“Ngha Kuwulawula Ka Nwina . . . Ku Lungilwe Hi Munyu” Xontlhe Xikhati
1. Zi wula yini a ku ‘lunga kuwulawula ka hina hi munyu’?
1 “Ngha kuwulawula ka nwina ku hi ni tipswalo xontlhe xikhati, na ku lungilwe hi munyu, lezaku mu fela ku tiva lezi mu ta nga hlamulisa zona ka munwe ni munwani.” (Kol. 4:6) A ku lunga kuwulawula ka hina hi munyu zi wula ku hlawula khwatsi magezu ni ku wulawula hi ndlela leyi yi ta nga maha lezaku a mitlhamuselo ya hina yi nanziha ka loyi hi wulawulako naye. A ku maha lezo a xikhati lexi hi hlengelako wutirelini za lisima nguvu.
2. Xana Jesu i zi kotisile kuyini ku xumayela a wasati wa muSamaria?
2 Xikombiso Xa Jesu: A xikhati lexi a nga kari a humula kusuhani ni hlowo, Jesu i sangulile hi yena a wulawula ni wasati wa muSamaria loyi a ngata a ku takha mati. Zikhati zo tala nzeni ka bhulo, a wasati loye i wa wula zilo lezi zi nga kombisa a livengo la kale leli li nga hi kona xikari ka vaJuda ni vaSamaria. Yena kambe i kombisile lezaku i wa kholwa ku a vaSamaria va wa hi pswalo wa Jakobe, hambu lezi a vaJuda va nga kholwa nguvu lezaku a vaSamaria va wa huma ka vamatiko. Wutshanwini ga ku kaneta mitlhamuselo ya wasati loye, Jesu i mahile lezaku a bhulo gi tsakisa. Kota wuyelo ga lezo, i zi kotile ku nyika wukustumunyu legi gi vunileko wasati loye zinwe ni vanhu va doropa lego. — Joh. 4:7-15, 39.
3. Xana hi nga xi lanzelisa kuyini a xikombiso xa Jesu loku hihi wutirelini?
3 A xikhati lexi hi xumayelako hi fanele ku tshama na hi alakanya a kungo ga hina — ku huwelela a “mahungu yo saseka” ya zilo zo saseka. (Rom. 10:15) Hi lava ku byela nwinyi wa muti a timhaka to tsakisa ni ti akako ta lomu ka Biblia, na ku nga hi ku mu maha a alakanya lezaku hi yele ku ya kaneta lezi a zi kholwako. Loku a kombisa mawonela yo biha, a hlamulo wa hina a wu faneli kuva wo phikiza. Xana ku na ni zo kari xikari ka lezi a wulileko lezi hi nga vumelelanako naye kutani lezi hi nga zi tirisako kota xiseketelo xa ku mu bonga na zi huma mbilwini? Kuzilava hi nga ha nghenisa mutsalo hi ku wula lezi, “Xana wa tshuka uzwa a mhaka yo fana ni leyi?”
4. Zini lezi hi faneleko ku maha loku a nwinyi wa muti a hi wa tihanyi?
4 Ahati loku a nwinyi wa muti a hi wa tihanyi kutani loku zi woneka kubaseni lezaku i lava ku kanetisana na hina ntsena? Hi fanele ku simama hi kombisa wunene ni kurula hi magezu ni zimaho. (2 Tim. 2:24, 25) Loku a munhu loye a nga ma tsakeli a mahungu ya Mufumo, i chukwana ku mu salisa hi xichawo. — Mat. 7:6; 10:11-14.
5. Mabhinzu muni lawa a makabye wo kari wa xisati a ma kumileko hi kota ya mahlamulela yakwe ya ma nene?
5 Mabhinzu: Loku a makabye wo kari wa xisati a zamile ku xumayela muakelani wakwe wa xisati, a wasati loye i lo vindluka hi zanga, a kanyuluka a rukatela. Hi ndlela yi nene, a makabye wa hina wa xisati i te ngalo: “Nzi rivalele hi lezi u ti zwisako lezo. Sala khwatsi.” Hi nzhako ka maviki mambiri, a wasati loye i yile kaya ka makabye wa hina wa xisati, a ya kombela rivalelo hi kota ya lezi a zi mahileko, a tlhela a kombisa ku ti yimisela kuzwa lezi a makabye wa xisati a nga lava ku mu byela. A hlamulo wa wu nene zikhati zo tala wu kuma mabhinzu! — Mav. 15:1; 25:15.
6. Hikuyini zihi za lisima a kuva hi tirisa magezu ma lungilweko a xikhati lexi hi nga wutirelini?
6 Ti karatele ku tirisa magezu ma lungilweko a xikhati lexi u huwelelako mahungu yo saseka. Hambu loku a nwinyi wa muti a nga lavi ku ingisela, kuzilava i ta ti yimisela ku ingisela a khati ginwani legi a Timboni ta Jehova ti ta ngaya mutini wakwe.