“A Mhaka ya Nungungulu . . . yi na ni ntamu”

“A mhaka ya Nungungulu ya hanya, yi na ni ntamu.” — MAHEBERU 4:12.

1. Cini ci ku kholwisako lezvaku a Mhaka ya Nungungulu yi na ni ntamu? (Wona mufota laha hehla.)

A VANHU va Jehovha va kholwa lezvaku a mhaka yakwe, ku nga mahungu lawa a byelako vanhu, “ya hanya” niku “yi na ni ntamu.” (Maheberu 4:12) Ha wu wona a ntamu wa Bhibhiliya wutomini ga hina ni ga van’wani. Na va nga se maha Timboni, a vokari va wa hi makhamba, vadzahi va timbangi, kutani zvibhayi. A van’wani va wa hi vanhu va nduma kutani vanyatimali, kanilezvi va wa ti wona na va hi phanga wutomini gabye. (Mutshawuteli 2:3-11) Leci ci tsakisako hi ku a kutala ka vanhu lavo va nga ku khwatsi va lahlekile wutomini va kumile ndlela ya wutomi hi kota ya ntamu wa Mhaka ya Nungungulu. Lomu ka Murinzeli, hi kuma matshango yo tala yo tsakisa ka tindzima ti nge: “A Bhibhiliya ga cica a wutomi ga vanhu.” Kanilezvi, hambu lava makunu va nga maKristu, va fanele ku simama va tiyisa wunghana gabye na Jehovha hi ku vhuniwa hi Bhibhiliya.

2. A ntamu wa Mhaka ya Nungungulu wu khumbisile kuyini vanhu ka zana ga malembe go sangula?

² A zvi hlamalisi a ku wona vanhu vo tala na va cica nguvhu a cikhati va gondzako lisine. A vamakabye va hina va zana ga malembe go sangula, lava va nga hi ni kutsumba ko ya hanya tilweni, vonawu va cicile zva hombe. (Gondza 1 Va Le Korinte 6:9-11.) A cikhati leci Pawule a nga wulawula hi lava va to kala kuga tshomba ya Mufumo wa Nungungulu, i tlhelile aku: ‘A van’wani va n’wina va wa hi vakunghaho.’ A Mhaka ya Nungungulu ni moya wakwe wa ku basa zvi va vhunile ku cica wutomi gabye. Kanilezvi hambu andzhako ka kuva va mahile maKristu, a vokari vabye va mahile zviwonho zva hombe zvi nga khumba a wunghana gabye na Jehovha. Hi cikombiso, a Bhibhiliya gi wulawula hi makabye wo kari a totilweko a nga kala a susiwa bandleni. Kanilezvi hi kufamba ka cikhati, i cicile va tlhela va mu amukela kambe Bandleni ga wuKristu. (1 Va Le Korinte 5:1-5; 22; Va Le Korinte 2:5-8) A zvo ku tiyisa hlana a ku tiva lezvaku a vamakabye va hina va zvi kotile ku cica zva hombe hi ku vhuniwa hi Mhaka ya Nungungulu.

3. Zvini hi to wulawula hi zvona ka ndzima leyi?

³ Jehovha i hi nyikile Mhaka yakwe na a zvi tiva lezvaku yi na ni ntamu wa hombe. Hikwalaho hi fanele ku yi tirisa khwatsi. (2 Timote 2:15) Ka ndzima leyi hi ta wulawula hi lezvi hi nga tirisisako zvona a ntamu wa Bhibhiliya 1) wutomini ga hina, 2) ntirweni wo chumayela, ni 3) cikhati hi gondzisako laha ciluvelweni. Lezvi hi to zvi gondza zvi ta hi vhuna ku randza ni ku bonga a Papayi wa hina wa le tilweni, loyi a hi gondzisako lezvi zvi hi vhunako. — Isaya 48:17.

WUTOMINI GA HINA

4. a) Zvini hi nga mahako kasi hi khumbiwa hi Mhaka ya Nungungulu? b) U ci kumisa kuyini cikhati ca ku lera Bhibhiliya?

⁴ Kasi a Mhaka ya Nungungulu yi khumba wutomi ga hina, hi fanele ku ti karatela ku yi lera siku ni siku. (Joxua 1:8) A kutala ka hina hi tshama hi khomekile. Hambulezvo, hi nga tsiki nchumu wu hi vhalela ku lera Bhibhiliya, ne hambu mitiro ya lisima. (Gondza Va Le Efesusi 5:15, 16.) Hi nga ha kuma cikhati leco ni mixo, ni mumu, kutani ni wusiku. Hi lava ku fana ni mutsali wa tisimu loyi a ngaku: ‘E, ndzi wu randzisa kuyini a nayo wa wena! Ndzi wu alakanya gontlhe siku.’ — Lisimu 119:97.

Hi nga tsiki nchumu wu hi vhalela ku lera Bhibhiliya, ne hambu mitiro ya lisima

5, 6. a) Hikuyini hi faneleko ku ehleketa hi lezvi hi lerako? b) Hi nga ehleketisa kuyini hi ndlela ya ku hi vhuneka? c) A ku lera Bhibhiliya u tlhela u ehleketa hi lezvi u lerako zvi ku vhunisa kuyini?

⁵ Kanilezvi, a ku lera basi a zvi eneli. Hi fanele ku tlhela hi ehleketa hi lezvi hi lerako. (Lisimu 1:1-3) Loku hi maha lezvo hi kona hi to zvi kota ku tirisa wutlhari ga Bhibhiliya wutomini ga hina. Hikwalaho kani hi lera a Bhibhiliya ga maphepha kani hi lera lomu ka muchini, hi lava ku tsika Mhaka ya Nungungulu yi hi cica yi tlhela yi hi kuca.

Mboni ya Jehovha yi ti lerelako Bhibhiliya

⁶ Hi nga ehleketisa kuyini hi ndlela ya ku hi vhuneka? A cikhati hi lerako Bhibhiliya, hi fanele kuta na hi nyima hi ti wutisa ku: ‘Lezvi zvi ndzi byela yini hi Jehovha? Ndzi sina ndzi zvi tirisa wutomini ga mina? Zvini ndza ha faneleko ku zvi cica?’ Loku hi ehleketa hi Mhaka ya Nungungulu hi tlhela hi khongelela lezvi hi gondzako, hi ta xuva nguvhu ku hanya hi zvona. Hi ndlela leyo, hi ta wona a ntamu wa Bhibhiliya wutomini ga hina. — 2 Va Le Korinte 10:4, 5.

NTIRWENI WO CHUMAYELA

7. Hikuyini hi faneleko ku tirisa khwatsi a Mhaka ya Nungungulu ntirweni wo chumayela?

⁷ Zva lisima ku hi tirisa nguvhu a Mhaka ya Nungungulu a cikhati hi chumayelako ni ku gondzisa. A makabye wo kari i te: “Loku u wo chumayela na Jehovha hi muti ni muti, u wa ta wulawula wece kutani u wa ta mu tsika a wulawulawo?” A cikhati hi lerelako munhu mavhesi ya Bhibhiliya, ho tsika Jehovha a wulawula naye. A ku tirisa mutsalo wu hlawulilweko khwatsi zvi na ni ntamu nguvhu ku hundza ni cihi leci hi to wula. (1 Va Le Tesalonika 2:13) Loku u hi kuchumayeleni, wa ti karatela ku tirisa Bhibhiliya contlhe cikhati ke?

A cikhati hi lerelako munhu mavhesi ya Bhibhiliya, ho tsika Jehovha a wulawula naye

8. Hikuyini hi nga faneliko ku lera mitsalo basi a cikhati hi chumayelako?

⁸ Hambulezvo, a ku lera mavhesi ya Bhibhiliya basi a cikhati hi chumayelako a zvi eneli. A vanhu vo tala a va gi zwisisi a Bhibhiliya. Hambu ka zana ga malembe go sangula a vanhu va wa nga gi zwisisi; a ha ha wuli hi nyamutlha. (Va Le Roma 10:2) Hi nga leri mutsalo hi guma hi miyela hiku a n’winyi wa muti i wu zwisisile. Hi nga mu vhuna hi ku phinda a magezu-tshinya ya vhesi lego hi tlhela hi mu tlhamusela lezvi ma wulako zvona. Loku hi maha lezvo, a Mhaka ya Nungungulu yi ta khumba a maalakanyo ni timbilu ta vanhu. — Gondza Luka 24:32.

9. Lezvi hi wulako na hi nga se lera mutsalo zvi nga va vhunisa kuyini vanhu lezvaku vava ni cichavo hi Bhibhiliya? Nyika cikombiso.

⁹ Lezvi hi wulako na hi nga se lera mutsalo zvi nga vhuna n’winyi wa muti lezvaku ava ni cichavo hi Bhibhiliya. Hi cikombiso, hi ngaku: “A hi nga wone lezvi a Muvangi wa hina a zvi wulako ka mhaka leyi.” Loku a munhu loye a nga hi wa wukhongeli ga wuKristu, hi ngaku: “A hi nga wone lezvi a Mitsalo yo Basa yi hi byelako.” Loku hi kuma munhu a kalako a nga hi na mhaka ni wukhongeli, hi ngaku: “U tshuka u mazwa magezu lawa ma wulilweko kaleloko?” Loku hi alakanya lezvaku a munhu ni munhu i na ni tshamela gakwe ni lezvi a zvi kholwako, hi ta maha zvontlhe hi zvi kotako kasi ku tirisa cingheniso ci khumbako. — 1 Va Le Korinte 9:22, 23.

Timboni ta Jehovha ti tirisako Bhibhiliya kuchumayeleni

10. a) Zvini zvi humeleleko makabye wo kari? b) Wena ke, hi rini u nga wona ntamu wa mhaka ya Nungungulu ntirweni wa wena wa kuchumayela?

¹⁰ A votala va polile lezvaku a ku tirisa Mhaka ya Nungungulu zvi na ni ntamu wa hombe ka lava hi va chumayelako. Hi cikombiso, a wanuna wo kari i wa hi ni malembe na a lera marevhista ya hina. Kanilezvi ka siku go kari, a makabye loyi a nga tolovela ku mu nyika marevhista lawo, i bohile ku lera mutsalo wutshan’wini ga ku mu nyika Murinzeli basi. I gondzile 2 Va Le Korinte 1:3, 4, a wulako lezvaku Jehovha i ‘Dhadhani wa wuxinji ni Nungungulu wa kuchavelela kontlhe, loyi a hi chavelelako kuxanisekeni ka hina kontlhe.’ A magezu lawo ma mu khumbile nguvhu wanuna loye laha ka kuza a kombela makabye wa hina lezvaku a lera kambe. Hi kulandzela, i wulile lezvaku yena ni sati wakwe va zvi lava nguvhu ku chavelelwa. A mutsalo lowo wu mu mahile a lava ku tiva zvo tala hi Bhibhiliya. Wa zvi wona ku a ku tirisa Mhaka ya Nungungulu ntirweni wo chumayela zvi na ni ntamu nguvhu? — Mitiro 19:20.

A CIKHATI U GONDZISAKO LAHA CILUVELWENI

11. Wutihlamuleli muni va nga nago a vamakabye lava va gondzisako laha ciluvelweni?

¹¹ Hi zvi randza nguvhu kuva kona mitlhanganweni ya bandla ni ya cipandze, ni migotsovanyanweni. A cigelo co ranga ci hi mahako hiva kona ka mitlhangano leyo hi lezvaku hi lava ku khozela Jehovha. Ha vhuneka kambe hi lezvi hi gondzisiwako. Hikwalaho, a vamakabye lava va gondzisako laha ciluvelweni va na ni lungelo ga hombe ni wutihlamuleli go bindza. (Jakobe 3:1) Lezvi va gondzisako zvi fanele ku seketelwa ka Mhaka ya Nungungulu. Loku u hi ni lungelo ga ku gondzisa lomu bandleni, u nga wu tirisisa kuyini a ntamu wa Bhibhiliya kasi u khumba timbilu ta lava u va gondzisako?

Makabye a tirisako Bhibhiliya a cikhati a gondzisako laha ciluvelweni

12. A mukaneli a nga maha yini kasi a veka kanelo leyi hakunene yi seketelwako ka Mitsalo?

¹² A Mitsalo yi fanele kuva tshinya ga kanelo yin’we ni yin’wani yi vekiwako. (Johani 7:16) Hikwalaho, ti wonele ku kanela kutani ku tirisa matshango ni zvikombiso hi ndlela yi mahako ku a mavhesi ya Bhibhiliya ma sala ndzhako. Alakanya kambe lezvaku a ku lera Bhibhiliya zvi hambene nguvhu ni ku gondzisa hi ku tirisa Bhibhiliya. Hi lisine, loku u lera mitsalo ya talela ga cima, a vanhu va nga ta yi alakanya. Hikwalaho, hlawula khwatsi a mitsalo leyi u to yi tirisa. Hi kulandzela, lera, u tlhamusela, u nyika zvikombiso u tlhela u komba khwatsi lezvi yi hi vhunisako zvona. (Nehemia 8:8) Loku yi hi kanelo yi sinako yi longoloxilwe laha ka phepha, yi gondze u tlhela u gondza a mitsalo leyi yi tako ka phepha lego. Zama ku zwisisa lezvi a mitsalo leyo yi yelanisako zvona ni lezvi zvi wuliwako. Hi kulandzela, hlawula mitsalo yo kari u gondzisa hi yona a timhaka leti ti nga laha ka kanelo. (U nga kuma mawonela ma nene ka zvigondzo 21 kala 23 zva bhuku Beneficie-se da Escola do Ministério Teocrático.) Kanilezvi, u nga rivali ku kombela Jehovha lezvaku a ku vhuna ku tlhamusela khwatsi a timhaka takwe ti nga lomu ka Bhibhiliya. — Gondza Ezra 7:10; Mavingu 3:13, 14.

13. a) A makabye wo kari wa cisati i khumbisilwe kuyini hi mutsalo a nga wuzwa mutlhanganweni? b) A ndlela leyi a Bhibhiliya gi tirisiwako hi yona mitlhanganweni ya hina yi ku khumbisa kuyini?

¹³ A makabye wo kari wa cisati le Australiya, i humelelwe hi zvilo zvo tala zvo tshisa na a ha hi n’wanana. Hi kufamba ka cikhati, i gondzile lisine a tlhela a hendleleta wutomi gakwe ka Jehovha. Hambulezvo, zvi wa mu karatela ku kholwa lezvaku Jehovha wa mu randza. Kanilezvi, ka siku go kari na a hi mutlhanganweni, i zwile mutsalo wu nga mu khumba nguvhu. Hikwalaho, i ehleketile hi wona a tlhela a handzela mabhukwini ya hina a kuma mavhesi man’wani ya Bhibhiliya. Lezvo zvi mu mahile a tiyiseka lezvaku Jehovha wa mu randza.a (Wona tlhamuselo wa lahasi.) Wena ke, u tshuka uzwa mutsalo mutlhanganweni wa bandla kutani wa cipandze kutani ka gotsovanyano wu ku khumbileko hi ndlela leyo? — Nehemia 8:12.

14. Hi nga kombisa kuyini lezvaku ha yi nyika lisima a Mhaka ya Jehovha niku ha yi randza?

¹⁴ Xana a wu mu bongi Jehovha hi lezvi a nga hi nyika Mhaka yakwe, a Bhibhiliya? I tsumbisile lezvaku yi ta tshama yi hi kona, niku wa tatisa citsumbiso cakwe. (1 Pedro 1:24, 25) Hikwalaho, hi fanele ku gondza a Bhibhiliya hi kukhandzakanya, hi hanya hi lezvi hi gondzako, hi tlhela hi gi tirisa kasi ku vhuna van’wani. Loku hi maha lezvo, hi komba lezvaku ha yi randza hi tlhela hi yi nyika lisima tshomba leyo. Hi komba kambe lezvaku ha mu randza ni ku mu bonga a Mutumbuluxi wa yona, Jehovha Nungungulu.

a Wona kwadru “Leci ci nga cica mawonela ya mina.”

“Leci ci nga cica mawonela ya mina”

Victoria i wa ti byela ku a zvi nge koteki ku Nungungulu a mu randza. I simamile a ti zwisa lezvo hi malembe yo tala hambu andzhako ka ku gondza lisine. Makunu, cini ci nga mu kholwisa lezvaku hakunene Nungungulu wa mu randza? Zwana matimu ya kona:

“Leci ci nga cica mawonela ya mina i kanelo ndzi nga yizwa Salawini ya Mufumo andzhako ka 15 wa malembe na ndzi bhabhatisilwe. A mukaneli i kumbukile bhuku ga Jakobe 1:23, 24. A mavhesi lawo ma fananisa Mhaka ya Nungungulu ni cibuko ci hi vhunako ku ti wona hi ndlela leyi Jehovha a hi wonako hi yona. Ndzi sangulile ku ti wutisa ku lezvi ndzi ti wonisako zvona a zvi hambani ni lezvi Jehovha a ndzi wonisako zvona ke. Kusanguleni ndzi wa lavile ku zviba hi makatla. Ndzi wa ha ti byela ku a ndzi munhu wo ringana ku randziwa hi Jehovha.

“Andzhako ka masiku yo kari, ndzi gondzile mutsalo wu nga cica wutomi ga mina. Kuve Isaya 1:18, laha Jehovha a nge: ‘Tanani, hi wulawulisana timhaka. Hambu loku a zviwonho zva n’wina zvi pswhukile, zvi nga basa khwatsi i gapongo.’ Zvi wo khwatsi hi loku Jehovha aku: ‘Vicky, tana hi ta bhulisana. Ndza ku tiva khwatsi; ndza zvi tiva a zviwonho zva wena niku ndza yi tiva a mbilu ya wena. Ndza ku randza.’

“A ndzi gi kumangi wurongo ka wusiku lego. Ndzi wa ha kanakana ku Jehovha wa ndzi randza, hambulezvo ndzi sangulile ku ehleketa hi muphahlo wa Jesu. Hi citshuketi, a kupima ka mina ku se ambuluko, ndzi wona lezvaku Jehovha ive ni lihlazva-mbilu hi mina hi cikhati co leha nguvhu, na a ndzi komba hi tindlela to tala lezvaku wa ndzi randza. Kanilezvi ndzi wo ala ndziku: ‘A lirandzo la wena li tsongwani laha ka mina. A muphahlo wa N’wana wa wena a wu nge ndzi koti.’ Zvi wo khwatsi hi loku ndzi no mu tlhelisela ndzhiho wakwe Jehovha. Kanilezvi hi ku ehleketa hi cinyikiwo leco ca ndzhiho, ndzi sangulile ku zvi wona lezvaku Jehovha wa ndzi randza.”