Papilo Ga Hubye Yi Fumako

Timboni-kulori ta Jehova ti Ranzekako:

Mupostoli Paule i lonzowotile a xikhati xontlhe kasi ku kombisa a liranzo ni kubonga kakwe ka makholwa-kulobye. Ka maKristu ya le Roma, i lo tsala lezi: “Nza bonga Nungungulu wa mina ha Jesu Kristu hi kota ya nwina nwentlhe, hi lezi a kukholwa ka nwina ka zwakala misaveni yontlhe.” (Rom. 1:8) Ina, Mufunweni wontlhe wa Roma, a maKristu lawo ya zana ga malembe go sangula ma wa tiviwa hi kukholwa kabye ko tiya, zinwe ni kuchivirika kabye ntirweni wa kuxumayela. (1 Tes. 1:8) A zi hlamalisi lezi Paule a nga va ranzisa lezo a vamakabye vakwe!

A ku fana na Paule, ha bonga Jehova xontlhe xikhati lexi hi alakanyako nwina. Ha mu ranza nguvu nwina nwentlhe! Niku tiyisekani lezaku Jehova wa ranza a munwe ni munwani wa nwina. A vo kari xikari ka nwina va yimisana ni kukanetwa ko tshisa, kanilezi mu ya mahlweni mu xumayela. Hakunene a kutiya ni kungachavi nchumu loku mu ku kombisako ku maha a mbilu ya Jehova yi tsaka! — Mav. 27:11.

A Anuário gi nyika wukustumunyu go tala ga lezaku Hosi Jesu Kristu i “huma kota muhluli a yako kuhluleni” ni lezaku a ku na tlhari ni ginwe gi fulelweko ku vukela a valanzeli va Kristu gi ta nga humelela. — Kuv. 6:2; Isa. 54:17.

Ka maKristu ya le Filipi, Paule i lo tsala lezi: “Nza bonga Nungungulu . . . hi kota ya kuhlengela ka nwina ntirweni wa ku fambisa ivangeli.” (Fil. 1:3-5) Hina ziro za Hubye yi Fumako hi ti zwisa zalezowo ha nwina. Nzeni ka lembe ga ntiro ga 2007, a 6.691.790 wa vahuweleli va mbhetile a tsengo wa 1.431.761.554 wa tihora na va xumayela a mahungu yo saseka ka 236 wa matiko misaveni yontlhe. A hi kukula ka mizamo leyi mu yi mahako kuhangalaseni ka mahungu yo saseka! Alakanya hi mazana ya makume ya mazana ya vanhu lava va vunilweko hi mizamo ya hina hontlhe, zontlhe lezo zi yisa wudumo ka Jehova!

Ka khati ginwani, Paule i kombile lezaku i wa va zwela nguvu wusiwana a vamakabye vakwe. I lo tsalela lava va nga hi le Tesalonika aku: ‘Xontlhe xikhati hi alakanya a kutimisela ka nwina kutsumbeni ka Hosi ya hina Jesu Kristu, a mahlweni ka Nungungulu a Dadani wa hina.’ (1 Tes. 1:2, 3) Lisine lezaku a hi masiku wontlhe a kuhanya ku hi nanzihelako. Ka humelela zikarato, kanilezi a xa lisima ku timisela. Zikarato muni lezi wena wutsumbu u yimisanako nazo? Xana wa mbhetiwa ntamu hi wubabyi ga hombe legi gi ku tsanzekisako nguvu a ku maha lezi u zi lavako ntirweni wa Jehova? Xana a munghana wa wena wa wukati loyi u hanyileko naye malembe yo tala i hlulilwe hi nala loyi wa hombe a nga eneliswiko, a nga Xeole? (Mav. 30:15, 16) Xana za ku karatela a ku kuma munghana wa ku tekana naye loyi a ranzako Jehova a ku fana na wena kuveni lezo u khomelela hi kutsumbeka ka nayo wa lomu Mitsalweni wa ku chada Hosini ntsena? (1 Kor. 7:39) Xana u tira hi kutikarata kasi ku wundla vana va wena nzeni ka ziyimo zo nonoha nguvu hi tlhelo ga timali? Na ku nga khataliseki a xiyimo xa wena, loku u rangisa a zilaveko za Mufumo, wa zi kota ku tiyiseka lezaku Jehova a nga ta ‘rivala a mitiro ya wena ni liranzo leli u li kombisako vitweni gakwe.’ Vamakabye, mu nga “karali a ku maha lezi zi nene”! — Maheb. 6:10; Gal. 6:9.

Xini xi ta nga mu vuna lezaku mu timisela? A ku fana ni vaTesalonika, ‘ku tsumba ka Hosi ya hina Jesu Kristu.’ Hi xigelo xi nene, Paule hi nzhako ka xikhati i fananisile a “kutsumba ka kuhanyiswa” ni ndlhondlha leyi yi zi kotako ku vikela a muKristu ka maalakanyo ya hava ni kukanakana ko kala ku nga hunzi. — 1 Tes. 5:8.

Hakunene, hi ku timisela na mu tsakile, mu nyika hlamulo ka ziruko za Satani mhakeni ya hombe ka tontlhe ya wuhosi ga wuako gontlhe. Satani i wula lezaku a malanza ya Nungungulu ma na ni makangwa ya mabeleko niku hambu lezi ma nga ha tirelako Nungungulu hi xikhati xo kari, ma ta rereka kukhozeleni ka wona loku a minzhingo yiya mahlweni kutani loku a mafambisela ya zilo ma teka xikhati xo leha a ku hunza lexi ma nga xi rinzele. Mu na ni lungelo ga ku paluxa Diyabu kota muhembi wo sangula khwatsi hi lezi a nga zona! A siku ni siku ga kuhanya ka nwina gi mu tshineta kusuhani ni kutatiseka ka kutsumba ka nwina.

Khwatsi hi lezi Paule a lonzowotileko a xikhati lezaku a dzunza vamakabye vakwe hi kota ya kukholwa kabye ko tiya ni ko hanya, kuhlengela kabye hi matsenya ntirweni wa kuxumayela, ni kutimisela kabye, hi tsakela ku tirisa a xikhati lexi kasi ku mu dzunza ni ku tiyisa a liranzo la hina ha nwina. Simamani ntirweni wu nene!

Ngha a lembe gi tako gi tatiswa hi makatekwa yo tala ya moya. Hi mu xuvela zontlhe za zi nene, hi hina

Vamakabye va nwina,

Hubye yi Fumako ya Timboni ta Jehova