“Wona a kusaseka ka Jehova”

A ku welwa hi zikarato zi nga hi siyela zilonza ni tiphanja timbilwini ta hina. Zi ngaga maalakanyo ya hina, zi hi mbheta ntamu zi tlhela zi khumba nguvu lezi hi gi wonisako zona wutomi kusukela kwalaho. Hosi Davida wa Israeli wa kale i kumene ni zikarato zo tala. I yimisanisile kuyini nazo ke? Ka lisimu lo kari li khumbako nguvu mbilu, Davida wa hlamula: “Hi gezu ga mina nzi khongela ka Jehova. Nzi chulula kuvilela ka mina mahlweni kakwe, nzi mu bikela hlomulo wa mina. Laha a moya wa mina wu nga ni gome nzeni ka mina, hi wena loyi u tivako ndlela ya mina.” Hakunene, Davida i lo khongela ka Nungungulu hi kutikoramisa a kombela xivuno. — Tis. 142:1-3.

Ka lisimu linwani, Davida i lo yimbelela aku: “Xilo xinwe nzi kombelako ka Jehova, nzi ta lava lexo: Hi lezaku nzi tshama ndlwini ya Jehova a masiku wontlhe ya kuhanya ka mina, kasi nza wona a kusaseka ka Jehova, nzi languta tempeli yakwe.” (Tis. 27:4) Davida i wa nga hi muLevi, kanilezi mu alakanyele na a yimile hi le handle ka wutshamu go basa kusuhani nguvu ni tsinza wa wukhozeli gi basileko. A mbilu ya Davida yi tala hi kubonga laha ka kuza a lava ku tshama masiku wontlhe ya kuhanya kakwe ndlwini ya Nungungulu kasi a “wona a kusaseka ka Jehova.”

A gezu “kusaseka” gi yelana ni tshamela ga “ku vumela kutani ku xalalisa maalakanyweni ni hi tlhelo ga kutizwa.” Xontlhe xikhati Davida i wa nyika nguvu lisima ni ku tsakela a lulamiselo ga Nungungulu ga ku khozela. Hi wa ta maha khwatsi hi ku ti wutisa lezi: ‘Xana minawu nzi ti zwisa lezi Davida a nga ti zwisa zona?’

KOMBISA KUBONGA KA LULAMISELO GA NUNGUNGULU

Masikwini ya hina, a lulamiselo ga Jehova ga kuva hi tshinela ka yena a gi ka wutshamu ga xiviri. Wutshanwini ga lezo, i tempeli ya hombe ya moya ya Nungungulu — ku nga lulamiselo go basa ga wukhozeli ga lisine.a Loku hi kombisa kubonga ka lulamiselo legi, hinawu hi ta ku “wona a kusaseka ka Jehova.”

Ehleketa hi alati ga suku ga ku hisela miphahlo legi gi nga hi laha nyangweni ya tabernakeli. (Ekso. 38:1, 2; 40:6) A alati lego gi wa komba a kutiyimisela ka Nungungulu ka ku amukela wutomi ga Jesu ga xiviri kota muphahlo. (Maheb. 10:5-10) Hi nga alakanya a ku zi wula yini ka hina! Mupostoli Paule i lo tsala aku: “Hi tlhanganyisilwe na Nungungulu hi kota ya kufa ka N’wana wakwe, na hi wa ha hi valala.” (Rom. 5:10) Loku hi kombisa kukholwa nkhateni wa Jesu wu halatilweko, ha zi kota ku amukeleka ni kuva ni kutsumba, zi nga zilo zi kumiwako hi kuva vanghana va Nungungulu. Kota mbhanzu wa lezo, hi ti buza hi kuva vanghana va Jehova va hombe. — Tis. 25:14.

Hi kota ya lezi a ‘zionho za hina zi vinyetelweko,’ hi ti buza hi ‘zikhati za kuhumutwa hi le ka Jehova.’ (Miti. 3:19) A xiyimo xa hina xa fana ni xa xibochwa lexi xi ti solako ka mitiro ya xona ya kale zonake xi cica mahanyela ya xona na xa ha rinzela ku dawa. Laha a wonako lezo, a mulamuli wa tipswalo i susumeteka ku vinyetela zontlhe zi tsalilweko xungetano hi xibochwa lexi — a basisa a nanzu wa xona kasi xi nga dawi. Handle ko kanakana a xibochwa lexo xo hefu! A ku fana ni mulamuli loye, Jehova i kombisa tipswalo ka vanhu lava va ti solako zonake a va basisa a nanzu kasi va ngafi.

KUMA LITSAKO WUKHOZELINI GA LISINE

Ka zilo zo tsalangana zi yelanako ni wukhozeli ga lisine lezi Davida a nga zi wona ndlwini ya Jehova, ku wa hi ni zidlemo za vaIsraeli-kulobye zi nga tsombene, kugonziwa ni kutlhamuselwa ka Nayo mahlweni ka vanhu, kuhiswa ka libani, ni ntiro wo basa wu nga mahiwa hi vapristi ni vaLevi. (Ekso. 30:34-38; Mitse. 3:5-8; Deut. 31:9-12) A zipanze lezi za wukhozeli ga lisine le Israeli wa kale zi na ni lezi zi fananako nazo masikwini ya hina.

A ku fana ni kale, masikwini ya hinawu ‘za tsakisa nguvu loku a vamakabye va hanya khatiginwe hi kuzwanana’! (Tis. 133:1) Ku na ni kuanza ka hombe ka ntsengo wa “vamakabye” va hina misaveni yontlhe. (1 Ped. 2:17) A Mhaka ya Nungungulu ya gonziwa ni ku tlhamuselwa mitlhanganweni ya hina. Hi ku tirisa a hlengeletano yakwe, Jehova i nyikela gonziselelo ya yi nene nguvu. Ku na ni zakuga zo tala za moya zi tako ka mabhuku kasi ku zi tirisa ka xigonzo xa munhu wutsumbu ni xa ngango. A xiro xo kari xa Hubye yi Fumako xi wulile lezi: “A ku ehleketa hi Mhaka ya Jehova, ku alakanyela hi lezi yi wulako, ni ku hlota wutlhari ni kupimisisa zi nzi vunile ku hlengeletela titshomba to tala ta moya ni kuva ni litsako.” Kunene, a ‘wutivi gi tsakisa muhefemulo wa hina.’ — Mav. 2:10.

Inyamutlha, a mikhongelo yo amukeleka ya malanza ya Nungungulu yiya ka Jehova siku ni siku. Ka Jehova, a mikhongelo leyo yi fana ni masema yo nuhela ya libani. (Tis. 141:2) A zo ku tangalisa a muhefemulo wa hina a ku tiva lezaku Jehova Nungungulu wa tsaka nguvu a xikhati lexi hi tshinelako kakwe hi mukhongelo wo ti koramisa!

Mosi i lo khongela aku: “Ngha a tipswalo ta Jehova, Nungungulu wa hina, tiva hehla ka hina! Hi tiyisele a ntiro wa mandla ya hina.” (Tis. 90:17) A xikhati lexi hi tatisako a wutireli ga hina hi kuhiseka, Jehova wa katekisa ntiro wa hina. (Mav. 10:22) Za koteka ku ngha hi vunile vokari a ku gonza lisine. Kuzilava, hi kari hi timisela wutirelini kuringana malembe yo tala hambu lezi a vokari va nga vumeliko, hi tako na hi babya, ku bayiseka, kutani ku xaniswa. (1 Tes. 2:2) Hambulezo, xana a hi ku woni “a kusaseka ka Jehova” ni ku tiva lezaku a Dadani wa hina wa le tilweni wa xalaliswa hi kutikarata ka hina ke?

Davida i lo yimbelela aku: “Jehova hi xiavelo xa mina ni gombe ga mina; hi wena u gongolako a tshomba ya mina. Nzi panzelwe xiavelo matshanwini ma nzi tsakisako.” (Tis. 16:5, 6) Davida i wa bonga “xiavelo” xakwe, ku nga kuzwanana ku nene na Jehova ni lungelo ga ku mu tirela. A ku fana na Davida, hi nga tshuka hi kumana ni zikarato, kanilezi hi na ni makatekwa yo tala ya moya! Hikwalaho, ngha hiya mahlweni hi kuma litsako wukhozelini ga lisine, hi tlhela hi tsakiswa hi tempeli ya Jehova ya moya xontlhe xikhati.