Ngha U Kholwisa Kugonziseni Ka Wena
1. Xana a ku tirisa a Mhaka ya Nungungulu hi kuhumelela wutirelini a kutala ka zikhati ku patsa yini?
1 A vatireli vo humelela vo fana na mupostoli Paule, va zi tiva lezaku a ku tirisa khwatsi a mhaka ya zinene ku patsa zo tala a ku hunza ku tshaha Mitsalo yo Basa ntsena. (2 Tim. 2:15) A xikhati lexi hi tirisako a Mhaka ya Nungungulu xana hi nga kholwisisa kuyini kugonziseni ka hina? — Miti. 28:23.
2. Hi nga va vunisa kuyini a vanhu lezaku va kombisa xichawo xa hombe ka Mhaka ya Nungungulu?
2 Tsika A Mhaka Ya Nungungulu Yi Wulawula: A ku sangula, yisa kupima ka Biblia hi ndlela yi ta nga maha lezaku a vaingiseli va kombisa xichawo ka wutlhari ga Nungungulu legi gi nga lomo. A kutsumba ka hina Mhakeni ya Nungungulu ku nga kuca a vaingiseli va hina lezaku va chela nguvu kota a xikhati lexi ku gonziwako a mutsalo. (Maheb. 4:12) Ha zi kota ku wula lezi: “Za nzi vuna a ku tiva maalakanyo ya Nungungulu xungetano hi mhaka leyi. Wona lezi a Mhaka yakwe yi zi wulako.” Xontlhe xikhati zi kotekako, tsika a Mhaka ya Nungungulu yi wulawula hi ku yi gonza hi kukongoma.
3. Anzhako ka ku gonza mutsalo, xana hi nga maha yini kasi ku vuna a muingiseli wa hina lezaku a zwisisa a mongo wa mhaka?
3 Xa wumbiri, tlhamusela a mutsalo lowu wu tirisilweko. A vanhu vo tala za va karatela a ku zwisisa a vesi ka khati go sangula gi gonziwako. A kutala ka zikhati ku laveka tlhamuselo kasi ku komba lezi a mutsalo wu yelanisako zona ni mhaka. (Luka 24:26, 27) Yisa kupima ka timhaka-tshinya. Zi ngava chukwana a ku maha xiwutiso kasi u tiyiseka lezaku a mhaka leyo i yi zwisisile hi kudlunyatekileko ke. — Mav. 20:5; Miti. 8:30.
4. Hi gihi a zambo go gumesa gi lavekako lezaku hi kholwisa kugonziseni ka hina?
4 Wulawulisanani Hi Mitsalo: Xa wunharu, ti karatele a ku khumba maalakanyo ni mbilu. Vuna a nwinyi wa muti a ku wona lezi a vesi gi tirisako zona ka yena wutsumbu. A ku wulawulisana hi Mitsalo zi nga kuca munhu lezaku a cica a maalakanyo yakwe. (Miti. 17:2-4; 19:8) Hi xikombiso, anzhako ka ku gonza Tisimu 83:18 hi nga ha bhulisana hi mhaka ya lezaku a ku tiva vito ga munhu za lisima kasi hiva ni kuzwanana naye. Zonake u nga ha wutisa lezi, “Xana a ku tiva a vito ga Nungungulu zi wa nga ta maha lezaku a mikhongelo ya wena yiva ni xigelo nguvu ke?” A ku zwananisa a mutsalo ni wutomi ga nwinyi wa muti hi ndlela leyo zi komba a lisima la mutsalo lowo ka yena wutsumbu. A kugonzisa a Mhaka ya Nungungulu hi ndlela yo kholwisa yo kota leyo zi koka vanhu va timbilu ti nene lezaku va ta khozela Nungungulu wa zinene ni a hanyako, Jehova. — Jer. 10:10.