AUSTRÁLIA

Hi 2013, a matlhelo yo kari ya le mbhirini ya bimbi le Queensland ma lo gobhoziwa hi ndambi, zonake a 70 wa Timboni ta Jehova ti lahlekelwa hi miti. Mark na Rhonda ni n’wana wabye wa xisati va lo siya a muti wabye va ya rurelwa mutini wa ku rurela lava va welweko hi mhango. A wutshamu lego gi wa tele nguvu hi vanhu. Rhonda i ngalo: “Hi wa tele nguvu laha ka kuza zi nga koteki ku tshama.” A guwa ga zithandamoya lezi zi nga kari zi khapama ni ku suka laha kusuhani gi wa va tinga, a ku patsa ni pfilupfilu ya kuamukeliwa ka lava va nga kari va tsutsuma mhango. Na a karatekile, Rhonda i lo wutisa lezi a nuna wakwe, “Hi ta kuyini?” Mark i lo khongela ka Jehova hi kuhiseka na a kombela xivuno. Rhonda i simama aku: “A xipimo xa 30 wa timeneti anzhako ka lezo, ku lo chikela mova mutini lowo, zonake ku chika vamakabye vanharu. Loku hi kumene navo, vona va te ngalo: ‘Hita hi ta mu teka. Mu ta ya tshama kaya ka makabye.’” Rhonda i engeta lezi: “Za karata ku tlhamusela lezi hi nga ti zwisa zona a xikhati lexo hi kota ya liranzo hi kombiselweko hi hlengeletano ya Jehova.”

Ku humelele a ku hunza 250 wa vanhu va ku ti nyiketela lezaku va ya vuna vamakabye vabye ka mhango leyo. A makabye wo kari a khosaheleko i ngalo: “Ku lo humelela a ntlawa wa Timboni wu ta tira ku khwatsi tisokoti kubasiseni ka muti wa mina. Mina ni sati wa mina hi nga ta tshuka hi rivala lezi va nga hi vunisa zona.”

BRASIL

Hi 2008, a kudheremukela ka zitsunga ni tindambi zi lo kurumeta a xipimo xa 80.000 wa vanhu a ku suka mitini yabye le província ya Santa Catarina. A muhanyi wo kari wa kwalomo i te ngalo a mhango leyo yi wa ku khwatsi i “tsunami ya lidhaka ni tisinya.” A vamakabye vo kari va lo kuma wuchavelo ka Salawu ya Mitlhangano ya Hombe. Márcio, a nga muhlayisi wa Salawu leyo, i bika lezaku a vamakabye lavo “va lo pona ni tinguwo leti va nga bohile ntsena, na ti punyele hi madhaka.” A makabye wo kari wa xisati i ngalo: “A yindlu ya hina yi wile. Zi bayisile nguvu a ku yi wona na yi nwalala hi tisegundo to kari ntsena, kanilezi cima nzi nga ta rivala lezi a vamakabye va hina va nga hi chavelelisa zona. Hi lo kombiselwa liranzo hi tindlela to tala nguvu! A ximaho lexo xi nzi gonzisile a ku nyika nguvu lisima a zilo za moya.”

Salawu ya Mitlhangano le Santa Catarina, Brazil, yi hunzukako yi maha tsinza ga ku lamulela timhango yi teleko hi minyikelo, hi 2009

A kudheremuka ka zitsunga ku hahlulile a miti yontlhe yi nga hi mareveni ya zitsunga lezo kusuhani ni doropa ga Rio de Janeiro. Kasi ku vuna khwatsi lava va nga welwa hi timhango leto to phindaphinda, a vamakabye va lo yimisa a Kometi ya ku Lamulela Timhango yi tirako ka xipanze lexo ntsena. Loku ku kanakanelwa lezaku ku ta dheremuka zitsunga, a tihloli (ti nga vamakabye vo kari va hanyako ka xipanze lexo) ti bikela a kometi. Hi xihatla, ku chikela vatiri hi mikamiyawu yi tsalilweko ku “Timboni ta Jehova — Xivuno ka lava va welweko hi timhango.” A ziro zontlhe za mitlawa leyo yo lamulela timhango yi kwayileko khwatsi zi na ni mitiro yo kongoma. A vatiri lavo va boha tinguwo ti va tivekisako hi kudlunyatekileko lezaku Timboni ta Jehova. Na va tira zinwe ni vamakabye va Tikometi ti Tirisanako ni Zipitali, va vuna vamakabye va bayisilweko. Lava va mahako ntiro wa ku lamulela timhango va neha zakuga, mati, mimuri, tinguwo, ni sabawu. A ku suselela madhaka lomu mitini a zi olovi. Anzhako ka kudheremuka ka ha hi ku humelelako, ku lavekile a 60 wa vatiri lezaku va susa a mune wa mikamiyawu ya madhaka ka muti munwe ntsena!

LOKU KU HUMELELA MHANGO!

A madota ma angula a vahuweleli vontlhe
A madota ma nyika mubiko a mutlhanganyisi wa hubye ya madota
A mutlhanganyisi i rumela mubiko ka vawoneleli va fambafambako ni ka Kometi ya Xipanze ya ku Aka loku yi hi kona tikweni lego. A vamakabye lava va rumela mahungu lawo hofiseni ya ravi
Va nyikiwa zakuga, mati, ko tshama kona, mimuri, ni xivuno xa moya hi xihatla hi laha zi kotekako hi kona
A hofisa ya ravi yi bikela a mhaka leyo ni zilaveko zi nga kona ka Kometi ya Mutlhanganyisi ya Hubye yi Fumako
A Kometi ya ku Lamulela Timhango yi rumela xivuno yi tlhela yi chavelela a vamakabye kuxanisekeni ka vona
Kometi ya Mutlhanganyisi yi khatalela a zilaveko niku, loku zi laveka, yi leletela lezaku ku rumelwa vatiri va manwani matiko kasi ku ya vuna

XINWANI XITIRO KASI KU VUNA LAVA VA MAHAKO A NTIRO WA KU LAMULELA TIMHANGO

Hi Junho wa 2013, ku humesilwe a broxura Jehovah’s Witnesses and Disaster Relief (Timboni ta Jehova ni ku lamulela timhango). Gi mahelwe nguvunguvu a vatiri va mufumo va le Estados Unidos lava va wonelelako a mitiro ya ku lamulela timhango. A broxura lego gi tlhamusela a mitiro yo kari ya ku lamulela timhango leyi hi yi mahileko kusukela xikari ka va 1940. Gi tlhela gi komba a mapa wu kombisako a wuhombe ga ntiro wa hina wa ku lamulela timhango misaveni. A dota go kari legi gi nga ntirweni wa ku lamulela timhango gi ngalo: “A vamakabye lava va tirako ka Tikometi ta ku Lamulela Timhango va tirisa a broxura legi lezaku va bhula ni vatiri va mufumo matshanwini lawa zi olovako ku humelela mhango na yi nga se humelela a mhango ya kona. Loku a vatiri lavo va sina va wu tiva a ntiro wa hina wa ku lamulela timhango, za vevuka a ku va hi nyika malisensa ya ku nghena lomu ku humeleleko mhango.”