‘Maha Zontlhe Hi Kota Ya Ivangeli’
1. Zini lezi a muxumayeli wa Mufumo a ti yimiseleko ku mahela vanwani, niku hikuyini?
1 Mupostoli Paule i wa ti wona na a kurumeteka a ku kanela ivangeli ka vanwani. (1 Kor. 9:16, 19, 23) Hi kufanana, a kukhatala ka hina hi kutshamiseka ka vanhu ka pinzukelwa ka hi kuca a ku ti karatela nguvu a ku va byela mahungu yo saseka.
2. A xikhati lexi hi xumayelako, kutizwananisa muni ni xiyimo loku hi ti yimiseleko kuva nako, niku hikuyini?
2 Xumayela Lomu A Vanhu Va Kumekelako Kona Hi Xikhati Lexo: A mukukuti mu nene a nga hoxeli a mika kutani likoka lakwe lomu a ku alakanyelako ntsena, kanilezi i hoxela lomu zi wonekisako ku khwatsi a tinjhanjhi ti kumekela kona hi xikhati lexo. Hinawu, kota “vakukuti va vanhu,” hi nga hava ni xilaveko xa ku ti zwananisa ni xiyimo kasi ku kuma vanhu xipanzeni xa hina zonake hi kuma kutsaka ka hombe ntirweni lowu wo hlawuleka wa ku kukuta a “tixaka tontlhe” ta tinjhanjhi. (Mat. 4:19; 13:47) Xana hi nga tirisa a tihora to sangula ta ni gambo kasi ku enzela vanhu mitini yabye kutani a tihora to sangula ta ni mixo kasi ku nyika wukustumunyu maruweni? A kungo ga Paule gi wa hi ku ‘nyika wukustumunyu go mbhelela hi ivangeli,’ niku i lonzowotile a zikhati zi faneleko kasi ku maha lezo. — Miti. 17:17; 20:20, 24.
3, 4. A xikhati lexi hi nga wutirelini, hi nga xi zwananisisa kuyini a xingheniso xa hina, niku hi wahi a mabhinzu ya kona?
3 Zwananisa A Xingheniso Xa Wena Ni Xilaveko: A vakukuti va tala ku cicacica a tipulani tabye kasi ku phasa a lixaka lo kari la tinjhanjhi. Hi nga xumayelisa kuyini a mahungu yo saseka ya Mufumo hi ndlela yi tsakisako vanhu lomu xipanzeni xa hina? Hi wukheta, hi fanele ku maha xingheniso xa mhaka leyi yi karatako a wunyingi ga vanhu zonake hi ingisela khwatsi a mihlamulo yabye xungetano hi mhaka leyo. (Jak. 1:19) Hi nga ha maha xiwutiso xi lavako mawonela kasi va wula lezi va zi alakanyako. (Mav. 20:5) Hi ndlela leyi, hi ta zi kota a ku zwananisa a xingheniso xa hina xa mahungu yo saseka kasi ku khumba a wutomi gabye wutsumbu. Paule i lo ti maha “zontlhe ka vanhu vontlhe.” (1 Kor. 9:22) A kuva vanhu vo olova za lisima kasi ku khumba timbilu ta vanhu.
4 A hi kutsakisa ka zona a ku xumayela vanhu a “mahungu yo saseka yo tsakisa”! (Isa. 52:7) Ngha hontlheni hi ‘maha zontlhe hi kota ya ivangeli’ kasi hi chikelela a vanhu vo tala hi laha zi kotekako hi kona. — 1 Kor. 9:23.