Kombisa Kubonga Hi Xinyikiwo Xa Nungungulu Xa Hombe Ka Zontlhe
1. Hikuyini hi nga ni xigelo xa hombe xa ku bonga Jehova?
1 Xikari ka ‘zinyikiwo zo tala zo saseka’ za Jehova, a nzhiho lowu wu nyikilweko hi N’wana wakwe wo ranzeka hi wona wu nga wa hombe ka zontlhe. (Jak. 1:17) Wona wu neha a makatekwa yo tala, a ku patsa ni kutsetselelwa ka zionho za hina. (Efe. 1:7) Hi kota ya lezo, hi na ni kubonga xikhati xontlhe. Ka nguva ya Xialakanyiso, hi ti nyika xikhati xa ku ehleketa hi xinyikiwo lexi xa lisima.
2. Xana hi nga vangisa kuyini a ku tsakela a nzhiho mingangweni ya hina ni ka hina wutsumbu?
2 Vanga Kutsakela: Kasi ku vanga kutsakela ngangweni wa wena, hikuyini u nga tirisiko a xikhati xa Wukhozeli ga Ngango kasi ku vuxeta a mahungu lawa ma wulawulako hi nzhiho, ka maviki ya mahlweni ka Xialakanyiso xa 30 ka Março? Ahandle ka lezo, lanzelani a kugonza ka Biblia ko hlawuleka ka nguva ya Xialakanyiso siku ni siku kota ngango. Ehleketa hi lezi a nzhiho wu ku vunisako zona ni lezi wu khumbisako zona a mawonela ya wena ha Jehova, wena wutsumbu, vanwani, ni wumanziko. U ta zi wona na zi hi chukwana kambe a ku vuxeta a tisimu timbiri ta tiswa leti ti to tirisiwa Xialakanyisweni, ti nga tisimu 8 ni 109. — Tis. 77:12.
3. Xana hi nga kombisisa kuyini a kubonga ka hina?
3 Makombisela Ya Kubonga: A ku tsakela a nzhiho ku hi kuca a ku bhulela vanwani hi Jehova ni liranzo lakwe la hombe hi lezi a rumeleko a N’wana wakwe. (Tis. 145:2-7) Nzeni ka Março, Abril, ni Maio, a mingango yo kari yi kombisa a kubonga ka yona hi ku maha malulamiselo ya lezaku hi wutsongwani ga kona a xiro xinwe xa ngango xiva phayona go vunetela. Loku lezo zi nga koteki, xana a wu nge ti laveli xikhati xa ku engetela a kuhlengela ka wena wutirelini? (Efe. 5:16) A kubonga ku ta hi kuca kambe lezaku hi vuna vanwani a kuva kona Xialakanyisweni zinwe na hina. (Kuv. 22:17) Sangula ku maha a xaxameto wa lava u va enzelako, zigonzani za Biblia, maxaka, vatiri-kuloni, ni vaakelani lava u to va ramba, u tlhela u hlengela nguvu tsimeni go hlawuleka ga ku ramba vanhu lezaku vata Xialakanyisweni.
4. Xana hi nga yi tirisisa kuyini a nguva ya Xialakanyiso hi ndlela yi nene?
4 A nguva ya Xialakanyiso yi vulula tindlela tiswa to komba Jehova lezi hi xi bongisako zona a xinyikiwo xakwe ka vanhu. Ngha hi tirisa a xikhati lexi lezaku hi vanga kutsakela ni ku kombisa kubonga hi kota ya nzhiho ni tontlhe “titshomba ta Kristu leti ti nga kambiwiko.” — Efe. 3:8.